ས་དཀྱིལ་ཚེ་བཀྲའི་ལྷུག་རྩོམ་སྙན་ངག

       དགུན་གྱི་ཉི་འོད་ནི་ཉི་འོད་གང་ལས་ཀྱང་ཆེས་རྒས་ཉམས་དོད་པོ་ཞིག་ཏུ་སྣང་ནའང་། དབྱར་གཞུང་། ལྷིང་འཇགས་ཀྱི་ནགས་ཚལ་དུ་ཟང་ཟིང་སྦས་ཡོད་པ་ནང་བཞིན། དགུན་གཞུང་། རྒས་འཁོགས་ཀྱི་ཉི་འོད་གསེབ་ཏུ་དྲོད་ཁོལ་དང་བརྩེ་བ་ལྷན་དུ་སྦྲུམ།
       དགུན་གྱི་མཚན་ལམ་རིང་མོར་ཁ་བ་བབས་རྗེས། ཞོགས་པར་ས་གཞི་ཡོད་ཚད་རྗེས་ཤུལ་མེད་པའི་རྨི་ལམ་དང་འདྲ་སྟེ། ཁ་བའི་འདབ་མ་སར་ལྷུང་ཚུལ་ལ་སྨྲ་བ་མེད་ཅིང་། ཁ་བའི་བརྩེགས་རིམ་ཉི་འོད་ཀྱིས་བཞུ་ཚུལ་ལ་ཟུག་གཟེར་གང་ཡང་མེད། 
       མཁའ་དབུགས་ནི་སྲོག་ལྡན་ཐམས་ཅད་ཀྱི་ཚེ་ཡི་འཛིན་ཐག་ཡིན་པ་བཞིན། ཉི་འོད་ནི་སྐྱེ་དངོས་ཡོད་དོ་ཅོག་གི་སྲོག་གི་རྒྱུན་བསྲིངས་ཉིད་དེ། གནས་འདིའི་ས་ཞིང་རེ་རེ་དང་རི་རྒྱུད་རེ་རེ། ཆུ་བོ་རེ་རེ། ད་དུང་ནགས་ཚལ་གྱི་སྨུག་པ་དང་ནམ་མཁའི་སྤྲིན་དཀར་སོགས་ཐམས་ཅད་ནི་ཉི་འོད་ཁྲོད་འཚར་ལོངས་འབྱུང་བ་ཤ་སྟག་ཡིན།  
       དགུན་གྱི་ཉི་འོད་ནི་བཀྲེས་ལྟོགས་ཀྱིས་མནར་བའི་སྟོན་རླུང་དང་ཡེ་ནས་མི་མཚུངས་ཏེ། དགུན་གྱི་ཉི་འོད་ལ་ཚ་གདུག་མི་ཆེ་མོད། འོན་ཀྱང་ཚ་གདུག་གི་ངོ་བོ་དང་རང་ཚུགས་བསྲུངས་འདུག ཉི་འོད་དང་མཁའ་དབུགས་ཀྱིས་གསོ་བའི་ཚེ་སྲོག་ནི་ངོ་བོ་གཅིག་ཏུ་གྲུབ་སྟེ། ཉི་འོད་ཀྱིས་ང་ཚོའི་མེས་པོར་དྲོད་ཀྱི་ཐིག་ལེ་དང་དབུགས་ཀྱི་ཐོག་མ་བསྩལ་མྱོང་ལ། ཉི་འོད་དང་མཁའ་དབུགས་ཀྱིས་ང་ཚོའི་བུ་རབས་ཚ་རྒྱུད་དང་སྐྱེ་དངོས་ཡོད་ཚད་ལ་ཚེ་དང་སྲོག་གི་འཛད་མེད་ཀྱི་ལམ་བུ་བསྐྲུན་ཡོད།
       དགུན་ཁར། རྒྱང་རིང་གི་རི་ཚོགས་ནི་མིས་བདག་ཏུ་མ་བཟུང་བར་རྫ་དང་སྤང་ཐང་དུ་རང་གར་འཚོ་བའི་འབྲོང་རྒོད་དག་དང་འདྲ་སྟེ། འབྲོང་གི་གཟུགས་སྟོབས་དང་འཁྱགས་གྲང་ལ་མི་འཇིགས་པའི་དཔའ་སྤོབས་དེས་ང་ཚོའི་ཕྲག་སྟེང་དུ་ཉི་འོད་མཆིས་ཤིང་ཉི་མའི་མགོ་རུས་གངས་ལ་འཕགས་ཚུལ་གྱི་གཏམ་རྒྱུད་འཆད་ཅིང་གདའ།
       མཚམས་ལན་རེར། ཟུངས་ཟད་པའི་དགུན་གྱི་ཉི་འོད་ཀྱིས་སུ་ཞིག་ལ་འཁང་ར་དང་ལེ་བདའ་མཉམ་དུ་བགྱི་བ་དང་ཡང་མཚུངས་ཏེ། དགུན་གྱི་འཚོ་བཞེས་དང་ནང་སེམས་ཀྱི་འཁོས་ཆུང་འཇགས་པར་དཀའ་བས། འཁྱག་རླུང་ཇེ་རྒོད་ནས་ཇེ་རྒོད་དུ་གྱུར་ཏེ་ས་ཆེན་འདི་ཉིད་ཁྱུར་མིད་གཏང་བའི་བཟོ་ལྟ་སྟོན།
       “ས་གཞི་ནི་ང་ཚོའི་མ་ཡུམ་ཡིན། གལ་ཏེ་ང་ཚོས་ས་ཆ་འདི་བློས་བཏང་ནས་ཁྱོད་ཚོར་སྤྲད་ཚེ། ཁྱོད་ཚོས་ས་འདི་ནི་མཆོག་ཏུ་གྱུར་བ་ཞིག་ཡིན་པ་ངེས་པར་དུ་ཡིད་ལ་འཛིན་དགོས། ཁྱོས་ཚོས་རང་གི་བྱིས་པར་ཁོ་ཚོའི་རྐང་འོག་གི་ས་ནི་ང་ཚོའི་མེས་པོའི་པུར་བཞུས་པའི་གདུང་ཐལ་ཡིན་པ་དང་། སའི་ནང་དུ་ང་ཚོའི་གཉེན་ཉེ་ཡི་སྲོག་ཐིམ་ཡོད་པ་བཤད་དགོས།”*
       ང་ཚོའི་མ་ཡུམ་ནི་སུ་དང་གང་གི་བསམ་ཚོད་ལས་ཀྱང་ཉམ་ཐག་ཅིང་དགུན་གྱི་ཉི་འོད་འོག་ཏུ་རང་བྱུང་གི་སྐད་ལ་ཉན་ཞིང་མགོ་སྐྲ་དཀར་པོ་རླུང་གིས་འཛད།
       ས་ཆེན་དང་གཙང་བོའི་སྟེང་འོད་ཆེམ་ཆེམ་འཕྲོ་བ་དེ་ནི་ཉི་འོད་ཁོ་ན་མ་ཡིན་པར་དེ་ནི་ང་ཚོའི་མེས་པོ་རྣམས་ཀྱི་ཟུངས་ཁྲག་དང་ལོ་རྒྱུས་ཀྱི་བརྩེ་བ་དྲོན་མོ་ཡིན་ལ། ང་ཚོའི་སྙན་ཚིག་གི་ཤོག་ལྷེ་རེ་རེའི་ངོས་ཀྱི་སྙན་ཚིག་རེ་རེ་ཡིས་ང་ཚོས་བརྒྱུད་མྱོང་བའི་ལོ་རྒྱུས་ཀྱི་ཕུ་ཐག་དང་བརྗེད་མེད་ཀྱི་འདས་དོན་རེ་རེ་མཚོན།
       “དགུན་གྱི་ཉི་འོད་སྐྱ་བོར་ཟང་ཟིང་མེད་ལ་འཛེམ་བག་དང་ལྡན། ཁྱིམ་དུ་བསྡད་དེ་བཏུང་ཇར་རོལ་བ་ནི་བདེ་སྐྱིད་ཅིག་ཡིན་ལ་ཁོམ་པའི་དུས་སུ་དཔེ་དེབ་ཅིག་བླངས་ནས་ཤོག་གྲངས་འགའ་བཀླགས་རྗེས། ཐང་ཆད་ན། ཁ་བསུམས་ཏེ་མིག་ཟུང་བཙུམས་ནས་ཅི་ཞིག་ལ་བསམ་གཞིག་བཏང”བས།* ང་ཚོས་ཉི་འོད་དང་རང་གི་ས་གཞི་ལ་བཅངས་པའི་བརྩེ་ཞེན་གྱི་སེམས་པ་ནམ་ཞར་ལྷོད་མྱོང་མེད་ལ་ལྷོད་ཀྱང་ག་ལ་སྲིད།
—————
མཆན།
༡ དུས་རབས་བཅུ་དགུ་བའི་ལོ་རབས་ལྔ་བཅུ་བར་ཨ་མེ་རི་ཀའི་དབྱིན་ཏེ་ཨེན་གྱི་ཚོ་དཔོན་སེ་ཡ་ཐི་ཡིས་ཝ་ཤིང་ཐོན་དམིགས་གསལ་ས་ཁུལ་གྱི་མི་དཀར་གཙོ་འཛིན་ལ་སྤྲངས་པའི་འཕྲིན་ཡིག«ས་གཞི་ནི་ང་ཚོའི་མ་ཡུམ་ཡིན»ཞེས་པ་ལས་དྲངས།
༢ རྒྱའི་རྩོམ་པ་པོ་ཧྲི་ཀྲི་ཡི་སྙན་ཚིག«དགུན་གྱི་ཉི་འོད»ཅེས་པ་ལས་དྲངས།