ལྷ་རྒྱལ་འོད་ཀྱི་སྙན་ངག

                           ༡                
སྤྲིན་དང་སྤྲིན་པ་འདྲེས་ཚེ། ང་ལ་སྙིང་ལོག་རིམ་པ་དགུ་བརྒྱུགས།
གདུང་བ། འགྱིག་ཁུག་ཅིག་ལ་གྱུར་ཏེ།
ཁངས་སྨུག་འདྲེས་མཚམས་སུ་འཁུར་ན་བསམས།

རྨ་ཁར་སྐྱེས་པའི་ལྕགས་སོག་གི་སོ་ཁ་ཆག་རྗེས།
རྣམ་ཤེས་མྱ་ངན་གྱིས་བཏུམས་ནའང།
ངས་ཁྱོད་ལ་དབང་རྩ་འཁྲུག་པའི་གངས་རི་ཞིག་སྟོན།
                            ༢
 ཆག་ཧྲུག་ཤོར་བའི་ཕྱི་དྲོར།
 མི་རེའི་ཚེ་མཇུག་གིས་ཕམ་ཁ་རེ་བྲོ་བཞིན་ཁུར།
 ས་སྟོང་ནས་ལྷག་ན། ངས་ཁྱོད་ལ་མེ་མདའ་ཞིག་གི་བདེ་སྐྱིད་གླེང་བས་འཐུས།

སྡུག་བསྔལ་གྱི་བཞི་མདོར། "རྟ་ཕོ་གསེག་ཞོན"གྱི་ས་སྲོས་ནི་སྐྱོ་སྣང་ལས་ཚེས།
དཔུང་བ་དམར་རྗེན་ཚོའི་རབས་རྗེས་མར། རྟ་ཕོའི་འཚེར་སྐད་བོར།
སྒའི་སྔ་རི་དང་ཕྱི་རིའི་ཡང་སྟེང་གི་ཉི་ཟླ་ཞི་སྟེ་གཙང་བོར་འདྲེས།
སྐྱེ་བོ་ཁྱོད་ཀྱི་སྲོག་དབང། དུས་རབས་དེའི་སྣང་བའི་ཁྲོད་ནས་བོར་ཟིན།
                           ༣
ཁེར་རྐྱང་གི་སྒྲ་འདི་སྙན་པ་ལ་ཨང།
གོམ་ཁ་དང་བོའི་ནང་དུ། སྨོན་ལམ་ལོག་འདེབས་ཀྱི་དགེ་བ་སྨིན།

སྙིང་ལ་འགྱུར་རྡོ་སྐྱེས་འདྲའི་ཟུག་གཟེར་རེ་ལངས་རྗེས།
ངས་རྨི་ལམ་གྱི་འཕྲུལ་སྣང་ལག་ལ་བཟུང་སྟེ། རང་གི་མིག་འབྲས་བཙལ།
                           ༤
པྲ་མཁན་གྱི་མེ་ལོང་གི་སེམས་སུ
མུན་ནག་གི་བང་རིམ་དགུ་བར། བྱ་རྒོད་ཕོ་མོ་ཟུང་གིས་གཤོག་པས་གར་འཁྲབ།
                           ༥
རླུང་འཚུབ་ཀྱིས་བཏོད་པའི་གཉེར་མའི་བར་དོ་དེ།
རྟ་ནག་ཤི་རྗེས། རྣ་ལམ་དུ་འཚེར་སྐད་བསེར་བུར་འཐིམ་ཞིང་རྒྱུག་འོང་ས་ཡིན།
                           ༦
མི། ཧྲེང་བུའི་གར་གྱི་ཕུན་ཚོགས་ལ་སྤྲོ།
འབྱུང་བོའི་ལྡབ་ལྡིབ་ཀྱི་ལུང་བསྟན་ལའང་སྤྲོ།
                           ༧
མུན་པའི་ལྗན་ལྗིན་ནང། འཁྲུལ་སྨན་ཐེངས་འགའ་ལ་བརྟེན་ཡང།
སྤུ་ཁ་ནག་པོ་འདིའི་ཚེ་སྲོག བུ་སྣོད་གཞན་ཞིག་གི་ནང་འདས་ལོག་འབྱུང་མི་སྲིད།

ས་སྲོད་ཀྱི་བོར་སྟོར་དེས་སྨུག་པས་བཙན་རྫོང་གཏོར།
རྣམ་ཤེས་མ་ཞུགས་པའི་ནགས་ཚལ། བེམ་པོའི་རྗེས་སུ་ཁྲིད།

རི་བོར་མུན་ནག་འཐིབ་རྗེས། གདུང་བ་སྐོར་ཞིག་འཁྱགས་རོམ་ལ་གྱུར།
རབ་རིབ་ནང་གི་ལུས་རྟེན། འཆི་བའི་གམ་ནས་འཁྱགས་གྲིར་ཐེབས།
                           ༨
དཔེ་ཞིག་བཞག་སྟེ་བཤད་ན། རི་སྒང་འདིའི་རྩ་ཁམས་ཡོད་ཚད་ཀྱང།
ལྭའི་སྲུབས་ཀར་འཚངས་པའི་ཚེ་སྲོག་ཕྲ་མོ་དག་ལ་འདྲ།
                           ༩
དུས་ཚོད་ཀྱི་བར་སྟོང། མུན་པའི་གཏིང་ལ་སྦས།
ཉི་མའི་མཁར་རྫོང། བྱེ་རྡུལ་གྱིས་གཅུད་དུས།
སྒོ་གཞན་ཞིག་ནས་བུད་དེ། ལག་ནང་གི་སྡིག་པའི་རྩིས་ཁྲ་བཤེར་ཞོར།
སྐད་ཆས་ཁེགས་པའི་གླིང་ཕྲན་ལ་བལྟས་ཏེ། བྲང་ལ་སེན་འབྲད་བགྱིས།
 
མིའི་སེམས་ཀྱི་སྡིག་ཉེས་ཙག་གིས་བཅུམ་ཚེ།
སྔར་ལྟར་རླུང་བུའི་རྒྱུ་ཕྱོགས་ལ་སྨོན་ལམ་འདེབས་སམ།

ང་རང་ས་རྒོད་དུ་གྱུར་བའི་ནགས་ཚལ་ལ་འཇིགས།
དྲན་པ་དང་གདུང་བ། སྐམ་ཐན་གྱིས་བཟུང་རྗེས།
མཚན་མོའི་འོད་ཟེར་ཤི་ནའང། བདེ་སྐྱིད་ཀྱི་གློ་གྲི་འདི་སེམས་མཛའ་བ་ལ་ཨང།

བརྩེ་དུང་གིས་མི་རྣམས་རྡོ་བར་བསྒྱུར།
ཁེར་རྐྱང། ཆུ་འགྲམ་ནས་བཞད་པའི་མེ་ཏོག་ཅིག་ཡིན་ན།
ཉེས་ལྟུང་རིགས་ཤིག་གིས། འུ་ཚོ་ས་མཐའ་ཞིག་གི་རི་སྒང་ནས་བཞད་མི་སྲིད་དོ། །
                           ༡༠
ངག་ལ་ཚེར་མ་བཏབ། འཆི་བའི་སྒྱུ་མ"གླིང་བུར་དྲངས"
རྟ་ཕོའི་འཚེར་སྐད། ཕ་གིའི་གངས་རིའི་ཕྱོགས་ལ་འཐིབས།