དྲུག་གཅིག་བྱིས་པའི་དུས་ཆེན་ལ་རྟེན་འབྲེལ་ཞུ།

                        ༡
ཉི་འོད་མིག་ཟུང་དུ་བཅུག་སྟེ།
མཚན་མོར་བཀར་དགོས་སྙམ་བྱུང་།
                        ༢
གཉིད་མ་ཁུག་པས་སྒེའུ་ཁུང་ལས་སྐྱ་རེངས་ལ་ལག་གཡུག་བྱས།
འུ་ཐུག་སྟེ་ར་སྐོར་ནང་གི་བྱ་ཕོ་ལ་བདའ་ལུང་བདའ་བྱས།
ཞེ་བྲེལ་ནས་ཕྱག་མདུད་གསེང་གི་པི་པི་ཤུབ་བུར་བུས།
ཡང་ཡང་སྒེའུ་ཁུང་ཕྱི་ཡི་སྒྲ་ལ་མཉན།
སྒྲ་ནི་ལྷིང་ཞིང་འཇགས།
ཡང་ཡང་དུས་ཚོད་ངོས་ཀྱི་མདའ་རྩེར་བལྟས།
མདའ་རྩེ་ཁེགས་ཤིང་དཀག
རྩེ་ཞོགས་ཀྱི་ཟ་འཕྲུག་ཁྲག་དང་རྩ་རྒྱུས་དེད་ནས་འབར།
ལྭ་གསར་ནང་ནས་རྩེ་དགོད་སྟེག་ལ་ཤིན་ཏུ་བྲེལ།
སང་ཞོགས་དྲུག་པའི་ཚེས་གཅིག་ལ།
                         ༣
འཛུམ་ཆུང་མེ་ཏོག་བཞིན་བཞད།
མེ་ཏོག་གཅིག་ཡ་གཉིས་ཡ།
གར་སྟབས་བུང་བ་ལྟར་སྐྱེན།
བུང་བ་གཅིག་ཡ་གཉིས་ཡ།
ཀྱུར་ཀྱུར་གླུ་ཡང་ལེན།
ལྡེམ་ལྡེམ་གར་ཡང་འཁྲབ།
དེ་རིང་དྲུག་པའི་ཚེས་གཅིག་ལ།
                         ༤
ཉི་མ་རིང་དུ་འཐེན་ནས།
མཚན་མོར་མདུད་པ་རྒྱག་དགོས་བསམས།
དྭངས་ཤིང་གསལ་བའི་ཉིན་མོ་འདི་སྲིང་ཐབས་སུ།
                         ༥
སྤྲིན་པ་དཀར་སེར་གྱི་ཁ་དོག་ཚེས་པའི།
ངོ་གདོང་ཆུང་ཆུང་དང་ལྭ་བ་གསར་བར་ས་རྡུལ་གྱི་གཡུང་དྲུང་འཁྱུད།
ཕ་མ་མིང་སྲིང་གི་བརྩེ་བ་བྲན་པའི།
རྡེའུ་དཀར་ནག་དང་བྱ་བྱིའུ་འབའ་འབུ་ལ་ཞལ་བརྡ་ཤར་མར་མིག་ཆུའང་མཆོད།
རི་དང་གཙང་པོའི་ཞལ་ཁ་ཕྱེ་བའི།
ལྷམ་ཆུང་གིས་མ་ཁོགས་པའི་མཛུབ་མོ་སྙིང་རྗེ་དག
རླུང་གི་གཤོག་པ་ཐོགས་ཐོགས་ཀྱང་འཕུར།

ཨ་ཙི་ཙི།
ཉི་ནུབ་དང་གྲོད་པས་འབོད་ཀྱིན་འདུག
ཡུལ་ལ་ལོག་དགོས་བྱུང་སོང་། 
དགོད་དམ། ནམ་མཁའི་ལྷ་ཡང་སྤྲོ།
ངུའམ། ནག་པོ་བདུད་ཀྱང་སྐྱོ།
དྲུག་པའི་ཚེས་གཅིག་ལ།
                         ༦
དྲུག་པའི་ཚེས་གཅིག་ལ།
ཉི་མའང་དྲོ།
རླུང་ཡང་གཡུགས།
ངོ་གདོང་ཆུང་ཆུང་འདིའི།
ཕྱེད་ཀ་འཛུམ་ཆུང་ཡིན།
ཕྱེད་ཀ་མིག་ཆུ་ཡིན།