༄༅། །སྨུག་པོའི་སྙན་ངག་བདམས་བཀོད།

ཉི་གཞོན་ཨང་ཉེར་གཅིག་པས།
སྨག་རུམ་ཁྲོད་དུ་སྒྲོན་མེ་སྦར་བྱུང་།
སྒྲོན་མེའི་འོད་ཀྱིས་མུན་ནག་གི་ཧམ་སེམས་གཏོར།
སྐར་ཚོགས་ཀྱི་མིག་ལམ་དུ། 
རབ་རིབ་དང་རབ་རིབ་ངང་། རྒྱང་རིང་རྒྱང་རིང་ལས།
ཚན་རྩལ་གྱི་ཕོ་བྲང་ཞིག་མངོན་བྱུང་།

ཁ་བ་ལེབ་མོ་འགའ་ལྷག་པས་ཟོས་རྗེས།
རི་ཚོགས་ཀྱི་མིག་ལྕིབས་དལ་གྱིས་ཕྱེ།
རྩྭ་འཇམ་པོའི་མངར་བཅུད་ལ་རོལ་བའི་གནག་ཕྱུགས་ཚོས།
མཚར་སྣང་གི་དཔྱང་ཐག་ནམ་ཡང་གཅོད་མ་ནུས།
སྦྲ་གུར་གྱི་ཁ་ཚུབ་ལས་མེ་ཏོག་ཐོར་སོང་།
གཞོན་ནུ་མའི་ངག་ལས་སྙན་འཇེབས་ཀྱི་གླུ་དབྱངས་གྱེར་སོང་།

རྫི་བོ་ཚོའི་མི་རབས་ཕྱི་མ་འདིས།
འུར་ཆ་བསྐྱུར་ཏེ་སྨྱུ་གུར་འཇུས།
ཚེ་སྲོག་གི་གསང་བ་ཡིག་རྡོག་ཚོའི་རྣམ་ཤེས་ལ་འབྱར།
རྡོ་བའི་ཚོགས་ཀྱིས་ཀྱང་ཀ་ཁའི་གླུ་དབྱངས་ལེན།

གངས་རིའི་ཁ་དོག་སྔར་ལས་གསལ་ཞིང་འཚེར།
རྩྭ་ཐང་གི་གཞི་ཁྱོན་སྔར་ལས་ཡངས་ཤིང་ཆེ།
ཁང་རྩེག་གིས་སྦྲ་གུར་ལ་སྐྱེངས་པ་བྱིན།
རྒན་པོ་ཚོའི་མིག་ལ་འགྲེལ་མི་ཤེས་པའི་ཐ་སྙད་གསར་བ་བབས།
གཞོན་ནུ་ཚོའི་མདུན་དུ་ལམ་གྱི་ཁ་ཞེང་ཆེ་རུ་སོང་།
བྱིས་པ་ཚོས་གདངས་མི་གཅིག་པའི་གླུ་སྐད་སྣ་ཚོགས་གྱེར།

རྩྭ་ཐང་གི་ངོ་གདོང་དུ་དཔྱིད་ཀའི་མཛེས་སྡུག་ཤར།
གཉིད་དུ་ཡུར་བའི་ས་སྒང་འདིས་ཀྱང་།
དུས་ཀྱི་ཉིན་ཐོ་ཤུགས་ཀྱིས་བཀླགས།
དཀར་ངོགས་ནས་འདས་ཟིན་པའི་རྣམ་ཤེས་ཚོ་འདས་ལོག་བྱུང་སྟེ།
མཐོ་གཞོངས་ཀྱི་བཞིན་རས་ལ་འཕོ་འགྱུར་གྱི་རི་མོ་འབྲི་བར་བརྩོན།

རྨི་ལམ། སྐྱ་རེངས་ཀྱི་གཟི་འོད་དང་ལྷན་དུ་འཁྲུངས་སོང་།
རྨི་ལམ་དུ། མི་རྣམས་ཀྱི་མིག་ལ་ལོ་ལེགས་འཁྲུངས་སོང་།
གསེར་མདོག་གི་སྟོན་ཀ་འཁྲུངས་སོང་།  
མགོ་བོ་དགྱེ་རོགས།
མིག་ཆུ་གཏོང་མི་སྲིད་པའི་ཁྱོད།
ཕྲག་ཏུ་བབས་པ་ནི་རྡོག་ཁྲེས་ག་ལ་ཡིན།
དེ་ནི་མ་འོངས་བ་སྟེ།
ལྗིད་ཏིག་ཏིག་གི་རེ་བ་དང་།
གསེར་མདོག་གི་སྟོན་ལྗོངས་གང་ཞིག་གི་གཡབ་མོ་མ་ཡིན་ནམ།

མགོ་བོ་དགྱེ་རོགས།
མིག་ཆུ་གཏོང་མི་སྲིད་པའི་ཁྱོད།
མཚན་མོའི་གཉིད་ཀྱང་འཕྲོག་འགྲོ་བ་དེ་རྨི་ལམ་ག་ལ་ཡིན།
དེ་ནི་འཚོ་བ་དང་བྱ་གཞག་སྟེ།
སེམས་ཀྱིས་འཐགས་པའི་དར་ཚོན་སྣ་ལྔ།
བསམ་གཞིགས་ཀྱིས་བཞེངས་པའི་ཕོ་བྲང་།

མགོ་བོ་དགྱེ་རོགས།
མིག་ཆུ་གཏོང་མི་སྲིད་པའི་ཁྱོད།
འཁོར་བའི་ནགས་ཀློང་དེའི་རྫོབ་ཅི་འདྲའི་མཐུག
མིག་ལ་མཛེས་པ་ཐམས་ཅད་པདྨ་ག་ལ་ཡིན།
དུག་ཚེར་ཅན་དེ་ལའང་ཡིད་འགུགས་མེ་ཏོག་ཟེར།

མགོ་བོ་དགྱེ་རོགས།
མིག་ཆུ་གཏོང་མི་སྲིད་པའི་ཁྱོད།
ལམ་གྱི་རིང་ཚད་སེམས་ཀྱི་རྒྱ་ཁྱོན་ཡིན་པས།
རྐང་སྣེ་རྡོ་ལ་ཐོགས་པའི་སེམས་ཁྲལ་གྱིས་ཅི་བྱེད།
མིག་གིས་རྒྱང་རིང་ལ་ལྟོས་དང་།
རང་ཉིད་ཀྱི་ཕ་མཐའ་རུ་བརྒལ་ན།
ཐར་བའི་ལམ་སྣ་རྙེད་པ་མ་ཡིན་ནམ།  
ཚེ་སྲོག་གི་གླུ་སྐད་ཁྱོད་ཀྱི་པང་དུ་འཐོར་བ་ནས་བཟུང་།
ཨ་མའི་བྱམས་བརྩེ་དང་དྲོད་ཁོལ་གྱིས།
ཁྱོད་ཀྱི་རུམ་ཁོངས་དང་མཁའ་དབྱིངས་སོགས།
འཚོ་བ་ཡི་སྒོ་གླེགས་ཤིག་ངང་གིས་ཕྱེས།

ཚེ་སྲོག་གི་གླུ་སྐད་ཁྱོད་ཀྱི་པང་དུ་འཐོར་བ་ནས་བཟུང་།
ངའི་བྱིས་བློའི་འཇིག་རྟེན་དུ།
ཁྱེད་ཀྱི་རྟོགས་བརྗོད་ཀྱི་ཡིག་འབྲུ་བབས།
དྲན་པའི་ཡོལ་ངོས་སུ་འཆར་བ་ནི་མཚར་སྣང་དང་།
ངོས་ཟིན་གྱི་ཐོག་མ། རེ་བ་ཡི་མགོ་མ་སྟེ།
ཉི་ཟེར་གྱི་གསེར་མདངས་དང་ལྷན་དུ།
མེ་ཏོག་གི་བཀྲག་མདངས་དང་མཉམ་དུ།
ཡུལ་མི་ཚོའི་མཛའ་བརྩེ་དང་བྱམས་སྐྱོང་ཁྲོད་གཉོམ་ལག་རྒྱས།

ཚེ་སྲོག་གི་གླུ་སྐད་ཁྱོད་ཀྱི་པང་དུ་འཐོར་བ་ནས་བཟུང་།
དབྱངས་གསལ་གྱི་ཀློག་སྦྱོར་ངག་ལ་གྱེར་ནས།
མེས་པོ་ཚོས། ཁྱེད་ཀྱི་བྲང་གཞུང་དུ་བཏབ་པའི་གསེར་གྱི་ཞབས་རྗེས་རེ་བཏུས་ཡོད།
སྔོན་རབས་པ་ཚོས། ཁྱོད་ཀྱི་སྤྱི་གཙིག་ཏུ་སྒྲེང་པའི་རིག་པའི་རྒྱལ་མཚན་དེར་འཇུས་ཡོད།

ཕ་ཡུལ་ལགས།
མཐོ་བ་རི་རབ་དང་དམའ་བ་རྒྱ་མཚོ།
ཁྱོད་ཀྱི་གཟི་དཔལ་གྱི་བར་སྣང་ཡངས་བོར་ཕྱེས་ཡོད།
སྦྱངས་སྟོབས་ཀྱི་གཞལ་བར་དཀའ་བའི་ཤེས་རིག་གི་གཏེར་མཛོད།
རེ་རེ་བཞིན་ཤེས་རབ་ཀྱི་མིག་གིས་བཙལ་ཞིང་།
དཔལ་ཡོན་གྱི་རླབས་རྩེར་འགོད་པར་བྲེལ།

ཀྱེ་ཀྱེ། ཕ་ཡུལ་ལགས།
ང་ཁྱོད་ཀྱི་སྒལ་གཞུང་དུ་འགྲེང་ཡོད།
ང་ཁྱོད་ཀྱི་ཕྱག་མཐིལ་ན་འཚོ་ཡོད།
འཇིག་རྟེན་གྱི་དཔལ་ཡོན་དང་།
རིག་གནས་ཀྱི་སྡིངས་ཀ
ཚན་རྩལ་གྱི་ཕོ་བྲང་ཞིག
བདག་གི་མཐོང་ལམ་དུ་མངོན་བྱུང་།
ཞི་བདེ་དང་འཆམ་མཐུན་གྱི་དྲི་ངད་ཀྱང་ཚོར་བྱུང་།
མཛའ་མཐུན་དང་འཕེལ་རྒྱས་ཀྱི་རྡོག་སྒྲའང་ཐོས་བྱུང་།

ཀྱེ། ཕ་ཡུལ་ཨ།
རི་མཐོན་པོ་ཇོ་མོ་གླང་མ།
ཁྱེད་ཀྱི་དཔངས་མཐོ་བའི་བློ་སྤོབས་ཡིན་ན།
ངས་ཁྱེད་ཀྱི་བློ་སྤོབས་གཡར་ནས།
འཇིག་རྟེན་ཟླུམ་པོའི་དཔལ་ཡོན་གྱི་གསང་བ་རུམ་ན་འདོད།
ཆུ་གཙང་བོ་ཡན་ལག་བརྒྱད་ལྡན།
ཁྱེད་ཀྱི་ལུས་ཟུངས་ཀྱི་ཁྲག་རྒྱུན་ཡིན་ན།
ངས་སྙིང་ཁམས་ཀྱི་དྭངས་མར་བརྒྱུས་ནས།
ཡར་རྒྱས་ཀྱི་འཕར་རྩ་རུ་འདྲེན་འདོད།  
ཡར་ལྷ་ཤམ་པོའི་སྒམ་བརླིང་ལ།
སུ་ཞིག་གི་གསང་བའི་ལོ་རྒྱུས་བཀོད་ཡོད།
རྟ་ཐོག་གི་མི་རིགས་ཤིག
རལ་གྲིའི་སྣེ་མོ་ནས་འགྱེད་ལོག་ཡང་ཡང་བརྒྱབ་རྗེས།
ལོ་རྒྱུས་ཀྱི་ཤོག་ལྷེ་གསར་བ་ཞིག་ལ་བློ་བཀོད་བྱས་པ།
དཔྱད་བརྗོད་ཀྱི་མགྲིན་པ་རྣང་སོང་།
གཅིག་ནི་ཐར་བའི་བདེ་བ་སྟེ།
ཅིག་ཤོས་ནི་དམྱལ་བའི་གཏིང་རིམ།
མིན་མིན། འདི་ནི་གནའ་གཏམ་ཞིག
རལ་གྲིས་ལམ་ཁ་གཤགས་པའི་མེས་པོ་དག
གཟི་མིག་དགུ་བའི་གླ་རྡོ་ཡར་ཀླུང་ནས་བོར་བ།
ད་ལྟ་སུ་ཡི་མགུལ་ན་ཡོད།
ལག་ཟུང་གིས་བར་སྣང་ཕྱེ་དགོས་སམ།
གློ་གཤོག་གིས་རྒྱལ་ཁམས་འབྱེད་དགོས།
ངའི་མགྲིན་པ་བརྣང་དོན་ཅི།
སྐབས་འདི་དང་འདི་ལ།
ཁྱེད་ཀྱི་མིག་ལ་ཁེངས་ཉམས་རྒྱས་ཏེ།
ལག་མགོ་ཕུར་ཕུར་གྱིས་འཇིག་རྟེན་ལ་ཧབ་འཐོབ་བརྒྱག་དུས།
ངའི་མིག་ཆུའི་ནང་གི་རོལ་དབྱངས་ཐོས་སོང་ངམ།
ངའི་ཉིན་མོའི་མུན་པ་མཐོང་སོང་ངམ།
མཚན་མོ་ཇི་ལྟར་གནག་ན།
ཁྱོད་ཀྱི་མིག་ཟུང་དེ་ལྟར་གསལ།

གནའ་གཏམ་འཁུར་པའི་རྒན་རབས་པས།
ཁྱེད་ཀྱི་ཡང་སྟེང་དུ་དར་ཆ་ཞིག་བཙུགས་པ།
སུ་ཞིག་གི་མིག་ལ་འཚང་སོང་།

ཙོང་ཁའི་སྐྱེས་རིའི་མདུན་གྱི།
རི་སུལ་དང་ལོང་ཁུག་དེ་དག
དེ་རིང་ལམ་ཆེན་ཞིག་ཏུ་བསྒྱུར་བཏུབ་བམ།
ངའི་མིག་ལ་དཔྱངས་ཐག་འཛིན་འདོད།

ལོ་རྒྱུས་ལ་བྲིས་པ་ཇི་ལྟར་མང་ན།
ང་ཚོའི་འགན་འཁྲི་དེ་ལྟར་ལྕི།
ཁ་པར་དུ་ཤོང་ཚད་ནི།
སྙན་ངག་གི་མཆོད་བསྟོད་བྱས་ཀྱང་།
དཔག་བསམ་གྱི་ལྗོན་པ་དེ་ག་ལ་ཡིན།

རླངས་འཁོར་གྱི་མགྱོགས་བགྲོད་ལམ་དུ།
བསམ་གཞིག་གི་སྒག་ཟ་གནོན་ཐེངས་རེར།
ཉེན་ཟོན་གྱི་མིག་རྩ་དམར་སློག་སློག
གློ་བུར་གློ་བུར་དུ་འཚུབ་སྣང་འཕྱུར་འོངས།

ཙོང་ཁ།
བཤད་མི་ཚར་བའི་གཏམ་རྒྱུད་འདིས།
ཁྱོད་ཀྱི་ཤོག་ལྷེ་ག་ཙམ་ཟིན་ཡོད།  
ཁྱོད་ནི་ངའི་བྲང་གཞུང་དུ་སྐྱེས་པའི་མེ་ཏོག
ཆར་ཟིམ་དང་འཕྲད་ན་བཀྲག་མདངས་ལྷག་པར་མཛེས།
བསིལ་རླུང་དང་འཕྲད་ན་གར་སྟབས་ཡི་གར་འོངས།
མིག་ཟུང་ལས་བརྡོལ་བའི་ཟེའུ་འབྲུ།
སྙིང་གི་ཚིལ་ལུ་རུ་གྱུར་དུས།
ངའི་རྨི་ལམ་དུ་ཁྱོད་ལས་སུ།

ཁྱོད་ནི་ངའི་དབྱར་ཁའི་མཛེས་སྡུག
ལྗང་མདོག་གི་གསོན་ཤུགས་ལ་འཇའ་རིས་བཀྲ།
ཆུ་ཕྲན་གྱི་ངག་ལ་ཤང་ཤང་དབྱངས་རྟ་གྲོལ།
བསིལ་རླུང་གི་རེག་བྱས་གསང་བ་སྟོན་དུས།
ངའི་སྨྱུག་རྩེ་ན་ཁྱོད་ལས་སུ།

ཁྱོད་ནི་ངའི་རྨི་ལམ་གྱི་འཇའ་ཚོན།
ཁ་བཏགས་བཞིན་དཀར་མདངས་དང་།
མེ་ཏོག་བཞིན་སེར་མདངས།
སེམས་པ་བཞིན་དམར་མདངས་སྟོན་དུས།
ངའི་མིག་མཐའ་ན་འཁྱིལ་བའི་ཆར་ཟིམ་ལ།
ནམ་ཡང་ཁྱོད་སྦྲུམ་ཡོད་ཨང་།   རླུང་གི་མིག་ཟུང་ལྷོད་ཀྱིས་བཙུམ།
མཁའ་དབུགས་ཁྲོད་སྨུག་རྒྱུས་འགྲེ་ལྡོག་བྱེད།
རང་ཉིད་བོར་ཟིན་པ།
དབྱངས་རྟ་ཞིག་ལས་སླར་ཡང་རྙེད།

སྦུབ་ཆལ་དང་རྒྱ་གླིང་མི་དགོས།
རྔ་དང་གླིང་བུའང་མི་མཁོ།
སྨྱུག་གུའི་གོམ་འགྲོས་ཙམ་གྱིས།
ཡོད་ཚད་ངོ་གདོང་དུ་བྲིས་ཆོག

ཀྱེ་མ། མིག་ཟུང་ལག་ཏུ་ཐོགས་པ་རྣམས།
དོ་ནུབ་ངའི་དབྱར་སྐྱིད་ལ་འཛོམས་ཤོག

རྩོམ་པ་པོ་ངོ་སྤྲོད།
       སྨུག་པོ། ཀན་སུའུ་མི་རིགས་དགེ་འོས་སློབ་ཆེན་བོད་ཡིག་སྡེ་ཁག་གི་དགེ་རྒན། མཚོ་སྔོན་ཁྲི་ཀ་རྫོང་འཕྲང་དམར་གྲོང་རྡལ་རྐང་ཚ་སྡེ་བ་ནས་སྐྱེས། བོད་ཀྱི་ཟློས་གར་བརྙན་འཕྲིན་གློག་བརྙན་སྐོར་གྱི་སློབ་ཁྲིད་དང་ཞིབ་འཇུག་བྱེད་བཞིན་ཡོད། དུས་དེབ«སྦྲང་ཆར»སོགས་ཀྱི་སྟེང་འཁྲབ་གཞུང་དང་སྒྲུང་གཏམ། སྙན་ངག ལྷུག་རྩོམ་དང་དཔྱད་བརྗོད་བཅས་རྩོམ་རིག་བརྩམས་ཆོས་བགྲང་དུ་རི་བ་ཞིག་བཀོད་མྱོང་།