ཨ་མ་དང་འབྲེལ་བའི་སྙན་ངག སྨྲེང་བུ།

ལོ་གཅིག་ནུར་འགྲོས་ཀྱིས་རྒས།
སྨྲ་བ་མེད་པའི་སྟོང་སྒུག་གིས་བཅོམ།

ལག་པས་རེག་མ་ཐུབ།
ཚོར་བས་ལེན་མ་ཐུབ།

ཁ་བ་དང་ཆར་བ།
སྙེ་མ་དང་ལོ་ཡག
དྲན་པའི་སྒམ་ཆུང་དུ་བབས།
ད་དུང་འཛུམ་དམུལ་དམུལ།
དགོད་འཚེར་འཚེར།
ཡོད་ཚད་དྲན་པའི་རི་རྩེ་ནས་རྒས།

ཞིབ་འདང་དེ་རློམ་དཀའ།
སྔོན་ཆད་དེ་བརྗེད་དཀའ།

འགུག་དཀའ་བའི་མཚན་མོའི་རྗེས་སུ།
ཐོ་རངས་ཀྱི་གཤོག་པ་ཆག་སོང་།
སྔོན་ཆད།
རི་ལུང་བརྒལ་དུས།
ལྟོ་ཕད་ནང་ལམ་བྲོ་བརྫངས།
མི་གྲལ་སྙེག་དུས།
རས་ལྷམ་ལ་འཚེམ་བུ་བརྒྱབ།
ཚ་གྲང་གིས་འདེད་དུས།
སེམས་ལ་སྐྱོར་མ་བཏབ།

དིང་སང་།
ཡང་བསྐྱར་མི་ཡུལ་འགྲིམ་དུས།
མཆི་མས་རྒྱང་སྐྱེལ་ཞུ།
ཕྱག་གིས་བདེ་འཚམས་འདེགས།
སེམས་ཀྱིས་སྨོན་ལམ་འདེབས།
བརྒྱད་ཅུའི་ལ་རྩེ་བརྒལ་ཡང་།
སྤྱན་ཟུང་དང་དྲན་རིག་རྒས་མེད།
གསུང་ངག་གི་བྱིན་རླབས་ཤོར་ཡང་།
བུ་ཆུང་དྲན་པའི་སྙེ་མ་ཐོར་མེད།

དེ་རིང་།
ད་དུང་ཨ་མ་ཞེས་འབོད་ས་ཞིག་ཡོད་པ་ནི།
ཁྱིམ་གྱི་གཡང་རྟེན་ཡིན།
བུ་ཚའི་བསོད་ནམས་ཡིན།
ལམ་གྱི་ནོམ་པ་ཡིན།
སེམས་ཀྱི་དྲོད་ཁོལ་ཡིན།
ཨ་མ་སྐུ་བདེ།

---

ཁ་བ་འབབ་པའི་ཞོགས་པ།
ཁ་བའི་ལོ་མ་ཐོར་ཞིང་ལྡིང་གིན་པའི་གསེབ་ཏུ།
ཨ་མ་ལགས་ཀྱི་འཛུམ་ཆུང་ལ་ཤུགས་མེད་ཀྱང་།
དབུས་བཞུད་བུ་ཆུང་གི་སེམས་ལ་དྲོད་ཁོལ་བསྐྱིལ་བྱུང་།

ཞོགས་པ་དེ་ནི་ས་ཟི་ལིང་མཁར་གྱི་ཞོགས་པ་རེད།
ཁ་བ་དེ་ནི་ཙོང་ཁའི་སྐྱེས་རིའི་འདབས་ཀྱི་ཁ་བ་རེད།
ནམ་མཁའ་དང་མཉམ་པའི་སེམས་ཅན་ལ།
ནམ་མཁའ་དང་མཉམ་པར་ཕན་དུ་རེ་བ།
ཚེའི་འདུ་བྱེད་རིང་དུ་བསྲིང་སའི་ཀུན་ར་འདིར།
ཞོགས་པར་ཁ་བའི་ལོ་མའི་གསེབ་ཏུ་འཛོམས་ཀྱང་།
དགའ་དགོད་དང་སྙིང་གཏམ་གྱི་དྲོད་སྐྱིད་ཤོར།
གནམ་ལོ་གསར་ཚེས་ཀྱི་སྣང་བ་ནུབ།
ཡང་བསྐྱར་ལན་ཅིག་ཞལ་ངོ་མཇལ་ཞིང་།
དབུ་སྐྲར་བྱིལ་བྱིལ་བྱ་བའི་གོ་སྐབས་དེ་ནི།
ཁ་བའི་ཀློང་དུ་ཚང་མལ་འཚོལ་བའི་བྱིའུ་ཆུང་དང་འདྲ་ཨང་།
བྱིའུ་ཆུང་འདིས་བདེ་བླག་ངང་ཚང་མལ་རྙེད་ཅིང་།
རྒྱུན་རིང་མ་བུ་ལྷན་འཛོམས་ཀྱི་དྲོད་སྐྱིད་ཚོར་ཤོག

རྒས་པའི་སྡུག་བསྔལ་ཟེར་བ་འདི་དབང་བཙན་པས།
ཟུངས་ཟད་པའི་ཨ་མ་ལགས་ཉལ་ཁྲིར་ལྷུང་སྟེ།
ཆུ་བུར་མིག་གིས་ཅེར་རེར་བརྟག་པའི་ཚེ་ན།
མགྲིན་པ་མི་བརྣངས་པའི་བུ་ཆུང་ཨེ་ཡོད།
འདུས་པའི་མཐའ་མ་འབྲལ་བ་ཆོས་ཉིད་ཡིན་པས།
ཙོང་ཁའི་སྐྱེས་རིའི་འདབས་སུ།
གསོལ་འདེབས་དང་སྨོན་ལམ་ཁོ་ན་བསྒོམས་ཏེ།
ཨ་མ་བསྐྱུར་ནས་དབུས་བཞུད་ཀྱི་སྟ་གོན་བརྩམ།

མ་དྲིན་མོ་ཆེའི་བདེ་སྡུག་འདི།
སྙིང་རྗེ་ཅན་གྱི་འཚོ་བྱེད་གཞོན་ནུས་མཁྱེན་མཁྱེན།
སྐྱབས་དམ་པ་དཀོན་མཆོག་གསུམ་པོས་མཁྱེན་མཁྱེན།