སྙན་ངག དཀར་རྒྱན།

དཀར་རྒྱན་ནི་ལྷ་སའི་བུ་རུམ་རྟ་རྨིག་མ་ཞིག་དང་འདྲ་སྟེ།
ངས་རང་ཉིད་ཀྱི་ལྕེ་ཐོག་ཏུ་བླངས་ནས་ཡང་ཡང་དམུར་ན་བསམ།

དཀར་རྒྱན་དྲན་པའི་དུས་སུ།
རྫ་ཆུ་དྭངས་ཤིང་བསིལ་བ་ཞིག་རྩ་ལམ་རེ་རེར་བབས་ཤིང།
ཡང་རྩ་ལམ་རེ་རེར་གྱེས་བཞིན་པ་དང་འདྲ་བོ་འདུག

ནམ་རྒྱུན། དཀར་རྒྱན་གྱི་མིག་མདངས་དྭངས་ལ་ལྷོད་བག་ཁོལ་བ་དེས།
ང་ལ་ནམ་མཁའ་གཞན་ཞིག་རྟོག་བཟོ་བྱ་རུ་བཅུག་ཡོང།

དཀར་རྒྱན་གྱིས་བཤད་ན་འུ་གཉིས་སྐལ་བའི་ཆགས་འཇིག་བར་གྱི་ནམ་མཁའ་ཡིན་ཟེར།
སྐད་ཆ་དེའི་དྲོད་ཀྱིས་ང་རང་སྐད་ཅིག་མའི་མི་རྟག་པ་དག་ལ་ཅི་མི་སྙམ་པར་གྱུར།

དཀར་རྒྱན་གྱི་རྒྱབ་གཟུགས་ཁོ་ནས་ཀྱང།
ང་རང་བཟི་ལ་ང་རང་རྩ་རྒྱུས་ལྷོད་པ་ནང་བཞིན་ཡུན་རིང་བོར་གྲགས་མེད་དུ་ལུས་མྱོང།

དཀར་རྒྱན་ངོ་ཤེས་པའི་དགུན་ཁ་དེར།
ཁྲུང་ཁྲུང་དང་སྐྱ་ཀ་དག་ཀྱང་གཉིས་རེ་གཉིས་རེ་འཕུར་ནས་གང་ཞིག་ཏུ་བཞུད་ཀྱིན་འདུག
ཡིན་ན་ཡང། དཔྱིད་ཟླ་ཚེས་དུས་དཀར་རྒྱན་གཅིག་པུ་ཁེར་རྐྱང་གིས་འཕུར་དགོས་སོང།

མཚན་མོར་ཁ་རོག་གེར་ཉན་བསྡད་ཚེ།
དཀར་རྒྱན་གྱིས་རྒྱང་རིང་ན་གཞས་གཏོང་གིན་པའི་སྒྲ་ཐོས་ཡོང།
ད་ལྟ། མོའི་གཞས་ལ་ཁེར་རྐྱང་དང་སྐྱོ་ངལ་གྱི་མདངས་ཏོག་ཙམ་མངོན་ཡོང་གིན་འདུག

དཀར་རྒྱན་དྲན་པའི་དུས་སུ།
ངས་རྩི་ཤིང་དང་མེ་ཏོག་ལ་བལྟས་ཤིང་ཆུ་བོའི་བཞུར་སྒྲར་ཉན་བཞིན་ཡོད།
ངས་མཚོ་ཁར་བབས་པའི་ཁྲུང་ཁྲུང་དང་ངང་མོའི་གཤོག་རླབས་ལ་ལྟ་བཞིན་ཡོད།

དཀར་རྒྱན་ནི་འབྲོག་མོ་རྣལ་མ་ཞིག་ཡིན།
འཛུམ་མདངས་ཁོ་ནས་ཀྱང་འཇིག་རྟེན་ཇེ་གསལ་དུ་བཏང་ཡོང།