སྙན་ངག གནས་བསྟོད་ཚངས་དབང་མཆོད་པ།

དབྱིངས།

བརྩེ་བའི་ལུས་ཀྱི་མེ་ཏོག་གི །
ཉམས་སྣང་འདར་བའི་སྒྱུ་མ་ཡིས། །
འདབ་གཤོག་གཡོ་བའི་ཟློས་གར་མཁན། །
འོད་ཀྱི་རྗེ་བོ་རྟག་ཏུ་འཛུམ། །

སྙན་འགྱུར་སྟོང་གི་གྲིབ་བསིལ་གྱིས། །
ཡིད་ཀྱི་ཚ་གདུང་གཞིལ་ནུས་པ། །
ཚིག་གི་ནོར་བུ་འབུམ་གྲོལ་བ། །
ངག་གི་བུ་མོ་མགྲིན་པར་མཆོད། །

མཚར་སྡུག་ཆུ་རིས་སྙིང་པོ་ཅན། །
ཚོར་རླབས་ཤེས་པའི་རྟོག་འགྱུར་གྱི། །
རང་བྱུང་ཉམས་ཀྱི་ངང་ཚུལ་ལས། །
སྒྱུ་འཕྲུལ་སྡིངས་ནི་སྙན་པ་འབར། །

ཡིད་འོང་གངས་རིའི་དོ་ཤལ་གྱི། །
སྟོད་གཡོགས་ལྷབ་ལྷུབ་གཡོ་ལྡན་པར། །
བྱིན་དཀར་མཛེས་པའི་མགོན་པོ་ཡིས། །
རྒྱལ་བསྟན་གདུགས་དཀར་འདེགས་པ་མཚར། །

སྤྲིན་གྱི་བ་གམ་མངོན་མཐོ་བ། །
གསེར་གྱི་བྱ་སྐྱིབས་དཔལ་གྱིས་འཕྱོར། །
རིན་ཆེན་ཉི་ཟླའི་བླ་བྲེས་ཀྱི། །
ཡུལ་འདིའི་ཕུན་ཚོགས་བཟུང་བ་དགེ །

མཐུ་ལྡན་ཤུགས་དྲག་གཡོ་བ་དང་། །
དཀར་ཕྱོགས་མགོ་འཕང་མངོན་བསྟོད་པ། །
གཞན་ཕན་བརྩེ་བའི་བ་དན་གྱིས། །
ཁ་རྗེ་བསྟོད་པའི་ལས་མ་གཡེལ། །

གླིང་འདིའི་དཔལ་དང་དགེ་ལེགས་ཀྱི། །
གྲགས་པ་བསྐྱོད་པའི་སྣང་བརྙན་འབུམ། །
ཁྱེད་ཀྱི་ཐུགས་དམ་རྡོ་རྗེ་ལས། །
གཡེལ་མེད་ལས་འདི་ཀུན་གྱིས་སྨོན། །

ལྗང་མདོག་འོད་དུ་སྡུག་པ་ཡི། །
ལྕུག་ཕྲན་འཐབ་པའི་ནགས་མ་ནི། །
མཛེས་པ་བཟུང་པའི་སྙན་པ་ཡིས། །
ཡིད་ཀྱི་སྐྱོ་དུབ་བསིལ་ཞིང་བདེ། །

རྒྱལ་རྣམས་དགྱེས་པའི་ག་བུར་འཛུམ། །
ཀུན་བཟང་མཆོད་པའི་ཚོགས་ལགས་པས། །
སྣ་ཚོགས་འཕྱོར་བའི་མདངས་ལྡན་པའི། །
མེ་ཏོག་བཀྲམ་པའི་སྤྱན་གཟིགས་མཛེས། །

ཆོས་ཀྱི་བརྟུལ་ཞུགས་རོལ་བའི་སྡེ། །
ལྔ་རིག་པད་ཚལ་རྫིང་བུ་ལ། །
བློ་གྲོས་བསྐྱོད་པའི་འདུན་པ་དཀར། །
ས་གསུམ་བརྗིད་པའི་རྒྱན་དུ་ཆེ། །

ཕྱོགས་སུ་མ་ལྷུང་རྒྱལ་བསྟན་གྱི། །
མུ་ཏིག་ཤལ་བ་མཛེས་ལྡན་པ། །
ཕྱོགས་ཀྱི་མོས་ལྡན་མགྲིན་པ་ཡི། །
འཕྱོར་ལ་དཔྱངས་པའི་བཀྲག་མདངས་ངོམ། །

མཚམས་སྤྲིན་དམར་པོ་རོལ་བ་ཡི། །
སྡུག་གུར་བཀྲམ་པ་དམར་སེར་དཔུང་། །
བརྗིད་ཆགས་ཕྱི་ལུས་ངོམས་པ་ཡིས། །
ལི་ཁྲིའི་རྒྱ་མཚོར་འཁྱིལ་ལ་ལྟ། །

བཀའ་ཡི་བདེན་ཚིག་ཨུཏྤལ་དཀར། །
སེམས་ཀྱི་མགུལ་ལ་འཐེན་པ་ཡི། །
ཤེས་ལྡན་བློ་གྲོས་འདབ་མ་ནི། །
རིག་གཞུང་མཚོ་ལ་ཕྱོགས་བཅུར་རྒྱས། །

སུམ་རྩེན་འོད་ཀྱི་མེ་ཏོག་ཚལ། །
འཐོར་བའི་ཡེ་ཤེས་མདངས་ལྔ་ཡི། །
ཡིད་ཀྱི་ཤེས་པ་བསིལ་བྱས་པ། །
དགའ་བའི་མཆོག་ལ་དམིགས་སུ་མེད། །

ཆོས་ཀྱི་བརྟུལ་ཞུགས་འཆང་བ་ཡི། །
ཡིད་ཅན་གང་ཟག་རྣམས་ཀྱིས་ནི། །
ཐུགས་ཀྱི་བུམ་པར་བསྐྱིལ་བྱས་པ། །
འཕགས་པའི་དགོངས་དོན་གང་ཞིག་ལགས། །

རྟེན་འབྱུང་སྤྲིན་གྱི་མེ་ཏོག་ཆར། །
དབུ་ལ་འཕོ་བའི་རྩེ་དགའ་ཡིས། །
ཕྱོགས་ཀྱི་མུ་ཁྱུད་འཁོར་ལོ་ནི། །
གྲགས་པ་འཇིག་རྟེན་རྒྱན་དུ་མཐོ། །

བྱིན་དཀར་འཕྲིན་ལས་ཉི་ཟླ་ཡིས། །
འདྲིས་དང་མ་འདྲིས་སྐྱེ་བོའི་ཚོགས། །
རྣར་པར་བཟུང་བའི་ཚུལ་གྱིས་ནི། །
འཆི་མེད་དབང་ཡང་སྐྱེངས་པར་ལྷུང་། །

ཨེ་མ་ད་ནི་འོག་མིན་ཞིང་། །
སྤྲུལ་བསྒྱུར་ཐབས་ཀྱི་ཆོ་ག་ཡིས། །
སུམ་རྩེན་གནས་ལ་ཡིད་དབྱུང་ནས། །
ས་ལ་འཕོས་ཞེས་ཀུན་གྱིས་བརྗོད། །

ཀུན་འབྱུང་ལས་ཀྱི་རི་མོ་ལ། །
བྱིང་བའི་འགྲོ་རྣམས་མོས་གུས་ཀྱིས། །
གླིང་འདིར་ལན་གཅིག་བཏུད་པའི་བསོད། །
བགྲང་ལ་གསེར་མངལ་ཅན་ཡང་ངལ། །

གསང་ཆེན་ཆོས་ཀྱི་གདེངས་ཀ་ལས། །
ཆོས་ཀྱི་ཏིང་འཛིན་རོལ་བ་འབུམ། །
སྲིད་ན་སྙན་པའི་བ་དན་དང་། །
ལྷན་དུ་འོད་ཀྱིས་ཀུན་ནས་སྒེག །

བྱང་སེམས་ཐུགས་གོང་ལེགས་འཁྱིལ་བའི། །
ཀུན་ཏུ་བཟང་པོ་ངོ་མཚར་ཅན། །
མཐུ་ལས་གྲུབ་པའི་སྨོན་པ་ཡིས། །
ས་ལ་བསོད་ནམས་ཡུགས་གཅིག་འཕྲོས། །

སྡིག་ལྟུང་དྲི་མ་ར་རོའི་ཚོགས། །
བྱང་ལ་ཐུགས་སྟོབས་དཔལ་ལྡན་པ། །
རྡོར་སེམས་པད་དཀར་འོད་གོང་གིས། །
བྱིན་ཆེན་ཟེར་མ་སྟོང་དུ་འཛུམ། །

ལེགས་བྱས་གདུགས་དཀར་གཡས་འཁྱིལ་གྱི། །
རྟེན་འབྱུང་ཆོས་ཀྱི་ཟེ་བ་ལས། །
ཕྱག་ན་བདྨོའི་མཆོག་གི་སྐུ། །
དབྱིངས་སུ་རོལ་བ་བསམ་མི་ཁྱབ། །

དེ་ལྟའི་ཡིད་ཀྱི་སྨོན་པ་ནི། །
འོད་ཀྱིས་འཕུར་བའི་མཛེས་སྡུག་གིས། །
ཟེགས་མ་གར་དུ་ལྡེམ་པ་བཞིན། །
གྲགས་དཀར་ཤལ་བ་རིང་དུ་འཕྱར། །

སྤྲིན་གྱི་ལྡིང་ཁང་མཛེས་དམ་པར། །
འཆི་མེད་བུ་དང་བུ་མོ་ཡིས། །
ས་འདིར་འོག་མིན་ཆོས་སྡིངས་ཞེས། །
བསྟོད་དབྱངས་རྔ་ནི་ཕྱོགས་མེད་སྒྲོག །

རབ་འབྱམས་རྒྱལ་བ་ཐམས་ཅད་ཀྱི། །
ཐུགས་དགོངས་འོད་ཀྱི་རྨུ་ཐག་དཀར། །
མཁའ་ལ་འཐེན་པའི་སྣང་བ་ནི། །
རྩིབས་སྟོང་རྒྱས་པའི་འཁོར་ལོ་བཞིན། །

དེ་ལྟའི་ཕྱིར་ན་ཚེ་རབས་ཀྱི། །
བགྲང་བར་མི་སྤོབས་ཀུན་ཏུ་ཡང་། །
གླིང་འདིའི་བྱིན་དཀར་ཟེར་མ་ཡི། །
སྣང་བ་མི་འབྲལ་སྨོན་པ་འདེབས། །

རིག་བྱེད་ངག་གི་ཡིད་འཕྲོག་མ། །
མཛེས་པར་ཕོབས་པའི་དོ་ཤལ་གྱི། །
རིན་ཆེན་ནོར་བུའི་སྐྱེས་ཀྱི་མཆོག །
ཕྱོགས་ཀྱི་སྙན་གོང་མཛེས་པར་མཆོད། །

དབེན་གསུམ་ཆོས་ཀྱི་སྡིངས་དམ་པར། །
བསྟོད་དབྱངས་རྒྱུད་སྟོང་འཕང་འགྲོ་ཡི། །
སྙན་པ་འབར་བའི་གསལ་བྱེད་གྲངས། །
གྲས་སུ་བསྒྲིགས་པའི་དགེ་འདི་བསྔོ། །

བཀྲ་ཤིས་ནོར་བུའི་བ་གམ་རྩེར། །
ཆོས་ཀྱི་མེ་ཏོག་ཐང་ཆེན་དུ། །
བརྡལ་བའི་གནས་དེར་རིག་བྱེད་ངག །
འཛུམ་པའི་འོད་དང་སྦྱར་ཏེ་སྤེལ། །