འཇུ་སྐལ་བཟང་གི་སྙན་ངག སྙན་ངག་པ།

གྱང་རྩི་ལྷུང་བའི་ལྡེབས་རིས་ཀྱི་ལོགས་སུ།
ཆག་གྲུམ་ཤོར་བའི་རྡོ་རིང་གི་རྩ་རུ།
འབྲོང་རྒོད་ཀྱི་འགྲམ་རུས་འབྱར་བའི་འཁྱགས་དར་གྱི་ངོས་སུ། 
ང་ཚོས་དེ་སྔོན་གང་དུའང་བྲིས།

ང་ཚོས་དེ་སྔོན་ཅི་ཡང་བྲིས་ཏེ།
དུས་རབས་ཤིག་འཕོ་འགྱུར་གྱི་ཁྲོད་ནས་བྲིས།
ལས་དབང་ཞིག་དར་རྒུད་ཀྱི་གསེབ་ནས་བྲིས།
ཚེ་སྲོག་ཅིག་ཤི་གསོན་ཀྱི་བར་ནས་བྲིས།

འདོད་རྔམ་གྱི་རྦ་རླབས་གཞུང་གཤགས་བྱས་ཏེ།
སྡོང་ལོ་ཁྲི་ཕྲག་ས་ལ་ཕབས་ཤིང་།
གཞོན་ནུ་མའི་སྐྲ་ལོ་ལ་མེ་ཏོག་གི་འདབ་མ་བཀྲམ།
འོན་ཀྱང་རེས་འགའ་སྡོང་དུམ་གྱི་ཚིག་རོའི་གསེབ་ནས།
བསམ་གཞིག་གི་ཁ་བྱང་ཡང་ཡང་བོར།

ཀྱེ་མ། མགོ་མི་རྙེད་ཅིང་མཇུག་མི་རྫོགས་པའི།
སྙན་ངག་དེ་ཚོ།

ང་ཚོ་རེ་དགའ་སྟེ——
ཉམས་འུར་ཐེངས་གཅིག་གིས།
ཁ་དོག་སྣ་ཚོགས་པའི་ཐ་སྙད་མང་པོ་ཞིག
འབྲུག་པ་ཀུན་ལེགས་ཀྱིས་རྣ་ཁྱུ་བདས་པ་བཞིན།
གཙུག་ལག་རིག་པའི་ཉིན་སྲིབ་ནས།
ཁྱུ་དང་ཁྱུ་བྱས་ནས་དེད་འོང་ཚེ།
ང་ཚོའང་འུ་ཐུག་པ་ཡོད་དེ——
མནོ་བསམ་རེ་རེས་དྲུད་འོང་བའི་ཡིག་འབྲུ་དེ་ཚོ།
ཕ་བོང་ས་ཟུག་བཞིན་གྱུར་ཚེ།

མཆིལ་ཞགས་ཀྱིས་བརྩེ་མེད་དུ་བཅོམ་པའི།
ཚིག་དུམ་དེ་དག
འདི་ནས་ཤི་ཡང་།
དེ་ནས་སླར་ཡང་དབུགས་ཐོགས་འོང་ཞིང་།
སྙུག་རྩེ་ནས་ནར་སོན་གྱིན།
བསམ་གཞིག་མང་པོ་ཞིག་ལ།
གཤོག་པ་རིང་བོ་ཞིག་སྐྱེ་འོང་།