ཁེར་བུའི་སྙན་ངག་ཆེད་བཀོད།

ལྷ་ལགས།
ཁྱེད་ཀྱིས་དཀའ་སྡུག་གསར་གཏོད་གནང་སོང་།
འོན་ཀྱང་ང་ཡིས་གླུ་གཞས་གཏོང་།

ངག་མི་སྨྲ་བའི་གླུ་བ།
ཁྱོད་ཀྱི་མགོ་ཐོག་གི་བར་སྣང་དུ།
མ་འོངས་པའི་རྔམ་བརྗིད་ཀྱི་དུར་ས་ཡོད།

---

ཟབ་སར་གནས་བཅས་པའི།
གསེར་མདོག་གི་གེའུ།
སྙིང་ག་ནས་བརྒྱུད་འོངས་པའི།
ཚེ་རབས་ཀྱི་སོན་འབྲུ།
ཡར་ཡར་སྐྱེ་འོངས་པའི།
ཁེར་རྐྱང་གི་རྒྱུན་ཐག
ཁུ་སིམ་མེར་སྡོད་པའི།
སྨེང་སྐྱོའི་རྡོ་བ།
ཉི་འོད་དང་བྲལ་བའི།
རྣང་ཞིང་ཁྲོད་ཡུན་རིང་གནས་བཅས་པའི།
ཡི་མུག་གི་ས་བོན།

---

ཟོམ་གྱི་མི་དག་དམའ་མོ་གཤོང་དུ་འདུས་ཤིང་།
ཕུ་ཆུ་ཡུར་དུ་དྲངས།
ཤི་གསོན་མེ་ཡིས་འབྱེད།

སྤྱིར་ན་ང་རང་མཐའ་ཡས་པའི་རྣང་ཞིང་ཁྲོད་དུ།
ཞིང་གྲོང་གི་སྙིང་ག་རུ་མཛེས་སྡུག་གིས་བཞད་པའི།
ཟླ་དྲུག་པའི་གསེར་མདོག་གི་མེ་ཏོག་ལྟ་བུའི་བུ་མོ་ཞིག་དང་།
རྒྱས་སྤྲོས་ཀྱིས་གཉེན་སྒྲིག་བྱ་དགོས་མོད།

འོན་ཀྱང་མེ་འཁོར་ཐོན་བྱུང་།
མེ་འཁོར་ཐོན་བྱུང་།
ང་རང་གཞི་ནས་ཕ་ཡུལ་གྱི་སོན་འབྲུ་ཁོ་ན་བསྣམས་པའི།
ཡུལ་གྱར་གཞས་པ་ཞིག་ཏུ་གྱུར་སོང་།

---

ཙོང་ཁ་པ།
སྨག་མུན་གྱི་ཁོང་གསེང་དུ་བཞད་པའི།
འོད་ཀྱི་སོན་འབྲུ།
མཐའ་ཡས་པའི་སེམས་དཔངས་ལས་འཁྲུངས་པའི།
གངས་ཀྱི་ཕ་ལམ།

ཙོང་ཁ་པ།
ཁྱེད་ཀྱིས་འགྲོ་ཀུན་མ་རུ་ཤེས།
འོན་ཀྱང་།
རང་གི་སྐྱེད་མ་ཁོ་ན།
ནམ་ཤི་ཡང་མ་ཤེས།

---

རླུང་གཡུག་བྱུང་།
སྡོད་ཁང་དང་རི་བོ།
འཇིག་རྟེན་སོགས།
ཡོམ་ཡོམ་འགུལ་བཞིན་འདུག

ང་རང་།
རླུང་ཁྲོད་དུ་འགྲེང་བ་ན།
རླུང་འཕུར་སོང་།

---

བལྟས་ཚོད་དུ།
འབྲུ་གུ་དམར་སྨུག་རིལ་ཆུང་ཁྱོད་རང་།
སོན་འབྲུ་ཁོག་སྟོང་སྐྱོན་ཅན་ཞིག་ཏུ་སྣང་མོད།

དབྱར་ཟླ་ཐ་མར།
སྔར་བཞིན་ཉི་འོག་ཏུ་གསེར་མདོག་གིས་འཚེར་ཞིང་།
འཕུར་འདོད་ཀྱི་གཤོག་པ་ཇི་བཞིན།
འདབ་མའི་རྒྱ་གྲམ་ཕྱོགས་ནས་ཕྱོགས་སུ་བརྐྱངས།

སྟོན་མཇུག་ཏུ།
ཁྱོད་ཀྱི་བསམ་བློས་རྒྱགས་པའི་ང་རྒྱལ་གྱི་མགོ་བོ་དེ།
ཟོར་བའི་དབྱིབས་སུ་གྲུབ་པའི་ཟླ་བའི་ཁ་ཟས་སུ་གྱུར་ཚར་ནའང་།
ཁྱོད་ཀྱི་སེར་ལམ་ལམ་གྱི་དོན་སྙིང་དེ།
ད་དུང་ཡང་མི་ཡུལ་དུ་བཞུར་གྱིན་འདུག

---

ཐོག་མར་རྒྱང་ཐག་རིང་ངོ་།
རྒྱ་མཚོ་ལས་བྱུང་བས་སོ་ཟེར།

བར་དུ་ཤུགས་རྒྱོབས་ཤུགས་རྒྱོབས།
ན་ཚ་ང་ལའང་ཡོད་ཟེར།
མཐའ་མར་འཇམ་ཅག་གེར་གྱུར།
མུན་པ་ཡང་མཉམ་དུ་སླེབས་བྱུང་།

བཟའ་འབྲུ་དང་བུད་མེད་མེད་པའི་ཁང་མིག་དོག་པོ་ཞིག་ཏུ།
ངས་ནི་རྟོག་བཏགས་ཀྱི་མེ་ལྕེ་དམར་པོ་ཞིག་མཐོང་།

དོན་དུ་ང་ཚོ་ཡང་ནད་དུག་རིགས་ཤིག་མ་ཡིན་ནམ།
གློ་རྡེག་དེ་ལྟར་བསམ་བྱུང་།

---

ཨ་མ།
ཁྱོད་རང་གཉིད་སོང་ངམ།
མཚན་མོ་འདི་ཅི་འདྲའི་རིང་ཨང་།
ང་ནི་རྨི་ལམ་གྱིས་བསླུས།
འོན་ཀྱང་གནས་གཅིག་གཏན་དུ་ལུས།
ང་ནི་ནམ་ཡང་ཁྱོད་ཀྱི་ནར་མ་སོན་པའི་བྱིས་པ་དེ་ཡིན།
ད་ནི་ངའི་ཆུང་དུས་ཀྱི་གཅེས་མིང་གིས་འབོད་མཁན་སུ་ཡང་མེད།
ཨ་མ་ཡ། ཨ་མ།
སྙིང་ཉེ་བའི་ཨ་མ།

ཨ་མ།
ཁྱོད་ཀྱིས་གོ་སོང་ངམ།
ལམ་བུ་འདི་ཅི་འདྲའི་རྩུབ་ཨང་།
ང་ནི་རང་དབང་གིས་བསླུས།
འོན་ཀྱང་སྒྲོག་གིས་དམ་པོར་བཅིངས།
ང་ནི་ནམ་ཡང་ཁྱོད་ཀྱི་ནར་སོན་རྒྱུ་མེད་པའི་བྱིས་པ་དེ་ཡིན།
ད་ནི་ཁེར་རྐྱང་གིས་གདུང་བའི་མི་དེ་ཡང་ཐག་རིང་ལམ་ལ་ཆས་སོང་།
ཨ་མ་ཡ། ཨ་མ།
སྙིང་ཉེ་བའི་ཨ་མ།

ཨ་མ།
ཁྱོད་རང་བུད་སོང་ངམ།
གྱེས་བྲལ་འདི་ཅི་འདྲའི་མགྱོགས་ཨང་།
ང་ནི་དུག་མཚོན་གྱིས་རྨས།
འོན་ཀྱང་རྨི་ལམ་དུ་སེང་གེ་རྨིས།
ང་ནི་ནམ་ཡང་ཁྱོད་ཀྱི་སྐྱོ་གདུང་གི་བྱིས་པ་དེ་ཡིན།
ད་ནི་ཀཱེ་ཐར་འཁུར་བའི་གཞས་པ་དེ་ཡང་ཕྱིར་ཡུལ་ལ་ལོག་མ་བྱུང་།
ཨ་མ་ཡ། ཨ་མ།
སྙིང་ཉེ་བའི་ཨ་མ།

---

ངས་ལག་པ་ཅི་དགར་བསྲིངས་ནས།
འཚར་ལོངས་སྐོར་གྱི་གཏམ་རྒྱུད་ཡོད་ཚད་ལ་ཉན་ཡོད།
སྒོ་དང་སྒེའུ་ཁུང་མེད་པའི་ཁང་མིག་ཅིག་ཏུ་འཛུལ།
མུན་པ་ལས་མཐུག་པའི་ཕྱོགས་བཞིའི་གྱང་།
བག་ལ་ཞ་བའི་ཚུལ་གྱིས་འགུལ་གྱིན་འདུག
ལང་ཚོ་ཡི་མྱ་ངམ་ཐང་ཡོད་ཚད།
ང་ནི་ནད་པ་ཞིག་དང་འདྲ་བར་གཤགས་བཅོས་སྟེགས་བུའི་སྟེང་ཉལ་བསྡད།
སྒྱུ་རྩལ་གྱི་ཕྱོགས་ལ་བསམ་བློ་གཏོང་དགོས་མི་འདུག
སུག་བཞི་ཡི་སྐོམ་གདུང་ནི་ཁ་ཕྱོགས་ཉག་གཅིག་ཡིན།
ཚ་སྲེག་གི་སྒང་གཤོང་ཐམས་ཅད་ལས་ཁྱོད་ཀྱི་འཇམ་མཉེན་འཁྲུངས།
མཚན་མོ་ཡི་བུ་ག་ལས་བརྡོལ་བའི་གཤེར་ཁུའི་ཐིགས་པ་གཅིག
རིམ་གྱིས།
ང་ནི་དམར་པོ་དེའི་ངོ་བོར་འཐིམ་གྱིན་འདུག
ཁྱོད་ཀྱི་གཅོང་རོང་དུ་ལྷུང་གིན་འདུག

---

གངས་རི།
ལུག་ཁྱུ་དང་སྤྲིན་དཀར།

གངས་རི།
མཚན་མོའི་ཀུན་གཞི་ལ་སྣང་བའི་དཀར་པོ།

གངས་རི།
མགོ་སྐམ་དང་ཀེང་རུས་ཀྱི་ཚོགས།

གངས་རི།
འཇགས་ཐབས་མེད་པའི་ན་ཟུག
སྲ་གཟུགས་ཀྱི་དམར་པོ།

གངས་རི།
གཟུགས་འགྱུར་རྐང་གླིང་ཞིག་ནས།
གཉིད་ལབ་ཐན་ཐུན།