སྙན་ངག སྟོན་གྱི་ལོ་མ་སེར་པོ།

སྟོན་ཟླ་འདིར་སྡོང་ལོ་སེར་པོ་སེམས་པའི་འཁྱགས་སྒང་ལ་བབས། སེར་བུས་ལམ་ཙམ་ལམ་ཙམ་འཁུར་ཞོར་དུ། སེམས་སུ་བབས།
འཁྱགས་སོབ་སོབ་ཀྱི་སེམས་པ་དང་བར་སྣང་འདི། ཁྱོད་ཀྱི་མདུན་ཅོག་སྟེང་གི་ཤོག་སྟོང་བཞིན།
རྒྱང་རིང་ལ་སེམས་འགྱུ་ཞིག་འབྲི་བསམ་ཚེ། རྙིང་ཞིང་ཟད་བཞིན་པའི་ལོ་ཟླ་འདི་དག
རྒས་ཤིང་འཁོག་གྱིན་པའི་སེམས་འཁུར་ལྷག་མ་དེ་དག སྟོན་མཇུག་གི་བསུ་མ་ལ་སླེབས།
ངའང་སེར་ལམ་ལམ་གྱི་ལོ་མ་དེ་དག་ཁྲོད་ཀྱི་ལོ་མ་སེར་པོ་དེ་ལས་ཅི་ཡང་མིན་པ་ཚོར།
སྟོན་མཇུག་འདིར་ཁྱོད་ཀྱི་སེམས་ཁམས་སྐྱིད་དམ། འཚམས་འདྲི་ཞུ།
གཉིད་བདེའམ་ཁམས་བདེ་ཞུ།

བུད་མེད་དེས་ལམ་འགྲམ་གྱི་ལོ་མ་ཕྱག་སྟེ་ཁུད་དུ་སྤུངས། དེའི་ཞོར་དུ་ངའི་སེམས་པའང་གཅིག་ཏུ་བསྒོངས།
ལམ་འགྲོ་བ་ཚོའི་རྡོག་འོག་གི་སག་སྒྲ་རེ་ཞིག་འཇགས། སྨྲེ་ངག་ལྟ་བུའི་སག་སྒྲ་དེ་གཞི་ནས་འཇགས།
ལོ་མས་ལོ་མ་བཀབ་སྟེ་ཆེས་མཐའ་མཇུག་གི་ཁ་དོག་བསྲུང་། སྨན་ཁང་དང་ནད་ཁྲི་ལྟ་བུའི་འཇིག་རྟེན་འདི་ནག་པོར་གྱུར།
ལོ་མའི་ཕུང་བོ་ཁངས་མ་ཆར་གྱིས་མནན། སྐམ་ཞིང་རིད་པར་གྱུར། ཇེ་ཆུང་ནས་ཇེ་ཆུང་དུ་གྱུར།
ཁྱོད་ཀྱིས་ཁ་ཆེམས་ཤིག་འཇོག་འདོད་དམ། སྐད་ཆ་འགའ་བཤད་འདོད་དམ།

འདི་ནི་དབྱར་གྱིས་བསྒྲིགས་པའི་བདེ་སྐྱིད་རེད། ལོ་ཟླས་བཀལ་བའི་ཁྲེལ་མེད་རེད། འུ་གཉིས་ཀྱིས་བཏབ་པའི་དུས་ཆད་རེད།
དེ་རིང་གི་གྲང་ངར་འདི་ཚིག་གིས་བརྗོད་དཀའ། ཡི་གེ་འགས་ཐེག་ཀྱང་དཀའ།
སྟོན་མཇུག་ནི་འབྲས་བུ་ལེན་པའི་དུས་རེད། སུས་ཀྱང་ལོ་མའི་ཚོར་བ་ལ་དོ་སྣང་བྱས་མ་མྱོང་།
སྟོན་མཇུག་ནི་ཆང་དང་གཞས་ཀྱི་གནམ་ས་རེད། འོན་ཀྱང་དགུན་གྱི་སྔ་ལྟས་ཀྱང་རེད།

ལོ་མ་སེར་པོ་དེ་དག འཁྱམས་པའི་བླ་སྲོག་སེར་པོ་དེ་དག
ཁ་འབྲལ་ཁའི་འཕྲིན་ཡིག་ཇི་བཞིན་གཤགས་ཏེ། བར་སྣང་ལ་སྟོར་དོན་ཅི།
ངའི་མདུན་དུ་ལྷུང་དོན་ཅི། རྡོག་འོག་ནས་སག་སྒྲ་འབྱིན་དོན་ཅི།
སེམས་པ་ལ་ཁུར་པོས་མནན་དོན་ཅི།

ལོ་མ་སེར་པོ། ལོ་ཟླ་དང་གོམ་འགྲོས་ཀྱི་བར་ན་འབབ་པའི། སེམས་པ་ཟུག་པའི་ལོ་མ་སེར་པོ།