གདམ་ག བྱ་གཞུང་སྐལ་ལོ།

       སྔོན་ཆད་རང་ཉིད་ཀྱི་སེམས་ལ་འཁོར་བ་བཞིན་ད་ནི་དགུན་ནམ་རིང་མོ་ཞིག་འདི་ལྟར་ཁད་ཀྱིས་སླེབས་སོང་། དེ་ནི་ལས་དབང་གི་བཀོད་སྒྲིག་ཅིག་དང་མཚུངས་པར་ང་ཚོ་ཕ་མེས་ཀྱི་སྙིང་ཁོང་དྲོན་མོ་ལས་ཕྱིར་བུད་དེ་འཚང་ཁ་ཤིག་ཤིག་ངང་རྒྱ་མཚོ་ལྟ་བུའི་མི་ཚོགས་ཀྱི་འཇིངས་སུ་འཐིམས་མགོ་བརྩམས།        འདི་ལྟར། དུས་རབས་ཀྱི་འགྲམ་ལྕགས་ཚ་བེར་བ་ཞིག་གིས་གཅེས་སུ་རུང་བའི་སྡེ་བ་དང་ཚོ་བ། ཁྱིམ་ཚང་དང་རུ་སྐོར། ཞིང་པ་དང་འབྲོག་པ། ཡོད་ཚད་ཀྱི་ཡོད་ཚད། སུ་ཞིག་གིས་རྗེས་ནས་དེད་པ་བཞིན་གྲ་སྒྲིག་དང་སྟ་གོན་ཅི་ཡང་མེད་པར་ལམ་ལ་ཆས་དགོས་བྱུང་། ཉིན་དེ་ནས་བཟུང་། ང་ཚོས་ཡུན་རིང་ལ་བློས་བཏང་མ་མྱོང་བའི་ཤུལ་བཞག་གི་རྒྱུ་ནོར་ཐམས་ཅད་ཀྱང་རིམ་བཞིན་བདག་མེད་ཁེར་རྐྱང་དུ་ལུས་སོང་།        ནོར་ལུག་གི་འབའ་སྒྲ་དང་མེ་ཏོག་གི་འཛུམ་བཞད་བསྐྱུར་ནས། དྲན་གདུང་དང་ཞེན་ཆགས་ཅི་ཡང་མེད་པར། མཐའ་ཡས་པའི་རྩྭ་ཐང་དུ་ཁྱེད་ཀྱི་སེམས་རྒྱ་མ་ཤོངས་པར། སྐོར་བྲོ་དང་སྒྲ་སྒམ་གྱི་དེང་གཞས་སྙན་མོ་དང་འགྲོགས་ནས། ཕ་མེས་ཀྱི་དབྱངས་རྟ་གསོན་པོ་དང་གྱེས་ནས། ཁྱིམ་སྲིད་ཀྱི་མགོ་རྔ་ཐ་གུས་མ་དམ་པར། དངོས་ཡོད་ཀྱི་སྡང་སྡིགས་ཁྲོད་ནས། རྩེད་དགོད་ཀྱི་གླུ་བྲོ་འཁྲབ་བཞིན། གློག་སྒྲོན་དང་ཆང་ཤག་གིས་བརྒྱན་པའི་འཇིག་རྟེན་ཞིག་ཏུ་ཡལ་སོང་།        ཡིན་ནའང་། དེ་རིང་ནས་བཟུང་ཁྱེད་ཀྱིས་རི་མཐོན་པོ་གནམ་གྱི་ཀ་བ་དང་མཚོ་དམའ་མོ་གཡུ་ཡི་མཎྜལ། གངས་དཀར་པོ་ཤེལ་གྱི་མཆོད་རྟེན། ལྷ་ཀླུ་གཉན་གསུམ་དང་ཡུལ་ལྷ་གཞི་བདག་གི་མགོན་སྐྱོབ་མེད་པར། འཇིགས་སྐྲག་དང་ཞེད་སྣང་ཅི་ཡང་མེད་པར། གངས་དཀར་པོའི་སེམས་དཔང་དང་མཚོ་སྔོན་མོའི་་རླབས་སྒྲ་དང་མཉམ་དུ་འདི་ལྟར་རྒྱང་ལ་བཞུད་སོང་།        ཕ་མེས་ཀྱི་ཡིག་ཚང་ལས། མཛངས་པའི་ལས་སུ་ཞིང་ལ་དོར་ཁ་བརྩིགས། །འབྲོག་ལ་ཐུལ་རྩིས་ཕུ་ཆུ་ཡུར་དུ་དྲངས། །མདའ་རུ་ཆུ་མ་རྨོ་བ་དེ་ནས་དར། །ཞེས་འུ་ཅག་གི་མེས་པོ་རིམ་བྱོན་ཚོས་ང་ཚོར་དགོས་འདོད་ཀྱི་ནོར་བུ་དང་འཛད་མེད་ཀྱི་འཚོ་ཚིས་བསྐྲུན་ནའང་། ཏག་ཏག་སྐབས་འདིར་ཁྱེད་ཀྱིས་རྨོན་པ་དོར་བསྡེབ་དང་འབྲི་མོའི་གདང་ཐག་བཅད་ནས། མཛེས་སྡུག་གི་རྩྭ་ཐང་དང་ཞིང་ཚིགས་ཀྱི་ལོ་རླབས་བསྐྱུར་ནས་གང་ལ་ཆས་འགྲོ།        འཁྱག་རེངས་སུ་གྱུར་བའི་ལྕགས་སྦུག་གི་དྲོད་རླངས་ལ་མགོ་བོ་སྔས་ཐེངས་རེར། དཀའ་སྡུག་དང་དངུལ་ཆད་ཀྱི་ཉིན་མོ་སླེབས་ཐེངས་རེར། དབུལ་སྐྱོར་གྱི་གཡས་འདེགས་གཡོན་འདེགས་ལས། ཁྱེད་ལ་སེམས་གཏིང་གི་གྲོགས་པོ་དང་ཤ་ཁྲག་གི་གཉེན་ཉེ་ག་ཙམ་ཡོད། ཁྱེད་ལ་གདུང་སེམས་དང་སྙིང་གཏམ་གླེང་མཁན་ཅི་ཙམ་མཆིས། འོན་ཀྱང་། ཁྱེད་རང་སྔར་བཞིན་ཁ་ཕྱོགས་དང་གདམ་ག་ཅི་ཡང་མེད་པར་མཚན་ལམ་རིང་མོ་དེ་བརྒལ་ནས་ཡལ་སོང་།        རེད་དེ། ཁྱེད་རང་གངས་ཀྱི་ར་བ་ལས་བརྒལ་ཏེ། ཨ་ཕའི་པག་ཙག་དང་ཨ་མའི་བྱམས་སྐྱོང་དང་བྲལ་ནས། ཁལ་མ་དང་སྒོ་ཁྱི། རྟ་ཕོ་དང་བུས་པ་སོགས་ཅི་ཡང་མེད་པར། རིགས་རུས་དང་གདུང་རྒྱུད་བསྐྱུར་ནས། མཆེད་ཁུངས་ཀྱི་ལོ་རྒྱུས་མེད་པའི་རྒྱང་རིང་ཞིག་ཏུ། ན་ཟུག་དང་མིག་ཆུ་ཁོག་ཏུ་སྦས་ནས་བུད་སོང་།         ཁྱེད་རང་གཞན་ཡུལ་བསྙེགས་པའི་ཉིན་དེ་ནས་བཟུང་། རྟ་ཕོའི་རྨིག་སྒྲ་དང་སྒོ་ཁྱིའི་ཟུག་སྐད་དབེན་པའི་གནས་ཤིག་ཏུ་རྟག་པར་ཁ་པར་གྱི་ཡོལ་ངོས་སུ་ཅེར་ཡོད། གར་འོངས་མི་ཤེས་པའི་གསར་འགྱུར་དང་འབྲེལ་མེད་ཀྱི་བརྡ་འཕྲིན་རེ་རེས་དུས་ཚོད་དང་ངལ་གསོ་འཕྲོག་གིན། ཕུགས་འདུན་དང་བདེ་སྐྱིད་བཅོམས་བཞིན་བསླེབས་སོང་། ཁྱེད་ཀྱིས་སྔར་བཞིན་སྙིང་སྨན་ལྟ་བུའི་དུ་བ་བག་ཆ་གང་སྔས་མགོར་བཞག་ནས་ཁེར་རྐྱང་གི་གཞིས་ཁུལ་དྲོན་མོ་དེ་བསྲུང་བཞིན་སེམས་ཁྲལ་དང་འགྱོད་སྣང་ཅི་ཡང་མེད་པར། མཚན་སྙན་དང་ཁེ་བཟང་རུམ་གང་ཉར་ནས་གཟིམས་སོང་།