གདོན་མིག་གི་ལྷུག་རྩོམ་སྙན་ངག་ཁག་བཞི།

       རི་རྩེ་དགུང་ལ་ཟུག་པའི་འདབས་ན། དེའུ་འབུར་ལབ་བ་ལེབ་བེའི་ཁུད་ན། ནགས་ཚལ་ཐར་ར་ཐོར་རའི་གསེབ་ན། དུད་ཁྱིམ་རེ་གནས་པ་དེ། གནའ་བོའི་རི་དྭགས་ཀྱི་རྡོ་སྐུ་ཞིག་དང་མཚུངས། གནམ་གྱི་ཡང་སྟེང་ནས་བབས་འོང་བའི་ལོ་མ་དེ་དག ཨ་ཡིག་གི་ཆར་བ་ཡིན་སོང་། ལྗང་ལོའི་ཁུད་ཀྱི་གྲོང་ཚོ། གྲོང་ཚོ་ལྷིང་ཞིང་འཇགས་པ་དེ་ཨང་།
       ཕ་གའི་ལུག་ཁྱུ་ཡི་འབའ་སྒྲ་ཐོས་རྒྱུ་འདུག ལྷ་བྱ་ཁུ་བྱུག་སྔོན་མོའི་གསུང་སྐད་རེའང་ཐོས་རྒྱུ་འདུག ཡིན་ནའང་། དེ་རིང་། ནམ་མཁའ་རུ་སྤྲིན་པ་ཡུག་གཅིག་མཐོང་རྒྱུ་མེད་པ་དེ་བཞིན་དུ། ས་གཞི་འདིའང་སྟོང་སེང་ངེ་བ་ཞིག
       གྲོང་ཚོ་ཆུང་ཆུང་འདི། བྱ་རྒོད་འཕུར་སའི་བྲག་ཐེམ་ཞིག་དང་འདྲ།
​​​​​​​       གྲོང་ཚོ་ཆུང་ཆུང་འདི། ཉི་ཟླའི་པང་གི་གསེར་གྱི་གཡང་ཏྲི་ཞིག་དང་འདྲ།
​​​​​​​       རྒྱང་རིང་ནས་མཐོང་བའི་མཆོད་རྟེན་དཀར་པོ་དེ། ཞི་བའི་དབྱིངས་སུ་བཞུགས་ནས་ཡུན་རིང་འགོར། བྱ་རྒོད་ཅིག བར་སྣང་དུ་ལྡིང་སྐོར་རྒྱག རླུང་བུ་ཞིག་དལ་གྱི་ལྡང་འོང་སྟེ། ས་ཚུགས་མང་པོ་ཞིག་གི་ས་ཁྲའི་སྟེང་ལ་ལྷུང་བའི་མེ་ཏོག་ལྡུམ་ར་དེ། ཉི་འོད་དང་ཆར་ཆུའི་མེ་ལོང་གི་མཛེས་སྡུག་ལ་བསྲེས།
​​​​​​​       དུང་སྐད་གཉོམ་པོ་ཐོས་ན། ནགས་ལྗོངས་ཤུག་ལོ་ཤིག་ཤིག
​​​​​​​       དབྱར་ཀྱི་ཚ་གདུང་དུ་བསྐུངས་པའི་དགུན་ཟླ་རིང་མོ། འཁྱགས་རོམ་གྱི་སྤང་ལྗོངས་སུ་ཚེས་ཡོང་ན། རྟ་ཕོ་ཁམ་པ་རྔོ་རིང་། རྨི་ལམ་ནང་ནས་བཏང་ཆོག རྔོག་ཆུང་ལྡེམ་མེ་ལྡེམ་མེ། འཚེར་སྐད་ལྷང་ངེ་ལྷང་ངེ་།
​​​​​​​       དུས་ཚོད་ནི་གཟུགས་མེད་པའི་དུག་ཆུ་བཞིན། ན་ཚོད་ཀྱི་མེ་ཏོག་ཏུ་ཐིག་དུས། སྤྲིན་དཀར་ལས་མུ་ཏིག་གི་འཇའ་ཚོན་ཤར་བ་དང་རྒྱ་མཚོའི་རླབས་སྒྲའི་ཁྲོད་དུ། རྙིང་དུ་མེད་པའི་གླུ་སྐད་ཅིག་དལ་གྱིས་མཁའ་ལ་འཕུར་ཡོང་། སྐུ་སྐད། བསྐལ་བ་སྟོང་གི་ཟམ་པ་ཇི་བཞིན།
​​​​​​​       སེམས་ཀྱི་དཔྱིད་ཁར་སླེབས་པ་དེ། སྙིང་གི་རུས་པར་རེག་པ་དེ།
​​​​​​​       སོང་ཡང་མ་ཐོན་ས་འདི་ཡིན་ཡང་། སྙེག་ནས་མི་ཚེ་ཟད་པའང་འདི་ཡིན་ཆོག འོན་ཀྱང་། མཚན་མོ་ལྟ་བུའི་ལམ་ཕྲན་འདི་བརྒལ་ན། ལོ་རྒྱུས་ཀྱི་གཡུ་བྱུར་ཕོན་ཆེ་བ་དེ་ཚོ། ལྗང་ལོའི་ཁུད་ཀྱི་གྲོང་ཚོ་འདི་རུ་བཏབ་ཆོག
​​​​​​​       གསལ་ལ་མི་གསལ་བའི་ཕྱིར་མིག་གི་ཆུ་རྒྱུན་ཀློང་ན། གཙོད་ཁྱུ་རྫ་ནས་གཤར་བའི་རྫ་ལམ་ཡོད་པ་དྲན་ཤིང་རེད། དྲོད་ལམ་ལམ་གྱི་གླེགས་བམ་དབུས་སུ། གསེར་གྱི་སྒྲ་དབྱངས་ལྷོད་ལྷོད་མཆེད་པ་གདུང་བ་རེད།
​​​​​​​       དགུན་ཟླ་འདི། མི་ཆེན་གྱིས་བསྐྱུར་བའི་ཞྭ་མོ་ཞིག་དང་འདྲ།
​​​​​​​       དགུན་ཟླ་འདི། བུད་མེད་ཀྱི་མངལ་ལ་སྦྲུམ་པའི་ཁྱེའུ་ཞིག་དང་འདྲ།
​​​​​​​       རྒྱང་རིང་ནས་གླུ་སྒྲ་ཞིག་མཆེད་འོང་བའི་ལོ་ཟླ་དེར། ངས་ནགས་ཚལ་ཞིག་ཏུ་ཉི་འོད་ལ་སྒུག་གིན་ཡོད། རི་དྭགས་རྨས་མ་ཞིག་གི་རྨིག་རྗེས་ལས་མེ་ཏོག་བཞད་ན་བསམ་དེ། དུས་ཚོད་ཀྱི་ཉིན་ཞག་མང་པོ་སྐེ་རྒྱན་དུ་བཏགས། དེ་ནི། རླུང་བུ་བཞིན། དྲན་པའི་འཕྲུལ་སྣང་བཞིན། རྨི་ལམ་གྱི་འཇའ་ཚོན་བཞིན། དུས་དང་དུས་སུ། ངའི་རྣམ་ཤེས་ཀྱི་འཇིག་རྟེན་དུ་ས་ཁྲ་བཞིན་ཤིན་ཏུ་གསལ།
​​​​​​​       བར་སྣང་སྟོང་བའི་དབྱིངས་སུ། བྱེའུ་ཁྱུ་ཞིག་འཕུར་འཕུར་ཏེ། ལོ་མ་དང་ཡལ་ག་མེད་པའི་སྡོང་སྐམ་ཞིག་ཏུ་བབས། བྱེའུ་དེ་ཚོ། མཁའ་དབྱིངས་ནས་འཐོར་བའི་ཁ་བའི་འདབ་མ་ཞིག་དང་མཚུངས། བྱེའུ་དེ་ཚོ། ལྷགས་རླུང་གིས་གཏོར་བའི་ལོ་མ་སེར་པོ་ཞིག་དང་འདྲ།
​​​​​​​       མེ་སྒྱོགས་ཀྱི་དྲག་ཆར་བབས་ཤུལ་དུ། བདེན་པའི་མེ་ཏོག་སྔར་བཞིན་མཛེས་ཤིང་ལྟ་ན་སྡུག ནད་ཡམས་དང་མུ་གེའི་རྗེས་ཤུལ་དུའང་། ཚེ་སྲོག་གི་གསོན་སྟོབས་ཀྱིས་ཡོད་ཚད་ལ་བདེ་སྐྱིད་ཀྱི་མྱུ་གུའི་ལེགས་སྐྱེས་ཕུལ། ཐ་ན། ཨར་འདམ་དང་རྣོ་ལྕགས་ཀྱི་སྲུབས་ཀ་རེ་རེ་ནས་ཀྱང་མེ་ཏོག་གི་བཀྲག་མདངས་མཚེར། 
​​​​​​​       ཡིན་ནའང་། སྡིག་ཉེས་ཀྱི་སྒེའུ་ཁུང་དེ་ལས། ངས་དམག་འཁྲུག་འཐུང་བྱུང་། ལོ་རྒྱུས་ཀྱི་རྨ་ཁ་མཐོང་བྱུང་།
​​​​​​​       གལ་ཏེ། ཤུལ་མེད་དུ་བཏང་བ་ས་གཞི་མིན་ན། ཁྱེད་ཀྱིས་མེ་ཏོག་མཐོང་སྲིད།
​​​​​​​       གལ་ཏེ། ཤུལ་མེད་དུ་བཏང་བ་ནམ་མཁའ་མིན་ན། ཁྱེད་ཀྱིས་སྤྲིན་དཀར་མཐོང་སྲིད།
​​​​​​​       ཐོ་ཡོར་གྱིས་ཁེངས་པའི་གངས་རིའི་འདབས་སུ། གཟུགས་དང་གྲིབ་མ་འཐབ་སྟེ། སྒྲ་དང་རོལ་དབྱངས་ཀྱི་བར་མཚམས་ཕྱེ་ནུས་པའི་གཏམ་རྒྱུད་སུས་ཀྱང་ཤེས་ནའང་། གླུ་སྐད་དང་བྲག་ཅའི་བར་ལ་འགལ་བ་གང་ཡང་མི་འདུག རླབས་སྒྲ་དང་རྒྱ་མཚོའི་བར་ལའང་འགལ་བ་གང་ཡང་མི་འདུག
​​​​​​​       རྒྱང་རིང་རྒྱང་རིང་ཞིག་ཏུ། འོད་ཟེར་ཞིག་ཡར་འཕག་གིན་འདུག
​​​​​​​       རྡུལ་འཚུབ་ཁྲོད་དུ་དྲོལ་ཁོལ་བསྙལ་བའི་གྲོང་ཚོ་འདི་རུ། ཡི་གེའི་སྒྲ་དབྱངས་ལ་བརྒྱུས་པའི་བདེ་སྐྱིད་ཧ་ཅང་ཆུང་ནའང་། ང་ཁྱེད་ཀྱི་མིག་ཀོང་དུ་འགྲེང་སྟེ། ར་བཟི་བའི་གར་མ་ཞིག་ལྟར། ཟློས་གར་གྱི་འཁྲབ་གཞུང་ལས་སྒྱུ་འཕྲུལ་གྱི་བདེན་པ་སྲུང་ངེས་ཡིན།
​​​​​​​       ལང་ཚོ་དང་གཟི་བརྗིད་དོར་ཏེ། ཞིང་གྲོང་དང་རྩྭ་ཐང་གི་གནས་མལ་ལ་ལོག་ཐུབ་ན། ང་ཚོ་ཆར་བ་བཞིན་ས་ལ་འཐིམ་ཆོག མེ་ཏོག་བཞིན། ཡང་བསྐྱར་བཞད་ཆོག
​​​​​​​       ཞེ་སྡང་གི་བལ་དཀར་ཁུད་དུ་མེ་ཏོག་བཞད་སོང་།
​​​​​​​       མུན་ནག་གི་ཨུ་པད་སྔོན་པོ་དེའང་། རླུང་གི་གོས་ཆེན་ཐོག་གི་རི་མོ་ཞིག་དང་འདྲ།
​​​​​​​       འབྲུག་སྒྲ་ལྡིར་ལྡིར། ཕུག་རོན་གཤོག་ཟུང་འོ་མས་བྲན་ཏེ་འོད་ཀྲིག་ཀྲིག བྲག་གདོང་སེར་པོ་དེ་ཡི་རྩེ་རུ། གཟུགས་འགྱུར་བའི་དར་ཤིང་རིང་མོ་དེ་ཡི་རྩེ་རུ། སྤྲིན་དང་དུ་བའི་གཡང་དྲུང་སོ་ལོ་ལོ། བྱེའུ་ཆུང་གི་རྨི་ལམ་དུ། ཁ་བ་འབབ་པའི་ཟོལ་གྱིས་ཞི་བདེའི་གཟུངས་སྔགས་ཐར་ཐོར་འབབ།
​​​​​​​       གླུ་ཞིག་ལོངས་དང་། མེ་མདའི་ཁ་རུ་རོལ་མོ་བཏང་ཆོག
​​​​​​​       མགོ་བོ་དགྱེས་དང་། སྐར་འོད་ཀྱིས་ཞལ་རེས་བཀྲུས་ཆོག
​​​​​​​       ཤེལ་གྱང་ཞིག་གི་ཕར་ཚུར་ནས་ཕན་ཚུན་ལ་ལྟ་བཞིན། ལག་པའི་ནང་གི་ལོ་ཏོག་ལ་གོང་ཐང་གཅོད་ཀྱིན། རལ་གྲི་ཨེ་ཉོ་བསམ་ནས་བསྡད། ངོ་གདོང་ཉི་མས་བྲད་པའི་ཞིང་བ་སྨུག་པོ་དེ་ཚོ། རང་ཁྱིམ་དུ་སྙེག་པའི་དུས་ཚུགས་མེད་པར་བྱས། དེ་ནི། གནམ་བསྐོས་ཀྱི་ལས་དབང་ལ་སྨྱོ་ནད་ཀྱི་ཟུངས་ཁྲག་གིས་ཞལ་ཞལ་བྱས་པ་དང་འདྲའམ།
​​​​​​​       ངས་ཐོས་པ་ནི་རྡོ་བའི་སྐྱོ་གླུ་ཁོ་ན་རེད།
​​​​​​​       ཡིན་ནའང་། ངང་སྒུག་ཁྲོད་དུ་ལྷག་པ་ནི་དུས་ཚོད་ཀྱི་བག་ལེབ་མིན་ལ། ཨར་འདམ་གྱི་སྦྲང་རྩིའང་མིན་པར། བཞུར་གྱིན་པའི་ཁ་དོག་ཡིན། རྨ་ཁ་མེད་པའི་ཁ་དོག་གི་འཇིག་རྟེན་ཡིན།
​​​​​​​       འགྲོས་མྱུར་བའི་གོམ་སྟབས་དེས། རེ་ཞིག་ཧད་དུ་བཅུག ལག་ཟུང་གིས་ཡང་ཡང་ཕྱེས་པའི་རབ་གསལ་ཁ་རུ་འགྲེང་སྟེ། རྒྱང་རིང་ལ་ལྟ་བའི་རྣམ་པ་དེ་དལ་དྲགས་སོང་།
​​​​​​​       གང་ལྟར། དྲག་ཆར་ཁྲོད་ནས་བརྟན་པོར་ཅུང་ཙམ་སྡོད་དང་། དྲག་ཆར་གྱིས་རྗེས་སུ་ཁྲིད་པ་ནི་འཇའ་ཚོན་གྱི་དག་ཞིང་རེད། རི་བོ་ཆུང་ཆུང་ཞིག་གི་ཤོད་དུ། ལུ་གུ་འབའ། ཁྱི་གུ་ཟུག
​​​​​​​       ཉིན་མཚན་བར་གྱི་ལྕགས་རི་ཉིལ་ནས། དུས་ཚོད་དང་དུས་ཚུགས་བར་གྱི་མཁར་གྱང་ཞིག་ནས། ང་ཚོ་ཚང་མ་ཆུ་ལོག་བཞིན་རགས་ལས་ཤོར་ནའང་། ང་ཚོ་ཚང་མ་ཆུ་བོ་ཡིན་མི་སྲིད། དེ་དུས། འཁྱམས་རོམ་ནི་ནམ་ཡང་ཉི་འོད་ཀྱི་ཕྱི་རོལ་ཏུ་ཡོད་པའི་སྤང་ལྗོངས་རེད།
​​​​​​​       ལོ་ཟླ་མང་པོ་བཞུད་སོང་།
​​​​​​​       ངས་དམག་འཁྲུག་ལ་སྒུག་ཡོད། ཡང་ན།
​​​​​​​       ཁ་སང་གི་རྒུན་འབྲུམ་ལྟ་བུའི་མེ་སྒྱོགས་ཀྱི་ཆར་བ་ལ་སྒུག་ཡོད།
​​​​​​​       སྒུག སྒུག སྒུག ད་དུང་སྒུག
​​​​​​​       དགུན་རླུང་དྲག་པོས་ཁྱུར་མིད་བཏང་ཟིན་པའི་མེ་ཏོག་དང་རྡོ་བ། སྤྲིན་དཀར་དང་འཇའ་ཚོན། རྒྱ་ཕིབས་དང་རྩྭ་ཐང་སོགས་ནི། ཁ་དོག་མེད་པའི་ཤོག་བུ་ཞིག་ལྟར་བར་སྣང་དུ་ལྷབ་ལྷུབ་སྐྱོད་ཀྱིན་འདུག ཁྱི་ཡི་ཟུག་སྐད་ཁོ་ན་རོལ་དབྱངས་སུ་བསྒྱུར་བའི་སྲང་ལམ་དེ་རུ། ཀེང་རུས་ཀྱི་རི་མོ་གཟུགས་ཅན་དུ་རྒྱུ་ཞིང་། རྒས་ཟིན་པའི་རུལ་སུངས་ཀྱི་མཛེས་སྡུག་མཐའ་དག སྒྱུ་མའི་གྲོང་ཁྱེར་དུ་ལྷིང་ངེར་མངོན།
​​​​​​​       ཕྱུ་པ་ཧྲུལ་པོ་གྱོན་མཁན་གྱི་བགྲེས་པོ་དེ་ཚོ། བར་སྒོ་ཆུང་ཆུང་ཞིག་ཏུ་ཕར་བཞུད་སོང་།
​​​​​​​       བྱི་ལ་ནག་པོ་ཞིག་དང་ལུག་ནག་པོ་དེ་གཉིས། དུས་གཅིག་ལ་སངས་རྒྱས་སོང་།
​​​​​​​       སྒེའུ་ཁུང་འཁྱགས་པ་དེ་ལས་ལྷ་ཡི་ཞལ་གཟུགས་གནང་བྱུང་། ཟླ་བའི་ངོས་སུ་བྲིས་པའི་འཁྱམ་པོའི་སྙན་ཚིག་དེ་དག ཁ་བ་དང་ཆར་བར་སྤྲུལ་ཏེ་ས་གཞིར་བབས་བྱུང་། མཆོད་པར་ཕུལ་བའི་གླིང་བྲོ་དང་གླུ་སྐད་ལས་མ་འོངས་པའི་འཇིག་རྟེན་ཤར་མར་འཆད། འོན་ཀྱང་། ད་དུང་ནམ་གསལ་ཏེ་ཞོགས་པ་མ་བསླེབས་པའི་དུས་ཚོད་འདིར། ང་ཚོས་རང་གི་ལྷམ་ཆུང་གོན་ནས་ལམ་ལ་ཆས་ཆོག་ཨང་།
​​​​​​​       ཁ་ཕྱོགས་ནོར་ཟིན། གྲུ་དཔོན་གྱིས་ཕྱོགས་སྟོན་འཁོར་ལོའང་བོར་ཟིན་པས།
​​​​​​​       རྒྱ་མཚོའི་སྨུག་སྤྲིན་སྟུག་པོའི་གསེབ་ཏུ། རླབས་རྒྱུན་དྲག་པོས་གདུང་གླུ་ཤུགས་ཀྱིས་ལེན། མ་རུང་བ་དང་ཞེ་འཁོན་ཅན། སྡིག་ཉེས་ཅན་དང་ཡུལ་འཁྱམ་པ་དག་ནི། གདུང་དབྱངས་ཕྲ་མོའི་འགྱུར་ཁུགས་དབུས་ན། ཝུ་བ་བཞིན། ཝུ་བ་བཞིན་སོབ་སོབ་བྱེད།
​​​​​​​       འཁྱགས་རོམ་གྱི་མེ་ཏོག་ལས་བུ་རུམ་གྱི་ཟེའུ་འབྲུ་སྨིན་མི་སྲིད་ནའང།
​​​​​​​       སྟོང་བ་དང་ཡོད་པ་ལས་མནར་གཅོད་ཀྱི་སྡུག་བསྔལ་མི་འབྱུང་ནའང་།
​​​​​​​       གཡང་དང་བླ་མི་གནས་པའི་མེ་ལོང་ལས་གངས་རི་འཆར་མི་སྲིད་ནའང་།
​​​​​​​       སྐད་འོད་ཁྲོད་ནས་སྐར་འོད་གཉིས་པ་དེ་གསལ་མི་ཐུབ་ནའང་།
​​​​​​​       བང་རིམ་བསྒྲིགས་པའི་འདུ་ཤེས་ཀྱི་ཁ་དོག་ལས། ཚོར་བ་སྣ་ཚོགས་ཀྱི་གཏེར་ཁ་བསྔོག་ཆོག་ལ། དབུགས་ཀྱི་རྒྱུ་བ་ལ་དྭངས་གཙང་གི་ནམ་ཟླ་བདུད་རྩི་བཞིན་ཕུལ་ཆོག ཐ་ན། ཕུགས་བསམ་ཞེས་པ་དེ། བདེན་ལུགས་ཟེར་བ་དེ། ཚེ་སྲོག་ཅེས་པ་དེ། སྐད་ཅིག་དེ་ཉིད་ལ་སྒྱུ་འཕྲུལ་གྱི་དབང་བོ་གང་རུང་ལ་བརྗེ་ཆོག་པ་མ་ཡིན་ནམ། དེ་བས། འཇིག་རྟེན་གྱི་སོ་སྐྱེས་དེ་ཚོ། འདུ་ཤེས་འོག་མའི་ཨར་ཁང་དེ་རུ་འཚང་ཁ་ཤིག་ཤིག་ཏུ་འགྲོ་བཞིན་འདུག
​​​​​​​       ཡི་གེ་འཐོར་འོང་། གཡུ་བྱུར་འཐོར་འོང་།
​​​​​​​       ཁེར་རྐྱང་གིས་འཚོ་བའི་བུད་མེད་ཀྱི་སྐྲ་ལོའང་། སྐྱུག་མེར་བའི་ཡིད་ལྗོངས་སུ་འཐོར་འོང་།
​​​​​​​       ལོ་རྒྱུས་ཀྱི་ཕྱུར་བ་ཕྱིང་དཀར་དུ་བཀྲམ་པའི། བདེ་སྐྱིད་ཀྱི་ལོ་མ་སྟོན་མཇུག་ཏུ་བཞད་པའི། བྱིན་རླབས་འབར་བའི་ལས་དབང་མཚན་ཉིད་དུ་འགོད་པའི། ཤ་ཁྲག་གི་ཡལ་ག་དེ་རུ། ཆ་མེད་རྒྱུས་མེད་ཀྱི་ངོ་གདོང་འགའ་བཀལ་འདུག
​​​​​​​       འཕྲུལ་སྣང་གི་མཁར་རྫོང་འདི་རུ། ཚེ་སྲོག་གི་གཟི་མདངས་ཁོ་ན་དགུང་དུ་འཕྱོ།
​​​​​​​       ཧྭ་པ་དང་བྱིས་པ་མཉམ་དུ་འཚོ། ཕྱེ་ལེབ་དང་རྒོད་པོ་མཉམ་དུ་འཕུར། ཆེ་བ་དང་ཆུང་བ་མེད་པའི། དཀར་པོ་དང་ནག་པོ་མེད་པའི། མཐའ་དང་དབུས་མེད་པའི། ཟངས་སྐུད་གཅིག་ལ་ཧྲིལ་གྱིས་བརྒྱུས་པ་དེ། ས་སྤར་བ་གང་ཡིན་ནམ། ཡང་ན། འོད་ཟེར་གྱི་ཞལ་འབག་ཡིན།
​​​​​​​       རབ་རིབ་ཀྱི་ཞལ་རེས་ལས་འཛུམ་མདངས་སྐྱ་བོ་ཞིག་འཚེར།
​​​​​​​       འཛིན་དུ་མེད་པའི་གཤོག་པ་ཟུང་ལས། རྣམ་རྟོག་གི་མེ་ལྕེ་དྲག་ཏུ་མཆེད།
​​​​​​​       ཡུལ་ལྗོངས། མ་འོངས་པའི་དཀྱིལ་འཁོར།
​​​​​​​       ཡུལ་ལྗོངས། ཤམ་བྷ་ལའི་ས་ཚིགས་ཐ་མ།
​​​​​​​       ཡུལ་ལྗོངས། ཡུལ་ལྗོངས། ཡུལ་ལྗོངས།