བཙན་བྷོ་ཊའི་སྙན་རྩོམ《མ་ཡུམ་སློབ་གྲྭ ངའི་དུས་གསུམ་གྱི་གཞིས་ཁྱིམ་དྲོད་མོ》།

མ་ཡུམ་སློབ་གྲྭ ངའི་དུས་གསུམ་གྱི་གཞིས་ཁྱིམ་དྲོད་མོ།
བཙན་བྷོ་ཊ།

ཁྱེད་ནི་ཁམས་གསུམ་གྱི་མུན་པ་བསལ་བར་བྱེད་པའི་ཉི་འོད་ལྟ་བུའི་སྒྲོན་མེ་ཞིག་རེད།
ཉི་འོད་ལྟ་བུའི། སྒྲོན་མེ་ལྟ་བུའི།
འོད་ཀྱིས་བྱུགས་ཤིང་དྲོད་ཀྱིས་ཁྱབ་ཡོད།
ཁྱེད་ནི་སྲིད་གསུམ་གྱི་འགྲོ་བར་མགོན་སྐྱོབ་གནང་བའི་ལྷ་ཚོགས་ལྟ་བུའི་དག་ཞིང་ཞིག་རེད།
ལྷ་ཚོགས་ལྟ་བུའི། དག་ཞིང་ལྟ་བུའི།
བྱམས་པས་ཁེངས་ཤིང་སྙིང་རྗེས་བརྟས་ཡོད།
ཁྱེད་ནི་དུས་གསུམ་གྱི་ང་ཚོར་བདེ་བ་སྩོལ་བའི་ཕ་ཁྱིམ་ལྟ་བུའི་ཁྱིམ་གཞིས་ཤིག་རེད།
ཕ་ཁྱིམ་ལྟ་བུའི། ཁྱིམ་གཞིས་ལྟ་བུའི།
བརྩེ་བས་ཕྱུག་ཅིང་དུངས་བས་གཏམས་ཡོད།
དེའི་ཕྱིར།
ང་རང་ཕ་ཡུལ་གྱི་རི་གྲོང་ནས་ལམ་ལ་ཆས་ཤིང་རྒོད་པོ་བཞིན་ནམ་འཕངས་བསྟད་དེ།
མཐའ་མེད་པའི་ཁོར་ཡུག་དང་ཀྱག་ཀྱོག་གི་ལམ་ཕྲན་གང་མང་བརྒལ་ནས།
ག་ལེར་ག་ལེར་ཁྱེད་ཀྱི་སྒོ་ཐེམ་འགྲིམས།
ཤེས་རིག་དང་དཔལ་ཡོན་གྱིས་ཕྱུག་པའི་ཁྱེད་ཀྱི་སྒོ་ཐེམ་འགྲིམས་ཏེ།
མི་ཚེ་ཞིག་གི་ཕུགས་བསམ་ལ་ཆེས་ཐོག་མའི་སྟ་གོན་བགྱིས།

མ་ཡུམ་སློབ་གྲྭ
ངས་ཆེས་ཐོག་མའི་དབྱངས་གསལ་གྱི་སྦྱོར་ཀློག་དྭངས་མ།
ཁྱེད་ཀྱི་པང་བ་ནས་བསླབས་པའི་དུས་དེ་ནས་བཟུང་།
ངས་ཆེས་ཐོག་མའི་དགེ་རྒན་གྱི་བཀའ་གསུང་ལེགས་པོ།
ཉིད་ཀྱི་རུམ་ཁུང་ནས་གསན་པའི་གླགས་དེ་ནས་བཟུང་།
ཏག་ཏག་མི་ལོ་ཉི་ཤུའི་སྐ་རགས་ཁྱེད་ཀྱི་པང་བ་ནས་བཅིངས་ཏེ།
མི་ཚེ་ཞིག་གི་ཕྱེད་ཀ་ཁྱེད་ཀྱི་རུམ་ཁུང་ནས་ཟད་ཀྱང་།
ང་ལ་འགྱོད་གདུང་མེད་ལ་འཁང་རས་དབེན་པར།
ང་ནམ་ཡང་ཁྱེད་ཀྱི་རྣམ་ཤེས་ལ་འཁྱུད་ཡོད།
ང་ནམ་ཡང་ཁྱེད་ཀྱི་འོད་སྣང་ལ་བརྟེན་ཡོད།

མ་ཡུམ་སློབ་གྲྭ
ཁྱེད་ཀྱི་དཔལ་དུ་སྤྲུམ་པའི་ཤེས་བྱའི་བཅུད་ཀྱིས།
ང་ཚོ་ལ་སྐུལ་ལྕག་ཡང་ཡང་ཐེབས་པས།
སྐལ་ལྡན་གྱི་སློབ་བུའི་ཁྱུ་ཚོགས་ཤིག
ལྷག་བསམ་དང་དྲོད་ཀྱིས་བརྟས་པའི་ཁྱེད་ཀྱི་པང་བ་ནས།
རེ་བའི་བདེ་སྐྱིད་ཀྱི་ཞིང་ལ་གོམ་ཁ་བསྙེག་གིན་གདའ།
མ་ཡུམ་སློབ་གྲྭ ངའི་དུས་གསུམ་གྱི་གཞིས་ཁྱིམ་དྲོད་མོ།
ང་ཚོ་ཁྱེད་དང་གྱེས་ནས་ཕྱིར་ཁྱེད་ཀྱི་པང་དུ་ལོག་ན།
ཁྱེད་ད་དུང་འཚོ་དགོས། ཁྱེད་སྔར་བཞིན་འཚོ་དགོས།
ད་དུང་།
ཁྱེད་ཀྱི་པང་བ་ནས་གངས་ཕྲུག་རྫོགས་མེད་ཅིག་གཉོམ་ལག་རྒྱས་ནས་ལམ་ལ་ཆས་དགོས་པས།
ཁྱེད་ནི་ང་ཚོའི་སེམས་སུ་བསྒྲོན་པའི་ཚེ་འབར་གྱི་མར་མེ་དེ་ཡིན།
ཁྱེད་ནི་ང་ཚོའི་སེམས་ཁུངས་སུ་བརྟན་བརླིང་གིས་འགྱིང་བའི་རྒྱབ་རི་སྨུག་པོ་དེ་ཡིན།
ཀྱེ་ཀྱེ། མ་ཡུམ་སློབ་གྲྭ
ངའི་དུས་གསུམ་གྱི་གཞིས་ཁྱིམ་དྲོད་མོ།