རྒྱང་རིང་གི་མི་དང་བརྩེ་བ།

རྒྱང་རིང་གི་མི་དང་བརྩེ་བ།
    བྱ་མདོ་མར་ལོ། མཚོ་སྔོན་མི་རིགས་སློབ་ཆེན་བོད་རིག་པའི་སློབ་གླིང་།

ཞོགས་སྤྲིན་ལ་ཞོགས་པ་ཐོགས་པའི་ནངས་མོར
རི་ཚོགས་ཁེར་བརླིང་གིས་འགྱིང་ཡོད
ང་ཉིད་བསམ་གཞིག་གི་རི་སུལ་དུ་འདུར་ཡང
ཁྱོད་ཉིད་བདག་གི་ཚོར་བའི་ཞོགས་པ་ནས་བྲོས་ཏེ
སྔ་མོ་ནས་ཉི་འོད་ཀྱི་གཅོང་རོང་དུ་ལྕེབས་པའི
ཟིལ་ཆུ་ནག་པོ་ཞིག་གི་ཁོག་པ་རུ་འཛུལ་སོང
 
རྒྱང་རིང་ལ་ཉན་པར་སུན་སྣང་གིས་འཚེར་བའི་ཟླ་བ
སྙིང་ཉེ་བའི་ཤོག་ལྷེ་ཞིག་རེད་དེ
ཁྱོད་ཀྱི་མིག་ལའང་ཟླ་འོད་འཁྱིལ་འདུག་པའི་སྙན་ཚིག་དེ
བདག་གིས་སྡེ་གྲོང་ཞིག་གི་ཁྲོན་པའི་ཁ་ནས་གྱེར་མྱོང
ཁྲོན་པའི་གཏིང་མཐིལ་དུ་ལྷུང་བའི་ལྷ་མོ་དེས
བདག་གི་རྣ་བའི་ཏོག་ཏུ་གྱུར་བའི་སྙན་ཚིག་དེ
ད་ལྟ་རྒྱང་རིང་དུ་མི་འདུག་སྐད
ཁྱོད་ཀྱི་མིག་གཏིང་དུའང་ཅི་ཡང་མི་འཚེར་སྐད
ཐ་ན།  ཁྱོད་ཀྱི་བར་སྣང་གི་ཟླ་བར་གྱུར་བའི་ངའང་་་་་་
 
རྒྱང་རིང་ལ་ཟུག་པའི་གདུང་སེམས་ཀྱི་གྲིབ་ཆེན
ཁྱོད་ཀྱི་བརྩེ་བའི་ས་སྲོད་དུ་སླེབས་པ་མ་བྱུང་བས
ཁྱོད་ཉིད་སྔར་ནས་ཆས་འདོད་བྱུང་ཡོད་པའི
སྐར་མ་ཆུང་ཆུང་ཞིག་གི་རུམ་ཁར་འདུར
བགྲང་གིས་མི་ལང་བའི་སྐར་ཚོགས་ཀྱི་ཁྲོད་ནས
བདག་གིས་ཁྱོད་རྙེད་བྱུང
འོན་ཀྱང་ཁྱོད་ལ་རང་གི་འཛུམ་ཆུང་མི་འདུག
ཐ་ན།  འཛུམ་ཆུང་གི་གཏིང་དུ་ལྷུང་བའི་ངའང
 
རྒྱང་རིང་གི་མི་ཨ
དབེན་འཇགས་སུ་གྱུར་བའི་ཚོར་བ་ལས
སྐག་སྒྲ་བཙན་པོ་ཞིག་མཆེད་འོངས་པ་ནི
བར་སྣང་གི་སྤྲིན་པའི་ཆག་སྒྲ་མ་རེད་དེ
ཁྱོད་ཀྱིས་སུ་ལ་བཞག་པའི་གྱེས་ཁ་མའི་གོམ་ཁ་ལས་ཤོར་བའི
རྡོག་སྣེ་ཕར་འཁོར་གྱི་བརྩེ་བ་ནག་པོ་ཞིག་གི་ཧབ་ཆ་རེད