མཐོ་འབྲིང་སློབ་མ་ཆང་གཞོན་ནུའི་སྙན་ངག་གདམས་བཀོད།

ལོ་ཟླའི་གཙང་བོ་ཤུགས་ཀྱིས་བཞུར་སོང་ངོ་། ། 
ཚེ་སྔོན་ལས་ཀྱི་རླུང་བུ་གཡུག་བྱུང་ངོ་། །
ང་ཡི་སེམས་པར་དར་ཁ་འགྲིག་སོང་ངོ་། ། 
འུ་གཉིས་ལས་འཕྲོའི་ཞགས་པ་ཆད་སོང་ངོ་། ། 
དམ་ཚིག་རྡོ་རྗེའི་མདུད་པ་ཞིག་སོང་ངོ་། ། 
ད་ལོའི་དབྱར་ལ་གྲང་རླུང་ལྡང་བྱུང་ངོ་། ། 
ད་ལོའི་སྟོན་ཆར་སེམས་ལ་བབས་བྱུང་ངོ་། ། 
ལྷགས་རླུང་འཁྱག་པོས་སྙིང་ཤ་བརྟོལ་བྱུང་ངོ་། ། 
དགུན་གྱི་གྲང་ངར་རུས་ལ་ཟུག་སོང་ངོ་། ། 
གཏམ་རྒྱུད་དེ་ལ་སེམས་པ་གླན་སོང་ངོ་། ། 
འདས་དོན་མ་ལུས་དྲན་པར་ཤར་བྱུང་ངོ་། ། 
ཕྱིར་དྲན་ཀློང་དུ་སེམས་པ་ཡན་སོང་ངོ་། ། 
གཉོམ་དུངས་སེམས་པས་ངུ་ཤུམ་འཐེན་བྱུང་ངོ་། ། 
སྙིང་གཏམ་འཕྲིན་པ་རླུང་ལ་བསྐུར་སོང་ངོ་། ། 
སེམས་སོང་ཁྱོད་རང་དྲན་ཅིང་དྲན་སོང་ངོ་། ། 
མགྲིན་པ་བརྣངས་ཤིང་ཡ་ཆུང་འདར་བྱུང་ངོ་། ། 
བརྩེ་བས་རྨས་པའི་ན་ཟུག་ལྕི་སོང་ངོ་། ། 
གདུང་བའི་མིག་ལ་མཆི་མ་འཁྱིལ་བྱུང་ངོ་། ། 
གྱེས་གདུང་ཚོར་བས་རབ་ཏུ་མནར་སོང་ངོ་། ། 
ཆུང་འདྲིས་ཡིད་ཀྱི་དྲན་ཤིང་ཡིན་སོང་ངོ་། ། 
དྲན་པའི་འཁྲི་ཤིང་བརྗེད་མེད་ཡིན་སོང་ངོ་། །  ང་ནི་ད་དུང་ཁྱོད་ལ་འཁྲེང་བའི་བརྩེ་བའི་ཕྱེ་ལེབ་ཁྲ་ཁྲ་ཡིན། ། 
ང་ནི་ད་དུང་ཁྱོད་ལ་དུངས་པའི་དངུལ་འོད་འཚེར་བའི་ཟླ་གོར་ཡིན། །
ང་ནི་ད་དུང་ཁྱོད་ལ་ཞེན་པའི་ཕྱི་མིག་འཕེན་པའི་སྐྱེས་ཕོ་ཡིན། ། 
ང་ནི་སྙན་ངག་རྟ་ཁྱུ་འདེད་པའི་ཇག་ཚོགས་ཁྲོད་ཀྱི་ཅིག་ཤོས་ཡིན། ། 
ང་ནི་ཆགས་སྡང་སྣོལ་མར་གདུ་བའི་ཐབ་ཀྱི་ཁྲོ་ཆུ་ཁོལ་མ་ཡིན། ། 
ང་ནི་ཞེ་རྩ་གཉོམ་དུང་དུང་གི་ཆུང་འདྲིས་སེམས་པ་སྐྱོར་མཁན་ཡིན། ། 
ང་ནི་ལོ་བརྒྱའི་ཁེར་རྐྱང་ཁུར་བའི་སྨྲེང་གཏམ་རིང་མོ་བྱོ་ས་ཡིན། ། 
ང་ནི་སེམས་པ་གཅོང་གིས་མནར་བའི་ཁྱོད་ཀྱི་ཁ་ཡ་ན་ཟླ་ཡིན། ། 
ང་ནི་ཕ་གིའི་ཉག་ག་གན་ནས་གློ་བུར་བུད་པའི་ལམ་པ་ཡིན། ། 
ང་ནི་ལི་ཐང་ཡུན་གྱིས་སྐོར་ཞིང་འཕྱོངས་རྒྱས་འགྲིམ་པའི་རྟ་པ་ཡིན། ། 
ང་ནི་རྫོང་རྒྱབ་ཀླུ་ཁང་ནང་གི་ཆང་མགུར་ལེན་པའི་ཕོ་གཞོན་ཡིན། ། 
ང་ནི་འཁོར་བའི་ལ་གླུ་ལེན་པའི་མོ་གཞོན་དེ་ལ་དགའ་མཁན་ཡིན། ། 
ང་ནི་སྔོན་གྱི་བརྩེ་གཞས་དྭངས་མོར་སེམས་པའི་ཕྱི་ནང་གླན་མཁན་ཡིན། ། 
ང་ནི་གནའ་བོའི་བརྩེ་སྒྲུང་དག་ལ་དམར་ཆུང་སེམས་པ་སྟེར་མཁན་ཡིན། ། 
ང་ནི་ཁྱོད་ཀྱི་སེམས་པའི་ལྡེབས་སུ་མ་བརྐོས་རི་མོ་རང་བྱོན་ཡིན། ། 
ང་ནི་ཁྱོད་རང་ཚེ་རབས་སྟོང་ལ་སྙན་ངག་ཀློང་ནས་འཚོལ་མཁན་ཡིན། །  སེམས་པ་འདི་སྤྲིན་དཀར་ཇི་བཞིན་སྤྲིན་དཀར་གྱི་འཕྱོ་སྟངས་ཇི་བཞིན། ། 
སེམས་པ་འདི་སྐར་ཚོགས་ཇི་བཞིན་སྐར་ཚོགས་ཀྱི་ཁོང་འདར་ཇི་བཞིན། ། 
སེམས་པ་འདི་རྒོད་པོ་ཇི་བཞིན་རྒོད་པོ་ཡི་གཤོག་འགྱུར་ཇི་བཞིན། ། 
སེམས་པ་འདི་མེ་ཏོག་ཇི་བཞིན་མེ་ཏོག་གི་བཀྲག་མདངས་ཇི་བཞིན། ། 
སེམས་པ་འདི་རྩྭ་ལྗང་ཇི་བཞིན་རྩྭ་ལྗང་གི་ཟིལ་བ་ཇི་བཞིན། ། 
སེམས་པ་འདི་མཛའ་གཞས་ཇི་བཞིན་མཛའ་གཞས་ཀྱི་སྨྲེང་ཤ་ཇི་བཞིན། ། 
སེམས་པ་འདི་རོལ་དབྱངས་ཇི་བཞིན་རོལ་དབྱངས་ཀྱི་འཇིག་རྟེན་ཇི་བཞིན། ། 
སེམས་པ་འདི་དུས་ཚོད་ཇི་བཞིན་དུས་ཚོད་ཀྱི་ནད་ཁྲི་ཇི་བཞིན། ། 
སེམས་པ་འདི་ཡོལ་བ་ཇི་བཞིན་ཡོལ་རྒྱབ་ཀྱི་བརྩེ་དུང་ཇི་བཞིན། ། 
སེམས་པ་འདི་ཚེར་མ་ཇི་བཞིན་ཚེར་མ་ཡི་མེ་ཏོག་ཇི་བཞིན། །
སེམས་པ་འདི་མུན་པ་ཇི་བཞིན་མུན་ནང་གི་མིག་ཟུང་ཇི་བཞིན། ། 
སེམས་པ་འདི་མཚམས་སྤྲིན་ཇི་བཞིན་མཚམས་སྤྲིན་གྱི་དམར་ཆ་ཇི་བཞིན། ། བརྩེ་བ་ཆུ་མོའི་བཞུར་རྒྱུན་འཁྱག་པས་བསྡམས། །
དུང་བ་ཟུངས་ཁྲག་ཁོལ་མའི་ཚ་རླབས་འཇགས། ། 
ཞེ་འདང་དར་དཀར་མདུད་པ་འདི་ནས་ཞིག ། 
དྲན་འཕྲིན་ཤོག་ལྷེ་རེ་རེ་རླུང་ལ་བསྐུར། ། 
སེམས་པའི་ལྡེབས་སུ་འདས་དོན་རི་མོ་གསལ། ། 
ལོ་ཟླ་ཅི་ཙམ་འདས་ཀྱང་སྔར་བཞིན་གསལ། ། 
འཁོར་བའི་ལ་མོ་བརྒལ་བའི་རི་སྐེད་ནས། ། 
ཞེན་ཆགས་དུང་བའི་ཕྱི་མིག་ལན་གཅིག་འཕེན། ། 
ཐོག་མའི་དམ་ཚིག་རྡོ་རྗེའི་མདུད་རྒྱ་ལྷོད། ། 
སེམས་དང་སེམས་པ་ཕར་དང་ཚུར་ལ་གྱེས། ། 
ཨ་གསར་བརྩེ་བའི་མེ་ཏོག་རྙིད་དེ་ཐལ། ། 
སྙིང་གཏམ་སྙིམ་པའི་རི་མོ་འདི་ནས་ཡལ། ། 
ཚེ་སྔོན་ལས་ཀྱི་ཉི་འོད་འཕྲོས་པའི་ཚེ། ། 
ཆགས་སྡང་འཐབ་པའི་འཁོར་བའི་ཐུ་འོག་ནས། ། 
དུས་ཀྱི་རྟ་ཁ་བསྒགས་ཏེ་ཉན་སྒུག་བྱས། ། 
སྐྱིད་སྡུག་གཞས་སུ་འགུགས་པར་རྣ་བ་བླགས། ། 
དྲན་པའི་རྒོད་པོ་གཤོག་རླབས་བསྒྱུར་ཏེ་འཕུར། ། 
སྲིད་པའི་སྤྲིན་ལམ་གཤགས་ཏེ་རྒྱང་དུ་ཕྱིན། ། 
མཚམས་རེར་འཁོར་བའི་རྟོད་ཐག་བཅད་ནས་ནི། ། 
དབེན་པ་བསྟེན་ལ་སེམས་པའི་རྟ་ཡང་ཤོར། ། 
སྣང་བའི་འོ་ཆུ་གཅིག་ཏུ་འདྲེས་པའི་ཚེ། ། 
སེམས་པ་ཆུ་ལ་ཆུ་བཞག་དབྱེར་མེད་འདྲེས། ། 
རེ་ཞིག་བྲལ་ཀྱང་གདུང་བའི་སྨྲེང་གླུ་ལེན། །  
འཇིག་རྟེན་སྙིང་བོས་དབེན་ལ་རྣ་མི་གཡོར། ། 
དྲན་གདུང་གཏམ་གྱི་གྲུ་ཤན་རྟ་མགོ་མ། །  
མཆི་མའི་རྒྱ་མཚོ་ལན་མང་བརྒལ་དགོས་བྱུང་། ། 
རང་རང་ཡུལ་གྱིས་བསྐལ་བའི་ཕ་མཐའ་ནས། ། 
ལས་ཀྱི་གྲུ་ཁར་ལོ་སྒུག་ཟླ་སྒུག་བྱས། ། 
འདི་སྣང་ལས་ཀྱི་ནུབ་རླུང་ལྡང་བའི་ཚེ། ། 
བརྩེ་བའི་རྟ་ཕོ་སྲབ་མདའ་བཅད་ནས་ཤོར། ། 
ཡིད་ཀྱི་སྤང་དུ་ཕྱིར་དྲན་རྨིག་རྗེས་ཕབ། ། 
སྒྲ་འཛིན་རྣ་བར་དུང་བའི་འཚེར་སྐད་འཁོར། །  
ལྷོ་རུ་འཕུར་བའི་བྱ་ཁྱུའི་གཤོག་རྡང་གིས། ། 
ཁྱོད་ཉིད་ཡིད་ཀྱི་མཁའ་རུ་ཟླ་ལྟར་ཚེས། ། 
ལྷན་འཛོམས་འཚོ་བའི་ཟུར་ཙམ་དྲན་པས་བསླངས། ། 
ལོ་ཟླའི་རྨ་ཁར་སྐྱོ་གདུང་ལྷན་པ་གླན། ། 
སེམས་པའི་རི་ལ་སྨྲེང་བའི་ན་བུན་འཁྱུད། ། 
ས་སྲོད་རེ་རེར་སྨྲེང་གླུ་སེམས་སུ་བླངས། ། 
ནུབ་ཁའི་གཙང་འགྲམ་འཇག་རྩྭའི་ཤུགས་གླུ་ཡིས། ། 
མགྲིན་པ་བརྣངས་ཤིང་སྙིང་ལ་སྐྱོ་ཡུས་འཁོར། ། 
གྲང་རླུང་ལྡང་བས་མཚན་གྱི་རྨི་ལམ་དཀྲོགས། ། 
མིག་ཟུང་བཙུམས་པས་ཁྱོད་ཉིད་སེམས་སུ་ལྷུང་། ། 
གྱེས་གདུང་འདི་ཀོ་གཟུགས་མེད་འཕྲུལ་འཁོར་ལྟར། ། 
ང་ཡི་གློ་མཆིན་དྲན་པ་མ་ལུས་འཐག ། 
ད་ནི་སླར་ཡང་དགུན་ཁ་ཚེས་སོང་ངོ་། ། 
སེམས་པའི་གཏིང་དུ་འཁྱག་པའི་གྲང་ཤ་ལྷུང་། ། 
མིག་གི་མཐའ་ལ་གཙང་བོའི་བཞུར་རྒྱུན་འཁྱིལ། ། 
ལུས་ཀྱི་ཕྱི་ནང་ཙག་བསེར་རླུང་གིས་བརྟོལ། ། 
མི་ཚེ་མཐའ་བྲལ་མྱ་ངམ་ཐང་ཆེན་ནས། ། 
གནམ་གྱི་རྒྱལ་མོའི་བཀའ་ཆད་ཕོག་པ་འམ། ། 
ལན་ཆགས་བུ་ལོན་ངང་གིས་སླེབས་པ་འདྲ། ། 
སེམས་པའི་རྟ་ཁྱུ་སྐོམ་གདུང་ཐན་པས་གཟིར། །