རང་ལ་འཁང་བ།

རི་ཆུང་ཆུང་གི་མཛེས་པ་རུམ་ལ་བཅུག་ནས། ། 
གངས་དཀར་དཀར་གྱི་ཁ་དོག་རྐང་བས་བསུབ་ནས། ། 
སེམས་རྣམ་དག་གི་བརྩེ་བར་ངོ་ལོག་བྱས་ཏེ། ། 
ཕྱི་པྲ་ཆལ་གྱི་འཇིག་རྟེན་སྡུག་གིས་གཉོར་ཡ། ། 

སེམས་བདག་མེད་ཀྱི་རྟ་ཕོ་སྒྲོག་ལ་བཅུག་ནས། ། 
ས་ཐག་རིང་གི་གཞོང་ལ་རྡོག་ཁ་ཁྱེར་ཏེ། ། 
ལུས་དབང་མེད་ཀྱི་ཕུང་བོ་བྱ་སྦྱིན་བྱེད་སྔོན། ། 
རེ་ཆེ་ཆུང་གི་སྨོན་ལམ་སྙིམ་པས་སྐྱོར་ཡ། ། 

སྡུག་སེམས་ནག་གི་རླུང་རྟ་མཁའ་ལ་སྤུར་ནས།། 
སྐྱིད་བསམ་དཀར་གྱི་ཁ་ལས་རྡོག་པའི་མནན་ཏེ། ། 
སེམས་གངས་དཀར་ཀྱི་གདོང་ལ་དྲི་ནག་འབྱུག་བཞིན། ། 
ཁྲེལ་གཞུང་དྲང་གི་གཤིས་ཀ་ཡལ་བར་འདོར་ཡ། ། 

སྐྱིད་འཛད་མེད་ཀྱི་དགའ་ལྡན་ཡིད་ལ་སྒོམ་རུང་། ། 
སྡུག་ཆད་མེད་ཀྱི་འཁོར་བ་གཡས་བསྐོར་བྱས་ཏེ། ། 
སྐྱོན་ཉོན་མོངས་ཀྱི་ཉ་མོ་ཐབ་ནས་གདུ་ཞོར། ། 
སྡུག་ཆུ་ནག་གི་དུག་ཁུ་ཧུབ་ཀྱིས་བཏུང་ཡ། །