logo

༄༅། །ཁྲི་ཀ་རྫོང་འཕྲང་དམར་མི་རིགས་བཅའ་སྡོད་སློབ་ཆུང་གི་སློབ་མའི་སྦྱངས་རྩོམ་ལས་ཁག་གཉིས་པ།

རྩོམ་པ་པོ།:ཁྲི་སྐལ་བཀྲ། ཡོང་ཁུངས།:མཚོ་སྔོན་པོ་དྲྭ་བ། དུས་ཚོད།:2021-11-26 ཀློག་གྲངས།:
༄༅། །ཁྲི་ཀ་རྫོང་འཕྲང་དམར་མི་རིགས་བཅའ་སྡོད་སློབ་ཆུང་གི་སློབ་མའི་སྦྱངས་རྩོམ།
ངའི་ཨ་མ། 
ལོ་རིམ་ལྔ་བའི་འཛིན་གྲྭ་གསུམ་པ། བཙུན་མོ་ཅོག
        ཨ་མ་ནི་ང་ཚོ་ལ་མི་ལུས་རིན་ཆེན་གནང་མཁན་ཡིན། ཨ་མ་ཡོད་པ་ནི་སྐྱེ་བོ་ཚང་མས་བསོད་ནམས་ཤིག་ཏུ་བརྩི་བ་རེད། འཇིག་རྟེན་གྱི་སྐྱེ་བོ་ཚང་མར་ཨ་མ་རེ་ཡོད། ང་ལའང་ཨ་མ་བྱམས་བརྩེ་ལྡན་པ་ཞིག་ཡོད། མོའི་མིང་ལ་སྙིང་མོ་ཅོག་འབོད། མོ་ད་ལོ་ལོ་སོ་གཅིག་ཡིན། མོའི་ངོ་གདོང་ནི་ཅུང་ཙམ་ནག་ལ་དེ་འདྲ་ནག་རྒྱུའང་མེད། མོའི་ནག་ཅིང་སྟུག་པོའི་སྨིན་མ་གཉིས་ཀྱི་འོག་ན་ཐོ་རེངས་སྐར་ཆེན་ཅན་གྱི་མིག་ཟུང་གཉིས་ཡོད། མོའི་སྐྲ་ནག་པ་ནི་ཀྲེ་ནག་ཅིག་དང་མཚུངས། གཟུགས་ལུས་ཚིགས་དྲུག་སྨྱུག་མ་དང་འདྲ་བ་ཡོད་པས། ཁོ་མོ་ནི་ངེད་ཚང་ལ་བཀའ་དྲིན་ཤིན་ཏུ་ཆེ་བའི་ཁྱིམ་འཛིན་མ་ཞིག་ཡིན།
        ཉིན་ཞིག་ལ། ཨ་མ་ངེད་སློབ་གྲྭར་ང་དང་ཨ་ཅེ། ནུ་མོ་གསུམ་ལ་སྐོར་རྒྱག་ཏུ་ཐོན་འདུག ངས་ཨ་མར་ང་ལ་འབྲི་དེབ་གཅིག་མ་གཏོཊ་ཅི་ཡང་མི་དགོས་པར་བཤད། ཨ་མས་འབྲི་དེབ་ཉོས་ནས་ཕྱིར་ཡོང་དུས། ང་ཚོའི་སློབ་མ་ཞིག་གིས་ཁྱིམ་བདག་ལ་ཞ་སྨྱུག་བཞི་དང་ལྕགས་སྨྱུག་ཅིག་ཉོ་རོགས་ཟེར་བས། ཁྱིམ་བདག་དེས་བྱིས་པར་ང་ལ་སྒོར་མོ་མང་པོ་མེད་པས་རྗེས་སུ་ཉོ་ཞེས་བཤད་སོང་། ཨ་མས་སྐད་ཆ་དེ་ཐོས་མ་ཐག ཨ་མས་སློབ་གྲོགས་དེ་ལ་གྲོགས་པོ་ཆུང་ཆུང་ལགས། ཁྱོད་ཀྱི་སེམས་མ་ཕམ་དང་ཅི་དགོས་ངས་ཁྱོད་ལ་ཉོ་ངེས་ཡིན་ཟེར་ཞོར་དུ་ཚོང་ཁང་དུ་རྒྱུགས་ནས་ཉོས་ཡོང་སྟེ་བྱིན། སློབ་གྲོགས་དེས་བཀའ་དྲིན་ཞུས་ནས་ཨ་མར་ངེད་ཚང་ལ་རྒྱུ་ནོར་དེ་འདྲ་མེད་པས་ཁྱོད་ལ་སྤྱིན་ཚབ་སྤྲོད་མི་ཐུབ་ལ། ངའི་ཨ་ཕས་ང་རྒྱུན་དུ་སློབ་གྲྭར་འགྲོ་སྐབས་སྒོར་མོ་ཅི་ཡང་མི་སྟེར་ལ་ཐ་ན་སློབ་སྦྱོང་གི་ཡོ་བྱད་ཡང་ཉོ་མི་ཐུབ་པ་ཡིན་ཞེས་བཤད་པ་ཐོས་པ་ན། ཨ་མ་ཡང་བསྐྱར་ཚོང་ཁང་དུ་བརྒྱུགས་ནས་ཁོ་ལ་སློབ་སྦྱོང་གི་ཡོ་བྱད་མང་པོ་ཉོས་ཏེ་སྟེར་སྐབས་སློབ་གྲོགས་དེས་ཅི་ཞིག་བཤད་དགོས་པའང་མི་ཤེས་པར་རང་དབང་མེད་པར་ཁ་ནས་ཨ་ནེ་ལགས། ང་ལ་འདི་འདྲ་མང་པོ་ཞིག་མི་དགོས་ཞེས་བཤད་པ་ན། ཨ་མས་དེ་མ་ཐག་ཏུ་ཁྱོད་ཀྱིས་འཛེམ་དོགས་མ་བྱེད་ཟེར་བཞིན་ལག་ཏུ་བཞག དེ་ནས་སློབ་གྲོགས་དེའི་སེམས་དགའ་བས་མྱོས་ཏེ་ཨ་མར་ཡང་ཡང་བཀའ་དྲིན་ཞུས་ཤིང་། ཨ་མས་ཀྱང་གདོང་ལ་འཛུམ་མདངས་ཀྱིས་ཕྱུག་ནས་ལག་པ་གཡུག་ཞོར་དུ་སློབ་གྲྭ་དང་ཁ་བྲལ་སོང་། ན་ནིང་དགུན་ཚུགས་པ་ན། ནམ་ཟླ་ཧ་ཅང་འཁྱགས་པས། ཨ་མས་ནུ་བོ་དང་ངེད་གཉིས་ཀྱིས་སློབ་གྲྭ་རུ་གྲང་སྡུག་མྱོང་བར་དོགས་ནས། དགུན་ལྷམ་དང་དགུན་ལྭ་བཟོས། མཚམས་རེར་ང་རང་གཉིད་ཐུན་གཅིག་ལོག་ནས་སད་དུས། ཨ་མས་ད་དུང་སྒྲོན་མེ་འོག་ཏུ་ལྭ་བ་འཚེམ་བཞིན་ཡོད། ཡིན་ན་ཡང་། མོའི་གདོང་ལ་ཐང་ཆད་པའི་སྣང་བ་སྤུ་ཙམ་མེད། ཉི་མ་འགའ་འགོར་བ་ན་མོས་དགུན་ལྷམ་ཆ་གཉིས་དང་དགུན་ལྭ་ཆ་ཚང་གཉིས་བཟོས་ཚར་ཡོད། ཕྱི་ཉིན་ནུ་བོ་དང་ངེད་གཉིས་ཀྱིས་དགུན་ལྷམ་དང་དགུན་ལྭ་གསར་བ་གྱོན་ནས་སློབ་གྲྭར་སོང་བ་ན། ག་ས་གང་དུ་སོང་ཡང་གྲངརེག་གི་ཚོར་བ་ཅུང་ཙམ་ཡང་མེད། འདི་ལྟར་ཉི་མ་རེ་རེ་བཞིན་ཕར་ལ་འདས་སོང་།  
        ཨ་མ་ལགས། ཁྱེད་ངའི་སེམས་ཁུང་གི་ཆེས་མཛེས་པའི་ཨ་མ་དེ་ཡིན། ཆེས་བྱམས་བརྩེ་ལྡན་པའི་ཨ་མ་དེ་ཡིན། ཨ་མ་ལགས། ཁྱེད་ཀྱི་དྲིན་ལན་བུ་མོ་ངས་འཇལ་དཀའ་རུང་། ངས་མུ་མཐུད་དུ་སློབ་སྦྱོང་ལ་འབད་པ་ལྷོད་མེད་བྱས་ཏེ། རང་གི་ཕུགས་འདུན་དྲོན་མོ་མངོན་འགྱུར་བྱས་ནས་ཁྱེད་ལ་ལྷག་བསམ་རྣམ་དག་གིས་དྲིན་ལན་འཇལ་རྒྱུ་ནི་བུ་མོ་ངའི་མཐའ་མཇུག་གི་རེ་བ་ཉག་གཅིག་དེ་ཡིན།
ང་ཡི་ཕ་ཡུལ།            
ལོ་རིམ་དྲུག་པའི་འཛིན་གྲྭ་ལྔ་བ། མཁའ་འགྲོ་འཚོ།
        ང་ཡི་ཕ་ཡུལ་ནི་ཨ་མྱེས་བྲག་དཀར་གྱི་ལྷོ་ཕྱོགས་སུ་གནས་པའི་གཡང་སྡེ་ཕྱུག་མོ་སྟེ། གཡུ་བཟང་གཡུ་ཡིས་ལན་བརྒྱར་འཕྱིས་འདྲའི་ཐང་ཆེན་ན་ཆགས་པའི་ལྷ་སྡེ་སྡེ་བ་ཡིན། 
        ང་རང་ཆུང་དུས་ནས་གཡང་སྡེ་ཕྱུག་མོའི་ཕ་ས་རུ་རིམ་གྱིས་ནར་སོན་པ་ཡིན། ནམ་རྒྱུན་ཐོས་འཛིན་གྱི་བུ་ག་རུ་ཕ་ཡུལ་ཞེས་པའི་མིང་ཚིག་དེ་གཉིས་ཐོས་ཚེ། ང་ཡི་སེམས་སུ་དབང་མེད་དུ་གཅེས་སུ་འོས་པའི་ཕ་ཡུལ་དེ་དྲན་བྱུང་། གཡང་ས་དེ་ཆེ་རྒྱུ་མེད་རུང་། དེ་རུ་འཚོ་སྡོད་བྱེད་པའི་སྡེ་མི་ཉེ་འབྲེལ་ཡོངས་ཀྱི་སེམས་སུ་བདེ་སྐྱིད་ཀྱིས་ཁེངས་འདུག
        ཞོགས་པར། སྔ་མོ་ནས་མལ་ལས་ཡར་ལངས་ཏེ། ཕྱི་རུ་འཆམ་འཆམ་དུ་སོང་ཚེ། མིག་མདུན་དུ་འཆར་བ་ནི་མུ་མཐའ་མེད་པའི་རྩྭ་ཆུ་ཉིས་འཛོམས་ཀྱི་རྩྭ་ཐང་ཡིན་ལ། དེ་ཡི་མཁའ་དབུགས་ནི་ས་ཆ་གང་གི་མཁའ་དབུགས་ལས་ཀྱང་དྭངས་ཤིང་གཙང་ལ། དེ་རུ་སོང་ཚེ་སེམས་ཁམས་ཀྱང་ཧ་ཅང་བདེ་ཞིང་སྐྱིད་པོ་ཡོང་།
        ངས་བསམ་ན་ཁྱེད་ཀྱི་སེམས་སུ་ང་ཡི་ཕ་ཡུལ་དུ་རྩྭ་མ་གཏོགས་མེད་པར་འདོད་སྙམ། དེ་འདྲ་ཞིག་མ་ཡིན་ཏེ། ང་ཡི་ཕ་ཡུལ་དུ་རྩྭ་ཐང་མ་གཏོགས་ད་དུང་རྟ་ནོར་ལུག་གསུམ་ཡོད་དེ། དེ་དག་མུ་མཐའ་མེད་པའི་རྩྭ་ཐང་སྟེང་ན་གཡང་དཀར་ལུག་ཁྱུ་ཐང་མར་བརྡལ་བ་ལྟར་འདུག་པ་དེ་ནི་ལྗང་མདོག་གི་གདན་འཇམ་སྟེང་དུ་མེ་ཏོག་དཀར་པོ་བརྩེགས་ཡོད་པ་དང་གཉིས་སུ་མ་མཆིས། ད་དུང་གངས་རི་དཀར་པོ་དང་དྭངས་གཙང་གི་ཆུ་བོ། ཁ་དོག་རྣམ་པར་བཀྲ་བའི་སྣ་བརྒྱའི་མེ་ཏོག་སོགས་མང་པོ་ཡོད་ལ། སྲོག་ཆགས་འབའ་འབུ་དང་འདབ་ཆགས་བྱ་བྱེའུ་སོགས་ཀྱང་བག་ཡངས་སུ་གནས་ཡོད། ཁྱོད་ཚོས་བལྟས་ཚོད་དུ་ཡུལ་སྡེ་དེ་ནི་སྤྱིར་བཏང་བ་ཞིག་ཏུ་འདོད་ཡོད་མོད། འོན་ཀྱང་། ཁྱོད་ཚོས་མིག་གཉིས་ཀྱིས་ཞིབ་མོར་བལྟས་ཚེ། དེ་ནི་རི་མོ་བ་གྲགས་ཅན་གྱི་པུར་ལས་ཐོན་པའི་བརྩམས་ཆོས་ཤིག་དང་འདྲ་སྟེ། དུས་ནམ་ཡང་དེ་འདྲ་མཛེས་སྡུག་ཡིད་དུ་འོང་བའི་ཡུལ་ལྗོངས་ཤིག་ཡིན། རྒྱུ་མཚན་ནི་ནམ་ཡང་བྲིས་མི་ཚར་བའི་མུ་འབྲེལ་རི་མོ་ཞིག་དང་མཚུངས་པས་སོ། །
        ངས་མཛེས་སྡུག་ཡིད་དུ་འོང་བའི་ཕ་ཡུལ་གྱི་འགྱུར་ལྡོག་ལ་བལྟས་ཏེ། ཕ་ཡུལ་ལ་བསྟོད་གླུ་ཞིག་ལེན་པར་འདོད་ལ། ཡིད་ཀྱི་བརྟན་པ་ཅིག་ཅར་དུ་འཕྲོག་པའི་ཡུལ་གྲུ་དེ་སྔར་ལས་ལྷག་པ་ཞིག་ཏུ་འགྱུར་བ་ལ་ནུས་ཤུགས་ཡོད་ཚད་འབུལ་བར་མོས་ཤིང་། གུས་མོ་ས་ཕྱོགས་གང་དུ་ཕྱིན་རུང་། ལྷ་ཡུལ་ལྟར་མཛེས་པའི་ཕ་ཡུལ་དེ་ངའི་གངས་དཀར་སེམས་ཀྱི་དཀྱིལ་དུ་གནས་ངེས་ཡིན།
བརྗེད་དཀའ་བའི་འདས་དོན།    
ལོ་རིམ་དྲུག་པའི་འཛིན་གྲྭ་དྲུག་པ། རྡོ་རྗེ་འཚོ།
        ངུ་ངག་གི་དབྱངས་རྟ་སྙན་མོའི་འགྲོས་དང་བསྟུན་ཏེ། འཇིག་རྟེན་མི་ཡུལ་འདིར། བགྲོད་དཀའ་བའི་མངར་སྐྱུར་ཁ་གསུམ་གྱི་འཚོ་བའི་བརྒྱུད་རིམ་མང་པོ་ཞིག་ཀྱང་གསལ་ལེར་མངོན་བྱུང་། རེད་ཡ། འདི་དག་ལས་དགའ་སྐྱོ་འདྲེས་མའི་བྱིས་དུས་ཀྱི་འཚོ་བའི་བརྒྱུད་རིམ་དེ་ངའི་སེམས་ཀྱི་གཏིང་རིམ་དུ་དུས་རྟག་ཏུ་བརྗེད་ཐབས་མེད་ལ་རྡོ་ལ་རི་མོ་བརྐོས་འདྲའི་བག་ཆགས་ཟབ་མོ་ཞིག་བཞག
        སྔོན་ཆད། བདག་ནི་ཕྱུགས་རྫི་བུ་མོ་ཆུང་ཆུང་ཞིག་ཡིན་ལ། ནམ་རྒྱུན་འུར་ཆ་ཐུང་ཐུང་དེ་མགོ་ནས་བསྐོར་ཞིང་གཞས་ཆུང་ངག་ནས་གྱེར་བཞིན་ཤ་ཤེད་རབ་ཏུ་རྒྱས་པའི་ཕྱུགས་རྗེས་སུ་བསྐྱོད་པ་ཡིན། ཡིན་ནའང་། བདག་ལོ་ན་བརྒྱད་ལ་སོན་པའི་ལོ་དེའི་འབྲུ་དྲུག་སྙེ་མའི་མགོ་ལྕོག་ལྡེམ་ལྡེམ་གཡོ་བའི་སྟོན་དུས་ཤིག་ལ། བདག་གིས་དྲིན་ཆེན་ཕ་མའི་རེ་བ་དང་སྨོན་འདུན་རུམ་ནས་སློབ་ཆུང་གི་སྒོ་ཐེམ་ལ་གོམ་པ་དང་པོ་སྤོས་པ་དེ་ཡིན། དུས་དེ་ནས་བཟུང་སྟེ། བདག་ནི་མ་རབས་པྲ་ཆལ་གྱི་བྱིས་པ་སྣབས་ལུག་ཅིག་ནས་བརྩོན་འགྲུས་ཀྱི་རྟ་མཆོག་ལ་རྟ་ལྕག་གིས་བསྐུལ་ཏེ་མུ་མཐའ་མེད་པའི་ཤེས་བྱའི་ཐང་ཆེན་དུ་བསྐྱོད་པའི་ཕུཊ་འདུན་དང་ཡིད་ཆེས། བརྩོན་འགྲུས་བཅས་ཀྱིས་ཁེངས་པའི་སློབ་མ་ཞིག་ཏུ་གྱུར་མོད། ཡིན་ཡང་། དེ་དུས་ནམ་རྒྱུན་དགེ་རྒན་བཟང་པོའི་བསླབ་བྱ་སེམས་སུ་མ་བཟུང་བར་རྣམ་གཡེང་གི་དབང་དུ་སོང་ནས་བསྡད་མཐར། ཕམ་ཁ་ལས་རྒྱལ་ཁ་མེད་པས།སློབ་གྲྭར་ཡོང་མི་འདོད་པའི་སློབ་བུ་མ་རབས་པྲ་ཆལ་ཞིག་ཏུ་གྱུར།
        བརྗེད་མེད་པ་ནི་སྐབས་དེར་གདོང་ལ་བྱམས་བརྩེ་དང་འཛུམ་མདངས་ཀྱིས་འཁྱིལ་བའི་རྒན་ཡུམ་མཚོ་རྒྱལ་ལགས་ཀྱིས་ནམ་རྒྱུན་ནངས་སྔ་ལངས་དང་དགུང་འཕྱི་ཉལ་བྱས་ནས་བདག་ལ་ཟུར་ཁྲིད་བྱས་པ་དང་། སློབ་གསོ་བཏང་ནས་སློབ་བུ་ཡ་རབས་ཚུལ་ལྡན་བཟང་པོ་ཞིག་ཏུ་འགྱུར་རྒྱུ་དང་། སློབ་སྦྱོང་ལ་ནན་ཏན་བྱ་དགོས་པ་སོགས་ཀྱི་ཁ་ཏ་སློབ་གསོ་བཏང་བར་མ་ཟད།ད་དུང་། བདག་གི་རྨོངས་མུན་ལྟ་བུའི་ཡིད་ཀྱི་ཞིང་ས་རུ་ཤེས་བྱའི་མེ་སྟག་ཆེམ་ཆེམ་འཕྲོ་བ་ལྟར་བྱུང་བས། བདག་སློབ་ལ་སྤྲོ་ཞིང་བརྩོན་སེམས་ཆེ་བའི་སློབ་བུ་ཞིག་ཏུ་གྱུར། དེའི་རྐྱེན་གྱིས་རྒྱུགས་ལེན་ཐེངས་ཤིག་ལ།བདག་གིས་ཨང་དང་པོ་བླངས་པ་ན། རྒན་ལགས་ཐུགས་རབ་ཏུ་དགྱེས་ནས་བདག་ལ་བཟང་བསྟོད་གང་མང་བྱས་སོང་། དེའི་རྗེས་སུ་སློབ་བུ་ངས་དགེ་རྒན་ལགས་ལ་བཀའ་དྲིན་ཞུས་པ་ན། རྒན་ལགས་ཀྱི་གདོང་ལ་བཅོས་མིན་གྱི་འཛུམ་མདངས་ཤིག་ཤར་བྱུང་། དེ་ནི་དགེ་རྒན་གྱིས་མི་ལོ་འདི་དག་གི་རིང་ལ་སློབ་བུ་ངའི་ཆེད་དུ་བཏོན་པའི་ཟུངས་ཁྲག་དྲོན་མོ་དེ་ཆུད་ཟོས་སུ་བཏང་མེད་པ་ཤེས་ཡོད། དེ་བས། མ་རབས་པྲ་ཆལ་གྱི་སློབ་བུ་ངས་དགེ་རྒན་གྱི་བཀའ་དྲིན་ནམ་ཡང་བརྗེད་མི་སྲིད་དོ། །
        རེད་ཡ། བདག་ལོ་བཅོ་ལྔ་ལ་སོན་རག་བར་དུ་དགའ་འོས་པའི་དོན་དག་དང་སྐྱོ་འོས་པའི་དོན་དག  དགོད་བྲོ་བའི་དོན་དག་སོགས་བགྲང་ལས་འདས་པ་ཞིག་བྱུང་ཡོད་རུང་། ད་ལྟའི་བར་དུ་བརྗེད་དཀའ་ཞིང་རྡོ་ལ་རི་མོ་བརྐོས་པ་བཞིན་བདག་གི་དྲན་པའི་མེ་ལོང་ངོས་སུ་བག་ཆགས་ཆེས་ཟབ་མོ་བཞག་ཡོད་པ་ནི་རྒན་ཡུམ་མཚོ་རྒྱལ་ལགས་ཀྱིས་ང་རང་བྱམས་བརྩེ་དང་ཐུགས་ཁུར་ངང་བསྐྱངས་ནས་ཤེས་བྱའི་ནུ་ཞོ་བླུད་པ་དེ་ཡིན་ནོ། །
རྩོམ་ཡིག་མཁོ་འདོན་གནང་མཁན་གྱི་དགེ་རྒན་ཁྲི་སྐལ་བཀྲ་ལགས་ལ་ཐུགས་རྗེ་ཆེ་ཞུ་བ་ཡིན།
འབྲེལ་ཡོད་འོས་སྦྱོར།