བོད་རིགས་རྒྱང་རྒྱུག་ལུས་རྩལ་པ་མཚོ་མོ་སྐྱིད།

ལུས་རྩལ་པ་མཚོ་མོ་སྐྱིད།

　　ཟླ9པའི་ཚེས11ཉིན། རྒྱལ་ཡོངས་ལུས་རྩལ་འགྲན་ཚོགས་སྐབས་བཅུ་གཉིས་པའི་སྐྱེས་མའི་སྨི10000གི་རྒྱང་རྒྱུག་འགྲན་སྡུར་ཆེན་མོ་ཡོངས་སུ་མཇུག་རྫོགས་ཤིང་། མཚོ་སྔོན་ཞིང་ཆེན་ནས་ཡོང་བའི་ལོ་ན་ཉེར་གཅིག་ལ་སོན་པའི་བོད་རིགས་བུ་མོ་མཚོ་མོ་སྐྱིད་ཀྱིས་ཟླ9པའི་ཚེས9ཉིན་སྨི5000ཡི་རྟིང་རྩོད་འགྲན་སྡུར་ཁྲོད་སྐར་མ15དང་སྐར་ཆ49ཡི་གྲུབ་འབྲས་ཀྱིས་དངུལ་གྱི་རྟགས་མ་བླངས་རྗེས། ཟླ9པའི་ཚེས11ཉིན་སྐར་མ30དང་སྐར་ཆ55:66གི་གཟེངས་སུ་ཐོན་པའི་གྲུབ་འབྲས་ལ་བརྟེན་ནས་གསེར་གྱི་རྟགས་མ་བླངས་པ་རེད།
　　ལུས་རྩལ་པ་མཚོ་མོ་སྐྱིད་ནི་ཆུང་དུས་ནས་འགྲན་རྒྱུག་བྱེད་པར་དགའ་ཞིང་དེའི་ཐད་ལ་ལྷན་སྐྱེས་ཀྱི་འཇོན་ནུས་ཆེན་པོ་ཡོད་ལ། ལོ་ངོ12སྟེང་ནས་བཟུང་ཕ་ཡུལ་དང་རིང་གྱེས་ནས་འབྲིང་རྒྱུག་དང་རྒྱང་རྒྱུག་ལུས་རྩལ་སྦྱོང་བའི་འགོ་བརྩམས། ཁོ་མོ་སློབ་ཆུང་འགྲིམ་དུས་ནས་བཟུང་འགྲན་རྒྱུག་ཐད་ལ་འབྲས་བུ་ཚར་དུ་དངར་བ་བླངས་ཡོད་པ་སྟེ། 2002ལོར་ནུབ་མཚོ་གྲོང་རྡལ་དུ་བསྡུས་པའི་གྲོང་སྐོར་འགྲན་སྡུར་སྟེང་ཞུགས་ནས་གྲུབ་འབྲས་ལེགས་པོ་བླངས་པ་དང་། 2003ལོར་ཞིང་ཆེན་ཡོངས་ཀྱི་སློབ་འབྲིང་སློབ་མའི་ལུས་རྩལ་འགྲན་ཚོགས་སྟེང་ཞུགས་ནས་སྨི1500དང་སྨི3000ཅན་གྱི་འགྲན་རྒྱུག་རྣམ་གྲངས་རིགས་གཉིས་ཀྱི་བྱ་དགའ་ཨང་དང་པོ་བླངས། 2006ལོར་ཞིང་ཆེན་ཡོངས་ཀྱི་ལུས་རྩལ་འགྲན་ཚོགས་སྟེང་ཁོ་མོས་ཡང་བསྐྱར་སྨི1500དང་སྨི3000ཅན་གྱི་འགྲན་རྒྱུག་རྣམ་གྲངས་རིགས་གཉི་ཀའི་ཨང་དང་པོ་བླངས་པར་མ་ཟད། ར་ཕྱིའི་ འགྲན་རྒྱུག་གི་ཨང་དང་པོ་བླངས་པས། དེ་མ་ཐག་དུ་ཁོ་མོའི་སྙན་པའི་གྲགས་པ་ཡུལ་དེའི་ཕྱོགས་ཀུན་དུ་ཁྱབ་ཅིང་ལུས་རྩལ་ཁྱབ་ཁོངས་ཀྱི་རྒྱང་རྒྱུག་པའི་གྲས་ནས་གཟེངས་སུ་ཐོན། མོ་ལོ18སྟེང་། ཧྲང་ཧེ་ནས་བསྡུས་པའི་རྒྱལ་སྤྱིའི་མཱ་ལ་སུང་རྒྱང་རྒྱུག་འགྲན་སྡུར་གྱི་ལམ་ཕྱེད་འགྲན་སྡུར་གྱི་སྐྱེས་མའི་ཚན་ཆུང་བྱ་དགའ་ཨང་དང་པོ་བླངས། ཁོ་མོས་ཡིད་ཆེས་བརྟན་པོ་ཁོང་དུ་བཅངས་ཤིང་རྒྱུན་འཁྱོངས་ལྷོད་མེད་བྱས་པར་བརྒྱུད་ནས་ཡུལ་མི་སྤུན་ཟླ་རྣམས་ཀྱི་རེ་འབྲས་དོན་དུ་སྨིན་པ་དང་རྒྱལ་ཁའི་སྤྲོ་བ་གང་མང་མང་བསྩལ་སོང་ལ། ཁོ་མོ་ལུས་རྩལ་གྱི་ལམ་བུའི་སྟེང་རིམ་གྱིས་འཚར་ལོངས་བྱུང་།
　　ད་ལོར་ཁོ་མོས་མཚོ་སྔོན་གྱི་ཚབ་བྱས་ཏེ་སྐབས་བཅུ་གཉིས་པའི་རྒྱལ་ཡོངས་ལུས་རྩལ་འགྲན་ཚོགས་སྟེང་ཞུགས་པས། ཕ་ཡུལ་མཚོ་བྱང་དེ་ཡང་བསྐྱར་སྤྲོ་དགའི་དཔལ་གྱིས་རབ་ཏུ་མྱོས་པར་མ་ཟད། ཁོ་མོའི་རྒྱལ་ཁ་ལས་མཚོ་སྔོན་དང་བོད་རིགས་སྤུན་ཟླ་རྣམས་ང་རྒྱལ་གྱིས་ཁེངས་ཤིང་ངར་སེམས་ཀྱི་ཤུགས་སྟོབས་དྲག་པོར་རྒྱས་སུ་བཅུག

ལུས་རྩལ་པ་མཚོ་མོ་སྐྱིད་ཀྱིས་རྒྱལ་ཡོངས་ལུས་རྩལ་འགྲན་ཚོགས་སྐབས་བཅུ་གཉིས་པའི་སྐྱེས་མའི་སྨི་ཁྲིའི་རྒྱང་རྒྱུག་འགྲན་སྡུར་གྱི་གསེར་གྱི་རྟགས་མ་བླངས་པ།

　　རྒྱུས་ལོན་བྱུང་བ་ལྟར་ན་འགྲན་སྡུར་ཁྲོད། མཚོ་མོ་སྐྱིད་ཀྱི་ལྷམ་སྟེང་ལ་འགྲན་ཡས་ཐེངས་གསུམ་ལ་སྤོས་པས་ཁོ་མོས་འགྲན་སྡུར་ལ་བར་ཆད་ཅུང་ཙམ་བཟོས་མོད། ཁོ་མོས་ཧུར་ཐག་དང་རྒྱུན་འཁྱོངས་བྱས་པར་བརྟེན་ནས་ཆེས་རྗེས་མའི་སྨི300ནང་ཇེ་མགྱོགས་སུ་བཏང་སྟེ་འགྲན་ཡ་གཞན་རྣམས་རིང་དུ་བསྐྱུར་ནས་འགྲན་སྡུར་གྱི་བྱ་དགའ་ཨང་དང་པོ་བླངས་པ་རེད།
　　མཚོ་མོ་སྐྱིད་ཀྱིས་བཤད་རྒྱུར། ཁོ་མོས་བྱ་དགའ་ཨང་དང་པོ་བླངས་པ་ནི་ཡུན་རིང་ལ་མཐོ་སྒང་དུ་སྦྱོང་བརྡར་བྱས་པས་ཡིན་ཞེས་བརྗོད་ལ། ཁོ་མོའི་ཨ་ཕ་ཀུན་དགའ་ལགས་ཀྱིས་བཤད་པ་ལྟར་ན་ཁོ་མོ་ཆུང་དུས་ནས་རྒྱུག་རྒྱུར་དགའ་ཞིང་དེའི་ཕྱོགས་ལ་འཇོན་ནུས་ཆེན་པོ་ཡོད་པ་རེད།
　　ལུས་རྩལ་པ་མཚོ་མོ་སྐྱིད་ནི་ཆོས་དབྱངས་སྐྱིད་ཀྱི་རྗེས་སུ་བྱུང་བའི་མཚོ་སྔོན་གྱི་ལུས་རྩལ་འགྲན་སྡུར་ཁྱབ་ཁོངས་སུ་རིམ་གྱིས་བཀྲག་མདངས་རྒྱས་པའི་རེ་བའི་འོད་སྣང་ཞིག་ཡིན་ཞིང་། ཁོ་མོའི་རྒྱལ་ཁ་ཡིས་ཕ་ཡུལ་གྱི་མི་དམངས་དང་མདོ་དབུས་ཁམས་གསུམ་གྱི་བོད་རིགས་སྤུན་ཟླ་ཡོངས་ཀྱི་རེ་བའི་མེ་ལྕེ་དགུང་དུ་མཆེད་དུ་བཅུག་ལ། འཛམ་གླིང་གི་ཡུལ་ཁ་སོ་སོ་དང་མི་རིགས་སོ་སོའི་རྒྱང་རྒྱུག་ལུས་རྩལ་པ་རྣམས་ལ་འགྲན་བསླངས་པ་རེད།