༄༅། །ངའི་སེམས་ཁོང་གི་རྒན་པདྨ་ཚེ་བརྟན།

       རང་ལོ་བཅུ་བཞི་ཙམ་ལ་སོན་པའི་ལོ་དེའི་དབྱར་གཞུང་ཞིག་ལ། ང་རང་མཚོ་ལྷོ་ཁུལ་ཐོག་ཏུ་སྒྱུ་རྩལ་སློབ་གྲྭ་འགྲིམ་པའི་སྒང་ཡིན།ད་ལྟའང་དྲན་པའི་སྣང་ངོར་གསལ་ལེར་འཆར་ཡོང་བ་ནི། ཉིན་དེར་སྔ་དྲོ་ཆར་བ་བབས་ཤིང་། ཉིན་གུང་ཡོལ་ཙམ་ལ་ཆར་བ་འབབ་མཚམས་བཞག་ནས་གནམ་ངོ་ཡོངས་སུ་རུབ་འདུགང་རང་སློབ་གྲྭའི་སྒོ་ཆེན་ཕྱི་རོལ་གྱི་ཚོང་ཁང་དུ་ཅ་ལག་ཙག་ཙིག་ཉོ་བར་སོང་ནས་ཕྱིར་མལ་ཁང་དུ་ལོག་སྐབས། སློབ་གྲྭའི་སྒོ་འགྲམ་དུ་མི་ཆ་མེད་གཉིས་ལངས་འདུག་པ་མཐོང་བྱུང་། དེ་ལས་གཅིག་གིས་ལུས་སུ་དམག་མིའི་ལྭ་རིང་ལྗང་ཁུ་ཞིག་གྱོན་ཞིང་། གཞན་པ་དེས་བརྙན་འཕྲིན་སོགས་ལས་མཐོང་བའི་བརྙན་ཕབ་འཕྲུལ་ཆས་འདྲ་བ་ཞིག་བཟུང་འདུག ཕྱི་དྲོ་སླེབས་ཙ་ན་ང་ཚོའི་དགེ་རྒན་གྱིས་གློག་བརྙན་འཁྲབ་མཁན་གྱི་བྱིས་པ་ཕོ་མོ་གཉིས་དགོས་འདུག་པས་རེ་རེ་བཞིན་ཚོད་ལྟའི་རྒྱུགས་སུ་ཞུགས་ཟེར། སློབ་ཁང་ཞིག་ཏུ་སོང་བ་ན་ཉིན་གུང་སློབ་རའི་སྒོ་ཁར་འགྲེང་བའི་མི་དེ་གཉིས་ཡང་བསྐྱར་མཐོང་བྱུང་། དེ་ནས་ཚོད་ལྟའི་རྒྱུགས་སུ་ངེད་སློབ་མ་བུ་མོ་ཚོར་རེ་རེ་བཞིན་རང་ཉིད་མཚམས་སྦྱོར་དང་གླུ་དབྱངས་རེ་ལེན་དུ་བཅུག ངའི་མཚམས་སུ་སླེབས་དུས་ཡང་བསྐྱར་གླུ་དབྱངས་ཞིག་ལོངས་ཟེར་བས་བསྐྱར་དུ་གླུ་དབྱངས་གཞན་ཞིག་བླངས་པ་ཡིན། དེ་ལྟར་ཉིན་དེའི་ཚོད་ལྟའི་རྒྱུགས་ལེན་ཁྲོད་སུ་ལེགས་གང་འདེམས་ཀྱི་མཇུག་འབྲས་ཅང་བསྒྲགས་མ་བྱུང་། དབྱར་ཁའི་གུང་གསེང་བཏང་རྗེས་ཕ་ཡུལ་དུ་སྡོད་པའི་ཉིན་ཞིག་ལ། ང་ཚོའི་དགེ་རྒན་གྱིས་ཁ་པར་བཏང་ནས་ཁྱེད་རང་གློག་བརྙན་འཁྲབ་ཁྲིད་པ་པདྨ་ཚེ་བརྟན་ལགས་ཀྱིས་གློག་བརྙན་གསར་པ་ཕབ་སྐྲུན་བྱེད་པའི་འཁྲབ་སྟོན་པའི་གྲས་སུ་བདམས་འདུག་པས། ཉིན་ཤས་རྗེས་གློག་བརྙན་འཁྲབ་ཏུ་གཅན་ཚར་འགྲོ་དགོས་འདུག་ཅེས་བཤད་བྱུང་། སྐབས་དེར་གློག་བརྙན་ཕབ་སྐྲུན་ལ་རྒྱུས་མངའ་ཅི་ཡང་མེད་མོད་མཚར་སྣང་དང་དགའ་སྣང་འདྲེས་མས་དང་ལེན་ཞུས་ནས་ཉིན་འགའི་རྗེས་སུ་གཅན་ཚར་བསྐྱོད་པ་ཡིན།        «ལྷིང་འཇགས་ཀྱི་མ་ཎི་རྡོ་འབུམ»ཕབ་སྐྲུན་གྲུབ་རྗེས། གཟིགས་འབུལ་མཛད་སྒོ་ཟི་ལིང་དུ་བསྡུས་པར་ངའང་ཞུགས་ཤིང་། སྐབས་དེར་རྒན་པདྨས་ང་ལ་ཕྱིས་སུ་དོན་དག་ཅི་ཞིག་ཡོད་ན་ཁ་པར་ཐོངས་ཞེས་བཤད་པ་དྲན། ཕྱིར་ཆབ་ཆར་ལོག་རྗེས་ངས་ཀྱང་ཡུན་རིང་ཞིག་ལ་ཁོང་དང་འབྲེལ་བ་མ་བྱས། དེ་ཡང་ཉིན་ཞིག་གི་དགོང་མོར་བརྙན་འཕྲིན་ལས་རྒན་པདྨ་དང་མི་སྐོར་ཞིག་གློག་བརྙན་དུས་ཆེན་ཞིག་ལ་ཞུགས་ནས་ས་གདན་དམར་པོའི་སྟེང་དུ་ཤོམ་འགྲོ་བྱེད་བཞིན་པ་དང་། ཁོང་ལ་བྱ་དགའ་ཐོབ་པའི་རྣམ་པ་སོགས་མཐོང་བས་སེམས་ལ་ནོན་མི་ཐུབ་པའི་དགའ་སྤྲོ་དཔག་མེད་སྐྱེས། མཚན་མོ་དེར་ཅིས་ཀྱང་དགེ་རྒན་ཁོང་ལ་རྟེན་འབྲེལ་ཞུ་ཚིག་ཅིག་འཕྲིན་ཐུང་གི་ལམ་ནས་བསྐུར་དགོས་སྙམ་ནས་གཉིད་མ་ཁུག་པར་བསམ་བློ་ཡང་ཡང་བཏང་། ཕྱི་ཉིན་དེར«དགེ་རྒན་ལགས། མདང་བརྙན་འཕྲིན་ལས་ཁྱེད་ལ་བྱ་དགའ་ཐོབ་པ་མཐོང་བས་སེམས་སུ་དགའ་སྤྲོ་ཚད་མེད་སྐྱེས། ཁྱེད་ལ་སེམས་གཏིང་ནས་རྟེན་འབྲེལ་ཞུ»ཞེས་རང་ཉིད་ཀྱི་སེམས་པ་མཚོན་བྱེད་ཀྱི་འཕྲིན་ཐུང་སྟབས་བདེ་ཞིག་བསྐུར། དེ་ནས་ཁོང་གིས་ཐུགས་རྗེ་ཆེ། ཁྱེད་རང་སུ་ཡིན་ཞེས་དྲིས་པར། ང་གཡང་ཕྱུག་མཚོ་ཡིན་ཞེས་ལན་བཏབ་པ་ལ། ཁོང་གིས་སྐུལ་ལྕག་དང་རེ་སྨོན་གྱི་ཚིག་འགའ་བསྐུར་བ་དྲན།        ཡང་ལོ་ཞིག་ལ་ང་རང་ཆབ་ཆར་སློབ་གྲྭའི་ནང་སྡོད་སྐབས། རྒན་པདྨའི་འཕྲིན་ཐུང་འབྱོར་ནས་གལ་སྲིད་ཁོམ་པ་བྱུང་ཚེ་དེ་རིང་དགོང་ཟས་མཉམ་དུ་བཟའ་ཞེས་བྲིས་འདུག ཕྱི་དྲོར་སློབ་གྲྭ་གྲོལ་རྗེས་ང་རང་དུས་བཅད་བཏབ་པའི་ཡུལ་དེར་ཕྱིན་པ་ན། སྐབས་དེར་ཆབ་ཆར་སྡོད་པའི་མིང་ལའང་ཨ་ཁུ་པདྨ་ཟེར་བ་རྒན་པདྨའི་གྲོགས་ནང་ཚགས་ཤིག་ཡིན་པ་དེའང་འདུག ང་ཚོས་མཉམ་དུ་ཟ་མ་ཟ་ཞོར་དུ་ཁོང་གིས་ངའི་སློབ་གྲྭའི་འཚོ་བའི་སྐོར་ནས་དྲི་བ་འགའ་རེ་དྲིས་བྱུང་། ངས་ཀྱང་ད་བར་གཙོ་བོ་གླུ་དབྱངས་ལེན་རྒྱུར་ཤིན་ཏུ་དགའ་ཚུལ་དང་། ཞོར་དུ་ཉེ་ཆར་སྒྲ་ཕབ་པའི་གླུ་དབྱངས་ཤིག་ཀྱང་ཁོང་གཉིས་ལ་གསན་དུ་བཅུག ཁོང་གཉིས་ཀྱིས་བསྔགས་བརྗོད་ཀྱི་ཞོར་དུ་སྐུལ་ལྕག་གི་གཏམ་མང་པོ་བཤད་བྱུང་། སྐབས་དེར་ང་ལ་ཧ་ཅང་སེམས་ཐག་ཉེ་བའི་ཤ་ཉེ་ཞིག་ལ་འཕྲད་པ་ལྟ་བུའི་སྣང་བ་ཞིག་སྦྱིན་སོང་། ཕྱིས་སུ་ང་རང་མཚོ་སྔོན་བརྙན་འཕྲིན་གྱིས་བསྒྲུབས་པའི་སྣ་འཛོམས་སྒྱུ་རྩལ་ལེ་ཚན«མེ་ཏོག་ཆུན་པོ»ཞེས་པར་འགྲན་ཞུགས་བྱས་ནས་དུས་ཚོད་མང་པོ་ཞིག་དེར་ཟད་པས་རྒན་པདྨ་དང་འབྲེལ་ལམ་རེ་ཞིག་ཆད། འགྲན་སྡུར་དེ་མཇུག་རྫོགས་རྗེས་ང་རང་ཟི་ལིང་དུ་སླེབས་ཐེངས་ཤིག་ལ། རྒན་གངས་ཞུན་ལགས་ཀྱིས་སྔོན་ཚུད་ནས་ཁྱོད་རང་ཟི་ལིང་དུ་འབྱོར་རྗེས་རྒན་པདྨ་དང་ང་ཚོས་མཉམ་དུ་ཟ་མ་བཟའ་ཞེས་བཀའ་ཆད་མཛད་ཡོད་པ་དྲན་ནས། ཟི་ལིང་དུ་ཐོན་རྗེས་རྒན་གངས་ཞུན་ལགས་ལ་ཁ་པར་བཏང་བ་ན། ཏག་ཏག་ཁོང་དང་རྒན་པདྨ་གཉིས་རྒྱ་གྲམ་དམར་པོའི་སྨན་ཁང་དུ་ཡོད་ཟེར་བས་མེ་ཏོག་ཚོམ་བུ་ཞིག་ཉོས་ནས་ཐད་ཀར་སྨན་ཁང་དུ་སོང་བ་ཡིན། དེ་གར་བསླེབས་རྗེས་གཞི་ནས་རྒན་པདྨའི་ལུས་ཕུང་བརྟག་དཔྱད་ཅིག་གི་ཆེད་དུ་ཡོང་བ་ཤེས། དེ་ནས་ང་ཚོས་མཉམ་དུ་སྨན་ཁང་གི་ཉེ་སར་གུང་ཟས་བཟས་པ་ཡིན། དེའི་རྗེས་སུ་ང་རང་དུས་ཡུན་ངེས་ཅན་ཞིག་ལ་པེ་ཅིན་དུ་བསྡད་ཅིང་། རྒན་པདྨ་ཡང་སྐབས་དེར་རྒྱུན་པར་པེ་ཅིན་དུ་ཕེབས་ནས་ང་ཚོ་འདུ་འཛོམས་བྱུང་གི་ཡོད་ལ། རེབ་ཅིག་པེ་ཅིན་གྱི798སྒྱུ་རྩལ་འགྲེམ་སྟོན་སྡེ་ཁུལ་དུ་ཁོང་གི་གློག་བརྙན་བརྩམས་ཆོས་བརྙན་གཏོང་བྱེད་སྒོ་སྤེལ་བར་ངའང་སྔོན་ཚུད་ནས་བརྡ་བཏང་བས་རྒན་ལགས་དང་མཉམ་དུ་བརྙན་གཏོང་བྱེད་སྒོ་དང་དེའི་རྗེས་ཀྱི་བསམ་བློ་བརྗེ་རེས་ཚོགས་འདུར་ཞུགས་པ་ཡིན། སྐབས་དེ་དུས་ནས་རྒན་ཁོང་གི་ཆེད་ལས་རང་བཞིན་གྱི་ཤེས་འཇོན་དང་ལྷུན་ཆགས་རང་བྱུང་གི་གཤིས་ཀས་ང་ལ་བག་ཆགས་ཟབ་མོ་ཞིག་བཞག་བྱུང་སོང་།        དེ་ནས་ཧ་ལམ་ལོ་གཉིས་གསུམ་ཞིག་ལ་རྒན་པདྨ་དང་ཐད་ཀའི་འབྲེལ་འདྲིས་མ་བྱུང་། 2015ལོར་ཁོང་དང་པེ་ཅིན་དུ་འཕྲད་དུས་ཁོང་གིས་གློག་བརྙན་ཞིག་གྲ་སྒྲིག་བྱེད་སྒང་ཡིན་པ་དང་། དེའི་ནང་གི་བུད་མེད་གཙོ་འཁྲབ་པ་འཚོལ་བཞིན་ཡོད་ལ། འཁྲབ་གཞུང་ཁྲོད་ཀྱི་བུད་མེད་དེ་ནི་ལོ་ན་ཅུང་ཟད་ཆེ་བ་ཞིག་ཡིན་དགོས་འདུག་པས་ཁྱོད་རང་ཤིན་ཏུ་སྐམ་དྲགས་འདུག་ཅེས་ཞལ་གསང་ཐུགས་དྲང་གིས་བརྗོད་བྱུང་། དེ་ནས་ངེད་ཀྱིས་ཀྱང་ཡ་ཡ་ཞེས་རྒན་ཁོང་ལ་གུས་ལུགས་རང་བཞིན་གྱིས་ལན་སྤྲད་པ་ལས་གཞན་ཅང་མ་སྨྲས། ཕྱིར་ཁྱིམ་དུ་ལོག་རྗེས་གློག་བརྙན་དེའི་འཁྲབ་གཞུང་ཙམ་ལའང་མ་བལྟས་པར་དཔའ་ཞུམ་ཚེ་ཅུང་བློ་བདེ་བོ་རང་མ་བྱུང་བས། རྒན་ལགས་ལ་གློག་བརྙན་དེའི་འཁྲབ་གཞུང་ལ་ལན་གཅིག་བལྟ་ཆོག་པའི་རེ་སྐུལ་ཞུས་པར་ཁོང་མོས་མཐུན་བྱུང་། འཁྲབ་གཞུང་དེར་བལྟས་པས་བརྗོད་དོན་དང་མི་སྣའི་བྱ་བྱེད་སོགས་རང་ཉིད་ཀྱི་མཐོང་ཐོས་སུ་གྱུར་པའི་ཉེ་གམ་གྱི་གཏམ་རྒྱུད་རང་དུ་མཐོང་བས། རྒན་ལགས་ལ་བུད་མེད་གཙོ་འཁྲབ་པ་དེའི་སྣང་བརྙན་ལ་ཤིན་ཏུ་དགའ་ལུགས་དང་། དེའི་ཆེད་དུ་རང་ཉིད་ཤ་རྒྱགས་པ་ཆགས་སུ་བཅུག་ཆོག་ཚུལ་སོགས་ཞུས་པ་ཡིན། དེ་ལ་རྒན་ལགས་ཀྱིས་ངས་བསམ་བློ་ཞིག་བཏང་རྗེས་ལན་སྟེར་ཡོང་ཟེར། དེ་ནས་ཉིན་ཤས་རྗེས་སུ་ཕ་ཡུལ་ནས་གློ་བུར་དུ་ཁ་པར་ཞིག་འབྱོར་ནས་ངེད་ཀྱི་ཨ་མར་ན་ཚ་ཞིག་བྱུང་བས་མྱུར་མོར་ཟི་ལིང་ལ་སྨན་ཁང་དུ་སྟོན་དགོས་ཀྱི་འདུག་ཟེར་བས། ང་རང་པེ་ཅིན་ནས་རྟབ་རྟབ་པོར་ཕྱིར་ཟི་ལིང་དུ་ལོག་པའི་སྟ་གོན་བྱས། པེ་ཅིན་གྱི་གནམ་ཐང་དུ་བསླེབས་རྗེས་དེ་གར་དུས་ཚོད་ངེས་ཅན་ཞིག་ལྷག་འདུག་པས་དཔེ་ཁང་དུ་སོང་ནས་དཔེ་ཆ་གཉིས་ཉོས་ནས་འགྲུལ་སྡོད་ཚོམས་ཆེན་གྱི་འདུག་སྟེགས་སུ་བསྡད་ཙ་ན། ངའི་ཁ་གཏད་དུ་རྒན་པདྨས་ཀྱང་ལག་ཏུ་དཔེ་ཆ་བཞི་ལྔ་ཙམ་བསྣམས་ནས་བསྡད་འདུག་པ་མཐོང་བྱུང་། དེ་ནས་ཁོང་གིས་ང་ལ་དཔེ་ཆ་ཅི་ཞིག་ལ་ལྟ་བཞིན་ཡོད་ཅེས་འདྲི་ཞོར་ངའི་དཔེ་ཆ་དེ་གཉིས་ལ་རོབ་ཙམ་བལྟས། དེ་མུར་རྗེས་མར་གློག་བརྙན་ཐད་ཀྱི་དཔེ་ཆར་མང་ཙམ་ལྟོས། ལྷག་པར་དུ་འཛམ་གླིང་སྒང་གི་གློག་བརྙན་དང་འབྲེལ་བའི་སྐྱེས་མཆོག་དམ་པ་དག་གི་མུ་འབྲེལ་བརྩམས་ཆོས་སམ་བརྩམས་ཆོས་ཕྱོགས་བསྒྲིགས་ལ་ལྟོས་དང་ཕན་ཐོགས་ཆེ་བར་འདུག་ཅེས་ཞལ་ཏ་མཛད། དེ་ལ་ངས་ཀྱང་ཡ་ཡ་ཞེས་མགོ་ལྕོག་ལྡེམ་ལྡེམ་གྱིས་ཁས་ལེན་ཞུས། དེ་ནས་ང་ཚོ་གནམ་གྲུ་ནང་སྡོད་སྐབས་བློ་ཡུལ་ལས་འགོངས་པ་ཞིག་ལ་ངེད་གཉིས་འདུག་གྲལ་གཅིག་གི་རྐུབ་སྟེགས་གཡས་གཡོན་དུ་ཁེལ་འདུག སྐབས་དེར་ངའི་སེམས་ལ་འདི་ནི་ལས་ཀྱིས་བཀོད་སྒྲིག་བྱས་པ་ལྟ་བུ་ཞིག་ཀྱང་ཅི་ལ་མིན་ཏེ། རྒན་ལགས་དང་གློག་བརྙན«ཐར་ལོ»ཁྲོད་ཀྱི་བུད་མེད་གཙོ་འཁྲབ་པའི་ཐད་ནས་རྒྱུས་ལོན་མང་ཙམ་བྱེད་དགོས་སྙམ་བྱུང་། དེ་ལྟར་མཁའ་ལམ་གྱི་ཆུ་ཚོད་གཉིས་རིང་གི་ཁ་བརྡའི་ཁྲོད།ངས་རྒན་ལགས་ལ«ཐར་ལོ»ཁྲོད་ཀྱི་བུད་མེད་གཙོ་འཁྲབ་པ་གཡང་མཚོ་ཞེས་པའི་འཁྲབ་སྟོན་པ་དེ་དང་ཕྱིའི་གཟུགས་བྱད་ཅུང་ཟད་མཐུན་པའི་བོད་ཀྱི་གླུ་མ་ཞིག་དང་ངེད་སྡེ་བའི་བུད་མེད་ཅིག་ཀྱང་འོས་སྦྱོར་བྱས་པ་ཡིན། ཞོར་དུ་རང་ཉིད་ལའང་ཤ་རྒྱགས་པ་ཆགས་སུ་བཅུག་རྗེས་འཁྲབ་སྟོན་གྱི་ཆ་ནས་མི་སྣ་དེར་ཁ་ལོ་བསྒྱུར་ཐུབ་པའི་ཡིད་ཆེས་དང་བརྩོན་སེམས་ཡོད་ལུགས་ཀྱང་ཁ་ཁོག་མེད་པར་དྲང་པོ་དྲང་གཞག་གིས་བཤད་པ་ཡིན། དེའི་ཕྱི་ཉིན་དགོང་ཁར། རྒན་ལགས་ཀྱིས་ང་ལ་སྐད་འཕྲིན་བརྒྱུད་ནས་གློག་བརྙན«ཐར་ལོ»ནང་གི་བུད་མེད་གཙོ་འཁྲབ་པ་གཡང་མཚོ་ཁྱོད་ཀྱིས་གྲ་སྒྲིག་བྱོས་ཞེས་འཕྲིན་ཐུང་སྟབས་བདེ་ཞིག་བསྐུར་འདུག ངས་ཀྱང་དེ་ཉིད་མཐོང་མ་ཐག་དགའ་ཚོར་ཆེན་པོས་རྒན་ལགས་ལ་བཀའ་དྲིན་དང་བཅས་སྟ་གོན་གྱི་ལས་སུ་ཞུགས་པ་ཡིན།        དེ་ནས་ཟླ་གཉིས་ཙམ་འགོར་རྗེས«ཐར་ལོའི»དངོས་གཞི་ཕབ་སྐྲུན་གྱི་འགོ་ཚུགས། ང་ལ་མཚོན་ན«ཐར་ལོའི»ཕབ་སྐྲུན་གྱི་གོ་རིམ་དེ་ནི་རྒན་པདྨ་ལགས་དང་ཧ་ཅང་ཉེ་བར་བཅར་བའམ་ཁོང་གི་ཤེས་འཇོན་དང་ཐུགས་གཤིས་སོགས་ལ་རྒྱུས་མངའ་ཆེས་ཆེར་གྱུར་པའི་དུས་སྐབས་དེ་ཡིན་ཞེས་བཤད་ཆོག བར་གླགས་དེར་ང་ལ་ཐད་མཐོང་གི་ཚོར་བ་ཞིག་སྦྱིན་པ་ནི་རྒན་ལགས་ནི་གནས་ཚུལ་ཇི་འདྲའི་ཐབས་ཆག་ཅིག་ལ་ཕྲད་ཀྱང་ཁྲོ་ཉམས་སྟོན་པའམ་གཞན་ལ་གཤེ་གཤེ་གཏོང་བ་སོགས་ནི་ཧ་ལམ་རྒྱུད་དུ་མེད་པ་ལྟ་བུར་སྣང་། ཁོང་གི་འཇམ་པོ་བལ་དང་དལ་མོ་ཆུ་ལྟ་བུའི་རང་གཤིས་དེས་ཉེ་འཁོར་གྱི་མི་རྣམས་ལའང་ལས་ཀར་ཞུགས་དུས་གུ་ཡངས་དང་སྤྲོ་སྣང་གི་སེམས་ཁམས་ཤིག་རང་བཞིན་གྱིས་བསྒོས་ཡོད། གཞན་ཕབ་སྐྲུན་དངོས་ལ་ཞུགས་སྐབས་རྒན་པདྨའི་སྟེང་དུ་ཐུན་མིན་གྱི་ཁྱད་ཆོས་ཤིག་མངའ་བ་ནི། གལ་སྲིད་འཁྲབ་སྟོན་པ་དེ་འཁྲབ་བྱའི་མི་སྣའི་སྣང་བརྙན་དང་གཤིས་ཀ་སོགས་ལ་རྒྱུས་མངའ་ཧ་ཅང་ཆེ་བ་ཡིན་ཚེ། འཁྲབ་སྟོན་པ་རང་ཉིད་ལ་སྐབས་ཐོག་ཏུ་རྩལ་ནུས་འདོན་སྤེལ་བྱེད་ཆོག་པའི་དབང་ཆའམ་བར་སྟོང་སྤྲོད་ཡོད་པ་ཡིན། དེ་ནི་འཁྲབ་ཁྲིད་པ་མང་པོ་ཞིག་གི་སྟེང་དུ་མཐོང་དཀོན་པའི་གནད་ཅིག་ཏུ་སེམས། དེ་མིན་ད་དུང་བག་ཆགས་ཧ་ཅང་ཟབ་པ་ཞིག་ནི། ལན་རེར་གནམ་གཤིས་དང་སྒྲིག་ཆས་སོགས་ཀྱི་རྐྱེན་པས་འཁྲབ་གཞུང་དུ་བཀོད་པ་ཇི་བཞིན་ཕབ་སྐྲུན་བྱེད་མ་ཐུབ་ཚེ། རྒན་ཁོང་ལ་ཡུལ་དུས་གནས་བབ་དང་སྟབས་བསྟུན་གྱི་ནུས་པ་བསམ་གྱིས་མི་ཁྱབ་པ་ཞིག་འདུག་ལ། འཕྲལ་གྱི་བཀོད་སྒྲིག་དེ་དག་ནི་མ་བཅོས་རང་འགྲིག་ལྟ་བུར་མཐོང་བས། སེམས་ཀྱི་ཟབ་ས་ནས་ཁོང་ལ་དད་གུས་ཀྱི་བསམ་པ་དབང་མེད་དུ་སྐྱེ་ཡོང་བ་ལན་གཅིག་མིན།        ང་ཚོས་རགས་སྒྲིག་གི་གོ་རིམ་ཁྲོད་བརྙན་རིས་དེ་ལ་སྔ་ཕྱིར་ཐེངས་གསུམ་བལྟས་པ་ཡིན། དེ་ལ་ལྟ་ཐེངས་རེ་རེར་ངའི་མིག་ཀོང་ནས་མཆི་མ་དབང་མེད་དུ་བཞུར་ཡོང་། སྐབས་དེར་ངའི་སེམས་སུ་གལ་སྲིད་གློག་བརྙན་ཁང་གི་འཆར་ཡོལ་སྟེང་བརྙན་རིས་འདི་འཆར་ཐུབ་ཚེ་ཇི་འདྲའི་ཡིད་སེམས་སྒུལ་བ་ཞིག་ཡིན་ངེས་ཨང་ཞེས་རེ་ལྟོས་ཆེན་པོ་བཅངས། འོན་ཀྱང་མཐའ་མར་དེ་ཉིད་དོན་སྨོན་མ་བྱུང་། ཡང་ཉིན་འདི་དག་ལ་ངས་ཡང་ནས་བསྐྱར་དུ་བསམ་བློ་གཏོང་དུས། བརྙན་རིས་དེའི་བློས་བསླངས་དང་བསམ་བཀོད་ནི་ཏག་ཏག་རྒན་ཁོང་གིས་སྐྱེ་འཆི་དང་མི་རྟག་པ་སོགས་ལ་བཟུང་བའི་ལྟ་ཚུལ་ལམ་རྣམ་འགྱུར་ཞིག་ཅི་ལ་མིན་སྙམ་པའི་ཚོར་སྣང་དྲག་པོ་ཞིག་བྱུང་། དེ་ལྟར་བསམ་ན་རང་ཉིད་འཁྲབ་སྟོན་པ་ཞིག་ཡིན་པའི་ངོས་ནས་ལྟད་མོ་བ་རྣམས་ཀྱི་སྤྱན་ལམ་དུ་བརྙན་རིས་དེ་བསྟར་མ་ཐུབ་པར་ཕངས་སེམས་ཏོག་ཙམ་སྐྱེས།        ང་རང་རྒན་ཁོང་གིས་འཁྲབ་ཁྲིད་མཛད་པའི་གློག་བརྙན་འགའ་ལས་གཞན་ད་དུང་ལྟ་སྐུལ་སྒྲིག་བཟོའི་འགན་འཁུར་བའི་གློག་བརྙན་གཉིས་ཀྱི་འཁྲབ་སྟོན་དུའང་ཞུགས་མྱོང་། ཁོང་ལ་མཚོན་ན་ཉེ་འགྲམ་གྱི་ཉེ་རིང་སུ་ཞིག་གིས་རོགས་རེས་ལམ་སྟོན་གྱི་རེ་བཅོལ་ཞུས་ཚེ་རང་གིས་ནུས་པ་འདོན་ཐུབ་ཕྱིན་དང་ལེན་མ་མཛད་པ་ཞིག་ཧ་ལམ་ཡོད་མི་སྲིད། ཁོང་གི་བཀའ་དྲིན་ལ་བརྟེན་ནས་གོག་འགྲོ་མང་པོ་ཞིག་ལངས་ནས་འགྲོ་ཐུབ་ཡོད་པ་དང་། འཁར་བརྟེན་མང་པོ་ཞིག་ཁེར་འགྲོ་ཐུབ་པར་གྱུར་ཡོད། འདི་ཐམས་ཅད་གཞན་ཕན་གྱི་ཐུགས་བརྩེ་ཆེན་པོ་ཞིག་མེད་ན་ནི་སོ་སྐྱེས་རང་ག་བ་ཞིག་གིས་བསྒྲུབ་ཐུབ་རྒྱུ་ཤིན་ཏུ་དཀའ་བར་སེམས། དེ་བས་ང་རང་ཉིད་ལ་མཚོན་ནའང་ཤིན་ཏུ་དཀའ་ཁག་དང་རེ་ཐག་ཆད་པའི་དུས་ལ་ཐུག་ན་མ་གཏོགས་རྒན་ཁོང་ལ་དཀའ་ལས་འོ་བརྒྱལ་གཏོད་འདོད་སེམས་ཀྱིས་མི་ནུས་ལ། དེ་ནི་ཁོང་གི་བླ་ན་མེད་པའི་ཐུགས་གཤིས་དེར་རྒྱུས་ཆེ་དྲགས་པས་རང་གི་སེམས་ནས་མ་བཟོད་པ་ཡིན།        རྒན་ལགས་གློ་བུར་དུ་འདས་གྲོངས་སུ་ཕྱིན་པ་ཐོས་པ་ནས་ད་ལྟའི་བར་དུ་ང་ལ་དོན་དེར་ཡིད་མི་ཆེས་པའམ་འདི་ནི་འཕྲུལ་སྣང་ངོ་སྙམ་པའི་སེམས་ཚོར་ཞིག་ད་དུང་ཡང་སྐྱེ་བཞིན་ཡོད། འོན་ཏེ་ཞིབ་ཏུ་བསམ་བློ་བཏང་ན་རྒན་ཁོང་ལ་མཚོན་ན། གློ་བུར་དུ་སྟ་གོན་ཅི་ཡང་མེད་པར་ཕེབས་སོང་བ་ཞིག་ཀྱང་མ་ཡིན་སྙམ་སྟེ། ཁོང་ལ་སྐྱེ་འཆིའི་ངེས་མེད་རང་བཞིན་དང་མི་རྟག་པ་ལ་རང་ཉིད་ཀྱི་ཐུགས་བསྐྱེད་ངེས་ཤེས་ཟབ་མོ་ཞིག་ཏན་ཏན་ཡོད་པ་ནི། ཁོང་གི་གློག་བརྙན་དང་། རྩོམ་རིག ཁ་བརྡ་སོགས་ལ་ཞིབ་ཏུ་ལྟ་བཞིན་བསམ་ན་གསལ་པོར་མངོན་ཡོད་སྙམ།        ཁོང་ལྷ་སར་སྐུ་གཤེགས་པ་ཐོས་འཕྲལ་ང་རང་རྟབ་རྟབ་པོར་སྐར་མའི་རྗེས་ཆོད་ཕྱིར་ལྷ་སར་སོང་། དབུས་ལྷ་ལྡན་ནས་རྒན་ལགས་ཀྱི་གདུང་ཐལ་དང་བསྡོངས་ནས་ཕྱིར་ཕ་ཡུལ་ཁྲི་ཀར་ལོག ཁོང་གི་ཕ་ཡུལ་ནས་བདུན་ཚུགས་རྗེས་བདུན་དང་པོ་རྫོགས་རག་བར་དུ་དེ་གར་བསྡད་པ་ཡིན། བར་སྐབས་དེར་ཁོང་གི་ནང་མི་དག་གི་ངག་ལས་བེམ་པོ་སྦྱིན་སྲེག་གི་ཤུལ་དུ་རིང་བསྲེལ་རིལ་བུ་བབས་པའང་དངོས་སུ་གོ་བས་ཁོང་ནི་ཕལ་བ་རང་ག་བ་ཞིག་མ་ཡིན་སྙམ་པའི་སྔར་གྱི་བློ་གདེང་ཆེ་རུ་ཕྱིན། ཉིན་དེ་དག་ནས་བཟུང་ངས་རང་ཉིད་ལ་གལ་སྲིད་སེམས་ཀྱི་མཆོད་ཁྲི་སྟེང་ལ་རྒན་པདྨ་ཚེ་བརྟན་ཁོང་གི་སྐུ་བརྙན་ཞིག་བཤམས་དགོས་པ་ཡིན་ཚེ་ཁོང་གི་སྐུ་བརྙན་དེ་གང་ལ་འཇོག་གམ་ཞེས་དྲི་བ་ཁོངས་འདྲི་བྱས་མྱོང་། དགོངས་ཞག་ཞེ་དགུ་ཚང་ལ་ཉེ་བའི་སྐབས་འདིར། ངས་ཡང་བསྐྱར་འདིའི་སྐོར་ནས་བསམ་བློ་གཏོང་དུས། ང་ལ་མཚོན་ན་སེམས་ཀྱི་ཟབ་སར་རང་གི་ཕ་མ་དང་བླ་མ་དགེ་བའི་བཤེས་གཉེན་ལས་གཞན་རྒན་པདྨ་ཚེ་བརྟན་ཁོང་ལྟ་བུའི་མོས་གུས་མཛད་ཡུལ་གཞན་མེད་ཅེས་བརྗོད་འདོད་བྱུང་། མི་ཚེ་འདི་ལ་སེར་པོ་གསེར་གྱི་ཀ་ཆེན་ལྟ་བུའི་སྐྱེས་བུ་ཆེན་པོ་འདི་འདྲ་ཞིག་གིས་རོགས་རེས་ལམ་སྟོན་མཛད་ནས་སྤྱན་གྱིས་མ་བོར་བ་ནི་དངོས་གནས་རང་ཉིད་ཀྱི་བསོད་ནམས་ཤིག་ཏུ་བསྒོམས་ཡོད། འབྱུང་འགྱུར་གྱི་མི་ཚེ་རིང་ཡང་ཐུང་ཡང་རྒན་ཁོང་གི་ཐུགས་གཤིས་དང་། ཡོན་ཏན། ལྷག་བསམ། སྙིང་སྟོབས། བརྟན་ཚུགས། སྤོབས་པ་སོགས་ནི་རང་ཉིད་ཀྱི་མདུན་སྐྱོད་ལམ་གྱི་མིག་ལྟོས་དང་སྒུལ་ཤུགས་སུ་འགྱུར་དགོས་ཞེས་རང་ཉིད་ལ་དྲན་སྐུལ་ཡང་ཡང་བྱེད་ཀྱིན་ཡོད།