ཀྲུང་གོའི་བཟོ་རྩལ་མཛེས་རྩལ་མཁས་ཆེན་གདུགས་དཀར་ལགས།

       སློབ་དཔོན་གདུགས་དཀར་མཆོག་ནི1942ལོར་འཁྲུངས་པ་དང་། མཚོ་སྔོན་ཞིང་ཆེན་ཐུན་རིན་གྲོང་ཁྱེར་གྱི་མི་ཡིན། ལོ7ནས་བཟུང་རེབ་གོང་ཐང་ག་འབྲི་བཞེངས་སྒྱུ་རྩལ་ལ་སྦྱངས་པ་གནང་བ་དང་། ལོ་ངོ70ལྷག་ཙམ་རིང་ཀན་སུའུ་དང་། སི་ཁྲོན། མཚོ་སྔོན་སོགས་ཀྱི་དགོན་སྡེ་ཆེ་གྲས་ཁག་ཏུ་ཞལ་ཐང་འབྲི་བཞེངས་ཀྱི་ལས་ལ་ཞུགས་ཏེ། རྩེར་སོན་གྱི་ལག་རྩལ་དང་ཐུན་མིན་གྱི་མཚོན་ཐབས་ལ་བརྟེན་ནས་བརྩམས་ཆོས་འབོར་ཆེན་བརྩམས་པས་ལས་རིགས་དེའི་མི་ཀུན་གྱིས་ཁས་ལེན་ཞུ་བའི་སྒྱུ་རྩལ་མཁས་ཆེན་ཞིག་ཏུ་གྱུར།

       2006ལོར་ཁོང་ལ་ཀྲུང་གོའི་བཟོ་རྩལ་མཛེས་རྩལ་མཁས་ཆེན་ཞེས་པའི་མཚན་གྱི་ཅོད་པན་ཐོབ། སློབ་དཔོན་གདུགས་དཀར་མཆོག་གིས་སྐུ་ཚེ་གང་པོར་ཐང་གའི་སྒྱུ་རྩལ་གྱི་ཡང་རྩེར་སླེབས་པར་འབད་བརྩོན་གནང་ཡོད། ཁོང་གི་རི་མོའི་བློས་བསླངས་ལ་གཟབ་ནན་གྱི་ཁྱད་ཆོས་ལྡན་པ་དང་། པིར་རིས་ལ་རང་བཞིན་གྱི་འཁྱུག་ཉམས་ལྡན་པ། རི་མོའི་ཞིབ་ཆ་འགོད་ཐབས་ཞིབ་ཅིང་ཕྲ་ལ་མཛེས་པ། མི་སྣའི་སྣང་རིས་གསོན་ཉམས་ལྡན་པ། དབྱིབས་བཟོ་མཛེས་ཤིང་མཚར་ལ་དོ་མཉམ་པ་སོགས་ཀྱི་ཁྱད་ཆོས་ལྡན་པས། ཀུན་གྱིས་བསྔགས་བརྗོད་ཀྱི་མེ་ཏོག་གཏོར་བཞིན་ཡོད། སློབ་དཔོན་གདུགས་དཀར་མཆོག་གིས་རེབ་གོང་ཐང་གའི་འབྲི་བཞེངས་ལག་རྩལ་རྒྱུན་འཛིན་གནང་བ་དང་ཆབས་ཅིག ས་གནས་ཁག་གི་ནང་བསྟན་རི་མོའི་སྒྱུ་རྩལ་གྱི་སྙིང་བཅུད་རྒྱ་ཁྱབ་ངང་བསྡུ་ལེན་སྒོས་ཀུན་གྱི་ལེགས་ཆ་ཚུལ་བཞིན་དང་ལེན་གནང་ཐོག འབུར་བཞེངས་སོགས་ཀྱི་རྩལ་ཐབས་ལག་ལེན་ནང་སྤྱད་པས། རེབ་གོང་ཐང་གའི་འབྲི་བཞེངས་ཐད་གསར་འབྱེད་ཀྱི་མཛད་རྗེས་བཞག་ཡོད། སློབ་དཔོན་གདུགས་དཀར་མཆོག་གིས་ཤེས་ལྡན་མི་སྣ་གསོ་སྐྱོང་ཐད་མཛད་རྗེས་ཆེན་པོ་བཞག་ཡོད་པ་དང་། སྔ་ཕྱིར་སློབ་མ230ལྷག་ཙམ་བསྐྱངས་ནས་ཐང་ག་སྒྱུ་རྩལ་རྒྱུན་འཛིན་དང་འཕེལ་རྒྱས་ཐད་བྱས་རྗེས་མི་དམན་པ་བཞག་ཡོད། སློབ་དཔོན་གདུགས་དཀར་མཆོག་ནི་སྤྱོད་པ་དང་སྒྱུ་རྩལ་གཉིས་འཛོམས་དང་ལས་རིགས་འདིར་མཛད་རྗེས་འཇོག་སྤྲོ་མཁན་ཞིག་ཡིན་ཞིང་། ཁོང་གིས་རེབ་གོང་ཐང་ག་སྒྱུ་རྩལ་མཉམ་ལས་ཁང་བཙུགས་པ་དང་། ལྷ་རིས་པ་མང་པོ་མཉམ་རུབ་སྒོས་ཐང་ག་འབྲི་བཞེངས་བྱས་པས་ཐོན་སྐྱེད་ཀྱི་གཞི་ཁྱོན་གྲུབ་སྟེ། རེབ་གོང་ཐང་ག་ཐོན་ལས་ཅན་གྱི་ཐོག་ནས་འཕེལ་རྒྱས་འགྲོ་རྒྱུར་སྐུལ་འདེད་ཐེབས་ཡོད། སློབ་དཔོན་གདུགས་དཀར་མཆོག་ད་དུང་ས་གནས་འདིའི་རིག་གནས་འཛུགས་སྐྲུན་དང་ཡུལ་སྐོར་འཕེལ་རྒྱས་གཏོང་བའི་ལས་དོན་ཁྲོད་ཧུར་ཐག་གིས་ཞུགས་ཏེ། རེབ་གོང་སྒྱུ་རྩལ་རྟེན་རྫས་བཤམས་མཛོད་ཁང་དང་། ཐང་ག་སྒྱུ་རྩལ་སྡེ་བ་སོགས་སྲིད་གཞུང་གི་རིག་གནས་ཡུལ་སྐོར་རྣམ་གྲངས་གཏོད་རྒྱུར་རོགས་རམ་བྱས་པ་དང་། གྲོང་གསེབ་དར་སྤེལ་དང་རེབ་གོང་སྒྱུ་རྩལ་རྒྱུན་འཛིན་གོང་སྤེལ་ཐད་སྟོབས་ཤུགས་ཕུལ་ཡོད། སློབ་དཔོན་གདུགས་དཀར་མཆོག་སྐུ་གཤེགས་པ་ནི་རང་རྒྱལ་གྱི་བཟོ་རྩལ་མཛེས་རྩལ་ལས་རིགས་ཀྱི་གྱོང་གུན་ཞིག་ཡིན་པར་མ་ཟད། རང་རེའི་རྨ་ལྷོར་མཚོན་ནའང་ཐང་ཀ་སྒྱུ་རྩལ་གྱི་མི་བོ་ཆེ་ཞིག་ང་ཚོ་དང་ཁ་བྲལ་བའི་མྱ་ངན་གྱིས་གཟིར་ནས་ཡོད་དོ། །