༄༅།།ཆབ་འགག་རྟ་མགྲིན།

1955ལོར་མདོ་སྨད་ཆབ་འགག་རྒྱལ་ར་སྡེ་ཆེན་དུ་སྐྱེས། 1964ལོ་ནས་རིམ་བཞིན་སློབ་ཆུང་ནས་སློབ་གྲྭ་ཆེན་མོར་འགྲིམས། 1989ལོར་ནུབ་བྱང་མི་རིགས་སློབ་ཆེན་ནས་རབ་འབྱམས་པའི་བསླབ་གནས་བླངས། སློབ་མཐར་ཕྱིན་རྗེས། མཚོ་སྔོན་མི་རིགས་སློབ་ཆེན་དུ་སློབ་ཁྲིད་གནང་། སྔ་ཕྱིར་བོད་ཀྱི་རྩོམ་རིག་ཐུབ་པའི་སྐྱེས་རབས་ཀྱིས་ཤན་ཞུགས་ཚུལ་གླེང་བ་ཞེས་པ་དང་། གངས་ལྗོངས་མི་རིགས་ཁག་གི་འབྲེལ་བ་བརྗོད་པ་གཟུར་གནས་ཡིད་ཀྱི་དགའ་སྟོན་ཞེས་པ། བོད་བཙན་པོའི་དུས་ཀྱི་རྩོམ་ཡིག་ཅེས་པ། སྒྲུང་བཤད་སྙིང་གི་ལེགས་སྐྱེས་ཞེས་པ། ཆབ་འགག་རྟ་མགྲིན་གྱི་ཆེད་རྩོམ་ཕྱོགས་བསྒྲིགས་ཞེས་པ།(སྟོད་སྨད་ཆ) བོད་ཀྱི་དེང་རབས་རྩོམ་རིག་ལོ་རྒྱུས་ཞེས་པ། རྡོ་རིང་ཞིབ་འཇུག་ཅེས་པ། གངས་ལྗོངས་མཁས་དབང་རིམ་བྱོན་གྱི་གླིང་སྒྲུང་སྐོར་གྱི་གསུང་སྒྲོས་སྣ་ཚོགས་དང་དེའི་དཔྱད་པ་དྭངས་གསལ་ཤེལ་གྱི་མེ་ལོང་ཞེས་པ་སོགས་དཔེ་དེབ་བཅུ་ཙམ་པར་དུ་བསྐྲུན། སློབ་ཁྲིད་དང་ཞིབ་འཇུག་གི་འབུར་ཐོན་གྲུབ་འབྲས་ལ་དམིགས་ནས་རྒྱལ་ཁབ་སློབ་གསོ་ཨུ་ཡོན་ལྷན་ཁང་གིས་སྔ་ཕྱིར་མཐོ་རིམ་སློབ་གྲྭའི་ཕུལ་དུ་བྱུང་བའི་ན་གཞོན་དགེ་རྒན་དང་རྒྱལ་ཁབ་རིམ་པའི་དགེ་རྒན་གྲགས་ཅན་སོགས་ཀྱི་བྱ་དགའ་གནང་། སྔ་གཞུག་ཏུ་གླིང་སྒྲུང་ཞིབ་འཇུག་སྐོར་གྱི་རྒྱལ་སྤྱིའི་རིག་གཞུང་གྲོས་མོལ་ཚོགས་འདུ་སྐབས་གཉིས་པ་དང་བཞི་པ་དང་ལྔ་པ། རྒྱལ་སྤྱིའི་བོད་རིག་པའི་ཞིབ་འཇུག་གྲོས་ཚོགས་སྐབས་བརྒྱད་པ་དང་དགུ་པ་དང་བཅུ་གཅིག་པ། ཧྥ་རན་སི་དང་ཀྲུང་གོའི་བོད་རིག་པའི་ཚོགས་འདུ་དང་། ཀྲུང་གོ་དང་ཧྥ་རན་སིའི་བོད་རིག་པའི་ཞིབ་འཇུག་ཚོགས་འདུ་སོགས་ལ་ཞུགས།