གསེར་གྱི་བུམ་པ་ཐོགས་པའི་ཤེས་རིག་གི་ཕོ་ཉ།

       རྨོག་རུ་འཇའ་ཁོའམ་སློབ་གཙོ་འཇམ་དབྱངས་རྒྱ་མཚོ་ལགས་ནི། སྤྱི་ལོ1940ལོར་རྨོག་རུ་གཡང་སྡེ་ཕྱུག་མོར་སྐྱེས། རྗེ་བློ་བཟང་བསྟན་དར་པ་དང་མཛོད་པ་བ་རྗེ་ཡེ་ཤེས་རྒྱ་མཚོ། གཞུང་བརྒྱའི་མཛོད་འཛིན་ཤེས་བཞིན་དགེ་བའི་བཤེས་གཉེན་དགེ་འདུན་བསྟན་རྒྱས། རིག་པའི་དཔའ་བོ་ཀོའུ་བ་བསྟན་འཛིན་སོགས་བཤེས་གཉེན་མང་པོའི་ཞབས་པད་ཚུལ་བཞིན་དུ་བསྟེན་ཏེ། འབྲི་ཀློག་དང་སུམ་རྟགས་དག་གསུམ་སོགས་ལ་སྦྱངས་བརྩོན་ཆེན་པོ་བྱས་པ་བརྒྱུད། 1955ལོའི་སྔ་རྗེས་སུ་རྗེ་གདན་ས་སྐུ་འབུམ་དུ་ཐུགས་རྗེ་ཆེན་པོའི་དབང་སོགས་དང་། 1983ལོར་པཎ་ཆེན་རིན་པོ་ཆེ་ལས་སེམས་བསྐྱེད་མཆོད་པ་དང་ལམ་རིམ་བསྡུས་དོན་སོགས་ཆོས་བཀའ་མང་པོ་དང་། ཨ་རོལ་རྡོ་རྗེ་འཆང་ལས་དབང་བ་རི་བརྒྱ་རྩ་སོགས་ཐོབ་པ་དང་། ཁོང་རྗེ་བསྟན་དར་བ་ལས་རྗེ་ཞྭ་དམར་པཎྜི་ཏའི་ལམ་རིམ། ཐེག་ཆེན་གསོ་སྦྱོང་། བསྐལ་བཟང་རྒྱན་འཕྲེང་། གཅོད་ཀྱི་ཞི་དབང་སོགས་ཆོས་བཀའ་མཐའ་ཡས་མནོས། རིམ་བཞིན་བསྡུས་གྲྭ་གསུམ་དང་། བློ་རྟགས་གཉིས། གཞུང་གསར་འཛིན་གྲྭའི་བར་དུ་སློབ་གཉེར་གནང་།

       རང་ལོ་ཉེར་གཅིག་སྟེང་ནས་ལོ་དྲུག་ལ་རྨོག་རུ་རུ་ཁག་བཞི་པའི་རྩིས་གཉེར་པའི་འགན་ཁུར། རང་ལོ་ཉེར་དགུའི་སྟེང་ནས་ལོ་བཅུའི་རིང་ལ་རིམ་བཞིན་ཁུལ་དང་རྫོང་། ཞང་བཅས་ཀྱི་གསར་བརྗེ་ཨུ་ཡོན་ལྷན་ཁང་གི་ཨུ་ཡོན་གྱི་འགན་ཁུར། རང་ལོ་སོ་དགུའི་སྟེང་ནས་མང་ཚོགས་ཀྱི་རེ་བ་ལྟར་རང་སྡེའི་སྦྲ་གུར་སློབ་གྲྭའི་སློབ་གཙོའི་འགན་ཁུར་ཏེ། རུ་ཁག་སོ་སོའི་སློབ་གྲྭར་མགོ་ཁྲིད་བྱས་པ་མ་ཟད། རུ་ཁག་བཞི་པའི་དགེ་རྒན་གྱི་འགན་ཡང་གཅིག་ལྕོགས་སུ་བཞེས། རང་ལོ་ཞེ་ལྔ་སྟེ། སྤྱི་ལོ1986ལོ་ནས་བཟུང་། སྦྲ་གུར་ནང་དུ་ཁྱིམ་མཚེས་གཡས་གཡོན་གྱི་བྱིས་པ་མང་པོར་སྐད་ཡིག་གི་སློབ་ཁྲིད་མཛད། རིམ་བཞིན་རྫོང་རིམ་པ་ལ་ཡར་ཞུ་བྱས་ནས་སྲིད་གཞུང་ནས་སྒོར་དྲུག་ཁྲིའི་གནང་སྦྱིན་དང་། མང་ཚོགས་ཀྱི་ཞལ་འདེབས་སྒོར་སུམ་ཁྲི་སྟེ། ཁྱོན་སྒོར་དགུ་ཁྲི་ལྷག་གིས་སློབ་ཁང་གསར་བསྐྲུན་བྱས་ཏེ། གཏན་སྡོད་སློབ་གྲྭར་བསྒྱུར། དང་ཐོག་སློབ་མ་བཞི་བཅུ་ནས་ཕྱིས་སུ་བརྒྱ་ཕྲག་བརྒལ་བ་དང་། དང་ཐོག་བོད་ཡིག་རྐྱང་བ་བསླབས་ནས་ཕྱིས་སུ་བོད་རྒྱ་དབྱིན་གསུམ་གྱི་ཡི་གེ་དང་། རྩིས་རིག་གློག་ཀླད་སོགས་ཆ་ཚང་བའི་སློབ་གྲྭ་ཞིག་ཏུ་ཡར་ཟླ་བཞིན་འཕེལ་རྒྱས་བྱུང་བས། ཁོང་གིས་ཀྱག་ཀྱོག་གི་ལམ་ཕྲེང་གང་མང་བརྒལ་ཅིང་། དཀའ་སྡུག་གི་རྔུལ་ཆུ་གང་མང་ཞིག་གཏོར་མྱོང་བ་སྨོས་ཅི་དགོས། ད་དུང་རང་སྡེ་དང་མཉམ་སྦྲེལ་གྱིས་སློབ་གྲྭར་རྩྭ་ས་དང་ཞིང་ས། ནོར་ལུག་སོགས་བཀོད་སྒྲིག་བྱས་ཏེ་སློབ་མའི་སློབ་ཡོན་དང་འཚོ་བའི་དཀའ་ངལ་སེལ་བ་མ་ཟད། རྫོང་ཡོངས་ཀྱི་རང་ཁ་རང་གསོའི་རྟེན་གཞི་ཅན་གྱི་སློབ་གྲྭ་གཅིག་པུར་གྱུར་ཅིང་། གཞན་སློབ་ཡོན་དཀའ་བའི་སློབ་མར་ཁོང་གིས་ཐབས་ཤེས་སྒོས་སྒོར་འབོར་ཆེན་ཞིག་རོགས་སྐྱོར་དུ་ཕུལ་བ་སོགས་ནི་བདག་ལས་གཞན་གཅེས་ཀྱི་ལེགས་མཛད་ཡིན་པས། ཚུལ་དེ་ལས་གོ་བརྒྱད་ལོར། གོང་རིམ་ནས་ཀྱང“ལང་ཚོ་མི་རིགས་ལ་འབུལ་མཁན”ཞེས་པའི་མཚན་སྙན་གནང་།

       ཁོང་གིས་སློབ་གྲྭ་བཙུགས་པའི་ཚུན་དུ། རྒྱལ་ཁབ་ཕྱི་ནང་དུ་སློབ་གྲྭ་འདི་ནས་མཐར་ཕྱིན་པའི་ཆོས་རིག་སྨྲ་བའི་ལོ་ཙཱ་པ་དང་། ཞིབ་འཇུག་སློབ་མ། སློབ་ཆེན་སློབ་མ་བརྒྱ་དང་ལྔ་བཅུ། མཐར་ཕྱིན་སློབ་མ་སུམ་བརྒྱ་ལྷག་སྐྱེད་སྲིང་བྱས་པ་འདིའང་ནམ་ཡང་བསུབ་ཏུ་མེད་པའི་དན་རྟགས་ཤིག་ཏུ་ཟད། དེ་ལྟར་སློབ་གསོའི་ཤེས་རིག་གི་ནོར་བུ་གཙིགས་འཛིན་བྱས་པའི་ཞོར་དུ། རང་སྡེའི་མཐུན་སྒྲིལ་དམ་འཛིན་དང་དཔལ་འབྱོར་འཕེལ་རྒྱས། ཁ་ཕྱོགས་གནད་སྟོན། དམངས་སྲོལ་གཅིག་གྱུར་སོགས་ལ་སྣེ་ཁྲིད་མཛད་ནས་བྱས་རྗེས་བླ་མེད་བཞག 1998ལོར་ཀྲུང་ཀོ་གཞོན་ནུ་ལོ་ཆུང་གོང་འཕེལ་ཐེབས་རྩ་ཚོགས་པའི་མཚན་འཛིན་ཚོགས་གཙོ་བན་ལིས་མཆོག་གིས་ཆེད་དུ་མིང་རྟགས་བཀོད་དེ“རེ་བའི་བཟོ་སྐྲུན་ལས་ལྡུམ་རྭའི་བྱ་དགའ”ཞེས་པའི་གསེར་གྱི་རྟགས་མ་ཆེད་དུ་བསྩལ་བ་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་སློབ་གསོ་པུའུ་དང་། ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ནས་ཕུལ་བའི“རང་རྒྱལ་གྱི་གཞི་རིམ་ནས་ལོ་ངོ་སུམ་ཅུར་སློབ་གསོའི་བྱ་བར་བྱས་རྗེས་འཇོག་མཁན”ཞེས་པའི་བྱ་དགའ་སོགས་གཙོས། ཀྲུང་དབྱང་དང་ཞིང་ཆེན། ཁུལ། རྫོང་བཅས་ཀྱི་འབྲེལ་ཡོད་སྡེ་ཁག་སོ་སོས་བྱ་དགའ་རབ་དང་རིམ་པ་གནང་།