འགྲོ་མགོན་འཕགས་པ་བློ་གྲོས་རྒྱལ་མཚན་མཚམས་སྦྱོར་མདོར་བསྡུས།

        འགྲོ་མགོ་འཕགས་པ་བློ་གྲོས་རྒྱལ་མཚན་ནི།   རབ་བྱུང་བཞི་པའི་ཤིང་ལུག(སྤྱི་ལོ1235)ལོར་ཡབ་ཟངས་ཚ་བསོད་ནམས་རྒྱལ་མཚན་དང་ཡུམ་མ་གཅིག་ཀུན་དགའ་སྐྱིད་གཉིས་ཀྱི་སྲས་སུ་ས་སྐྱར་འཁྲུངས།    དགུང་ལོ་ཆུང་དུས་ནས་ཡི་གེ་འབྲི་ཀློག་སོགས་རིག་པའི་གནས་ལྔ་ལ་དཀའ་ཚེགས་ཆེན་པོ་མ་དགོས་པར་མཁྱེན།   དགུང་ལོ་བཅུ་བ་ཤིང་འབྲུག(སྤྱི་ལོ1244)ལོར་ཁུ་བོ་ས་སྐྱ་པཎྜི་ཏ་ཧོར་རྒྱལ་པོ་གོ་དན་གྱིས་གདན་དྲངས་པ་ལྟར་ལྱང་ཅུ་སྡེ་བཞིར་ཕེབས་སྐབས་ཞབས་ཕྱིར་བྱོན།   དགུང་ལོ་བཅུ་བདུན་པ་ལྕགས་ཕག(སྤྱི་ལོ1251)ལོར་ས་པཎ་སྐུ་གཤེགས་ཁར་རང་ཉིད་ཀྱི་ཆོས་བརྒྱུད་འཛིན་པའི་བདག་པོར་བསྐོས།   དགུང་ལོ་བཅུ་དགུ་བ་ཆུ་གླང(སྤྱི་ལོ1253)ལོར་ཧུ་པེ་ལ(གོ་པེ་ལ)སེ་ཆེན་ཧན་གྱིས་གདན་དྲངས་ཏེ་ཧོར་གྱི་བླ་མཆོད་མཛད།  ལོ་དེར་ས་པཎ་གྱི་སྐུ་གདུང་ངོ་མཚར་ཅན་བྱོན་པས་རྒྱལ་པོ་ཧུ་པི་ལི་སོགས་དད་ནས་འཕགས་པ་ལ་དབང་ཞུས་པས།   ཐོག་མར་རྒྱལ་པོ་གཙོས་མི་ཉི་ཤུ་རྩ་ལྔ་ལ་གསང་སྔགས་ཀྱི་དབང་གནང་།   དབང་ཡོན་དུ་བོད་ཁྲི་སྐོར་བཅུ་གསུམ་དང་།   ཏི་ཤྲཱིའི་གོ་གནས།   གཡང་ཊི་ལས་བྱས་པའི་ཐམ་ག་བཅས་ཕུལ།   དབང་ཐེངས་གཉིས་པ་གནང་བའི་དབང་ཡོན་དུ་བོད་ཆོལ་ཁ་གསུམ་གྱི་སྲིད་དབང་ཡོངས་རྫོགས་ཕུལ་ནས་བོད་ས་གནས་ཀྱི་ཆོས་སྲིད་གཉིས་ཀའི་དབང་གི་བདག་པོར་བསྐོས།   རབ་བྱུང་བཞི་བའི་ཆུ་བྱི(སྤྱི་ལོ1252)ལོར་བོད་དུ་ཕེབས།   གོང་མས་གོང་མས་འཕགས་པ་ལ་བོད་ཀྱི་ཆོས་སྲིད་གཉིས་ཀའི་བདག་པོར་བསྐོས་པའི་འཇའ་ས་མུ་ཏིག་མ་ཕུལ།   དེའི་ཕྱི་ལོར་ས་སྐྱར་བྱོན།   བོད་དུ་ལོ་ངོ་གསུམ་བཞུགས་རིང་ལ་ཁ་ཆེའི་པཎྜི་ཏ་ཤྲཱི་ཏ་ཐཱ་ག་ད་བྷ་དྲ་དང་།   གློ་བོ་ལོ་ཙཱ་བ་ཤེས་རབ་རིན་ཆེན།   སྣར་ཐང་མཁན་ཆེན་མཆིམས་ནམ་མཁའ་གྲགས་སོགས་མཁན་ཆེན་ཉི་ཤུ་ལྷག་ཙམ་བསྟེན་ནས་མདོ་སྔགས་ཀྱི་ཆོས་མང་པོ་གསན།   དེ་ནས་གོང་མའི་བཀའ་ལྟར་སླར་རྒྱ་ནག་ཏུ་ཕེབས།   དགུང་ལོ་ཉེར་གཅིག་པ་ཤིང་ཡོས(སྤྱི་ལོ1255)ལོར་སྙེ་ཐང་མཁན་ཆེན་གྲགས་པ་སེང་གེའི་དྲུང་དུ་དགེ་སློང་གི་སྡོམ་པ་བཞེས།   རབ་བྱུང་ལྔ་བའི་ས་སྦྲུལ(སྤྱི་ལོ1269)ལོར་ཧོར་ཡིག་གསར་པ་གཏན་ཕབ་ཀྱིས་ཕུལ་ཏེ་རྗེས་སུ་ཐང་གའི་ཐོག་བེད་སྤྱོད་བྱེད་སྲོལ་ཡོད།   དགུང་ལོ་སོ་དྲུག་པ་ལྕགས་རྟ(སྤྱི་ལོ1270)ལོར་སླར་ཡང་རྒྱལ་པོ་ལ་གསང་སྔགས་ཀྱི་དབང་གནང་བའི་ཡོན་དུ་ཤེལ་དམ་གླིང་དྲུག་མ་དང་།   གནམ་གྱི་འོག   ས་ཡི་སྟེང་ན་རྒྱ་གར་ལྷའི་སྲས་པོ།   སྤྲུལ་པའི་སངས་རྒྱས།   ཡི་གེ་རྩོམ་མི།   རྒྱལ་ཁམས་འཇགས་སུ་འཇུག་པ་པོ།  གནས་ལྔ་རིག་པའི་པཎྜི་ཏ་འཕགས་པ་ཏི་ཤྲཱི་ཞེས་པའི་འཇའ་ས་དང་གོ་གནས་ཕུལ།   མེ་བྱི(སྤྱི་ལོ1276)ལོར་སླར་བོད་དུ་ཕེབས་ནས་ས་སྐྱའི་ཆོས་རྒྱལ་མཛད་ཅིང་།  གཙང་ཆུ་མིག་རིང་མོར་དགེ་འདུན་ཁྲི་ཕྲག་བདུན་ལ་བསྙེན་བཀུར་ཏེ་ཆུ་མིག་ཆོས་འཁོར་མཛད།   དགུང་ལོ་ཞེ་དྲུག་པ་རབ་བྱུང་ལྔ་པའི་ལྕགས་འབྲུག(སྤྱི་ལོ1280)ལོར་ལྷ་ཁང་བླ་བྲང་དུ་སྐུ་གཤེགས།