གཅུང་ཁྲི་དར་མ་འུ་དུམ་བརྩན་ཞེས་པ་ལས་འཕྲོས་པ།

       དེ་ཡང་དགེན་བན་ཤུལ་ལགས་ཀྱི་དྲ་ལམ་བརྒྱུད་དེ་ཆེས་གནའ་བོའི་དཔེ་རྙིང་བཙན་པོའི་གདུང་རབས་ཕྱི་མའི་སྐོར་འཁོད་པའི་ཡིག་ཆ་སྟེ། ཤོག་ལྷེ་གཅིག་ཟུར་ཅུང་ཟད་མ་ཚང་བ་ཅིག་མཇལ་བྱུང་བས། དེ་ནི་ཡིག་རྙིང་གལ་པོ་ཆེར་སྣང་ལ། དེར་ཡིག་ཕྲེང་དང་པོར། ༄། གཅུང་ཁྲི་དར་མ་འུ་དམ་བརྩན།གཅུང་དར་མ་ཁྲི་འུ་དུམ་བརྩན་དང་། ཁབ་ཚེས་པོང་ཟ་རྒྱལ་སུམ་ཙན་གྱི་རྗེས་། ཞེས་གསལ་པོར་འཁོད་འདུག་པས། ཡིག་རྙིང་དེ་ཉིད་ཀྱི་ཡི་གེའི་གཟུགས། ཚིག་གི་འགྲོས། ཐ་སྙད་ཀྱི་ཉམས་སོགས་ལས་ཡིག་རྙིང་ཚད་ལྡན་ཁུངས་ཐུབ་ཅིག་ཡིན་པའི་ངེས་པ་བརྟན་པོ་སྦྱིན་ཐུབ་པར་སྣང་བས། འདིར་གནའ་དཔེའི་པར་ཡང་མཉམ་དུ་གཟིགས་ལམ་དུ་ས་ལེར་བཤམས་ཡོད་དོ། །        ཡིག་ཚངས་ཁག་ན་རྒྱལ་པོ་གླང་དར་མ་དང་། བདུད་རྒྱལ་གླང་དར་དང་། དུད་འགྲོའི་མིང་ཅན་སོགས་བཀོད་ཡོད་པ་ནི་བཙན་པོ་དར་མ་སྐུ་གཤེགས་ནས་ལོ་སུམ་བརྒྱའི་རྗེས་སུ་གཞི་ནས་ཐོན་ཚུལ་བོད་རིག་པའི་མཁས་དབང་མཁར་རྨེའུ་ལགས་ཀྱིས་གསུངས་པ་སོགས་གཞན་དུ་ཤེས་པར་བྱ་ཞིང་། གྲགས་རྗེས་མ་བསྙེག་པར་རང་གིས་ལེགས་པར་དཔྱོད་ཤེས་དགོས་ལ། འདིར་རང་གི་རྩོམ་ཐུང་དུ་བཀོལ་བའི་བཙན་པོའི་མཚན་ལ་གསལ་འགྲེལ་ཉུང་ངུ་འདི་ཡང་དཔེ་ཀློག་གི་འབྲས་བུ་གཟུར་གནས་བློ་གསལ་དག་གི་སྤྱན་ལམ་དུ་ཕབ་པ་ལགས་སོ། །