འབྲོམ་སྟོན་པ་རྒྱལ་བའི་འབྱུང་གནས།

     འབྲོམ་སྟོན་པ་རྒྱལ་བའི་འབྱུང་གནས་ནི་རབ་བྱུང་དང་པོའི་གོང་གི་ལོ་སྐོར་མཐའ་མའི་ཤིང་འབྲུག་ལོར(1004)བར་ཡབ་རྟ་གསུམ་སྐུ་གཤེན་དང་ཡུམ་ཁུ་འོད་བཟའ་གཉིས་སུ་སྲས་སུ་ཡུལ་སྟོད་ལུང་ཕུར་སྐུ་འཁྲུངས། རབ་བྱུང་དང་པོའི་ཆུ་རྟ་ལོར(1042)ཇོ་བོ་རྗེ་དཔལ་ལྡན་ཨ་ཏི་ཤ་མངའ་རིས་ལ་ཕེབས་པ་གསན་ནས་ཁམས་ནས་ཞབས་ཐང་གིས་མངའ་རིས་སུ་ཕེབས་ཤིང་། སྤུངས་རངས་སུ་ཇོ་བོ་རྗེ་དཔལ་ལྡན་ཨ་ཏི་ཤ་དང་མཇལ་ཏེ་ལོ་ངོ་བཅུ་གཅིག་གི་རིང་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། ཇོ་བོས་ཡོན་ཏན་ཐམས་ཅད་བུམ་པ་གང་བྱོའི་ཚུལ་དུ་འབྲོམ་ལ་གནང་ཞིང་ཁྱད་པར་དུ་སྐྱེས་བུ་གསུམ་གྱི་ལམ་གྱི་རིམ་པ་ལ་རྩལ་ཐོན། ཇོ་བོ་རྗེ་སྐུ་མྱ་ངན་ལས་འདས་རྗེས་འབྲོམ་སྟོན་པས་རྭ་སྒྲེང་དབེན་གནས་བཏབ་སྟེ་ཚོགས་པ་ཆོས་བཞིན་བསྐྱངས། པོ་ཏོ་བ་རིན་ཆེན་གསལ་དང་སྤྱན་སྔ་བ་ཚུལ་ཁྲིམས་འབར། ཕུ་ཆུང་བ་གཞོན་ནུ་རྒྱལ་མཚན་གཙོས་མཁས་ཤིང་གྲུབ་པའི་བུ་སློབ་མང་དུ་སྤེལ། རབ་བྱུང་དང་པོའི་ཤིང་འབྲུག་ལོར(1064)རྭ་སྒྲེང་དུ་གཟུགས་སྐུའི་བཀོད་པ་ཆོས་དབྱིངས་སུ་བསྡུས།