logo

༄༅།།མཁས་ཤིང་གྲུབ་པའི་སྐྱེས་མཆོག་དམ་པ་རོང་ཆེན་ཀིརྟི་སྐུ་ཕྲེང་བརྒྱད་པ་བློ་བཟང་འཕྲིན་ལས་ཀྱི་མཛད་རྗེས།

རྩོམ་པ་པོ།:མི་གསལ། ཡོང་ཁུངས།:མཚོ་སྔོན་པོ་དྲ་བ། དུས་ཚོད།:2020-02-27 ཀློག་གྲངས།:
དུས་གསུམ་རྒྱལ་བ་ཐམས་ཅད་ལས་ཀྱང་བཀའ་དྲིན་ལྷག་པར་ཆེ་བའི་ངེས་དོན་ཆོས་ཀྱི་རྒྱལ་པོ། ཐུབ་དབང་བསྟན་པའི་མངའ་བདག འཇམ་མགན་བླ་མ་ཤར་ཙོང་ཁ་བ་ཆེན་པོའི་དངོས་སློབ་རོང་ཆེན་ལྗགས་ནག་པའི་སྐུ་ཕྲེང་འཛིན་པ། རྗེ་བཙུན་བློ་བཟང་འཕྲིན་ལས་བསྟན་པ་རྒྱ་མཚོ་དཔལ་བཟང་བོ་འདི་ཉིད། བོད་རབ་བྱུང་བཅུ་བཞི་པའི་ས་བྱ་སྤྱི་ལོ1849ལོར་གངས་ཅན་མདོ་སྨད་ཡངས་པའི་ནོར་འཛིན་རྫེ་གཞུང་གི་སའི་ཆ་དང་བོའི་མདོ་ཞེས་པའི་ཡུལ་དུ། ཡབ་སྔགས་འཆང་བདེ་ཆེན་དང་ཡུམ་ཇོ་མོ་ཐར་གཉིས་ཀྱི་སྲས་སུ་སྐུ་འཁྲུངས། དེ་ནས་ཡབ་བདེ་ཆེན་གྱིས་བྱིས་པའི་ མིང་ལ་འཕྲིན་ལས་རྡོ་རྗེ་ཞེས་བཏགས། ཆུང་ངུའི་དུས་ནས་རྣམ་དཀར་གྱི་ལས་ལ་འདུན་ཞིང་། བྱམས་སྙིང་རྗེ་ན་ལས་ཆེ་བ་སོགས་དམ་པའི་ངང་ཚུལ་དང་ལྡན། དགུང་ལོ་ལྔ་བར་སྐྱབས་མགོན་ཀུན་མཁྱེན་གསུམ་པ་རྗེ་བཙུན་འཇིགས་མེད་རྒྱ་མཚོ་དཔལ་བཟང་བོ་མཆོག་གིས། རོང་བོའི་ཆོས་རྗེའི་མཆོག་སྤྲུལ་དུ་ངོས་འཛིན་གནང་སྟེ་མཚན་ལ་བློ་བཟང་འཕྲིན་ལས་བསྟན་པ་རྒྱ་མཚོ་ཞེས་བསྩལ། དེ་རྗེས་རོང་ཆེན་ཀིརྟི་གོང་མའི་གདན་སར་ཞབས་ཤུང་བཀོད་དེ་ཀུན་གྱིས་གཙུག་ཏུ་བཀུར། དགུང་ལོ་དྲུག་པར་བསྟན་པའི་གསལ་བྱེད་དམ་པ་ཨ་ལགས་བསྟན་པ་ཚང་ཡོངས་འཛིན་དུ་བསྟེན་ནས་ཡོན་ཏན་ཀུན་གྱི་གཞི་རྟེན་ཡི་གེ་ཀློག་བསླབས་པས་ཚེགས་མེད་དུ་མཁྱེན། དགུང་ལོ་བདུན་པར་རྗེ་དཀོན་མཆོག་སྨོན་ལམ་བཟང་པོའི་སྤྱན་སྔར་རབ་བྱུང་དང་དགེ་ཚུལ་གྱི་སྡོམ་པ་རིམ་པར་བཞེས་ཏེ། རྒྱལ་བསྟན་རིན་པོ་ཆེའི་སྒོར་ཞུགས། རྗེ་ཐུབ་བསྟན་མཐའ་ཡས་པ་སོགས་བསྟེན་ནས་བཀའ་པོད་ཆེན་པོ་ལྔས་མཚོན་པའི་མདོ་སྔགས་ཀྱི་གཞུང་ལ་སྦྱངས་པ་མཐར་ཕྱིན་པ་མཛད་དེ་མཁས་པའི་གྲགས་པ་འབར། དགུང་ལོ་ཉེར་བཞིའི་སྟེང་དུ་རྗེ་བཙུན་ངག་དབང་ཆོས་འཕེལ་མཆོག་གི་དྲུང་དུ་བསྙེན་པར་རྫོགས་པ་དགེ་སློང་གི་སྡམ་པ་ཡང་དག་བཞེས་ཏེ་ངུར་སྨྲིག་འཆང་བ་ཀུན་གྱི་རྗེ་བོར་གྱུར། ཆུ་བྱ་སྤྱི་ལོ1873ལོར་དད་ལྡན་དུ་མས་གསོལ་བ་བཏབ་པ་བཞིན་རྔ་བའི་ཀིརྟི་དགེ་ལྡན་ལེགས་བཤད་གླིང་ཕྱག་འདེབས་མཛད། དེ་ནས་བཟུང་གདན་དར་གནང་སྟེ་ལུགས་གཉིས་ཀྱི་སྒོ་ནས་ལེགས་པར་བསྐྱངས་ཤིང་། མཁས་བཙུན་བཟང་གསུམ་གྱི་ཡོན་ཏན་དང་འཆད་རྩོད་རྩོམ་གསུམ་ལ་འགྲན་ཟླ་བྲལ་བའི་མཚན་སྙན་ཕྱོགས་ཀུན་ཁྱབ། ཧོར་གཙང་དཀོན་མཆོག་རྒྱུ་ཕྱུག་གི་དགོན་གྲོང་གིས་གདན་དྲངས་པ་ལྟར་ཕེབས་ཏེ་དགེ་ལྡན་བསྟན་འཕེལ་གླིང་དུ་ཆོ་འཕྲུལ་སྨོན་ལམ་གསར་འཛུགས་གནང་དགོས་པའི་གསུང་བཀོད་དང་། སྤྱི་རྫས་སྦྱོར་འཇགས་གནངས། དགོན་འདིར་མཚན་ཉིད་གསར་འཛུགས་གནང་སྟེ་བླ་མ་མཆོད་པའི་ཁྲིད་བསྩལ་བ་དང་བཅའ་ཡིག་མཛད། ད་དུང་དགོན་འདི་ནས་རྒྱུད་སྡེ་བཞིའི་དཀྱིལ་འཁོར་དུ་མའི་ཕྱག་བཞེས་དང་རྗེས་སུ་མཐུན་པར་ལེགས་པར་བསྩལ། སྟག་ཚང་ལྷ་མོར་དུས་འཁོར་གྲྭ་ཚང་གསར་འཛུགས་གནང་ཞིང་གདན་སར་སྔགས་རམས་པའི་སྲོལ་གསར་འཛུགས་མཛད། གཞན་ཡང་ཧོར་གཙང་ཀིརྟི་དགོན་དང་ཁ་གྱ་ཚོ་དྲུག་གི་དགོན་སྡེ་དུ་མས་གདན་དྲངས་པ་ལྟར་ཕེབས་ཏེ། རྒྱལ་བ་འཇམ་དཔལ་སྙིང་བོའི་མདོ་སྔགས་ཟུང་འབྲེལ་གྱི་བསྟན་པ་རིན་པོ་ཆེ་ཕྱག་མཚན་དུ་བཞེསཏེ། ཟུང་འཇུག་རྡོ་རྗེ་འཆང་གི་གོ་འཕང་ཐོབ་པར་བྱེད་པ་ལ་བདེ་གསང་འཇིགས་གསུམ་གྱི་ལམ་ཡ་མ་བྲལ་བ་དགོས་པར་ཡབ་གཅིག་འཇམ་པའི་དབྱངས་ཀྱིས་རྒྱལ་བ་གཉིས་པ་ལ་ནན་ཏན་དུ་གདམས་པའི་བདེ་གསང་འཇིགས་ཀྱི་དབང་གནང་བས། སྐལ་བ་དང་ལྡན་པ་རྣམས་ལ་གང་ལ་གང་འཚམ་པའི་གསུང་གི་བདུད་རྩིས་སྨིན་ཅིང་གྲོལ་བའི་སྐལ་བ་ཅན་དུ་བྱས་ཐོག བླ་མའི་རྡོ་རྗེ་སློབ་དཔོན་ཆེན་མོ་རང་ཉིད་ནས། རྡོ་རྗེ་ཐེག་པ་སློབ་ཚུལ་གསུངས་པ་ནི། དེ་ལྟར་ལམ་ཐུན་མོང་དེ་དག་གིས་རྒྱུད་སྦྱངས་ནས། ཚེ་གཅིག་ཉིད་ལས་སངས་རྒྱས་ཀྱི་སར་བགྲོད་པའི་ཉེ་ལམ་ཟབ་མོ་རྡོ་རྗེ་ཐེག་པ་ལ་འཇུག་པར་བྱ་དགོས་པས། རྡོ་རྗེ་སློབ་དཔོན་མཚན་ཉིད་དང་ལྡན་པ་ལས་སྐུ་བཞིའི་ད་བོན་ཐེབས་ངེས་ཀྱི་དབང་སྐུར་པ་རྣམ་པར་དག་པ་མནོས་ཤིང་། དེའི་དུས་དུ་ཁས་བླངས་པའི་དམ་ཚིག་སྡོམ་པ་མིག་འབྲས་བཞིན་དུ་གཞིར་བཟུང་ནས་སྨིན་བྱེད་བསྐྱེད་པའི་རིམ་པ་དང་། གྲོལ་བྱེད་རྫོགས་པའི་རིམ་པ། ལམ་ལ་བོགས་བགྱིད་པའི་སྦྱོར་བ་དང་བཅས་པ་ལ་བསླབས་པས། སྙིགས་དུས་ཀྱི་ཚེ་ཐུང་འདི་ལ་ཟུང་འཇུག་རྡོ་རྗེ་འཆང་གི་གོ་འཕང་མངོན་དུ་བྱས་ཏེ་མ་རྒན་སེམས་ཅན་ཐམས་ཅད་གཏན་བདེ་བླ་ན་མེད་པའི་ས་ལ་མྱུར་དུ་འགོད་པར་བྱའོ།། དེ་ལྟར་བྱེད་ནུས་པ་བླ་མ་ལྷས་བྱིན་གྱིས་བསླབ་ཏུ་གསོལ། ཞེས་གསུངས་པ་དང་། ད་དུང་བརྒྱད་ཁྲི་བཞི་སྟོང་ཆོས་ཕུང་སྙིང་བོའི་བཅུད།། ཐུན་མོང་བྱང་ཆུབ་ལམ་གྱི་རྒྱུད་སྦྱངས་ཏེ།། དབང་ཐོང་དམ་ཚིག་ལ་གནས་རིམ་གཉིས་ཀྱིས།། ཟུང་འཇུག་ཡན་ལག་བདུན་ལྡན་ཐོར་པར་ཤོག ཅེས་བླ་མ་རྡོ་རྗེ་སློབ་དཔོན་པོས་རིན་ཐང་ཆེ་བའི་ཞལ་གདམས་གནད་སྨིན་བསྩལ་ཏེ་གང་དེའི་འཕྲིན་ལས་ཀྱི་འོད་ཟེར་འབར་བས་བུ་སློབ་རྣམས་ཀྱིས་རྡོ་རྗེ་ཐེག་པའི་ལམ་ལ་སློབ་ཚུལ་གྱི་ངེས་ཤེས་རྙེད་དེ་ཡིད་ཀྱི་པདྨོ་རབ་ཏུ་བཞད་དེ་སྤྲོ་དགའ་ཆེ་བར་བྱུང་། སྐྱབས་མཆོག་སྲིད་ཞིའི་གཙུག་རྒྱན་རོང་ཆེན་ཀིརྟི་བརྒྱད་པ་རྗེ་བཙུན་བླ་མ་དམ་པ་འདི་ཉིད་མདོ་སྔགས་ཀྱི་གཞུང་ལ་གསན་པ་རྒྱ་ཆེ་ཞིང་། ཤེས་བྱའི་གནས་ཀུན་མཁྱེན་ཞིང་གཞན་ལ་ཕན་པའི་སེམས་ཆེ་བ། གདུལ་བྱ་སྐྱོང་བའི་ཐབས་ལ་མཁས་པ། ཀུན་ལ་ཐུགས་སྙོམ་ཤིང་ལེགས་པའི་གསུང་སྙན་པ། ད་དུང་སྦྱིན་པའི་ཕྱག་རིང་བ་ཞིག་ཡིན་ཕྱིར། ཆེ་པོ་ཧོར་གྱི་ཡུལ་དང་མདོ་སྨད་ལྷོ་བྱང་གི་དགོན་སྡེ་དུ་མས་གདན་དྲངས་པ་ལྟར་ཕེབས་ཏེ། སྐྱེ་དགུ་ཐམས་ཅད་བདེ་བར་འཚོ་བའི་གཞི་ཞྭ་སེར་གྱི་བསྟན་པ་རྒྱ་ཆེར་སྤེལ་བའི་འཕྲིན་ལས་ཀྱི་གདུགས་དཀར་གྱེན་དུ་འདེགས་པའི་བྱེད་པོར་དབང་སྐུར་ཞིང་། རྗེ་བླ་མ་ཉིད་ནས་རྒྱལ་བ་འཇམ་དཔལ་སྙིང་བོའི་མདོ་སྔགས་ཟུང་འབྲེལ་གྱི་གདམས་པའི་བདུད་རྩི་བུ་སློབ་རྣམས་ལ་གནངས་པས་འདི་ལྟ་བུའི་སྐལ་བ་བཟང་བོ་ཉམས་སུ་མྱོང་སྙམ་དུ་དགའ་སྤྲོ་དང་དད་གུས་འགྲན་བཞིན་འཕེལ་བར་བྱུང་། འདིའི་སྐབས་སུ་རྗེ་ཀིརྟི་འཕྲིན་ལས་བས་དབང་བཀའ་ཆོས་དུ་མ་མ་གནང་སྟེ་དམ་པའི་ཆོས་འཛིན་གླིང་དུ་ཕྱག་ཕེབས་ཏེ། འཇམ་མགོན་བླ་མ་བསེ་སྐུ་ཕྲེང་ལྔ་བ་རྗེ་བཙུན་བློ་བཟང་བཀྲ་ཤིས་འཕྲིན་ལས་རྒྱ་མཚོ་མཆོག་སྐུ་ན་ཧ་ཅང་ཕྲ་ཞིང་། གཟིགས་པ་དགེ་བས་རིགས་གསུམ་སྤྱི་སྒྲུབ་སོགས་ཀྱི་རྗེས་གནང་དང་། ཞབས་བརྟན་གསོལ་འདེབས་ལེགས་བྱས་སྙེ་མ་ཞེས་བྱ་བ་མཛད། བཀའ་ཆོས་གསན་བཞེས་དང་བསྟན་འགྲོ་ལ་སྨན་པའི་བྱ་བ་མཛད་དགོས་ཚུལ་གསུང་བཀོད་ཞིབ་རྒྱས་གནང་ཚུལ་རྣམ་ཐར་དུ་སྣང་། ཡང་སྒོས་སུ་ཀུན་མཁྱེན་བླ་མ་ཡབ་ སྲས་ཀྱི་སྐུ་དོན་དང་། བསྟན་འགྲོའི་ཕན་བདེ་སྤེལ་བའི་ཐུགས་སྨོན་རྒྱ་ཆེར་གནང་སྟེ་གཙོས་ཁ་གྱ་ས་སྒར་ལུང་ བཅུ་དང་། མཛོད་དགེ་དམེ་བོ་ཤོག་པ་ལྔ་མ་མཐུན་པར་ཡུན་རིང་འཁྲུག་པའི་གཡུལ་ངོར་མི་ཉིས་བརྒྱ་དང་གོ་དགུ་ཙམ་ལུས་སྲོག་ཤོར་པའི་གྱོད་སྣ་ཤིན་ཏུ་ཆེ་བ་བྱུང་སྟབས། ཕྱོགས་འདིའི་གདུལ་བྱ་སེར་སྐྱ་མཆོག་དམན་ཀུན་གྱི་རེ་འདོད་ཇི་བཞིན་ཆོས་དང་ཕྱག་དབང་བསྩལ། ཕན་ཚུན་རྟ་ནོར80དང་དངུལ་སྲང་བརྒྱའི་གནང་སྦྱིན་བྱས་ཐོག ཕན་ཚུན་གྱོད་ཆེན་འགྲིག་རྒྱུའི་འགོ་བཙུགས་ཏེ་རྒྱུ་འབྲས་དྲང་ཐིག་གི་སྒོ་ནས་དོན་ཆེན་པོ་འདི་དག་འདུམ་པར་གཟུ་ཡིག་གནང་སྟེ་བཀའ་ནན་བསྩལ། དེའི་རྗེས་སུ་རྗེ་བཙུན་བླ་མའི་ཐུགས་རྗེའི་ཉིན་བྱེད་ཀྱིས་སོ་སོའི་ཞེ་སྡང་གི་མུན་པ་ཞི་ནས་གུས་པ་ཆེན་པོས་བཀའ་དང་ལེན་བྱས་ཐོག རྗེ་བཙུན་འཕྲིན་ལས་ཐུགས་བརྩེ་བ་ཆེན་པོའི་ངང་ནས།
ཆོག་གསུམ་ཐུགས་རྗེ་ཟླ་ཤེལ་དབང་བོའི་གར།།
ཐབས་མཁས་བསམ་སྦྱོར་རླུང་གི་ཤིང་རྟ་ཡིས།།
རྣམ་དཀར་ལེགས་སྨོན་མཁའ་ལ་ཉེར་དྲངས་པས།།
དགའ་བདེ་དཔལ་གྱིས་འཚོ་བའི་རྒྱུ་རུ་བསྔོ།།
གཡུལ་དུ་བསད་པའི་ཉམ་ཐག་འགྲོ་བ་ཀུན།།
རྣམ་དཀར་ལས་འདིའི་དོན་དུ་འབད་པ་རྣམས།།
སྐྱེ་བར་མི་ཁོམ་གནས་སུ་མི་ལྷུང་བར།།
རིང་མིན་འགྲོ་བའི་སྐྱབས་གཅིག་ས་ཐོབ་ཤོག།
ཞེས་རྗེ་བཙུན་བླ་མ་དམ་པ་དམིགས་པ་མེད་པའི་ཐུགས་རྗེ་ཆེན་པོ་དང་ལྡན་པ་འདི་ཉིད་ཀྱིས་བསྟན་པའི་ཁུར་ཆེན་འདེགས་པའི་ལྷག་བསམ་དང་། བདག་བས་གཞན་གཅེས་ཀྱི་ལྷག་བསམ་རྨད་དུ་བྱུང་བའི་ཐུགས་བསྐྱེད་འཕྲིན་ལས་བཟང་བོ་ངེས་པར་སྨིན་པ་བཞིན་དུ་གྱོད་ཆེན་ལེགས་པར་འདུམས་ཏེ་དགེ་བ་རྫོགས་བྱང་བསྔོ་བ་སོགས་སྐུ་དྲིན་གཞལ་དཀའ་བ་དུ་མ་མཛད། གཞན་ཡང་བསང་ཆུའི་ཧོར་དང་གནམ་ལྷོའི་གྱོད་དོན། བསང་ཆའ་ཨ་མཆོག་དང་ཀླུ་ཆུའི་ས་རྩོད་གང་ཡང་འགྲིག་མཐུན་ལ་བཀོད་པ་མ་ཟད། ཡུལ་ཁམས་སོ་སོར་རྐུན་ཇག་གི་ཁྲིམས་བསྡམས་ཏེ་མ་ཎི་སྨྱུང་གནས། ཚེ་ཐར་ཅི་མང་ཅི་ནུས་ཁས་བླངས་ཏེ་གྲངས་ཕུལ། ད་དུང་རོང་འབྲོག་གང་གི་འཕྱི་བ་དང་། ཙི་གུ་སོགས་མི་གསོད་པར་གདམས་པ་ཐམས་ཅད་ཀྱིས་དད་གུས་དང་བླངས་བྱས་ཏེ་ཁས་ལེན་དམ་བཅའ་ཕུལ། དེ་དག་ལས་རྗེ་བླ་མ་མཆོག་གིས། ཡུལ་ཁམས་ལ་ལེགས་པོ་ཡོང་མི་ཡོང་ཡུལ་མིའི་བྱ་སྤྱོད་ལ་རག་ལས་པས། དགེ་འདུན་པ་རྣམས་ཀྱིས་བསླབ་ཁྲིམས་ཚུལ་བཞིན་སྲུང་བ་དང་། ཁྱིམ་པ་རྣམས་ཀྱིས་ཀྱང་ཕན་ཚུན་བྱམས་པའི་སེམས་ཀྱིས་དགེ་བཅུའི་ཁྲིམས་ལ་གནས་པ་ཞིག་བྱུང་ན། ཡུལ་ཁམས་སུ་བཀྲ་ཤིས་དང་བདེ་སྐྱིད་ལ་སྤྱོད་རྒྱུ་འབྱུང་བ་ཆོས་ཉིད་ཡིན་པས་དེ་བཞིན་ཀུན་གྱིས་ཡིད་ལ་བཅིངས་ན་བདག་གིས་ཀྱང་མཆོག་གསུམ་གསོལ་བ་བཏབ་སྟེ་སྐྱབས་འཇུག་བྱེད་ཅེས་གསུང་བཞིན། དགོན་སྡེ་དག་གི་རྟེན་གསུམ་སྤྱན་སྔར་མཆོད་འབུལ་དང་རྟེན་གསར་བཞེངས། ཁ་གྱའི་བདུད་འདུལ་མཆོད་རྟེན་བཞེངས་རྒྱུའི་གསུང་བཀོད་གནང་ཐོག་ཁོང་གི་ཕྱག་ཕྲེང་རྟེན་དུ་གནངས། ལྷ་གཉན་ཞལ་དཀར་ལ་གསོལ་མཆོད་བཏང་སྟེ་བསང་ཡིག་བརྩམས། གང་སེར་མ་གསུང་སྟེ་ཤིས་བརྗོད་ཀྱི་མེ་ཏོག་གཏོར། སྲིད་ཞིའི་རྒུད་པའི་རིགས་མཐའ་དག་ཞི་ནས་ཆོས་འབྱོར་བདེ་སྐྱིད་ཀྱི་དཔལ་ལ་ལོངས་སྤྱོད་པའི་ཐུགས་སྨོན་གང་རྒྱས་གནང་བར་སྨོན་ལམ་རྣམ་པར་དག་པས་མཚམས་སྦྱར་བ་སོགས་མཛད་པ་རླབས་ཆེ་ཞིང་རྣམ་ཐར་རྨད་དུ་བྱུང་བ་བསྐྱངས་པའི་མཐར་རབ་བྱུང་བཅོ་ལྔ་བའི་ཤིང་སྦྲུལ་སྤྱི་ལོ1905ལོར་དགོངས་པ་ཆོས་དབྱིངས་སུ་འཐིམ། ཐུགས་རྗེ་གཏེར་ཆེན་བདག་ཉིད་ཆེན་པོ་འདི་ནི་རང་དོན་གྱི་འཁྲི་བ་སྤངས་ཏེ་གང་མཛད་བསྟན་འགྲོའི་དོན་དུ་འགྱུར་བ་ཤ་སྟག་ཡིན་ཞིང་། ཡང་སྒོས་སུ་ཐུབ་དབང་འཇམ་མགོན་གཉིས་པའི་བསྟན་པ་རིན་པོ་ཆེའི་སྲོལ་སྔར་མེད་གསར་དུ་བཙུགས་པ་དང་ཉམས་པ་གསོ་བའི་སྒོས་གདུལ་བྱ་གང་ཡོད་ཀྱི་ཤེས་རྒྱུད་ལ་ཐར་བའི་ས་བོན་བསྐྲུན་པ་སོགས་རླབས་ཆེན་འཕྲིན་ལས་ཀྱི་འཇུག་པ་རྨད་དུ་བྱུང་བའི་ཐུགས་བསྐྱེད་ཀྱི་པདྨོ་འཛུམ་དཀར་འབུམ་དུ་གྲོང་ཞིང་འཁོར་ལོ་གསུམ་གྱི་ལྷུར་ལེན་པའི་སྐྱེས་མཆོག་ཁྱད་པར་ཅན་རྗེ་འདི་ལ་གསུང་ཆོས་པོད་བཅུ་གཉིས་བཞུགས་པ་མཇལ་ཏེ་དད་པའི་ཡིད་དྲངས་ཏེ། འགའ་ཞིག་ཤིང་པར་དང་ལྕགས་པར་དུ་བསྐྲུན་ཏེ་སྡེ་དགོན་སེར་སྐྱ་ཀུན་ལ་རིན་མེད་ཆོས་སྦྱིན་དུ་ཕུལ།
བདག་ཉིད་ཆེན་པོ་འདིའི་རྨད་དུ་བྱུང་བའི་རྣམ་ཐར་རྒྱ་མཚོ་ལྟ་བུ་ལས། ད་དུང་ཆུ་ཐིགས་ཙམ་ཞིག་མི་བརྗེད་པའི་དྲན་པ་གསོ་ཕྱིར། རྗེ་ཉིད་ཀྱི་རྣམ་ཐར་བཀྲ་ཤིས་གསེར་གྱི་འཁོར་ལོ་ཐུབ་བསྟན་མཛེས་རྒྱན་དང་། གངས་ལྗོངས་མཁས་དབང་རིམ་བྱོན་རྩོམ་ཡིག་གསེར་གྱི་སྦྲམ་བུ་དང་། གཙོས་ཁ་གྱའི་བློ་ལྡན་རྒན་པོ་དག་གི་ངག་རྒྱུན་སོགས་འཚོལ་སྡུད་བྱས་ཏེ་རྗེ་བཙུན་འཕྲིན་ལས་པའི་བཀའ་དྲིན་རྗེས་སུ་དྲན་པའི་རྣམ་ཐར་མདོར་བསྡུས་འདི་ཉིད་སྤེལ་བའི་མཐུས་འཛམ་གླིང་ཞི་བདེ་འཆམ་མཐུན་ཡོང་བའི་རྒྱུར་གྱུར་ཅིག
འབྲེལ་ཡོད་འོས་སྦྱོར།