༄༅།།ཆ་པ་ཆོས་ཀྱི་སེང་གེ

ཆ་པ་ཆོས་ཀྱི་སེང་གེ (ཕྱྭ་ཞེས་པའང་སྣང) རྗེ་འདི་ཉིད་རབ་བྱུང་གཉིས་པའི་ས་གླང( སྤྱི་ལོ1109)ལོར་སྐུ་འཁྲུངས། ཁོང་གིས་གྲོ་ལུང་པ་བློ་གྲོས་འབྱུང་གནས་ལས་ཆོས་གསན་ནས་འགྲེལ་ཆུང་གི་ཊཱིཀ་ཆེ་བ་ཞིག་མཛད། རྒྱ་དམར་བ་བྱང་ཆུབ་གྲགས་ལས་དབུ་ཚད་གཉིས་གསན། སློབ་དཔོན་ཆ་པས་ནེའུ་ཐོག་གི་གདན་ས་མ་མཛད་གོང་ནས་ཆོས་གྲྭ་མང་དུ་བསྐྱངས་ཤིང་། བསྟན་བཅོས་བརྩམས་པ་ལ་ཡང་བྱམས་པའི་ཆོས་ལྔ་དང་། ཚད་མ་རྣམ་པར་ངེས་པ། དབུ་མ་བདེན་གཉིས། རྒྱན། སྣང་ག སྤྱོད་འཇུག་ལ་སོགས་པའི་ཊཱིཀ་མང་པོ་མཛད། སོ་སོའི་བསྡུས་པ་ཡང་མང་དུ་བརྩམས། ཚད་མའི་བསྡུས་པ་ཡིད་ཀྱི་མུན་སེལ་ཞེས་བྱ་བ་ཚིགས་སུ་བཅད་པ་རང་འགྲེལ་དང་བཅས་པ་དང་། ཡིད་ཀྱི་མུན་སེལ་རྐྱང་པ་སྟེ་གཉིས་མཛད། བསྡུས་གྲྭའི་རིགས་ལམ་གྱི་སྲོལ་བཏོད། གཙང་ནེའུ་ཐོག་གི་གདན་ས་ལོ་མང་པོའི་བར་དུ་བསྐྱངས། མཐར་རབ་བྱུང་གསུམ་པའི་ས་གླང( སྤྱི་ལོ1169 ) ལོར་སྐུ་གཤེགས།
འདི་ཉིད་ལ་བུ་སློབ་ཀྱིས་བོད་ཡུལ་གང་བ་བྱུང་ཞིང་། དེ་དག་ལས། གཙང་ནག་པ་བརྩོན་འགྲུས་སེང་གེ་སོགས་སེང་ཆེན་བརྒྱད་དང་། འཁོན་ཇོ་སྲས་རྩེ་མོ་སོགས་ཇོ་སྲས་བཞི། འགར་དབང་གྲུབ་སོགས་ཤེས་རབ་ཅན་བཞི་སོགས་བྱུང་ངོ་།།