logo

༄༅།།ལྷ་སྲས་གཙང་མ།

རྩོམ་པ་པོ།:མི་གསལ། ཡོང་ཁུངས།:མཚོ་སྔོན་པོ་དྲ་བ། དུས་ཚོད།:2020-07-09 ཀློག་གྲངས།:
རྒྱལ་པོ་ཁྲི་ལྡེ་སྲོང་བཙན་གྱི་སྲས་འབྲིང་བའམ་རྒན་པ། འདི་ཉིད་ནི་བོད་ཀྱི་བཙན་པོའི་གདུང་རབས་ནང་ནས་རབ་ཏུ་བྱུང་བ་དང་པོ་ཡིན། ཆོས་འབྱུང་འགའ་ཞིག་ནང་རྒྱལ་པོ་ཁྲི་རལ་པ་ཅན་བཀྲོངས་རྗེས་ཆོས་ལ་མི་དགའ་བའི་བློན་པོ་དབས་སྟག་རྣ་ཅན་ལ་སོགས་པས་ངན་སྐུལ་བྱས་པ་བརྒྱུད། རྒྱལ་པོ་གླང་དར་མས་ལྷ་སྲས་གཙང་མ་མོན་དུ་སྤྱུགས། འདི་ཉིད་ལྷོ་བྲག་ཁོ་ཐིང་གི་བར་དུ་བྱོན། དེར་སྣ་ནམ་བཟའ་མང་པོ་རྗེས་དུག་ཕུལ་ནས་བཀྲོངས་ཞེས་པ་དང་། ཆོས་འབྱུང་ལ་ལར་ཐོག་མ་ལྷོ་བྲག་ཁོ་ཐིང་དུ་བྱོན། ཞིག་རལ་ཐམས་ཅད་གསོས། གཏེར་ཚན་གཅིག་སྦས། དེ་ནས་སྤ་གྲོར་བྱོན། སྐྱེར་ཆུའི་ལྷ་ཁང་རྙིང་པ་གསོས། གསར་པ་བརྩིགས། ཡབ་མེས་ཀྱི་བླ་དཔེ་དང་ཁྲིམས་ཀྱི་ཡིག་ཚང་སོགས་ཚན་ཆེ་བ་གཅིག་སྦས། སྟག་ཚང་དང་སེང་གེ་ཕུག་ཏུ་གཏེར་ཁ་མང་དུ་སྦས། སྤྱལ་ཀར་བརྒྱ་རྩ་བརྒྱད་སྦས། གཏེར་ཕྲན་མང་དུ་སྦས། དེ་ནས་ལྷ་སྲས་གཙང་མ་ལ་སྤྱན་འདྲེན་མི་མེད་པས་ཐུགས་མུག་སྟེ་བསམ་ཡས་ཀེ་ཚང་གི་བླ་དཔེ་ཟབ་མོ་རྣམས་སྤྱན་དྲངས་ཏེ་སྤྱལ་ཀའི་བྲག་ལ་སྦས། ལྷ་སྲས་ཉིད་དེར་སྐུ་གཤེགས་ཏེ་སྤུར་ཡང་བསེ་སྒྲོམ་དུ་བཅུག་ནས་བྲག་ལ་སྦས་ཞེས་གསལ་ནའང་། ལྷ་སྲས་གཙང་མ་རང་གི་དབོན་རྒྱུད་ཀྱིས་བརྩམས་པའི་མོན་ཡུལ་གྱི་ལོ་རྒྱུས་ནང་། ལྷ་སྲས་གཙང་མ་མོན་དུ་སྤྱུགས་པའི་སྐོར་ལ་འདི་ལྟར་གསལ་བ་སྟེ། འདི་ཉིད་མོན་སྤ་གྲོ་གནམ་ཐང་སོགས་བརྒྱུད་ནས་རིམ་བཞིན་ཕེབས་པའི་མཐར་མི་ཟིན་པའི་ས་ཆར་འབྱོར། འདིར་ཨ་མི་དོན་གྲུབ་རྒྱལ་ཟེར་བའི་མི་ཞིག་གིས་བདག་པོ་བྱས་པའི་མི་ཁྱིམ་ཞིག་འདུག་པ་དེར་གནས་ཚང་བཅའ་ནས་བཞུགས། ཨ་མི་དོན་གྲུབ་རྒྱལ་གྱིས་རང་གི་བུ་མོ་བསོད་ནམས་དཔལ་སྦྱིན་ལྷ་སྲས་གཙང་མའི་བཙུན་མོར་ཕུལ་བས་སྲས་ཁྲི་མི་ལྷའི་དབང་ཕུག་དང་། བུ་མཐོང་ལེགས་ཅན་འཁྲུངས་ནས་དེ་གཉིས་སྐུ་ནར་སོན་སྐབས་མི་ཁྱིམ་ཡུལ་གྲོང་ཐོར་བུ་ཡོད་པ་རྣམས་ལ་དབང་བསྒྱུར་ནས་རྒྱལ་མཁར་བརྩིགས་པས་བོད་ཆོས་རྒྱལ་གྱི་གདུང་ཞེས་གྲགས་པ་ཆེར་སོང་བ་དང་། ཁྲི་མི་ལྷའི་དབང་ཕྱུག་གི་སྲས་རྒྱུད་རྣམས་ལྷའུ་ཁམ་པ་ལ་བཞུགས་པས་ཁམ་པ་ཇོ་བོ་ཟེར་བའི་མིང་དེ་ལས་གྲགས་པ་ཡིན། བུ་མཐོང་ལེགས་ཅན་གྱིས་རྒྱལ་མཁར་མི་ཟིན་པ་བཟུང་ནས་སྲས་ཁྲི་བརྟན་དཔལ་དང་། གུང་དཀར་རྒྱལ་དང་དཔལ་སྐྱེས་དར་གཉིས་མཉམ་པོར་འཁྲུངས་པ་སོགས་མདོར་ན་ལྷ་སྲས་གཙང་མའི་གདུང་རྒྱུད་མི་རབས་ཉི་ཤུ་རྩ་གསུམ་ཙམ་གྱིས་མོན་ཁུལ་ཡུལ་ཚོ་སོ་སོར་དབང་བསྒྱུར་བྱས་པ་གསལ་བོར་འཁོད་འདུག
འབྲེལ་ཡོད་འོས་སྦྱོར།