བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༢

        ལོ་ངོ་འདི་དག་ལ་ཕྲན་གྱི་ཆེད་ལས་དང་། མོས་པ། ལས་ཀའི་དབང་གིས་ལོ་ཙཱ་བ་རྣམས་ཀྱི་བྲིས་འབུར་རྙིང་པ་ལ་མཇལ་སྙིང་འདོད་ཅིང་། བརྒྱ་ལ་སྟབས་འདྲ་བདེ་ན་དེ་རྣམས་པར་གྱི་ངོས་ནས་ཉར་ཏེ། སྐབས་དང་སྐབས་སུ་ཡང་དང་བསྐྱར་དུ་མཇལ་བ་ཡིན།
        དབུས་མཇལ་ལ་སྐྱོད་དུས་ལོ་ཙཱ་བ་ཁོང་ཅག་དང་འབྲེལ་བའི་འཁྲུངས་ཡུལ་དང་། གདན་ས། ལྷ་ཁང་སོགས་ལས་ལྡེར་སྐུ་དང་བྲིས་སྐུ་ཅི་རིགས་ཤིག་མཇལ་སྐལ་བྱུང་། བསམ་ཡས་སྒྲ་བསྒྱུར་རྒྱ་གར་གླིང་དུ་ལོ་ཙཱ་བ་རབ་དགུ་སོགས་ཀྱིས་མཚོན་པའི་བསྟན་པ་སྔ་དར་གྱི་ལོ་ཙཱ་བ་རྣམས་ཀྱི་འབུར་སྐུ་དང་། ལྡེབས་རིས་ལ་ལོ་ཙཱ་བ་བརྒྱ་རྩ་བརྒྱད་ཀྱི་སྣང་བརྙན་གསར་དུ་བཞེངས་འདུག །རྒྱལ་རྩེ་དཔལ་འཁོར་ཆོས་སྡེའི་སྐུ་འབུམ་ཆེན་མོ་རུ་ཡང་ལོ་ཙཱ་བ་མང་པོ་ཞིག་གི་བྲིས་འབུར་གསལ་ལ། དེ་དག་ལ་མི་ལོ་དྲུག་བརྒྱ་ཙམ་གྱི་ལོ་རྒྱུས་ཡོད་པ་རེད། གཞན་རང་རེའི་ཆོས་སྡེ་དང་། རྟེན་མཛོད་ཁང་། ཉར་ཚགས་པ་རྣམས་ཀྱིས་ཉར་བའི་ཐང་ག་དང་། ལི་མ། གླེགས་བམ་གྱི་དབུ་ལྷ་བཅས་སུ་གསལ་བའི་སྣང་བརྙན་དག་པར་དེབ་དང་སྐད་འཕྲིན་བཅས་ལས་མཐོང་མྱོང་།  
        ཁོང་རྣམས་ཀྱི་སྐུ་བརྙན་དེ་དག་ལ་ཞིབ་ཏུ་མཇལ་ན་སྐབས་འགར་ལོ་རྒྱུས་ཀྱི་གནད་ཆེན་པོ་རེ་རྙེད་འོང་བས། གཤམ་དུ་ལོ་ཙཱ་བའི་སྐུ་བརྙན་རྙིང་པ་འགའ་ལ་མཇལ་བའི་འབྲས་བུ་ལ་བཤད་འདོད་པ་གང་ཞིག་བརྗོད་པར་བྱ་ལ། འདི་ལ་ཤེས་ནས་སྨྲ་བ་རྣམས་ཀྱིས་དགོངས་འཆར་ཅི་ཡོད་འདོན་པར་སྙིང་ནས་རེའོ། ། 1. ཞལ་ཁྱིམ།
        ལོ་ཆེན་རིན་ཆེན་བཟང་པོའི་མཚན་གཞན་ལ་དགེ་སློང་བྱའི་གདོང་པ་ཅན་ཟེར་ཡང་། <བུ་སྟོན་ཆོས་འབྱུང་>དུ་ལོ་ཆེན་ཁོང་དང་དགེ་སློང་བྱའི་གདོང་པ་ཅན་གཉིས་སོ་སོར་ཕྱེ་ནས་བྲིས་པས། ཕྱིས་ཀྱི་དཔའ་བོ་གཙུག་ལག་ཕྲེང་པ་དང་སུམ་པ་མཁན་ཆེན་གཉིས་ཀྱིས་དེ་གཉིས་ལོ་ཙཱ་བ་གཅིག་ཡིན་མིན་ལ་མ་དཔྱད་པར་བུ་སྟོན་རིན་པོ་ཆེའི་ལུགས་ལྟར་ཆོས་འབྱུང་བརྩམས་ཡོད། བཀའ་བསྟན་དཀར་ཆག་ཁག་ཏུ་དགེ་སློང་བྱའི་གདོང་པ་ཅན་གྱིས་བསྒྱུར་བའི་ཆོས་ཚན་གཅིག་མ་གཏོགས་མེད་ལ། དེ་ཡང་ལོ་ཆེན་རིན་བཟང་དང་དུས་མཉམ་དུ་བྱོན་པའི་རྒྱ་གར་གྱི་མཁན་པོ་དཱི་པཾ་ཀ་ར་ཇོ་བོ་རྗེ་དཔལ་ལྡན་ཨ་ཏི་ཤ་དང་ལྷན་དུ་བསྒྱུར་བ་ཞིག་རེད། བཀའ་འགྱུར་དཔེ་བསྡུར་མར་ཇོ་བོ་རྗེ་དང་ལོ་ཆེན་གཉིས་ཀྱི་ཆོས་ཚན་གཅིག་གི་རྗེས་ཏག་ཏག་ལ། རྒྱ་གར་གྱི་མཁན་པོ་དེ་ཉིད་དང་དགེ་སློང་བྱའི་གདོང་པ་ཅན་གྱི་འགྱུར་གསལ་བ་རེད། ཆོས་ཚན་དེ་གཉིས་ཀ་འཕགས་པ་ལག་ན་རྡོ་རྗེ་གོས་སྔོན་པོ་ཅན་གྱི་ཆོས་སྐོར་རེད། འདི་ལས་ཀྱང་ལོ་ཆེན་རིན་བཟང་དང་དགེ་སློང་བྱའི་གདོང་པ་ཅན་གཉིས་ཀྱི་བར་ལ་འབྲེལ་བ་ངེས་ཅན་ཞིག་ཡོད་པ་ཤེས་ནུས་སྙམ་ཞིང་། སྒོས་སུ་གུ་གེ་ཁྱི་ཐང་པས་མཛད་པའི་ལོ་ཆེན་གྱི་རྣམ་ཐར་འབྲིང་པ་དང་ཞང་ཞུང་ངག་དབང་ཆོས་གྲགས་ཀྱིས་མཛད་པའི་ལོ་ཆེན་གྱི་གསོལ་འདེབས་སུ་བྱའི་གདོང་པ་ཅན་ནི་ཁོང་ཡིན་པ་གླེང་ཡོད།         འདི་དག་ནི་ཡིག་ཚང་རིག་པའི་ངོས་ནས་དཔྱད་པ་ཡིན་ལ། ཁོང་གི་སྐུ་རྟེན་ལས་ཀྱང་དགེ་སློང་བྱའི་གདོང་པ་ཅན་ཡིན་པ་བདེན་དཔང་རྙེད་ཐུབ་སྟེ། གུ་གེ་མཁར་རྩེ་དགོན་དུ་བཞུགས་པའི་སྐུ་འདྲ་མདའ་གང་མ་དང་། རྟེན་མཛོད་ཁང་ཞིག་ཏུ་ཉར་བའི་སྐུ་འདྲ་མཐོ་གང་མ་གང་རུང་ལ་མཚོན་ན་ལོ་ཆེན་གྱི་ཞལ་ཁྱིམ་ལ་བྱའི་གདོང་གི་ཁྱད་ཆོས་མངོན་པར་གསལ་བས་སོ། །དེ་བཞིན་བུ་སྟོན་ལོ་ཙཱ་བ་རིན་ཆེན་གྲུབ་ལ་བུ་སྟོན་ཁ་ཆེ་ཟེར་དགོས་པའི་རྒྱུ་མཚན་ཡང་ཁོང་གི་ལྡེར་སྐུས་ཁ་གྲགས་པ་ལྟ་བུ་ཞིག་རེད། དེ་ནི་རྗེ་བཙུན་ཙོང་ཁ་པ་མཆོག་ལ་ཨ་མདོ་སྣ་བོ་ཆེར་འབོད་པ་བཞིན་ཁོང་གི་སྐུ་བརྙན་འགའ་ལའང་དེ་ལུགས་ཀྱི་ཁྱད་ཆོས་ཡོད་པ་བཞིན་ནོ། །
2. ཚག་ཡིག །
        སྐུ་འདྲ་འགའ་ཡི་བཞུགས་ཁྲིར་མཚན་དང་གསོལ་འདེབས་ཚིགས་བཅད་མའི་ཚག་ཡིག་ཡོད་པས་ལོ་ཙཱ་བ་གང་དེའི་སྣང་བརྙན་ཡིན་པ་ཐད་ཀར་ཤེས་ནུས་ལ། ཕྲན་གྱིས་མཇལ་བ་ལས་འབྲོག་ལོ་དང་། ས་ལོ། འགོས་ལོ། ཆག་ལོ་བཅས་ཀྱི་སྐུ་བརྙན་ལ་དེ་ལྟ་བུའི་ཚག་ཡིག་འདུག །         ཆག་ལོ་ཙཱ་བ་རིན་ཆེན་ཆོས་རྒྱལ་གྱི་པད་འདབ་ཀྱི་རྒྱབ་ལ་འདི་ལྟར་གསལ་ཏེ་“ཆག་ལོ་ཙཱ་བ་གསུམ་པ་མཚུངས་མེད་རིན་ཆེན་ཆོས་ཀྱི་རྒྱལ་པོ་དགུང་ལོ་བདུན་ཅུ་བའི་འདྲ་སྐུ་ཉིད་ཀྱི་ཕྱག་ནས་ཀྱང་བཞུགས།”ཞེས་པ་ནི་གལ་ཆེ་བའི་དཔྱད་གཞི་ཞིག་རེད། གཅིག་ཏུ་སྐུ་འདྲ་དེ་ནི་ཁོང་གི་ང་འདྲ་མ་ཡིན་པ་དང་། གཉིས་སུ་དེ་ཉིད་ཁོང་གིས་སྐུ་དངོས་སུ་རབ་གནས་གནང་བས་སྐུ་བརྙན་དེ་ལ་ཆག་ལོ་གསུམ་པ་ང་འདྲ་མ་དང་ཆག་ལོ་གསུམ་པའི་ཕྱག་ནས་མ་ཞེས་ཀྱང་འདོགས་ཆོག་པ་ཞིག་རེད། གཞན་འདི་ལས་ལོ་ཙཱ་བ་གང་ཉིད་དགུང་ལོ་བདུན་ཅུའི་སྐབས་ལ་ད་དུང་སྐུ་འཚོ་བའང་ཤེས་ནུས་ཏེ། འགོས་ལོ་ཙཱ་བ་གཞོན་ནུ་དཔལ་གྱིས་ཆག་ལོ་གསུམ་པ་སྤྱི་ལོ་1447ལོར་འཁྲུངས་ཤིང་1476ལོར་སྐུ་བཞུགས་ཡོད་པ་གསལ་པོར་གསུངས་ཀྱང་། ལོ་ཙཱ་བ་འདི་གཉིས་དུས་སྐབས་གཅིག་ལ་བྱོན་པ་ཡིན་པས་<དེབ་ཐེར་སྔོན་པོ་>རུ་འདས་ལོ་འགོད་མེད་པའི་དབང་གིས་ཁོང་དུས་ནམ་ཞིག་ལ་འདས་པ་ད་ལྟའི་ཆར་སྟོང་ཆར་ལུས་ཡོད། ཆག་ལོ་ང་འདྲ་མའི་ཚག་ཡིག་འདི་ལ་གཞིགས་ན་སྤྱི་ལོ་1517(1447+70)ལོར་ཁོང་ཉིད་ད་དུང་སྐུ་བཞུགས་ཡོད་པ་ང་ཚོས་བརྟག་ཆོག་པ་ཞིག་རེད།  
3. ཕྱག་མཚན། 
        ཕྱག་མཚན་དང་ཕྱག་རྒྱ་ལས་ཀྱང་བསམ་རྒྱུ་མང་པོ་འདུག་སྟེ། དང་པོ་ཕྱག་མཚན་ཐད་ནས་ཙ་མི་ལོ་ཙཱ་བ་དང་། དཔལ་ཆེན་རྒྭ་ལོ། མར་པ་ལོ་ཙཱ་བ་བཅས་ཀྱིས་ཐོད་པ་བསྣམས་ཡོད། དེ་ནི་ཁོང་རྣམས་བདེ་མཆོག་གི་ཆོས་སྐོར་གྱི་བདག་པོ་ཡིན་པའི་མཚོན་དོན་ལ་གསང་སྔགས་ཀྱི་ཡིད་བཞིན་ནོར་བུ་ཀ་པཱ་ལ་འཛིན་པར་བཤད།          རྭ་ལོ་རྡོ་རྗེ་གྲགས་དང་། བུ་སྟོན་ལོ་ཙཱ་བ། དཔང་ལོ་ཙཱ་བ། ཇོ་ནང་ཏཱ་ར་ནཱ་ཐ་བཅས་ཀྱིས་ཕྱག་མཚན་ལ་རྡོར་དྲིལ་བསྣམས་པ་ནི་གསང་སྔགས་ལ་མཁས་པའི་རྟགས་དང་། རྡོ་རྗེས་ཐབས་དང་དྲིལ་བུས་ཤེས་རབ་མཚོན་པས་འཛིན་མཁན་སྐྱེས་བུ་དམ་པ་གང་ཉིད་ཟུང་འཇུག་གི་གོ་འཕང་བརྙེས་པ་ཡང་མཚོན། ཁྲོ་ཕུ་ལོ་ཙཱ་བས་རྩིས་གཞོང་ཞིག་བསྣམས་འདུག་ཅིང་། འོག་ཏུ་གསལ་བའི་པར་བཅུ་གཅིག་པ་འགོས་ལོ་ཙཱ་བའི་ཐང་ཀར་ཡང་འཁོར་ཞིག་གིས་བཟུང་ཡོད། དེ་དག་ལ་བལྟས་ན་སྔོན་གྱི་དུས་སུ་རྩིས་གཞོང་ནི་རྩིས་པ་ཁོ་ནར་སྤྱོད་པའི་ཡོ་བྱད་ཅིག་མིན་སྙམ་ཡང་། དགོས་པ་ཅིའི་ཕྱིར་ཁྲོ་ལོས་དེ་ཉིད་བསྣམས་དགོས་པ་དཔྱད་འཕྲོར་ལུས་ཡོད།          ས་སྐྱ་ལོ་ཙཱ་བའི་སྐུ་བརྙན་ལ་ཕྱག་གཉིས་ཆོས་འཁོར་གྱི་ཕྱག་རྒྱ་མཛད་ཅིང་པད་སྡོང་གཉིས་ལ་གླེགས་བམ་དང་རལ་གྲི་བསྣམས་པ་ནི་རྗེ་བཙུན་འཇམ་དབྱངས་ཀྱི་སྤྲུལ་པར་བཞེད་པའི་དབང་གིས་ཡིན་ལ། ཁོང་དང་། རྗེ་ཙོང་ཁ་པ། ཀློང་མཁྱེན་རབ་འབྱམས་པ་བཅས་འཇམ་དབྱངས་རྣམ་གསུམ་དུ་བརྩིས་ནས་ཕྱི་མ་གཉིས་ཀྱི་སྣང་བརྙན་དུའང་གླེགས་བམ་དང་རལ་གྲི་གཉིས་ཀྱི་ཕྱག་མཚན་གསལ་བ་རེད། ཇོ་བོ་རྗེ་དཔལ་ལྡན་ཨ་ཏི་ཤ་ས་སྐྱར་ཕེབས་དུས་མ་འོངས་པར་གནས་དེ་ནས་འཇམ་དབྱངས་ཀྱི་སྤྲུལ་པ་བདུན་བྱོན་པར་ལུང་བསྟན་པ་ཡང་ས་སྐྱ་ལོ་ཙཱ་བའི་སྣང་བརྙན་དག་ལ་མཇལ་དུས་དྲན་འོང་ངོ་། །     4. ཕྱག་རྒྱ། 
        ལོ་ཙཱ་བ་རྣམས་ཀྱི་སྣང་བརྙན་ཕལ་མོ་ཆེས་ཆོས་འཆད་ཀྱི་ཕྱག་རྒྱ་མཛད་པ་སྟེ། མངའ་རིས་མཐོ་ལྡིང་དགོན་གྱི་ལོ་ཆེན་རིན་བཟང་གི་ལྡེབས་རིས་དང་། རྒྱ་གར་གྱི་རྟེན་མཛོད་ཁང་ཞིག་ཏུ་ཉར་བའི་འབྲོག་ལོའི་སྐུ་འདྲ། གོང་གི་པར་བརྒྱད་པ་ས་པཎ་ཀུན་དགའ་རྒྱལ་མཚན་གྱི་ལི་སྐུ། ཁྲོ་ལོའི་རྣམ་ཐར་དུ་བཞུགས་པའི་ཁོང་གི་དབུ་ལྷ། བུ་སྟོན་ཡབ་སྲས་གཉིས་ཀྱི་འདྲ་ཐང་དུ་གསལ་བའི་སྒྲ་ཚད་པ་རིན་ཆེན་རྣམ་རྒྱལ་སོགས་ནི་དེ་འདྲ་རེད། རྒྱལ་རྩེ་དཔལ་འཁོར་ཆོས་སྡེའི་ལྡེབས་རིས་སུ་གསལ་བའི་ལོ་ཙཱ་བ་རྣམས་ཀྱིས་ཀྱང་ཆོས་འཁོར་གྱི་ཕྱག་རྒྱ་མཛད་ཅིང་། ཞབས་གཉིས་རྡོ་རྗེའི་སྐྱིལ་ཀྲུང་དུ་བཞུགས་པ། སྐུ་ལ་བེར་གསོལ་འདུག །           ས་པན་གྱི་ཐང་ཀ་པེ་ཅིང་ཕོ་བྲང་དུ་ཉར་བ་ཞིག་ལ་རྩོད་པའི་ཕྱག་རྒྱ་མཛད་པ་ནི་ཁོང་གིས་མང་ཡུལ་སྐྱིད་གྲོང་ནས་མུ་སྟེགས་འཕྲོག་བྱེད་དགའ་བོ་སོགས་བཏུལ་བའི་ལོ་རྒྱུས་ལ་འབྲེལ་བ་ཡོད་པ་ཞིག་རེད།         འགོས་ལོ་ཙཱ་བ་བསོད་ནམས་རྩེ་མོའམ་ཡོངས་གྲགས་སུ་ཁུག་པ་ལྷས་བཙས་སུ་འབོད་པ་ལ་ཡང་གོང་གི་ས་པཎ་གྱི་ཐང་ག་ལྟར་ཕོ་བྲང་དུ་ཉར་བ་ཞིག་ཡོད་དེ། དེ་གར་ཁོང་གིས་ཞབས་གཉིས་སེམས་དཔའི་སྐྱིལ་ཀྲུང་དུ་བཞུགས་ནས་ཕྱག་གཡས་ཀྱིས་གླེགས་བམ་བསྣམས་ཤིང་། གཡོན་སྡིགས་མཛུབ་ཀྱིས་འཁོར་ཡི་གེ་བ་ཞིག་ལ་བསྟན་ཚུལ་ལ་བལྟས་ན། ཁོང་དཔོན་སློབ་རྣམས་ཀྱིས་ཆོས་བསྒྱུར་བའི་ལས་མཛད་དུས་ལོ་ཙཱ་བས་མཛུབ་མོ་རི་སྟོན་གྱི་ཚུལ་དུ་སློབ་སྟོན་གནང་བ་དང་ཀུན་ནས་མཚུངས། གུས་པས་འགོས་ལོ་འདི་ཉིད་ཀྱི་རྣམ་ཐར་རྒྱས་པ་ཞིག་བཀླགས་མ་མྱོང་བས་བརྒྱ་ལ་རྣམ་ཐར་འདྲ་ཡོད་ན། འདིའི་སྐོར་གྱི་མཚོན་དོན་གསུངས་ཡོད་ཀྱང་སྲིད་པས་བརྟག་པར་བྱ། 
5.བཞུགས་སྟངས། 
        འདི་གར་དམིགས་བསལ་གྱིས་གླེང་འདོད་པ་ཞིག་ནི་ལོ་ཙཱ་བ་རྣམས་ཀྱི་སྐུ་བརྙན་འགའ་ལ་ཐུན་མོང་དུ་མངའ་བའི་ཁྱད་ཆོས་ཤིག་སྟེ།  ཀུན་མཁྱེན་དོལ་བོ་པ་ལྟར་ཕྱག་གཉིས་ས་གནོན་དང་ཞབས་གཉིས་པད་མའི་སྐྱིལ་ཀྲུང་དུ་བཞུགས་ཤིང་གཡས་པའི་ཞབས་མགོ་ན་བཟའི་ཕྱི་རུ་བསྟན་པ་དེ་རེད།            ད་ཕན་ཕྲན་གྱིས་དེ་ལྟ་བུའི་བཞུགས་ཚུལ་ཅན་གྱི་ལོ་ཙཱ་བ་དྲུག་མཇལ་མྱོང་སྟེ། འབྲོག་མི་ལོ་ཙཱ་བ་ཤཱཀྱ་ཡེ་ཤེས་དང་། མར་པ་ལོ་ཙཱ་བ་ཆོས་ཀྱི་བློ་གྲོས། དཔང་ལོ་ཙཱ་བ་བློ་གྲོས་བརྟན་པ། ལོ་ཆེན་བྱང་ཆུབ་རྩེ་མོ། འགོས་ལོ་ཙཱ་བ་གཞོན་ནུ་དཔལ། ཞྭ་ལུ་ལོ་ཙཱ་བ་རིན་ཆེན་ཆོས་སྐྱོང་བཟང་པོ་བཅས་རེད། མར་པ་ལོ་ཙཱ་བའི་སྐུ་བརྙན་ཕལ་མོ་ཆེ་ནི་རྟག་པར་དེ་འདྲ་ལགས་ན། འདི་ལྟའི་བཞུགས་སྟངས་ཅན་དང་། དགེ་བསྙེན་གྱི་ཆ་ལུགས་ཅན་ཡིན་ན་ཁོང་ལ་ངོས་འཛིན་ཆོག་པ་ལྟ་བུ་ཞིག་ཀྱང་རེད། དེ་དག་ལས་དཔང་ལོས་རྡོ་རྗེ་སྐྱིལ་ཀྲུང་མཛད་ནས་ཕྱག་གཉིས་ལྷ་ངར་བཞག་པ་དང་། ལོ་ཆེན་བྱང་རྩེས་ཕྱག་གཉིས་ཀྱིས་ཕྱག་ཕྲེང་བསྣམས་འདུག་པས་ཞིབ་ཆ་ཡང་ཅུང་ཟད་འབྱེད་དགོས་པ་ཞིག་འདུག །          ལོ་ཙཱ་བ་འདི་དག་གི་བཞུགས་སྟངས་ལ་མིང་བྱེ་བྲག་པ་ཞིག་ཡོད་དམ། ཁོང་ཅག་དེ་ལྟར་བཞུགས་པའི་དགོས་པ་ཅི་ཡིན་ནམ། ཐོག་མར་ལོ་ཙཱ་བ་སུ་ཡི་སྣང་བརྙན་དེ་ལྟར་བཞེངས་པ་ཡིན་ནམ། ལོ་ཙཱ་བ་གཅིག་གི་སྣང་བརྙན་དེ་གཞན་རྣམས་ལ་ཤུགས་རྐྱེན་ཐེབས་པ་ཡིན་ནམ། ཡང་ན་ཆོས་པ་གཞན་ཞིག་གི་ཤན་ཐེབས་པ་རེད་སྙམ་པའི་དྲི་བ་ཅི་རིགས་ཤིག་གོང་གི་ལོ་ཙཱ་བ་རྣམས་ཀྱི་པར་ལ་མཇལ་དུས་རྟག་པར་ཤར་འོང་བ་ཞིག་རེད། ལར་འདི་ལྟ་བུ་ནི་རང་རེའི་སྒྲུབ་ཐབས་དང་། ཡོ་གའི་གཞུང་ལུགས། བཟོ་རིག་གི་བརྟག་ཐབས་སོགས་ཀྱིས་དཔྱད་དགོས་པ་ཞིག་ལགས་ན། གུས་པའི་ཤེས་ཚད་ཀྱིས་ཕྱི་སྣང་ཚུལ་ཙམ་ལས་ནང་གི་སྙིང་པོ་ཅི་ཞིག་ཡིན་པ་དཔྱད་བཟོད་པ་ཞིག་མིན་པས་འདིར་འོལ་ཚོད་མི་སྨྲ་ལ། སླད་མར་བླ་མ་དང་དགེ་རྒན་རྣམས་ལ་བཀའ་འདྲི་ཞུས་པའམ། ཡང་ན་དཔེ་ཀློག་ལས་རྙེད་ན་འདིའི་སྐོར་ཇེ་ཞིབ་ཏུ་གཏོང་བའི་འདུན་པ་ཡོད། ཁག་གཉིས་པ་ལོ་ཙཱ་བ་རྣམས་ཀྱི་སྐུ་བརྙན་གྱི་སྐོར་ལ་འདི་ཙམ་གྱིས་འཐུས་པར་བྱས་སོ། །