བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༣

        དེང་སང་རྒྱ་ཡིག་གི་性别ལ་བོད་ཡིག་ཏུ་ཕོ་མོ་ཞེས་བསྒྱུར་ནས་ཐོབ་ཐང་ལག་ཁྱེར་སོགས་སུ་སྤྱོད་ཀྱང་། བོད་སྨན་ཁང་གི་ནད་ཐོ་རྣམས་སུ་རྟེན་ཞེས་བྲིས་འདུག །དེ་ཡང་<དཔལ་ལྡན་རྒྱུད་བཞི་>ལྟར་སྤྱོད་པ་ཡིན་པས་ཡིད་གར་འོང་བ་ཞིག་རེད། གཞན་རབ་བྱུང་བ་རྣམས་བསླབ་ཁྲིམས་ཀྱི་སྡོམ་པ་བརྙེས་ཚུལ་མི་འདྲ་བའི་དབང་གིས་རྟེན་དགེ་ཚུལ་དང་རྟེན་དགེ་སློང་ཞེས་ཀྱང་ཟེར་བས། འདི་ལ་སྒྲ་ཡངས་འཇུག་དང་དོག་འཇུག་གི་ངོས་ནས་དགར་ཆོག །སྔ་རབས་ལོ་ཙཱ་བ་ཕལ་མོ་ཆེ་རབ་བྱུང་བ་ཡིན་པས་དགེ་སློང་རེད། དེ་མིན་གཞན་དགེ་ཚུལ་དང་། དགེ་བསྙེན། མི་སྐྱ་ཡང་འདུག་པས་འདིར་རང་རེའི་ལོ་ཙཱ་བ་རྣམས་ཀྱི་རྟེན་གྱི་ཐད་ནས་ཅུང་ཟད་བཤད་འཆར་ལགས་ན་ཁ་བྱང་ཆུང་བ་ལ་དེ་ལྟར་བཏགས་པ་ཡིན། དགེ་སློང་ལོ་ཙཱ་བ་མང་བ་དང་ཀུན་ལ་རྒྱུས་ཆེ་བས་འདིར་ཁོང་རྣམས་ཀྱི་མཚན་ཐོ་འདྲེན་པའི་ངལ་བ་བསྐྱུངས་ནས་གཞན་དག་རང་ནུས་ཀྱིས་གླེང་བར་བྱ།  
1. སྐྱེས་པ་ལོ་ཙཱ་བ། རང་རེའི་ཡི་གེ་བྱེད་པོ་དང་ལོ་ཙཱ་བ་ལ་སྔ་བ་སློབ་དཔོན་ཐོན་མི་ནི་རབ་བྱུང་བ་མིན་པས་སྐྱེས་པ་ལོ་ཙཱ་བ་ཞིག་ཡིན་ཞིང་། ཁོང་གི་དུས་སྐབས་ལ་བོད་ཡུལ་དུ་འདུལ་བའི་སྡོམ་རྒྱུན་བྱུང་མེད་པ་ལོ་རྒྱུས་ཡོངས་གྲགས་ལྟར་རེད། དེ་ལྟ་ན་དཔའ་བོ་གཙུག་ལག་ཕྲེང་བས་དྷརྨ་ཀོཥྠ་དང་། ལྷ་ལུང་རྡོ་རྗེ་དཔལ། བྲན་ཀ་མུ་ལ་ཀོ་ཥ་བཅས་ནི་རྒྱལ་པོ་སྲོང་བཙན་དུས་ཀྱི་ལོ་ཙཱ་བ་ཡིན་པར་བཤད་པ་དག་ཀྱང་སྐྱེས་པ་ལོ་ཙཱ་བ་ཡིན་པར་བསམས། བསྟན་པ་ཕྱི་དར་སྐབས་ཀྱི་ལྷ་ཡེ་ཤེས་རྒྱལ་མཚན་དང་འབྲོག་མི་ཇོ་སྲས་གཉིས་ཀྱང་སྐྱེས་པ་ལོ་ཙཱ་བ་ཡིན་ཏེ། སྔ་མ་ལ་བཀའ་འགྱུར་དུ་བསྒྱུར་བའི་ཆོས་ཚན་གཅིག་དང་བསྟན་འགྱུར་དུ་བཅོ་ལྔ་འདུག །ཁོང་ནི་བཙན་པོའི་གདུང་རྒྱུད་ཀྱི་རྒྱལ་པོ་ཞིག་ཡིན་པ་འགྱུར་བྱང་ཁག་ཏུ་བོད་ཀྱི་མངའ་བདག་ལྷ་ཡེ་ཤེས་རྒྱལ་མཚན་ཞེས་མང་དུ་གསལ་བས་ལྷ་ཞི་བ་འོད་དང་། ཕོ་བྲང་བྱང་ཆུབ་འོད་ལྟར་རེད། <བསྟན་པ་རྒྱས་པ་རྒྱན་གྱི་ཉི་འོད་>ལ་གཞིགས་ན་རྗེ་བོ་ལོ་ཙཱ་བ་འདི་ཇོ་བོ་རྗེ་དང་དུས་མཉམ་དུ་བྱོན་པ་ཞིག་ཡིན་དགོས། འབྲོག་མི་ཇོ་སྲས་ལ་འགྱུར་གཅིག་འདུག་ལ།  ཁོང་ནི་འབྲོག་མི་ལོ་ཙཱ་བ་ཤཱཀྱ་ཡེ་ཤེས་ཀྱི་སྲས་གཉིས་པ་རྡོ་རྗེ་ཡིན་པ་བཅོམ་ལྡན་རིག་རལ་གྱིས་གསུངས།
2. དགེ་ཚུལ་ལོ་ཙཱ་བ། <བཀའ་བསྟན་དཔེ་བསྡུར་མའི་དཀར་ཆག་>ལ་གཞིགས་ན་རྟེན་དགེ་ཚུལ་ཡིན་པའི་ལོ་ཙཱ་བ་གསུམ་སྟེ། ཁྱུང་གྲགས་དང་། ཀུན་དགའ་སྙིང་པོ། ནམ་མཁའ་རྡོ་རྗེ་བཅས་རེད། ཡིན་ཡང་ཁྱུང་གྲགས་ཀྱི་འགྱུར་བྱང་ཞིག་ཏུ་དགེ་སློང་ཡིན་པ་གསལ་བས་རྨ་ལོ་ཙཱ་བ་དགེ་བའི་བློ་གྲོས་བཞིན་ཕྱིས་སུ་དགེ་སློང་བསྒྲུབས་པར་སྙམ། ཀུན་དགའ་སྙིང་པོ་ནི་ཇོ་ནང་ཏཱ་ར་ནཱ་ཐ་མཆོག་སྟེ་ཁོང་ཡང་དགེ་སློང་རེད། 3. དགེ་བསྙེན་ལོ་ཙཱ་བ། རྒྱ་བརྩོན་འགྲུས་སེང་གེ་དང་། འབྲོམ་སྟོན་པ་རྒྱལ་པའི་འབྱུང་གནས། དགེ་བསྙེན་གྲགས་པ་རྒྱལ་མཚན། མར་པ་ཆོས་ཀྱི་བློ་གྲོས། ཞ་མ་སེང་གེ་རྒྱལ་པོ། ཀམ་ཆོས་ཀྱི་ཡེ་ཤེས། སྦལ་རྡོ་རྗེ་རྒྱལ་པོ། འབྲོ་ཤེས་རབ་བརྩོན་འགྲུས། མར་པ་ཆོས་འབར། ཁུ་ནེ་ཙོ་བཅས་ནི་ད་ཕན་གུས་པས་བཀའ་བསྟན་དཀར་ཆག་དང་། ཆོས་འབྱུང་དེབ་ཐེར། ལོ་པཎ་རྣམ་ཐར་བཅས་ལས་རྙེད་པའི་དགེ་བསྙེན་ལོ་ཙཱ་བ་རྣམས་ཡིན། དེ་ལས་མ་གཅིག་ཞ་མའི་མིང་པོ་ཞ་མ་སེང་རྒྱལ་ནི་<བསྟན་པ་རྒྱས་པ་རྒྱན་གྱི་ཉི་འོད་>དང་<བུ་སྟོན་ཆོས་འབྱུང་>སོགས་སུ་དགེ་བསྙེན་ཡིན་པར་གསུངས་ཀྱང་། <སྡེ་དགེ་བསྟན་འགྱུར་>དུ་བཞུགས་པའི་<བསླབ་པ་མེ་ཏོག་སྙེ་མ་ཞེས་བྱ་བ་>ཡི་འགྱུར་བྱང་དུ་དགེ་སློང་ཞ་མ་སེང་གེ་རྒྱལ་པོ་ཞེས་གསལ་བས་ཕྱིས་དགེ་སློང་གི་བསླབ་པ་བརྙེས་པ་ཞིག་ཡིན་པ་འདྲ། དེ་བས་གོང་གི་འབྲོམ་སྟོན་པ་རྒྱལ་བའི་འབྱུང་གནས་དང་མར་པ་ཆོས་ཀྱི་བློ་གྲོས་གཉིས་ལས་ལོ་ཙཱ་བ་གཞན་རྣམས་ཞ་མ་སེང་རྒྱལ་བཞིན་དགེ་སློང་སྒྲུབ་ཡོད་ཀྱང་སྲིད་པས་མཐའ་གཅིག་ཏུ་ངེས་པ་མེད་དོ། ། 
4. དགེ་བོ་ལོ་ཙཱ་བ། དགེ་བོ་ཞེས་པ་མདོ་སྨད་མཚོ་སྔོན་པོའི་མཐའ་སྐོར་གྱི་འབྲོག་པ་ཚོས་བཤད་པའི་ཡུལ་སྐད་ཅིག་སྟེ། དགེ་སློང་གི་བསླབ་པ་ཕུལ་ནས་སྐྱ་སར་བབས་མཁན་ལ་གོ །རྩོམ་འདིར་གུས་པའི་ཕ་ཡུལ་རེབ་གོང་གི་ཡུལ་སྐད་ལྟར་གྲྭ་ལོག་ལོ་ཙཱ་བ་ཞེས་མ་བྲིས་པ་ལ་དགོས་པ་ཞིག་ཡོད། ཕྲན་གྱིས་ཤེས་པའི་དགེ་བོ་ལོ་ཙཱ་བ་ནི་འབྲོག་མི་ཤཱཀྱ་ཡེ་ཤེས་དང་། རྭ་རྡོ་རྗེ་གྲགས། ཁྲོ་ཕུ་བྱམས་པའི་དཔལ། རྡོ་བྲག་དགེ་འདུན་ཆོས་འཕེལ་བཅས་བཞི་རེད།
        འབྲོག་མིའི་འགྱུར་བྱང་རྣམས་སུ་ཁོང་དགེ་སློང་ཡིན་པ་བྲིས་ཡོད་ཀྱང་། ཕྱིས་རིག་མ་བཞེས་ནས་སྲས་ཀྱང་སྐྱེས་འདུག་སྟེ། འབྲུག་པ་པད་མ་དཀར་པོས་ཁོང་གི་སྲས་གཉིས་ལ་ཨིནྡྲ་དང་རྡོ་རྗེ་ཟེར་བར་གསུངས། ལམ་འབྲས་བླ་མ་བརྒྱུད་པའི་རྣམ་ཐར་སོགས་སུ་འབྲོག་ཕྲུག་ཨིནྡྲ་རྡོ་རྗེ་ཞེས་དེ་གཉིས་གཅིག་ཏུ་བརྩིས་འདུག་ཀྱང་། རྗེ་བཙུན་ཇོ་ནང་ཏཱ་ར་ནཱ་ཐའི་<གཤེན་རྗེ་གཤེད་ཀྱི་ཆོས་འབྱུང་>ལས་ཨིནྡྲ་གཅེན་པོ་དང་རྡོ་རྗེ་གཅུང་པོ་ཡིན་པ་དང་། གཅེན་པོ་རྭ་ལོ་རྡོར་གྲགས་དང་མ་མཐུན་སྟབས་རིམས་ནད་བྱུང་ནས་འདས་པ་ཞིག་གླེང་འདུག །གང་ལྟར་འབྲོག་མི་ལོ་ཙཱ་བ་འདིའི་བསླབ་པ་ཤོར་འདུག་གོ །         རྭ་ཡེ་ཤེས་སེང་གེས་མཛད་པའི་<རྭ་ལོ་ཙཱ་བ་རྡོ་རྗེ་གྲགས་ཀྱི་རྣམ་ཐར་>ལ་གཞིགས་ན། ཁོང་ལ་རིག་མ་དང་ཕྱག་རྒྱ་མ་བདུན་འདུག་སྟེ། ཇོ་མོ་དགེ་མ་ལྕམ་དང་། པདྨོ་མཚོ། མེ་ཏོག་ཟླ་ཟེར་མ། ཡིད་བཞིན་གསེར་མཚོ། ཀོང་པོ་ཨ་རྒྱལ་གྱི་བུ་མོ། འཕྱོངས་རྒྱས་སྟག་རྩེའི་བཙད་པོའི་བུ་མོ། འོད་ཟེར་འབུམ་མེ་བཅས་རེད། རིགས་ཀྱི་མྱུ་གུ་ཡང་རྡོ་རྗེ་སེངྒེ་དང་། རྭ་མོ་མཐུ་ཆེན། ལྷའི་མེ་ཏོག །འོད་ཟེར་དཔལ་མོ། རྭ་ཆོས་དབྱིངས་བཅས་ལྔ་བྱོན། དང་པོ་དང་གཉིས་པ་ནི་སྲས་དང་གཞན་དག་སྲས་མོའོ། ། 
        ཁྲོ་ཕུ་ལོ་ཙཱ་བ་བྱམས་པའི་དཔལ་གྱི་སྲས་ནི་ཁྲོ་ཕུ་སེམས་དཔའ་ཆེན་པོ་བསོད་ནམས་སེང་གེ་ཞུ་བ་ཡིན་པ་དགེ་རྒན་དགེ་འདུན་རབ་གསལ་གྱིས་<རིག་པའི་ཁྱེའུ་>ལས་བཤད། 
        རྡོ་བྲག་སྤྲུལ་སྐུ་དགེ་འདུན་ཆོས་འཕེལ་ཡང་ངེས་པར་ལོ་ཙཱ་བར་བགྲངས་འོས་ལ། ཁོང་ནི་སྔོན་བྱོན་ལོ་ཙཱ་བ་ཇི་བཞིན་སཾ་སྐྲྀ་ཏའི་སྐད་ལ་ནང་བྱན་ཆུད་པར་མ་ཟད། སངས་རྒྱས་ཀྱི་གསུང་འཁྲུལ་བ་མེད་པ་<ཆོས་ཀྱི་ཚིགས་སུ་བཅད་པ་>ཡང་ཁོང་གིས་བོད་ཡིག་ལ་བསྒྱུར་ཡོད་པ་རེད། དགེ་ཆོས་ལ་རིགས་སྲས་ཡོད་མེད་ཐད་ལ་རྩོད་གཞི་ཡོད་ཀྱང་བསླབ་པ་ཤོར་བའི་དགེ་བོ་ཡིན་པ་བསྙོན་དུ་མེད་པས་ཁོང་ཡང་དགེ་བོ་ལོ་ཙཱ་བའི་གྲས་སུ་བརྩིས་པ་ཡིན།  
        གོང་གི་ལོ་ཙཱ་བ་རྣམས་དགེ་ཚུལ་ནས་དགེ་སློང་དུ་དང་། དགེ་སློང་ནས་དགེ་བོར་གྱུར་བའི་གོ་རིམ་ལས་ང་ཚོས་ཁོང་རྣམས་ཀྱིས་བསྒྱུར་བའི་ཆོས་དེ་རྣམས་ལོ་ཙཱ་བ་གང་དེས་སྐུ་ཚེ་སྟོད་ལ་བསྒྱུར་བ་ཞིག་ཡིན་པ་ཤེས་ཐུབ་སྙམ། བླ་ཆེན་འབྲོག་མི་དང་རྭ་ལོ་ལྟ་བུས་རྒྱ་བལ་གྱི་མཁས་གྲུབ་རྣམས་བླ་མར་བཀུར་ནས་གསང་སྔགས་རྡོ་རྗེ་ཐེག་པའི་ཆོས་ལ་སློབ་གཉེར་བྱས་ཤིང་། བླ་མ་དང་ལྷན་དུ་རྒྱུད་བསྒྱུར་བའི་མཐར་རིག་མ་བཞེས་པ་ནི་སྔགས་ཉམས་ལེན་གྱི་སླད་དུ་ཡིན་པ་འདྲ། ཁྲོ་ཕུ་ལོ་ཙཱ་བ་ཡང་སྐུ་ཚེ་སྨད་ལ་ཉམས་ལེན་གཙོ་བོར་མཛད་དེ། ཁོང་འདས་པའི་ལོ་1236ལོར་རིགས་ཀྱི་མྱུ་གུ་བསོད་ནམས་སེང་གེ་འཁྲུངས་པར་གྲགས་སོ། །  
5. བུད་མེད་ལོ་ཙཱ་བ། བོད་ཀྱི་ལོ་རྒྱུས་སུ་མ་གཅིག་ལབ་སྒྲོན་དང་མ་གཅིག་ཞ་མ་སོགས་བུད་མེད་མཁས་པ་མང་པོ་བྱོན་མྱོང་བས་བུད་མེད་ལོ་ཙཱ་བ་ཡང་འཁྲུངས་ཡོད་སྙམ།         ད་ཕན་གུས་པས་ཤེས་པའི་ལོ་ཙཱ་བ་རྣམས་ལས་ལྷ་ལྕམ་དར་སྒྲོན་ཞུ་བ་ནི་བུད་མེད་ལོ་ཙཱ་བ་ཞིག་ཨེ་ཡིན་སྙམ་སྟེ། བསྟན་འགྱུར་དུ་བཞུགས་པའི་<རིག་སྔགས་ཀྱི་རྒྱལ་མོ་ཆེན་མོ་བསིལ་བའི་ཚལ་གྱི་མདོའི་འབུམ་འགྲེལ་ཞེས་བྱ་བ་>སློབ་དཔོན་ལས་ཀྱི་རྡོ་རྗེས་མཛད་པ་ཆོས་ཚན་དེ་ཉིད་ཀྱི་སྒྱུར་མཁན་ཡིན་དགོས། ཡིན་ཡང་རང་རེའི་ཆོས་འབྱུང་དང་དཀར་ཆག་རྙིང་པ་རྣམས་སུ་ཁོང་གིས་བསྒྱུར་བ་ཞིག་གླེང་མི་འདུག་ལ། སྒོས་སུ་ལོ་པཎ་མཚན་ཐོ་རུ་ཡང་ཁོང་གི་མཚན་མེད་པར་མ་ཟད། དཔལ་ཞ་ལུ་དང་། ཁམས་སྡེ་དགེ །མདོ་སྨད་ཅོ་ནེ་བཅས་ཀྱི་<བསྟན་འགྱུར་དཀར་ཆག་>ཏུ་ཆོས་ཚན་དེ་པཎྜི་ཏ་དོན་ཡོད་རྡོ་རྗེས་རང་འགྱུར་མཛད་པར་གསུངས། 
             <བསྟན་འགྱུར་དཔེ་བསྡུར་མའི་དཀར་ཆག་>ཏུ་བསྟན་བཅོས་དེ་ཉིད་ཁོང་གིས་བསྒྱུར་བར་བརྗོད་པ་དང་། འགྱུར་བྱང་དུ་ཡང་“སྨོན་ལམ་སྟོབས་ཀྱིས་གྲོང་ཁྱེར་མུ་གྱེར་བཙས། །མཁས་པར་གྲགས་པ་མི་མཉམ་རྡོ་རྗེའི་སྲས། །སྐྱེ་བ་ལྔ་བརྒྱར་སྦྱངས་པའི་འབྲས་བུ་ཡིས། །རིག་པའི་གནས་ལྔ་དག་ལ་མ་རྨོངས་ཤིང་། །གསང་སྔགས་གདམས་པ་མ་ལུས་ཐུགས་ལ་མངའ་བ་ཅན། །མཚན་ཡང་དོན་ཡོད་རྡོ་རྗེ་ཞེས་པར་གྲགས། །སྔོན་གྱི་སྨོན་ལམ་དབང་གིས་བོད་ཡུལ་དབུས་སུ་བྱོན། །སྨོན་ལམ་སྟོབས་ཀྱིས་དམ་པ་འབྲོ་ལོའི་བླ་མར་གྱུར། །འཛམ་གླིང་བྱང་ཕྱོགས་བྲག་དམར་དཔལ་གྱི་བསམ་ཡས་སུ། །རྒྱལ་པོ་ཁྱད་པར་འཕགས་པ་ཁྲི་བའི་གདུང་རྒྱུད་སྲས། །ལྷ་གཅིག་ཁྱད་པར་འཕགས་པ་ལྷ་ལྕམ་དར་སྒྲོན་གྱིས། །བཀྲ་ཤིས་ཕོ་བྲང་རྡོ་ལུང་དགོན་པ་རུ།  །ལོ་པཎ་ཞབས་ནས་བཏེག་ནས་དམ་ཆོས་འདི་བསྒྱུར་བ། །བསྒྱུར་བའི་བསོད་ནམས་གང་ཐོབ་བསགས་པ་དེས། །བདག་དང་མཐའ་ཡས་སེམས་ཅན་ཀུན། །བླ་མེད་བྱང་ཆུབ་ཐོབ་པར་ཤོག །”ཞེས་གསལ། 
        སྔོན་གྱི་ཆོས་འབྱུང་རྩོམ་མཁན་དང་དཀར་ཆག་སྒྲིག་མཁན་དག་གིས་ཅིའི་ཕྱིར་ལྷ་ལྕམ་དར་སྒྲོན་གྱིས་བསྒྱུར་བ་མ་གསུངས་པ་ཡིན་ནམ་ཞེ་ན། འགྱུར་བྱང་ཚིགས་བཅད་ཀྱི་གོ་བ་ལེན་ཚུལ་གྱིས་ཡིན་པར་སྙམ་སྟེ། གཅིག་ཏུ་ན་ལྷ་ལྕམ་དར་སྒྲོན་གྱིས་ལོ་པཎ་གཉིས་ལ་ཡོན་བདག་མཛད་དེ་བསྒྱུར་བ་ཞིག་ཏུ་གོ་ཆོག་པ་དེའི་དབང་གིས་ཡིན་པ་འདྲ། ཞུ་ཆེན་ཚུལ་ཁྲིམས་རིན་ཆེན་གྱི་<བསྟན་འགྱུར་དཀར་ཆག་>ཏུ་“རིག་སྔགས་ཀྱི་རྒྱལ་མོ་ཆེན་མོ་བསིལ་བའི་ཚལ་གྱི་མདོའི་འབུམ་འགྲེལ་ཞེས་བྱ་བ་རྣམས་སློབ་དཔོན་མཁས་པ་ཆེན་པོ་ལས་ཀྱི་རྡོ་རྗེས་མཛད་པ། པཎྜི་ཏ་མཁས་པར་གྲགས་པ་མི་མཉམ་རྡོ་རྗེའི་སྲས་སྐྱེ་བ་ལྔ་བརྒྱར་སྦྱངས་པའི་འབྲས་བུ་ལྔ་རིག་ལ་མ་རྨོངས་ཤིང་གསང་སྔགས་གདམས་པ་ཐུགས་ལ་མངའ་བའི་མཚན་དོན་ཡོད་རྡོ་རྗེར་གྲགས་པས་བོད་ཡུལ་དུ་བྱོན་ནས། འཛམ་གླིང་བྱང་ཕྱོགས་ཀྱི་བྲག་དཔལ་བསམ་ཡས་སུ་རྒྱལ་པོ་ཁྲི་པའི་གདུང་བརྒྱུད་ཀྱི་སྲས་ལྷ་གཅིག་ལྷ་ལྕམ་དར་སྒྲོན་གྱི་ཕོ་བྲང་རྡོ་ལུང་དགོན་པར་རང་འགྱུར་དུ་མཛད”ཅེས་པ་ལ་གཞིགས་ན་ཆོས་ཚན་འདི་བསམ་ཡས་སུ་བསྒྱུར་བ་ཡིན་ནམ། ཡང་ན་རྡོ་ལུང་དགོན་པར་བསྒྱུར་བ་རེད་སྙམ་པའི་ཐེ་ཚོམ་ཞིག་ཟར་བཅུག་འོང་། ལྷ་ལྕམ་དར་སྒྲོན་གྱི་ཕོ་བྲང་རྡོ་ལུང་དགོན་པ་ཡིན་པར་བརྗོད་ཀྱང་ཚིགས་བཅད་དུ་དེའི་སྐོར་གླེང་མེད། བྱེད་འབྲེལ་གྱི་ཕྲད་གྱིས་སྒྲ་དེ་གྱི་སྒྲ་རུ་བསྒྱུར་བས་བུད་མེད་ལོ་ཙཱ་བ་ཞིག་ལོ་རྒྱུས་ཀྱི་གསེབ་ནས་བོར་བ་འདྲ། འགྱུར་བྱང་དངོས་ལ་གཞིགས་ན་པཎྜི་ཏ་དོན་ཡོད་རྡོ་རྗེས་རང་འགྱུར་མཛད་པའམ། ཡང་ན་ཁོང་དང་འབྲོ་ལོ་གཉིས་ཀྱིས་བསྒྱུར་བ་ལས། ལྷ་ལྕམ་དར་སྒྲོན་གྱིས་ལོ་པཎ་གཉིས་ལ་བརྟེན་ནས་ཕོ་བྲང་རྡོ་ལུང་དགོན་པར་ཆོས་ཚན་དེ་ཉིད་བསྒྱུར་བར་གོ་བ་ལེན་འོས་པར་བསམ།         ད་དུང་ངེས་པར་བསམ་དགོས་པ་ཞིག་ལ་པཎྜི་ཏ་དོན་ཡོད་རྡོ་རྗེས་བོད་ཡིག་མཁྱེན་པ་དང་། <རིག་སྔགས་ཀྱི་རྒྱལ་མོ་གསང་སྔགས་རྗེས་སུ་འཛིན་མའི་མདོའི་འབུམ་འགྲེལ་>ཞེས་པ་རྡོ་ལུང་དགོན་པ་ནས་རང་འགྱུར་མཛད་པ་ཞིག་ཡོད། དེ་ལྟ་ན་གོང་གི་ཆོས་ཚན་དེ་ཉིད་ཀྱང་ཁོང་གིས་བསྒྱུར་བ་ཞིག་ཏུ་བསམ་ཆོག་པ་ཞིག་རེད། རྒྱུ་མཚན་དེའི་དབང་གིས་སྔ་རབས་པ་རྣམས་ཀྱིས་ལྷ་ལྕམ་དར་སྒྲོན་ནི་པཎྜི་ཏ་ཁོང་གི་ཡོན་བདག་ཙམ་ལ་ངོས་འཛིན་པར་སྙམ། 
        ལྷ་ལྕམ་འདི་ནི་བསམ་ཡས་རྒྱལ་པོ་མངའ་བདག་ཁྲི་བའི་གདུང་རྒྱུད་འཁྲུལ་མེད་ཅིག་དང་། པཎྜི་ཏ་དོན་ཡོད་རྡོ་རྗེ་དང་དུས་མཉམ་དུ་བྱོན་པ་ལ་བསམས་ན་དུས་རབས་བཅུ་གཅིག་ཡས་མས་ཀྱི་བུད་མེད་ཅིག་ཡིན་པ་ཐེ་ཚོམ་མེད། མངའ་བདག་གི་གདུང་རྒྱུད་དུ་འཁྲུངས་པ་དང་། བོད་སྐད་སྨྲ་བའི་པཎྜི་ཏ་དང་མཇལ་བ་དེས་ཁོང་ལ་ལོ་ཙཱ་སློབ་པའི་མཐུན་རྐྱེན་བསྐྲུན་ཡོད་པས་གཅིག་བྱས་ན་<བཀའ་བསྟན་དཔེ་བསྡུར་མའི་དཀར་ཆག་>ཏུ་གསལ་བ་ལྟར་ཁོང་གིས་བསྒྱུར་བར་སྙམ། 
        གལ་ཏེ་གུས་པའི་རིགས་འདེད་འདི་ནོར་མེད་ན་བུད་མེད་ལོ་ཙཱ་བ་འདི་ཉིད་རང་རེའི་སྒྲ་བསྒྱུར་ལོ་རྒྱུས་སུ་ངེས་པར་གླེང་རིན་ཡོད་པ་ཞིག་རེད། དེའི་ཚེ་རྟེན་གྱི་ངོས་ནས་སྔོན་བྱོན་ལོ་ཙཱ་བ་རྣམས་བུད་མེད་ལོ་ཙཱ་བ་དང་། སྐྱེས་པ་ལོ་ཙཱ་བ། དགེ་ཚུལ་ལོ་ཙཱ་བ། དགེ་བསྙེན་ལོ་ཙཱ་བ། དགེ་སློང་ལོ་ཙཱ་བ། དགེ་བོ་ལོ་ཙཱ་བ་ཞེས་རིགས་དྲུག་ཏུ་དབྱེ་ཆོག་པ་འདྲ། བུད་མེད་དང་སྐྱེས་པ། དགེ་བསྙེན་ལོ་ཙཱ་བ་ཡོད་པ་དེས་རང་རེའི་བཀའ་བསྟན་རིག་གནས་ནི་རབ་བྱུང་བ་གཅིག་པུ་ཙམ་མིན་པར་སྐྱ་སེར་ཕོ་མོ་ཀུན་གྱིས་འབད་པས་འབྲས་བཟང་རྨད་དུ་བྱུང་བ་ཞིག་ཡིན་པ་ཤེས་ནུས་ཞེས་སྨྲས་ན་ཐལ་ཆེའམ། འདི་དག་ནི་ཀུན་ལ་དཔྱད་གཞིར་ཕུལ་བ་ཙམ་ཡིན་པས་མུ་ནས་བརྟག་ཅིང་དཔྱད་པའི་རེ་བ་ཅི་ནས་ཀྱང་ཆེ། ཁག་གསུམ་པ་ལོ་ཙཱ་བ་རྣམས་ཀྱི་རྟེན་གྱི་སྐོར་རྫོགས་སོ། ། ༡ གསལ་བཤད་ཐུང་ངུ་། ཁག་དང་པོ་ལོ་ཙཱ་བ་རྣམས་ཀྱི་མཚན་གྱི་སྐོར་དུ་རུས་ཀྱི་ངོས་ནས་མཚན་བཏགས་པ་ལ་སྤ་ཚབ་ལོ་ཙཱ་བ་ཉི་མ་གྲགས་ཀྱང་བགྲངས་པ་ནོར་བ་སྟེ།  ཁོང་ནི་འཕན་ཡུལ་སྤ་ཚབ་སྟོད་དུ་འཁྲུངས་པས་ཡུལ་མིང་གི་ངོས་ནས་བཏགས་པ་ཞིག་རེད།  འདི་གར་ཆེད་དུ་ནོར་བ་ངོས་ཟིན་མཁན་ཀློག་མཁན་ཆོས་སྐལ་བ་བཟང་པོ་ལ་བཀའ་དྲིན་ཞུས་པ་ཡིན། 
༢ གསལ་བཤད། འདིར་བཀོད་པའི་ནང་དོན་དང་པར་སོགས་ནི་སྐྱིད་རྟག་འཕྲིན་སྟེགས་ཀྱི་དོ་བདག་གིས་དངོས་སུ་ཆོག་མཆན་བཀོད་པ་བརྒྱུད་འདིར་བརྒྱུད་འགོད་བྱས་པ་ཡིན་པས་གཞན་དག་གིས་རང་སྣང་གང་ཤར་གྱིས་བཤུ་འཁྱེར་མི་བྱ་རོགས་ཞུ། གལ་སྲིད་བརྒྱུད་འགོད་བྱ་ན་དོ་བདག་ལ་འབྲེལ་བ་བྱས་ཏེ་མོས་མཐུན་བྱུང་རྗེས་འཁྱེར་ཆོག