བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༤

        རང་རེའི་ཆོས་འབྱུང་དང་རྣམ་ཐར་ནི་བླ་སློབ་ཀྱི་ཆོས་འབྲེལ་ཡོད་པའི་མཁས་གྲུབ་རྣམས་ཀྱི་གཏམ་རྒྱུད་མང་པོས་གྲུབ་པ་ཞིག་རེད། གཏམ་རྒྱུད་དེ་དག་ལས་ཁུ་དབོན་གྱི་འབྲེལ་བ་ཡོད་པའི་དཔོན་སློབ་གཉིས་ཀྱི་མཛད་པ་དག་སྙིང་ཉེ་ཞིང་དཔྱད་རིན་ཡོད་པ་ཞིག་ཏུ་སྣང་། སྔོན་གྱི་ལོ་ཙཱ་བའི་གྲས་སུ་ཁུ་དབོན་གཉིས་ཀ་ལོ་ཙཱ་བ་ཡིན་པའི་སྐྱེས་བུ་དམ་པ་སྐོར་ཞིག་འདུག་ཅིང་། གལ་ཏེ་ཁྱེད་ནི་རང་རེའི་སློབ་གསོ་རིག་པ་ལ་ཞིབ་འཇུག་བྱེད་མཁན་ཞིག་ཡིན་ན་ཐུན་མོང་མ་ཡིན་པའི་སྣང་ཚུལ་འདི་ལ་ངེས་པར་དོ་སྣང་བྱེད་འོས་པ་ཞིག་རེད། དེང་གི་དུས་འདིར་ཕ་བོད་ཡིག་དགེ་རྒན་ཡིན་ཡང་རང་གི་རིགས་ཀྱི་མྱུ་གུ་བུ་དང་བུ་མོ་དག་གིས་བོད་ཡིག་ཕར་ཟད། བོད་སྐད་དག་མོ་ཞིག་ཀྱང་བཤད་མི་ཤེས་པའི་གནད་དོན་བྱུང་དུས། ལོ་ཙཱ་བ་ཁུ་དབོན་རྣམ་གཉིས་ཀྱི་མི་ཚེ་ཉམས་མྱོང་གིས་ང་ཚོ་ལ་བསླབ་བྱ་ཇི་འདྲ་ཞིག་གནང་ཡོད་མེད་ལ་ཉམས་ཞིབ་བྱེད་ཆོག །
        ཟངས་དཀར་ལོ་ཙཱ་བ་འཕགས་པ་ཤེས་རབ་དང་ཟངས་དཀར་ལོ་ཙཱ་བ་གཞོན་ནུ་ཚུལ་ཁྲིམས་གཉིས་ཀྱི་བར་ལ་ཁུ་དབོན་གྱི་འབྲེལ་བ་ཡོད་ཅིང་། སྔ་མ་ནི་ཁུ་བོ་དང་ཕྱི་མ་ནི་དབོན་པོ་ཡིན་པར་བཤད། རྔོག་ལེགས་པའི་ཤེས་རབ་དང་རྔོག་བློ་ལྡན་ཤེས་རབ། རྭ་རྡོ་རྗེ་གྲགས་དང་རྭ་ཆོས་རབ། ཆག་དགྲ་བཅོམ་དང་ཆག་ཆོས་རྗེ་དཔལ། དཔང་བློ་གྲོས་བརྟན་པ་དང་ལོ་ཆེན་བྱང་ཆུབ་རྩེ་མོ་བཅས་ཀྱང་དེ་བཞིན་རེད།  
        རྔོག་ལེགས་པའི་ཤེས་རབ་ལ་གཅུང་པོ་བཞི་མཆིས་པ་ལས་གསུམ་པ་ཇོ་སྲས་ཆོས་སྐྱབས་ཀྱིས་དཔལ་མོ་ཁབ་ཏུ་བཞེས་པ་ལ་དབོན་པོ་རྔོག་བློ་ལྡན་ཤེས་རབ་འཁྲུངས་པ་དང་། ཆག་དགྲ་བཅོམ་གྱི་གཅུང་དར་མ་འབྱུང་གནས་དང་ཆོས་འབུམ་གཉིས་ཀྱི་སྲས་ལ་དབོན་པོ་ཆག་ལོ་ཆོས་རྗེ་དཔལ་བ་བལྟམས། ཡབ་གཞོན་ནུ་དཔལ་བཟང་དང་དཔང་ལོ་ཙཱ་བ་བློ་གྲོས་བརྟན་པའི་སྲིང་མོ་ཇོ་ལྕམ་ཡེ་ཤེས་སྨན་ནེ་གཉིས་ལ་དབོན་པོ་བྱང་ཆུབ་རྩེ་མོ་བྱོན། <བོ་དོང་པཎ་ཆེན་གྱི་རྣམ་ཐར་>དུ་དབོན་པོ་ལ་རུས་དབོན་དང་སྣག་དབོན་ཞེས་རིགས་གཉིས་སུ་བཀར་འདུག་ཅིང་། ཕྱི་མ་སྣག་དབོན་ནི་སྲིང་མོའི་བུ་ལ་གོ་བས་ཁུ་བོ་དང་རུས་གཅིག་པའི་རྔོག་ལོ་དང་། རྭ་ལོ། ཆག་ལོ་བཅས་ནི་རུས་དབོན་དང་། ལོ་ཆེན་བྱང་ཆུབ་རྩེ་མོ་ལྟ་བུ་དཔང་ལོ་ཙཱ་བའི་སྣག་དབོན་རེད། བརྒྱ་ལ་ཁོང་དཔང་ལོའི་རུས་དབོན་ཡིན་ན་དཔང་ལོ་ཙཱ་བ་བྱང་ཆུབ་རྩེ་མོ་ཞེས་ཀྱང་བཀའ་བསྟན་ཁག་གི་འགྱུར་བྱང་རྣམས་སུ་ཡོང་སྲིད་སྙམ།         དབོན་པོ་ལོ་ཙཱ་བ་རྣམས་ཀྱི་རྣམ་ཐར་ལ་བལྟས་ན་ཁུ་བོའི་མཛུབ་སྟོན་དང་ཤུགས་རྐྱེན་གྱིས་མི་ཚེའི་ལམ་བུ་རང་གི་ཁུ་བོ་བཞིན་ཆོས་བསྒྱུར་བའི་ཆེད་ལས་བདམས་པ་ཞིག་ཏུ་སྣང་། གཉེན་ཚན་གྱི་འབྲེལ་བ་ཡོད་པས་མར་པ་ལོ་ཙཱ་བ་དང་འགོས་ལོ་ཙཱ་བ་གཉིས་ཀྱིས་འབྲོག་མི་ལོ་ཙཱ་བ་ལ་ཆོས་ཞུ་དུས་མན་ངག་རྣམས་ལ་ཡོན་མཐོན་པོ་མ་ཕུལ་ན་དཔེ་མཁྱུད་མཛད་པ་ལྟ་བུ་མིན་པར། ཁུ་བོས་ཆོས་གང་མཁྱེན་པ་དེ་ཉིད་རིན་མེད་དུ་དབོན་པོ་ལ་བུམ་པ་གང་བྱོའི་ཚུལ་དུ་བསྩལ་བར་མ་ཟད། སློབ་བུ་གཞན་ལས་དམིགས་བསལ་གྱིས་གཟིགས་སྐྱོང་གནང་བ་རྭ་ལོའི་ཐུགས་སྲས་རྭ་ཆོས་རབ་དང་། དཔང་ལོའི་ཐུགས་སྲས་ལོ་ཆེན་བྱང་རྩེ་ཡིན་པ་ལས་དཔགས་ནུས་ཤིང་། ཁུ་བོ་རྔོག་ལོ་དང་ཆག་ལོ་གཉིས་ཀྱིས་ཀྱང་བསྟན་པའི་ཁུར་རང་གི་དབོན་པོ་གཉིས་ལ་གཏད་པ་རྣམ་ཐར་དང་ཆོས་འབྱུང་ཁག་ཏུ་གསལ་ལོ། །
        རྔོག་བློ་ལྡན་ཤེས་རབ་དང་། རྭ་ཆོས་རབ། ཆག་ཆོས་རྗེ་དཔལ། ལོ་ཆེན་བྱང་རྩེ་སོགས་ལ་མཚོན་ན། རང་གི་ཁུ་བོ་ནི་ལོ་ཙཱ་ཁྲིད་མཁན་ཙམ་མ་ཡིན་པར་རིག་པའི་གནས་ཀུན་སྟོན་པའི་བློ་འབྱེད་སློབ་དཔོན་ཏེ། གུས་པ་ཆག་ལོ་ཁུ་དབོན་གཉིས་ལ་རྒྱུས་ཅུང་ཟད་ཡོད་པས་གཤམ་དུ་ཁོང་གཉིས་དམིགས་སུ་བཀར་ནས་བརྗོད་པར་བྱ།  དབོན་པོ་ཆག་ལོས་དགུང་ལོ་བདུན་པ་ནས་བོད་ཡིག་དང་། རྒྱ་ཡིག །བི་ཝར་ཏ། བཀས་བཅད། བྲི་ཐིག་བསླབས་ཤིང་། བཅུ་གཅིག་ནས་ཉེར་གཅིག་བར་ཁུ་བོ་དང་མ་བྲལ་བར་སྔགས་མཚན་ཉིད་ཀྱི་གཞུང་གདམས་ངག་མང་པོ་ཞུས་པས། ཆག་ལོ་ཕྱི་མས་ཆོས་གསན་པའི་ལོ་པཎ་ཐམས་ཅད་ཀྱི་ནང་ནས་བླ་མ་གཙོ་བོ་ཁུ་བོ་དར་མ་དགྲ་བཅོམ་དཔལ་རེད། རབ་བྱུང་སྒྲུབ་དུས་མཁན་པོ་ཡང་ཁུ་བོས་མཛད་པ་དང་། དུས་ཕྱིས་ཁོང་གི་ཞལ་ཆེམས་ལྟར་རྒྱ་བལ་གཉིས་སུ་སློབ་གཉེར་ལ་ཕེབས། རྒྱ་གར་ནས་གར་ལོག་གི་འཇིགས་པ་དང་ཚད་ནད་ཀྱི་ཉེན་ཁ་སོགས་ལ་ཐུག་དུས་མཁན་པོ་དགྲ་བཅོམ་གྱི་བཀའ་དྲིན་གྱིས་དཀའ་བ་ལས་ཐར་བར་མ་ཟད། ཁོང་གི་དྲིན་དྲན་པའི་བསྟོད་རྩོམ་ཞིག་ཀྱང་མཛད་འདུག་པས་ན། ཁུ་བོ་དགྲ་བཅོམ་མེད་ན་དབོན་པོ་ཆོས་རྗེ་དཔལ་བ་སྒྲ་བསྒྱུར་གྱི་ལོ་ཙཱ་བ་ཞིག་ཡིན་མི་དཔེ་ལ། དེ་ལས་ཀྱང་བལ་པོ་དང་རྒྱ་གར་ལ་ཡང་འགྲིམས་ཁག་པ་ཞིག་རེད།           དེ་ལྟར་བརྟག་པ་མཐའ་བཟུང་གི་ཚིག་གིས་བསམས་ཤིང་བསམས་ན་རྔོག་ལོ་ཙཱ་བ་ལེགས་པའི་ཤེས་རབ་འཁྲུངས་མེད་ན་རྔོག་བློ་ལྡན་ཤེས་རབ་ཡོད་མི་སྲིད་ལ། དབོན་པོ་ལོ་ཙཱ་བ་འདི་ཉིད་མེད་ན་བོད་ལ་ཚད་མ་རིག་པའི་འཆད་ཉན་དར་མེད་སྙམ། རྭ་ལོ་ཙཱ་བ་རྡོ་རྗེ་གྲགས་བྱོན་མེད་ན་རྭ་ཆོས་རབ་ཡོད་མི་དཔེ་ལ། དབོན་པོ་ལོ་ཙཱ་བ་འདི་ཉིད་མེད་ན་བོད་ལ་དུས་འཁོར་རྭ་ལུགས་ཀྱང་བྱུང་མེད་སྙམ། དཔང་ལོ་ཙཱ་བ་བློ་གྲོས་བརྟན་པ་བྱོན་མེད་ན་ལོ་ཆེན་བྱང་ཆུབ་རྩེ་མོ་ཡོད་མི་སྲིད་ལ། དབོན་པོ་ལོ་ཙཱ་བ་འདི་ཉིད་མེད་ན་བོད་ལ་<སྤྲིན་གྱི་ཕོ་ཉ་>ཞེས་པའི་སྙན་ངག་གི་བསྟན་བཅོས་གྲགས་ཅན་དེ་ཡང་བསྒྱུར་མེད་སྙམ་པ་ཞིག་རེད། དེ་ནས་ང་ཚོས་འདི་ལྟར་ཡང་ཆ་བཞག་ཆོག་སྟེ། ལོ་ཆེན་རིན་ཆེན་བཟང་པོ་དང་། བ་རི་ལོ་ཙཱ་བ་རིན་ཆེན་གྲགས་པ། འགོས་ལོ་ཙཱ་བ་བསོད་ནམས་རྩེ་མོ། ཁྲོ་ཕུ་ལོ་ཙཱ་བ་ཚུལ་ཁྲིམས་ཤེས་རབ། གློ་བོ་ལོ་ཙཱ་བ་ཤེས་རབ་རིན་ཆེན་སོགས་ལ་དབོན་པོ་ལོ་ཙཱ་བ་རེ་བྱོན་ཡོད་ཚེ། བོད་ཀྱི་སྒྲ་བསྒྱུར་ལོ་རྒྱུས་སུ་འོད་དུ་འཚེར་བའི་ཐོ་རེངས་སྐར་ཆེན་མང་པོ་ཞིག་བྱུང་ཡོད་ཅིང་། ཁོང་ཅག་གིས་བཀའ་བསྟན་གྱི་གླེགས་བམ་མང་པོ་ཞིག་ཀྱང་ཁུ་བོ་ལོ་ཙཱ་བ་ལྟར་རང་རེ་གངས་ཅན་པའི་སྐད་དུ་བསྒྱུར་ཡོད་ངེས།  
        བོ་དོང་པཎ་ཆེན་ཕྱོགས་ལས་རྣམ་རྒྱལ་མཆོག་ནི་ཁུ་དབོན་གྱི་འབྲེལ་བའི་ཐད་ནས་ཚབ་མཚོན་རང་བཞིན་གྱི་སྐྱེས་བུ་དམ་པ་གལ་ཆེན་ཞིག་ཡིན་ཏེ། དཔང་ལོ་ཙཱ་བ་བློ་གྲོས་བརྟན་པའི་སྣག་དབོན་ལོ་ཆེན་བྱང་ཆུབ་རྩེ་མོ་དང་། དེའི་རུས་དབོན་ལོ་ཆེན་གྲགས་པ་རྒྱལ་མཚན་དང་། དེ་ཉིད་ཀྱི་སྣག་གི་དབོན་པོ་ནི་བོ་དོང་པཎ་ཆེན་འཇིགས་མེད་གྲགས་པ་ཁོང་རེད། ཁུ་བོ་ལོ་ཙཱ་བ་རྣམས་ཀྱི་དབོན་པོ་མཁས་པའི་ཁྱུ་མཆོག་པཎ་ཆེན་དུ་གྱུར་བ་འདི་ལས་གདུང་རྒྱུད་སློབ་གསོ་ཞིག་གི་རྒྱལ་ཁ་མཐོང་ནུས་ལ། དཔང་ལོ་ཁུ་དབོན་རྣམས་ངེས་པ་དོན་གྱི་ལོ་ཙཱ་བ་ཆེན་པོ་བཻ་རོ་ཙཱ་ན་དང་དགེ་སློང་བྱའི་གདོང་པ་ཅན་སོགས་དང་བསྡུར་ན་དེ་འདྲའི་སྐུ་ཡོན་ཆེན་པོ་མེད་ཀྱང་། ཁོང་རྣམས་ཀྱི་དབོན་རྒྱུད་དུ་བྱོན་པའི་བོ་དོང་པཎ་ཆེན་ཞེ་ན་བོད་ཀྱི་ལོ་རྒྱུས་སུ་ངེས་པར་གླེང་དགོས་པའི་མདོ་སྔགས་གཉིས་ཀྱི་མཛོད་འཛིན་པ་ཞིག་རེད།          དེ་བཞིན་དབོན་པོ་ལོ་ཙཱ་བ་ཁ་ཅིག་ནི་ཁུ་བོ་ལས་ཀྱང་མཛད་རྗེས་ཆེ་བ་རྔོག་ལོ་དང་ཆག་ལོ་གཉིས་ཀྱིས་བསྒྱུར་བའི་ཆོས་ཚན་གྱི་གྲངས་ཁུ་བོ་གཉིས་ལས་ལྡབ་འགྱུར་གྱིས་མང་བ་ལས་ཤེས་ནུས་པ་དང་། དེ་དག་ཀྱང་ཁུ་བོ་བླ་མ་དག་གི་སྐུ་དྲིན་དང་རང་གི་སྡུག་རུས་ལས་བྱུང་བ་ཡིན་ལ། ཆག་ལོ་ཆོས་རྗེ་དཔལ་གྱིས་མཛད་པའི་<བླ་མའི་བཀའ་དྲིན་དྲན་པ་ཚིགས་བཅད་སུམ་ཅུ་པ་>ལས།         ཞེས་ཁུ་བོ་དགྲ་བཅོམ་ལ་བསྔགས་པ་ནི་ལོ་ཙཱ་བ་འདི་གཉིས་ཀྱི་རྣམ་ཐར་ལ་གཞིགས་ན་སྒྲོ་སྐུར་དང་རབ་རྟོག་གང་ཡང་མིན་པར་རང་བཞིན་བརྗོད་པ་ཞིག་ཡིན་པ་ངེས་ཤེས་ཟབ་མོ་སྦྱིན་འོང་། ལར་བོད་ཀྱི་ལོ་ཙཱ་བ་རྣམས་ཀྱིས་སློབ་གཉེར་གྱི་མཐུན་རྐྱེན་སྒྲུབ་ཚུལ་ལ་རིགས་བཞི་ཙམ་མཆིས་ཏེ། དང་པོ་རྒྱལ་པོ་དང་གཞུང་གིས་ཡོན་སྦྱར་བའི་ལོ་ཙཱ་བ་སྐ་ལྕོག་ཞང་གསུམ་དང་ལོ་ཆེན་རིན་བཟང་ལྟ་བུ། གཉིས་པ་རང་གིས་དཀའ་བས་གསེར་འཚོལ་བའི་ལོ་ཙཱ་བ་མཁས་གྲུབ་ཁྱུང་པོ་རྣལ་འབྱོར་དང་། སྟེང་པ་ལོ་ཙཱ་བ་ལྟ་བུ། གསུམ་པ་རང་གི་མཁན་པོ་དང་བླ་མས་གསེར་བརྫངས་ནས་སློབ་གཉེར་ལ་མངགས་པ་བླ་ཆེན་འབྲོག་མི་ལྟ་བུ། བཞི་པ་གཞན་ལ་རེ་མི་དགོས་པར་གདུང་རྒྱུད་ཀྱི་འབྱོར་བས་གསོས་པ་ནི་ས་སྐྱ་ལོ་ཙཱ་བ་ལྟ་བུ་རེད། དེ་ལས་ཆག་ལོ་ཆོས་རྗེ་དཔལ་ལ་མཚོན་ན་རིགས་གསུམ་པ་དང་བཞི་པ་གཉིས་ཀ་སྟེ། མཁན་པོ་དང་ཁུ་བོ་ཆག་དགྲ་བཅོམ་གྱི་འཕྲིན་ལས་ཀྱིས་དབོན་པོ་ཁོང་ཕལ་བའི་འཚོ་ཚིས་ལ་སེམས་ཁུར་མེད་པར་སློབ་གཉེར་གཅིག་པུར་བསམ་ཆོག་པའི་ཁོར་ཡུག་བཟང་པོ་ཞིག་ཏུ་འཚར་ལོངས་བྱུང་བ་རེད།  
        ཁོང་གིས་ཀྱང་མཐུན་རྐྱེན་བཟང་པོ་དེ་ཉིད་ཆུད་མ་བཟན་པར་ཆུང་དུས་ནས་སཾསྐྲྀ་ཏའི་སྐད་ལེགས་པར་སྦྱངས་པས། དུས་ཕྱིས་བལ་པོར་བཞུགས་དུས་ཁམས་ཀྱི་ཆོས་གྲོགས་རྣམས་ལ་ཆོས་སྐད་བསྒྱུར་བའི་ལོ་ཙཱ་གནང་བ་དང་། རྡོ་རྗེ་གདན་གྱི་དཀོན་གཉེར་རྣམས་ལ་ལེགས་སྦྱར་སྐད་དག་མ་གསུངས་ནས་ཧང་སངས་སུ་བཅུག་པ་རེད། འདི་ལས་རང་རེའི་བྱིས་པ་རྣམས་ཀྱིས་བོད་སྐད་དག་མོ་ཞིག་བཤད་ཁག་པ་ནི་ཡུལ་དང་དུས་ལ་ལན་པ་མ་ཡིན་པར། ཕ་མ་རང་གི་འཇོན་ནུས་ལ་རག་ལས་པ་ཞིག་ཨེ་ཡིན་སྙམ་སྟེ། བོད་སྐད་བོད་ཡིག་གི་ཁོར་ཡུག་ནས་དབོན་པོ་ལོ་ཙཱ་བ་རྣམས་ཀྱིས་ཁུ་བོའི་ཞབས་དྲུང་ནས་རྒྱ་གར་གྱི་པཎྜི་ཏ་འདར་དུ་བཅུག་ནུས་པའི་སཾསྐྲྀ་ཏའི་སྐད་སྦྱོང་ཐུབ་ན། གྲོང་ཁྱེར་གྱི་བོད་ཕྲུག་རྣམས་ཀྱིས་རྒྱ་ཡིག་རྒྱ་སྐད་ཀྱི་ཁོར་ཡུག་ནས་བོད་སྐད་དག་མ་ཞིག་བཤད་ནུས་མིན་དེ། གཅིག་བྱས་ན་ཕ་མ་གཉེན་ཚན་རྣམས་ཀྱི་མཁྱེན་བརྩེ་ནུས་གསུམ་ལ་འབྲེལ་བ་ངེས་ཅན་ཞིག་ཡོད་པར་བསམས། འདི་ནི་བྱིས་པ་མེད་པའི་བྱིས་པ་ཞིག་གི་ནར་མ་སོན་པའི་ལབ་རྡོལ་ཙམ་ཡིན་ན་མཐོལ་ལོ་བཤགས། གཞན་ཡང་རིག་གནས་གང་ཞིག་གི་རྩ་བ་བརྟན་ཞིང་རྩེ་མོ་རྒྱས་དགོས་ན་མི་རབས་གོང་མས་རྗེས་འཇུག་པ་འགན་འཁྲི་ཅན་སྐྱོང་ནུས་མིན་ལ་ཐུག་ཡོད་པས། ཁུ་བོ་རྣམས་ཀྱིས་དབོན་པོ་ལ་གཅེས་སྐྱོང་མཛད་ཚུལ་ནི་རང་གིས་དཀའ་བས་བསགས་པའི་ཐོས་བསམ་གྱི་བང་མཛོད་དེའི་བདག་པོ་ནོར་ངོ་ཟིན་མཁན་ཞིག་གསོ་སྐྱོང་གནང་བ་རེད། དེ་བས་ན་རང་རེའི་རིག་གནས་ཀྱི་རྒྱུད་འཛིན་ཟེར་བ་འབྲེལ་བ་བཟང་པོ་འདི་རིགས་ལས་བྱུང་ཞིང་། འཕེལ་རྒྱས་ཟེར་བ་ཡང་འདི་ཉིད་ལ་བརྟེན་ནས་ཡོང་དགོས་པ་འདྲའོ། །བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ་ལས་ཁག་བཞི་པ་ཁུ་དབོན་གྱི་སྐོར་རྫོགས་སོ། །

གསལ་བཤད། རྩོམ་འདིར་གསལ་བའི་པར་དང་པོ་དཔང་ལོ་ཙཱ་བ་དང་བཞི་པ་བོ་དོང་པཎ་ཆེན་གཉིས་ཀྱི་འབུར་སྐུ་ནི་གཙང་གི་ཆོས་སྡེ་བོ་དོང་ཨེར་བཞུགས་པ་དང་། པར་གཉིས་པ་ལོ་ཆེན་བྱང་རྩེ་དང་གསུམ་པ་ལོ་ཆེན་གྲགས་རྒྱལ་གཉིས་བོ་དོང་པཎ་ཆེན་གྱི་གདན་ས་སྤོ་རོང་པད་མ་ཆོས་སྡིངས་སུ་བཞུགས་པའི་སྐུ་རྟེན་རེད།