བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༥

        “མདོ་བསྒྱུར་ནང་དུ་ཡེ་ཤེས་སྡེ་ཞེས་བྲིས༔
        སྔགས་བསྒྱུར་ནང་དུ་བཻ་རོ་ཙ་ན་བྲིས༔
        བོན་བསྒྱུར་ནང་དུ་གན་ཇག་ཐང་ཏ་བྲིས༔
        རྩིས་བསྒྱུར་ནང་དུ་ཨིནྡྲ་བཻ་རོ་བྲིས༔
        སྨན་བསྒྱུར་ནང་དུ་ཆོས་འབར་བྱ་བ་བཅུག༔”
        ཞེས་<པདྨ་བཀའ་ཐང་>དུ་ལོ་ཆེན་བཻ་རོ་ཙཱ་ན་ལ་མཚན་མི་འདྲ་བ་ལྔ་ཡོད་པར་གསུངས་པ་བཞིན་རང་རེའི་ལོ་ཙཱ་བ་འགའ་ལ་ཡང་མཚན་གྱི་རྣམ་གྲངས་དུ་མ་འདུག་གཤིས། འདི་ཉིད་ཀྱི་གནད་མ་ཤེས་ན་དཔེ་ཀློག་སྐབས་སུ་མགོ་འཁྲུག་པའི་གནད་དོན་འབྱུང་སྲིད་ཅིང་། གུས་པས་ལོ་སྔོན་མ་དག་ཏུ་བཀའ་བསྟན་དཀར་ཆག་གཅིག་ལས་ལོ་ཙཱ་བ་ཉི་ཤུ་ལྷག་གི་འགྱུར་ཆོས་རྣམས་རེ་རེ་བཞིན་འཚོལ་དུས། ཁོང་རྣམས་ལ་མཚན་གཞན་ཡོད་པ་མ་ཤེས་པར་བསྐྱར་ཟློས་ཀྱི་ལས་ཚེགས་ལྕི་མོ་ཞིག་མི་འདོད་བཞིན་དུ་བསྒྲུབས་པ་ཡིན། རྩོམ་ཡིག་འདི་ནི་གནས་ཚུལ་དེ་འདྲ་ཞིག་བརྒྱུད་ནས་བྲིས་པའི་དཔྱད་རྩོམ་ཞིག་གི་སྙིང་བཅུད་ཡིན་པས་ཀློག་མཁན་ཁྱེད་ལ་ཅུང་ཟད་ཕན་པར་སྨོན།         སྒྲ་བསྒྱུར་གྱི་ལོ་ཙཱ་བ་ཆེན་པོ་རིན་ཆེན་བཟང་པོ་ལ་དགེ་སློང་བྱའི་གདོང་པ་ཅན་ཟེར་བ་ཁག་གཉིས་པ་སྐུ་བརྙན་གྱི་སྐོར་དུ་གླེང་ཟིན་པས་འདིར་བསྐྱར་དུ་བཟློས་པའི་ངལ་བ་སྤངས་ཤིང་། མཚན་དེ་ཉིད་ཐོགས་པའི་རྒྱུ་མཚན་ཁོང་གི་ཞལ་ཁྱིམ་ལ་འབྲེལ་བ་ཡོད་པར་བཤད་དེ། གུ་གེ་ཁྱི་ཐང་པས་ཁོང་འཁྲུངས་དུས་ཁྱེའུ་མདོག་སྔོ་བྱའི་གདོང་པ་དང་མིག་འདྲ་བ་ཞིག་ཡིན་པར་གླེང་བ་དེའི་དབང་གིས་ཡིན་ནམ་སྙམ།  2.འགོས་ལོ་ཁུག་པ་ལྷས་བཙས།
        འགོས་ལོ་ཙཱ་བ་ཁུག་པ་ལྷས་བཙས་ནི་ཡབ་ཡུམ་གཉིས་ཀ་མིང་སྲིང་ཡིན་པ་ལ་ལུས་འབྲེལ་བྱུང་ནས་ཁོང་ཆགས་པས། ངོ་གནོངས་ཏེ་ཡུལ་གཞན་གྱི་ལྷས་ར་ཞིག་ཏུ་འཁྲུངས་པས་མཚན་ཡང་ཟུར་ཟའི་ཚུལ་དུ་གཞན་གྱིས་དེ་ལྟར་བཏགས་པར་གྲགས་ཀྱང་། འགོས་ལོ་གཞོན་ནུ་དཔལ་གྱིས་ཡབ་ཡུམ་གཉིས་ཀ་འགོས་ཡིན་པས་འགོས་ཁུག་པ། ལྷས་ར་ཞིག་ཏུ་བཙས་པས་ལྷས་བཙས་ཟེར་བ་ནི་བླུན་གཏམ་ཁོ་ནའོ་ཞེས་མཐའ་གཅིག་ཏུ་མ་རངས་པའི་རྣམ་འགྱུར་བསྟན་འདུག །ལོ་ཙཱ་བ་ཁོང་གི་མཚན་དངོས་ནི་བསོད་ནམས་རྩེ་མོ་ཞུ་བ་དེ་ཡིན་སྙམ་ལ། <ས་སྐྱའི་གདུང་རབས་བང་མཛོད་>དང་<འབྲུག་པའི་ཆོས་འབྱུང་>གཉིས་སུ་གསལ་བའི་ཁོང་གི་རྣམ་ཐར་ལ་བསྡུར་ན་དཔག་ནུས་པས་ཤེས་འདོད་རྣམས་ཀྱིས་ཡིག་ཚང་དེ་གཉིས་ལ་གཟིགས་པར་ཞུ། 3.ཁྲོ་ལོ་བྱམས་པའི་དཔལ། 
        ཁ་ཆེ་པཎ་ཆེན་ཤཱཀྱ་ཤྲཱི་གདན་འདྲེན་མཁན་ཁྲོ་ཕུ་ལོ་ཙཱ་བ་བྱམས་པའི་དཔལ་ལ་མཚན་མི་འདྲ་བ་བཞིའམ་འབྲི་ཚུལ་མི་འདྲ་བ་བརྒྱད་ཙམ་<བཀའ་བསྟན་དཔེ་བསྡུར་མའི་དཀར་ཆག་>ཏུ་འབྱུང་། ད་ཕན་ཕྲན་གྱིས་བོད་ཀྱི་ཡིག་ཚང་ཁག་ལས་མཚན་ལྔ་ཙམ་རྙེད་དེ། ས་མིང་གི་ངོས་ནས་ཁྲོ་ཕུ་ལོ་ཙཱ་བ་དང་། རུས་ཀྱི་སྒོ་ནས་གནུབས་ལོ་ཙཱ་བ་བྱམས་པའི་དཔལ། སཾ་སྐྲྀ་ཏའི་སྐད་ཀྱིས་མཻ་ཏྲི་ཤྲཱི། གཞན་ཡང་འདུལ་ཁྲིམས་ཀྱི་སྡོམ་པ་མནོས་པས་ཚུལ་ཁྲིམས་ཤེས་རབ། གསང་སྔགས་རྡོ་རྗེ་ཐེག་པ་སློབ་གཉེར་དང་ཉམས་ལེན་བྱེད་པའི་གསང་མཚན་ལ་མི་བསྐྱོད་རྡོ་རྗེ་ཞེས་སུ་གྲགས། འགོས་ལོ་གཞོན་ནུ་དཔལ་གྱིས་ཁོང་གིས་དགེ་ཚུལ་མཛད་དུས་ཀྱི་མཚན་ལ་ཚུལ་ཁྲིམས་ཤེས་རབ་ཏུ་བཏགས་པར་བརྗོད་ཀྱང་། འབྲུག་པ་པད་མ་དཀར་པོས་བྱམས་པ་དཔལ་ཡིན་པར་གསུངས། <ལྷོ་རོང་ཆོས་འབྱུང་>དུ་ཁྲོ་ལོ་དགུང་ལོ་བཅུ་ལ་རབ་ཏུ་བྱུང་དུས་ཚུལ་ཁྲིམས་ཤེས་རབ་དང་། བཅུ་དགུ་ལ་བསྙེན་རྫོགས་མཛད་དུས་བྱམས་པའི་དཔལ་དུ་གསོལ་བར་བརྗོད་པས་<འབྲུག་པའི་ཆོས་འབྱུང་>གི་དེ་ཉིད་མ་དག་པ་འདྲ། དེ་ཅིའི་ཕྱིར་ཞེ་ན། ཁྲོ་ལོ་ཁོང་གི་འགྱུར་བྱང་མང་ཆེ་བའི་མཚན་ལ་བྱམས་པའི་དཔལ་འབྱུང་བ་དང་། ཆོས་ཚན་དེ་དག་ཕལ་མོ་ཆེ་ཞིག་གྲུབ་ཆེན་མི་ཏྲ་ཛོ་ཀི་དང་། པཎ་ཆེན་བུདྷ་ཤྲཱི། ཁ་ཆེ་པཎ་ཆེན་བཅས་དང་ལྷན་དུ་བསྒྱུར་བ་ཞིག་རེད། པཎ་གྲུབ་གསུམ་དང་ལྷན་དུ་བཞུགས་དུས་ཁོང་དགེ་སློང་ཡིན་པས་བྱམས་པའི་དཔལ་ནི་དགེ་སློང་གི་མཚན་ཡིན་དགོས་ཏེ། སྤྱི་ལོ་1210ལོར་གུང་ཐང་གི་ལྷ་བཙུན་མགོན་པོ་དཔལ་གྱིས་ཁ་ཆེ་པཎ་ཆེན་ལས་བསྙེན་རྫོགས་མཛད་དུས་ལོ་ཙཱ་བ་ཁོང་ལས་ཀྱི་སློབ་དཔོན་ཡིན་པ་ལས་བརྟག་ནུས་སོ། །  4.འགོས་ལོ་གཞོན་ནུ་དཔལ། 
        འགོས་ལོ་འདིའི་མཚན་ལ་གཞོན་ནུ་དཔལ་ལས་གཞན་རྩེས་ཐང་ལོ་ཙཱ་བ་དང་། ཆོས་རྗེ་ཡིད་བཟང་རྩེ་པ། སྐལ་བཟང་རྩེ་པ། རྣལ་འབྱོར་འཇམ་དབྱངས་རིན་ཆེན། མཁན་ཆེན་སྤོབ་བརྡར་བ་སོགས་འདུག  །
        པཎ་ཆེན་བསོད་ནམས་གྲགས་པའི་<བཀའ་གདམས་ཆོས་འབྱུང་>དང་<ཞྭ་ལུ་ལོ་ཆེན་གྱི་རྣམ་ཐར་>སོགས་སུ་ཆོས་རྗེ་ཡིད་བཟང་རྩེ་པ་ཟེར་ཞིང་། འབྲུག་རྒྱལ་དབང་ཆོས་རྗེས་མཛད་པའི་<རྗེ་བཙུན་ཙོང་ཁ་པའི་རྣམ་ཐར་>ལས་ཁོང་གིས་རི་རྩེ་ཞིག་ཏུ་སྒྲུབ་གནས་བཏབ་ནས་བཞུགས་པའི་ཚེ། གཞན་གྱིས་གནས་འདི་ལ་མཚན་ཇི་སྐད་ཟེར་ལགས་ཞུས་པས། ས་འདིར་བསྡད་ཅིང་སྒོམ་པ་སྐལ་བ་བཟང་བས་སྐལ་བཟང་རྩེ་རུ་ཐོགས་པ་དང་།  ཡིད་ལ་བསམ་པ་བཞིན་རི་རྩེ་འདིར་སྡོད་གནས་བཟང་བྱུང་བས་ཡིད་བཟང་རྩེ་རུ་ཐོགས་ཞེས་པ་ལ་བདག་སྒྲ་སྦྱར་བ་ན་སྐལ་བཟང་རྩེ་པ་དང་ཡིད་བཟང་རྩེ་པར་གསོལ་ཞིང་། མཐའ་མ་སྤོབ་བརྡར་བ་ནི་ཞལ་རས་སྤོབ་ཧྲིལ་ལེ་བ་ཡོད་པ་དང་། ཞབས་བརྡར་བ་ལ་བརྟེན་ནས་བཏགས་པར་བཤད། དེ་མིན་གཞན་<བསྟན་འགྱུར་དཔེ་བསྡུར་མའི་དཀར་ཆག་>ལས་སློབ་དཔོན་རྟག་པའི་རྡོ་རྗེས་མཛད་པའི་<ཡེ་དྷརྨའི་འགྲེལ་པ་>ལོ་ཙཱ་བ་གཞོན་ནུས་བསྒྱུར་བར་གསུངས་པ་ཡང་། ཁོང་ཡིན་པ་ཞྭ་དམར་ཆོས་གྲགས་ཀྱིས་མཛད་པས་<འགོས་ལོའི་རྣམ་ཐར་>དུ་འགྱུར་ཆོས་འདི་ཉིད་ལོ་ཙཱ་བ་འདི་བས་བསྒྱུར་བ་གསལ་བོ་གླེང་འདུག་པས་ཐེ་ཚོམ་མེད། 
        མཁས་དབང་ཚེ་ཏན་ཞབས་དྲུང་གི་<བསྟན་རྩིས་ཀུན་བཏུས་>སུ་འགོས་ལོ་ཁུག་པ་ལྷས་བཙས་ནི་འགོས་ལོ་དང་པོ་དང་། གཞོན་ནུ་དཔལ་ནི་འགོས་ལོ་གཉིས་པ། ཞྭ་ལུ་ལོ་ཙཱ་བ་ཆོས་སྐྱོང་བཟང་པོ་ནི་འགོས་ལོ་གསུམ་པ་ཡིན་པར་གསུངས་ལ། ཞྭ་ལུ་ལོ་ཙཱ་བའི་འགྱུར་བྱང་རེ་གཉིས་སུ་ཡང་ཁོང་ཉིད་འགོས་ལོ་གསུམ་པ་ཡིན་པར་བཞེད་ཀྱང་། བསྟན་པ་སྔ་དར་གྱི་སྐབས་སུ་བྱོན་པའི་ཞུས་ཆེན་གྱི་ལོ་ཙཱ་བ་འགོས་ཆོས་གྲུབ་བསྣན་ན་ཞྭ་ལོ་འགོས་ལོ་བཞི་པ་ཡིན་དགོས་སོ། །  5.ལོ་ཙཱ་བ་གཞན་དག ། 
        འབྲོག་མི་ལོ་ཙཱ་བ་ཤཱཀྱ་ཡེ་ཤེས་ལ་དཔལ་མྱུ་གུ་ལུང་པ་དང་། ཡར་ཀླུངས་ལོ་ཙཱ་བ་གྲགས་པ་རྒྱལ་མཚན་ལ་ཤུད་གེ་ལོ་ཙཱ་བ་དང་བྷོ་ཊ་པཎྜི་ཏ། པཎ་ཆེན་ནགས་རིན་དང་དུས་མཉམ་པའི་ལོ་ཙཱ་བ་བསོད་ནམས་རྣམ་པར་རྒྱལ་བ་ལ་བྱམས་པ་གླིང་པ། ཇོ་ནང་ཏཱ་ར་ནཱ་ཐ་ལ་སྒྲོལ་བའི་མགོན་པོ་དང་། རྒྱལ་ཁམས་པ། ཀུན་དགའ་སྙིང་པོ་སོགས་ཀྱི་མཚན་མཆིས་ལ། དེ་བཞིན་དུ་ལེགས་སྦྱར་སྐད་ལྟར་བྲིས་པ་ལོ་ཙཱ་བ་བན་དེ་རིན་ཆེན་འཚོ་ལ་རཏྣ་རཀྵི་ཏ་དང་། རྒ་ལོ་གཞོན་ནུ་དཔལ་ལ་ཀུ་མ་ར་ཤྲི། བ་རི་ཆོས་ཀྱི་གྲགས་པ་ལ་དྷརྨ་ཀཱིརྟི། ཟངས་དཀར་ཤེས་རབ་གྲགས་ལ་པྲཛྙཱ་ཀཱིརྟི། སྟེང་པ་ལོ་ཙཱ་བ་ཚུལ་ཁྲིམས་འབྱུང་གནས་ལ་ཤཱི་ལ་ཨ་ཀ་ར། ཆག་ལོ་ཆོས་རྗེ་དཔལ་ལ་དྷརྨ་སཱུ་མི་ཤྲི། ཞྭ་ལུ་ཆོས་སྐྱོང་བཟང་པོ་ལ་དྷརྨ་པཱ་ལ། ཆོས་འཁོར་ལོ་ཙཱ་བ་འཇམ་དཔལ་ཡེ་ཤེས་ལ་མཉྫུ་ཤྲཱི་ཉྫཱ་ན་ཡང་ཟེར་བ་བཀའ་བསྟན་གྱི་འགྱུར་བྱང་སོགས་ལས་ཤེས་ཐུབ། འདི་དག་ལས་ཁོ་བོ་དང་འདྲ་བའི་སློབ་གཉེར་བ་རྣམས་ཀྱིས་ཞིབ་འཇུག་ཡིག་ཚད་གཏོང་སྐབས་སྦྱོང་བའི་སྔགས་བཀླག་ཐབས་དང་སམ་བོད་ཤན་སྦྱར་གྱི་མིང་བརྡ་རྣམས་ནི་ངེས་པར་ཤེས་འོས་པའི་རྒྱུན་ཤེས་གལ་ཆེན་ཞིག་ཡིན་པ་ངང་ངམ་ཤུགས་ཀྱིས་རྟོགས་འོང་།
        འདི་ནི་གུས་པས་ཞིབ་འཇུག་སློབ་གཉེར་སྐབས་ཡིག་ཚང་ཞིབ་བསྡུར་གྱིས་བྲིས་པའི་དཔྱད་རྩོམ་ཐུང་ངུ་ཞིག་གི་སྙིང་པོ་ཡིན་ལ། ནང་དོན་ལ་ཤས་གཞན་གྱིས་སྔ་མོ་ནས་གླེང་ཟིན་པས་ན། དུས་དེབ་ཅིག་ཏུ་སྤེལ་བའི་རིན་ཐང་ཆེར་མེད་གཤིས་འདི་གར་ངོ་སྤྲོད་རྩོམ་ཐུང་ལ་བཅོས་ནས་སྤེལ་བ་ལགས། གཞན་སྟག་ཚང་ལོ་ཙཱ་བ་ཤེས་རབ་རིན་ཆེན་ལ་ལེགས་སྦྱར་སྐད་ཀྱི་པྲ་ཛྙཱ་རཏྣ་ཞེས་པར་མ་ཟད་མཚན་གཞན་ཞིག་ཀྱང་ཡོད་མོད། དཔྱད་འབྲས་གཏིང་ཐག་ཆོད་པ་ཞིག་རྩོམ་ནུས་མིན་ལ་གཞན་དུ་འབད་འཆར་ཡོད། བརྒྱ་ལ་ལོ་ཙཱ་བ་འདིའི་མཚན་གཞན་ཞིག་ཡོད་པ་གཏན་འཁེལ་ནུས་ན་སྟག་ལོ་ཁོང་ལ་འགྱུར་ག་ཚོད་ཡོད་པ་རྩི་ཆོག་པ་ཞིག་ཡིན་ཞིང་། བཀའ་བསྟན་གཉིས་སུ་སྟག་ཚང་ལོ་ཙཱ་བ་ཤེས་རབ་རིན་ཆེན་གྱི་མཚན་གསལ་བའི་འགྱུར་<སྡེབ་སྦྱོར་རིན་ཆེན་འབྱུང་གནས་>མ་གཏོགས་མེད་པས་ཁོང་གི་རང་རྣམ་དུ་གཞི་འགྱུར་དང་འགྱུར་བཅོས་མང་དུ་མཛད་པར་གསུངས་པ་དང་དོན་འགལ་དུ་སོང་ཡོད། དེ་བས་འདི་དག་གི་བྱེ་བྲག་འབྱེད་ནུས་ན་རང་རེའི་སྒྲ་བསྒྱུར་ལོ་རྒྱུས་ལ་གསལ་ཁ་ཡོང་བར་ཕན་ཐོགས་སྙམ། བོད་ཀྱི་ལོ་ཙཱ་བ་རྣམས་ཀྱི་མཚན་དང་འབྲེལ་བའི་བརྗེད་ཐོ་རྫོགས་སོ། །