བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༩

        མི་ཡི་སེང་གེ་རྗེ་བོ་རྣམས་ནི་འོད་གསལ་ལྷ་ལས་མཆེད་པར་བསྒྲགས་པས་བཙན་པོའི་དུས་སུ་རྒྱལ་པོ་རྣམས་ལ་ལྷ་བཙན་པོ་ཞེས་གསོལ་ཅིང་། དེ་བཞིན་སིལ་བུའི་དུས་སྐབས་ཀྱི་དཔལ་ས་སྐྱ་པ་བོད་མིའུ་གདུང་དྲུག་གི་རིགས་ལས་མཆེད་པ་མ་ཡིན་གྱི། གདུང་རུས་གཙང་མ་ལྷ་ལས་བྱོན་པ་<ས་སྐྱའི་གདུང་རབས་བང་མཛོད་>དུ་བརྗོད་པ་དང་། ཕག་གྲུ་དབང་འཛིན་པས་ཀྱང་ལྷ་རིགས་རླངས་རྒྱུད་ཡིན་པ་<རླངས་ཀྱི་པོ་ཏི་བསེ་རུ་རྒྱས་པ་>ལས་གླེང་བ་རེད། མངའ་བདག་གོང་མ་རྣམས་ལྷ་ལས་མཆེད་པར་བཤད་པ་བོད་ཡུལ་གཅིག་པུ་ཙམ་མ་ཡིན་པར། འཛམ་གླིང་གི་རྒྱལ་ཁམས་མང་པོ་ལ་དར་མྱོང་བའི་སྲོལ་ཐུན་མོང་ཅན་ཞིག་རེད།  1.འགོས་ལོ་ཙཱ་བ། 
        རུས་འགོས་ཅན་གྱི་ལོ་ཙཱ་བ་བཞི་སྟེ། འགོས་ཆོས་གྲུབ་དང་། འགོས་ཁུག་པ་ལྷས་བཙས། འགོས་གཞོན་ནུ་དཔལ།  ཞྭ་ལུ་ལོ་ཆེན་ནམ་འགོས་ཆོས་སྐྱོང་བཟང་པོ་བཅས་བཞི་རེད། འགོས་ལོ་གཞོན་ནུ་དཔལ་གྱིས་ཁོང་ནི་བོད་རྒྱལ་པོའི་བློན་པོ་འགོས་རྒན་གྱི་རྒྱུད་པ་ཡིན་པ་རྣམ་ཐར་དུ་གསུངས་ཤིང་། དེ་ནི་མཛངས་མི་བདུན་གྱི་ཡ་གྱལ་རྒྱལ་པོ་ཁྲི་སྲོང་ལྡེ་བཙན་གྱི་བློན་ཆེན་འགོས་ཁྲི་བཟང་ཡབ་ལྷག་གི་ཡབ་ཡིན་པ་མཁས་དབང་དུང་དཀར་ཚང་གིས་གསུངས། 
2.རྔོག་ལོ་ཙཱ་བ།  3.ལྕེ་ལོ་ཙཱ་བ། 
        རུས་ལྕེ་ཅན་གྱི་ལོ་ཙཱ་བ་ལྔ་སྟེ། ལྕེ་ཁྱི་འབྲུག་དང་། ལྕེ་ཛྙཱ་ན་སིང་དྷ། ལྕེ་དགའ་བའི་དཔལ། ལྕེ་ཀླུ་མེས། ལྕེ་བཀྲ་ཤིས་བརྩེགས་དཔལ་བཅས་རེད། <མྱང་ཆོས་འབྱུང་>དུ་རྒྱལ་པོ་སྲོང་བཙན་སྒམ་པོའི་ནང་བློན་དུ་ལྕེ་དབང་ཆེན་མོ་ཞེས་པ་ཞིག་མཆིས་པ་དང་། ལོ་ཙཱ་བ་ལྕེ་ཁྱི་འབྲུག་གིས་ཀྱང་ཁྲི་སྲོང་ལྡེ་བཙན་དང་ཁྲི་ལྡེ་སྲོང་བཙན་གཉིས་ཀྱི་ནང་བློན་མཛད་པར་བཤད།
4.འཁོན་ལོ་ཙཱ་བ། 
        རུས་འཁོན་ཅན་གྱི་ལོ་ཙཱ་བ་ལྔ་སྟེ། བསྟན་པ་སྔ་དར་སྐབས་སུ་བྱོན་པའི་ལོ་ཙཱ་བ་རབ་དགུའི་ཡ་གྱལ་འཁོན་ཀླུའི་དབང་པོ་བསྲུང་པ་དང་། ཕྱི་དར་དུས་ཀྱི་དགེ་བསྙེན་གྲགས་པ་རྒྱལ་མཚན་དང་ས་སྐྱ་ལོ་ཙཱ་བ་རྣམ་གསུམ་བཅས་རེད། <ས་སྐྱའི་གདུང་རབས་བང་མཛོད་>དུ་འཁོན་དཔལ་པོ་ཆེ་ནི་རྒྱལ་པོ་ཁྲི་སྲོང་ལྡེ་བཙན་གྱི་ནང་བློན་དང་།  གླང་ཁམས་པ་ལོ་ཙཱ་བའི་ལྕམ་མོ་གླང་བཟའ་ནེ་ཆུང་མ་ཁབ་ཏུ་བཞེས་ནས་སྲས་ཆེ་བ་འཁོན་ཀླུའི་དབང་པོ་འཁྲུངས་པར་གྲགས། 
5.ཤེའུ་ལོ་ཙཱ་བ།  6.ཡར་རྒྱབ་པ། 
        བྱམས་པ་གླིང་པ་བསོད་ནམས་རྣམ་རྒྱལ་ནི་དུས་རབས་བཅུ་བཞི་པར་བྱོན་པའི་ཡར་ཀླུངས་ལོ་ཙཱ་བ་ཞིག་སྟེ། འགོས་ལོ་ཙཱ་བ་གཞོན་ནུ་དཔལ་དང་། ཁྲུས་ཁང་ལོ་ཙཱ་བ་བསོད་ནམས་རྒྱ་མཚོ་དང་དུས་མཉམ་དུ་བྱོན་པའི་པཎ་ཆེན་ནགས་རིན་གྱི་དངོས་སློབ་ལགས་ན། པཎ་ཆེན་ནགས་རིན་གཙོས་པཎྜི་ཏ་གཞན་གཉིས་དང་ལྷན་དུ་བསྒྱུར་བའི་ཆོས་ཚན་བདུན་བསྟན་འགྱུར་དུ་བཞུགས། ལོ་ཙཱ་བ་འདི་བ་སློབ་དཔོན་ཐོན་མི་ཡི་གདུད་རྒྱུད་ལས་འཁྲུངས་པ་བྱང་ཆུབ་དགེ་ལེགས་རྣམ་རྒྱལ་གྱིས་མཛད་པའི་ཁོང་གི་རྣམ་ཐར་དུ་གསུངས།
        དེ་ལྟར་ལོ་ཙཱ་བ་ཚོས་བཙན་པོའི་སྐབས་ཀྱི་གདུང་རུས་ཤིག་ལ་གཏུགས་པའི་བསམ་སྦྱོར་འདི་ཡིས་གདུང་རབས་ཀྱི་རྒྱུན་རིང་པོ་ཡིན་པར་མ་ཟད། ཁོང་ཅག་གི་མེས་པོ་གོང་མ་རྣམས་ཀྱིས་བོད་ཀྱི་ལོ་རྒྱུས་ལ་མཛད་རྗེས་ཆེ་བའང་མཚོན་ཐུབ་སྙམ། བློན་པོ་རྣམས་ཀྱི་མིང་ལ་འགོས་རྒན་དང་། རྔོག་ཆེན་པོ། འཁོན་དཔལ་པོ་ཆེ། ལྕེ་དབང་ཆེན་མོ་ཞེས་ཆེ་བརྗོད་ཀྱིས་བྲིས་པ་ལ་གཞིགས་ན། ལོ་ཙཱ་བ་རྣམས་ཀྱི་གདུད་རྒྱུད་གཙང་མ་དང་གཟི་བརྗིད་ཅན། བླ་ན་མ་མཆིས་པ་ཞིག་ཡིན་པར་བསྟན་པ་ལྟར་སྣང་མོད། གདུང་རུས་འདི་དག་ནི་བཙན་པོའི་དུས་ཀྱི་བློན་པོ་དང་ལོ་ཙཱ་བ་རྣམས་ཀྱི་རུས་མིང་ཡིན་པ་རྒྱུས་ཡོད་ཀུན་ལ་གསལ། དཔེར་ན་བསྟན་པ་ཕྱི་དར་སྐབས་སུ་བྱོན་པའི་མཆིམས་བརྩོན་སེང་དང་། མཆིམས་བློ་བརྟན། མཆིམས་ནམ་གྲགས། མཆིམས་བློ་གྲགས་སོགས་རུས་མཆིམས་ཅན་གྱི་སྐྱེས་བུ་དམ་པ་མང་པོ་ཞིག་གི་གདུང་རུས་ཀྱང་། རྒྱལ་པོ་ཁྲི་སྲོང་ལྡེ་བཙན་གྱི་བློན་པོ་མཆིམས་རྡོ་རྗེ་སྤྲེ་ཆུང་དང་མཆིམས་མེ་ལྷ། ལོ་ཙཱ་བ་མཆིམས་ཤཱཀྱ་པྲ་བྷ་དང་མཆིམས་རྒྱལ་བ་མཆོག་དབྱངས་སོགས་ལ་གཏུགས་ཆོག་པ་ཞིག་རེད།          བོད་ཀྱི་ལོ་ཙཱ་བའི་གྲས་སུ་བློན་པོ་ལས་གཞན་བཙན་པོའི་གདུང་རྒྱུད་ཀྱང་མཆིས་པ་ཞུ་ཆེན་གྱི་ལོ་ཙཱ་བ་མངའ་བདག་ཡེ་ཤེས་རྒྱལ་མཚན་དང་། ལྷ་བླ་མ་ཞི་བ་འོད། ལྷ་བཙུན་བྱང་ཆུབ་འོད། ལྷ་བཙན་པོ་མུ་ནི་རཱ་ཛ་སོགས་ཡོད་པ་ལས་ཤེས་ཐུབ་ཅིང་། འདི་དག་ལས་ང་ཚོས་གནས་ཚུལ་འདི་འདྲ་ཞིག་བརྟག་ཆོག་སྟེ། བཙན་པོ་གོང་མ་རྣམས་ཀྱི་ཆབ་སྲིད་ཀྱི་སྒྲིག་གཞི་དུས་རབས་དགུ་པའི་དུས་དཀྱིལ་ནས་ཐོར་ན་ཡང་། ལོ་ཙཱ་རིག་གནས་ཀྱི་སྙིང་སྟོབས་དྲོད་མ་ཡལ་བ་ཞིག་རྒྱལ་བློན་བྱང་ཆུབ་སེམས་དཔའ་དག་གི་གདུང་རྒྱུད་དུ་བྱོན་པའི་ལོ་ཙཱ་བ་རྣམས་ཀྱིས་རྒྱུད་འཛིན་དང་དར་སྤེལ་བྱས་ནས་དུས་རབས་བཅོ་ལྔའི་བར་རྒྱུན་བསྐྱངས་པ་རེད། ལོ་རྒྱུས་སྣང་ཚུལ་འདི་ལ་བློན་ཆེན་པོ་འགོས་ཁྲི་བཟང་ཡབ་ལྷག་དང་། ཞུ་ཆེན་གྱི་ལོ་ཙཱ་བ་འགོས་ཆོས་གྲུབ་དང་གདུང་རུས་གཅིག་པའི་སྐད་གཉིས་སྨྲ་བ་རྩེད་ཐང་གཞོན་ནུ་དཔལ་དང་ཞྭ་ལུ་ཆོས་སྐྱོང་བཟང་པོ་གཉིས་བྱོན་པ་དེས་བདེན་དཔང་བྱས་ཡོད།  
        ཕྱིས་སུ་རིགས་རུས་ཆོ་འབྲང་བརྩི་བའི་ལེགས་བྱང་སྒོ་ཀུན་ནས་རྒུད་ཅིང་། གྲུབ་མཐའི་ཆགས་སྡང་དང་ཡུལ་ལུང་གི་ཕྱོགས་རིས་ཆེས་ཆེར་དར་བ་དང་སྦྲགས། ཡང་སྲིད་ངོས་འཛིན་པའི་ལམ་ལུགས་ཕྱོགས་དུ་མ་ནས་རྩ་བ་བརྟན་ཞིང་ཡལ་འདབ་རྒྱས་པས། ད་ཆར་ལོ་ཙཱ་བ་ཆེན་པོ་དག་གི་རྣམ་སྤྲུལ་ཡིན་ཟེར་བའི་སྤྲུལ་སྐུ་གསར་པ་འབྱུང་བཞིན་པ་དཔེར་ན་མདོ་སྨད་ཀྱི་ལུང་པ་ག་གེ་མོར་ཞུ་ཆེན་གྱི་ལོ་ཙཱ་བ་ལྕོག་རོ་ཀླུའི་རྒྱལ་མཚན་གྱི་སྤྲུལ་སྐུ་ཡང་ཡོད་རབས་ཐོས། བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ་ལས་ཁག་དགུ་པ་གདུང་རྒྱུད་གཅིག་པ་ལས་མཐོང་བའི་སྣང་ཚུལ་རང་ནུས་ཀྱིས་བརྗོད་པ་རྫོགས་སོ། །