བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༡༠

        ལོ་ཙཱ་བ་རྣམས་ཀྱི་རྣམ་ཐར་དག་སྒྲ་བསྒྱུར་ལོ་ཙཱ་བ་རང་གིས་བརྩམས་པའི་རང་རྣམ་དང་། རང་གི་སློབ་བརྒྱུད་རྣམས་ཀྱིས་བརྩམས་པ་རིགས་གཉིས་སུ་དགར་ཆོག་ལ། ཚན་ཆུང་འདིའི་གཞན་རྣམ་ཟེར་བ་ནི་ཕྱི་མ་ལ་གོ་དགོས། རང་རྣམ་གྱི་གྲས་སུ་སྟག་ཚང་ལོ་ཙཱ་བ་ཤེས་རབ་རིན་ཆེན་དང་། ལོ་ཆེན་དྷརྨ་ཤྲཱི། ཇོ་ནང་ཏཱ་ར་ནཱ་ཐ། སི་ཏུ་བསྟན་པའི་ཉིན་བྱེད་བཅས་ཀྱི་རྣམ་ཐར་གཏོགས།          གོང་གི་སྣང་ཚུལ་འདི་ལས་ང་ཚོས་སྡོམ་ཚིག་འདི་འདྲ་ཞིག་འཇོག་ཆོག་སྟེ། ལོ་ཙཱ་བ་རྣམས་ཀྱི་འཕྲིན་ལས་རྒྱས་ཤིང་ཆོས་བརྒྱུད་དར་བ་རྣམས་ལ་རྣམ་ཐར་ཡོད་པ་དེ་རེད། བླ་ཆེན་འབྲོག་མི་དང་། བ་རི་རིན་གྲགས། ས་ལོ་རྣམ་གཉིས། དཔང་ལོ། ལོ་ཆེན་བྱང་རྩེ་སོགས་ལ་རྣམ་ཐར་ཡོད་པ་ནི། ཁོང་ཅག་གི་ས་སྐྱའི་ཆོས་བརྒྱུད་ད་ལྟའི་བར་དུ་མ་ཉམས་པས་ཡིན་སྲིད་སྙམ། མར་པ་ལོ་ཙཱ་བ་དང་གྲུབ་ཆེན་ཨུ་རྒྱན་པ་ལ་ཡང་རྣམ་ཐར་རྒྱས་འབྲིང་བསྡུས་གསུམ་མཆིས་པ་བཀའ་བརྒྱུད་པའི་གྲུབ་མཐའ་དར་བའི་དབང་གིས་ཨེ་ཡིན་ནམ། དེ་ནི་ཆོས་བརྒྱུད་གྲུབ་མཐའ་འཕེལ་བའི་ལོ་ཙཱ་བ་ཚོར་བྲིས་འབུར་ཅི་རིགས་ཀྱི་སྣང་བརྙན་མཆིས་པ་དང་། ཆོས་བརྒྱུད་ཀྱི་འཕྲིན་ལས་རྫོགས་པའི་ལོ་ཙཱ་བ་རྣམས་ནི་དེ་ལས་ལྡོག་པ་དང་གཅིག་རེད་བསམ། (1).མཚན་བྱང་གི་ཁྱད་པར།
བྲིས་མ།
        རྒྱལ་ཁམས་པ་ཏཱ་ར་ནཱ་ཐས་བདག་ཉིད་ཀྱི་རྣམ་ཐར་ངེས་པར་བརྗོད་པའི་དེབ་གཏེར་ཤིན་ཏུ་ཞིབ་མོ་སྒྲོ་སྐུར་ཀུན་སྤངས་གནས་ཚུལ་ཀུན་གསལ་མ་བཅོས་ལྷུག་པའི་རྟོགས་བརྗོད་ཅེས་བྱ་བ་བཞུགས་སོ། །
སྤར་མ། (2). ནང་དོན་གྱི་ཁྱད་པར།
བྲིས་མའི་ལྡེབ་གྲངས་11aན།
        གོང་དཀར་ན་ཕྱག་རིས་ངོས་མ་རང་འདུག་པ་དངོས་སུ་མཐོང་། དེ་མཐུན་གྱི་བདག་མོ་འཕྱོང་རྩེའི་དྲུང་སོགས་ལ། ཕེབས་སྒོ་ཕྱག་བྲིས་ཀྱི་དན་རྟགས་ཅན་སོགས་གནང་འདུག་པ་ཕྱིས་དངོས་ཀྱི་མིག་ལམ་དུ་ཡང་འབྱོར། ཕེབས་སྒོ་དེ་ཀུན་ཡང་ཡང་དག་པ་ཁོ་ན་སྟེ། དངོས་ཅག་ལྟ་བུ་བར་དོར་མངོན་པར་རྫོགས་པར་སངས་རྒྱས་པའི་སློབ་དཔོན་སྤྱོད་པ་པ་ཡང་སྲིད་འཛིན་པའི་ཚུལ་སྟོན་པ་ལྟ་ག་ལ་ཞིག་་་་་་་་
སྤར་མའི་ལྡེབ་གྲངས་9bན། བྲིས་མའི་ལྡེབ་གྲངས་17aན།
        གམ་པ་རྫོང་དུ་བདག་པོ་རྣམ་རྒྱལ་དྲུང་དང་མཇལ། གད་དང་རྒྱང་རོའི་གཞུང་དེད་ནས་སླེབ། ས་སྐྱོང་ཡབ་སྲས་རྣམས་དང་མཇལ་བས། སྟག་ལུང་རྫོང་དུ་ཞག་བཅུ་སྐོར་སོང་།
སྤར་མའི་ལྡེབ་གྲངས་14bན། བྲིས་མའི་ལྡེབ་གྲངས་18bན།
        འབྲུག་སྦྲུལ་གྱི་ལོ་འདི་ཚོ་ལ་ཞབས་དྲུང་སྟོབས་དང་ཡང་ཡང་ཀ་འཇལ་བྱུང་། ཉི་ཤུའི་ཉིན་ར་ལུང་གི་མདར་ཞབས་དྲུང་བཀྲས་སྟོབས་དྲུང་དང་མཇལ་ཙམ་བྱས། རིམ་པས་རྒྱལ་རྩེར་ཕེབས།
སྤར་མའི་ལྡེབ་གྲངས་15bན། (3). དཀར་ཆག་གི་ཁྱད་པར།          མདོར་ན་བྲིས་མ་དང་བསྡུར་ན་ཤིང་སྤར་མ་རུ་མཚན་བྱང་དང་། ནང་དོན། དཀར་ཆག་གང་ཐད་ནས་ཆད་པ་ཤིན་ཏུ་མང་བས། འདི་ནི་བསམ་བཞིན་དུ་པར་ལ་རྐོ་དུས་སྤར་ཤིང་དང་དུས་ཚོད་ལ་གྲོན་ཆུང་བྱེད་པ་ཞིག་ཡིན་མོད། ཇོ་ནང་ཏཱ་ར་ནཱ་ཐ་ཁོང་གིས་མཛད་པའི་རྣམ་ཐར་གྱི་པར་མ་དངོས་ལ་གཏོར་བརླགས་ཆེན་པོ་ཞིག་ཐེབས་འདུག །དེ་བས་རྣམ་ཐར་ཡོད་པའི་ལོ་ཙཱ་བ་ཞིག་ལ་ཞིབ་ཏུ་འཇུག་འདོད་ན། རྣམ་ཐར་གང་དེའི་པར་མ་སྔ་ཤོས་ལ་མཇལ་འོས་ཏེ། དེང་སང་གསར་དུ་དཔར་བའི་རྣམ་ཐར་ཁག་ཏུ་བྲིས་མ་དང་སྤར་མའི་ཡི་གེ་ངོས་མ་ཟིན་པར་ནོར་འཁྲུལ་བྱུང་བ་མང་བར་མ་ཟད། ལྡེབ་གྲངས་ཆད་པའི་གནད་དོན་ཡང་ཡོད་པས། རྣམ་ཐར་གཅིག་གི་པར་མ་མི་འདྲ་བ་རྣམས་བསྡུར་ནས་བཀླག་རྒྱུ་ཡང་ཤིན་ཏུ་གལ་ཆེན་དུ་མཐོང་།         ཆག་ལོ་ཆོས་རྗེ་དཔལ་དང་གྲུབ་ཆེན་ཨུ་རྒྱན་པ་རིན་ཆེན་དཔལ་གཉིས་ཀྱི་རྣམ་ཐར་ནི་རྒྱལ་ཁམས་པ་ཞིག་གི་ངོས་ནས་བརྩམས་པ་ཞིག་རེད། གྲུབ་ཆེན་ཨུ་རྒྱན་པ་ལྟ་བུར་མཚོན་ན་སྐུ་ཚེ་གང་བོར་བོད་ཡུལ་སྟོད་སྨད་བར་གསུམ་ལས་གཞན་ཨུ་རྒྱན་དང་། རྒྱ་གར་ནག་སོགས་ལ་ཕེབས་ནས་འགྲོ་དོན་བསྐྱངས་པས། ཁོང་གི་རྣམ་ཐར་རྒྱས་པ་རུ་སྐབས་དེའི་ཡུལ་གྲུ་མང་པོའི་ལོ་རྒྱུས་ཀྱང་མི་ཉུང་བ་ཞིག་ཡོད། ཁྱད་པར་དུ་དུས་རབས་བཅུ་གསུམ་པའི་ཨུ་རྒྱན་ཡུལ་གྱི་སྤྱི་ཚོགས་ལོ་རྒྱུས་དང་། ས་མིང་ཞིབ་འཇུག་བྱེད་མཁན་ཞིག་ལ་མཚོན་ན། ལོ་ཙཱ་བ་འདི་ཉིད་ཀྱི་རྣམ་ཐར་ནི་ཧ་ཅང་གལ་ཆེ་བའི་དཔྱད་གཞི་ཞིག་ཏུ་བགྲངས་ཆོག །         <ལོ་ཆེན་བྱང་རྩེའི་རྣམ་ཐར་>ནི་གསན་ཡིག་རྩོམ་ཚུལ་གྱི་ངོས་ནས་མཛད་པ་དང་འདྲ་ལ། ཁོང་གིས་བླ་མ་རྣམས་ཀྱི་མདུན་ནས་ཆོས་ཅི་ཞིག་གསན་ཚུལ་གྱི་ཐོབ་ཡིག་རྒྱས་པར་བྲིས་འདུག །གཞན་<ཁྲིམས་ཁང་ལོ་ཙཱ་བའི་རྣམ་ཐར་>དུ་ལོ་ཙཱ་བ་གང་དེས་མགུར་གླུ་བཞེངས་པའི་ཚིགས་བཅད་མང་དུ་ཡོད་ཅིང་། རང་རེའི་མགུར་དབྱངས་རིག་གནས་ལ་ཞིབ་འཇུག་གནང་མཁན་ཞིག་ཡིན་ན་ངེས་པར་མཇལ་འོས་པ་ཞིག་སྟེ། ཚིག་གི་སྡེབ་སྦྱོར་ཐད་ནས་རྗེ་བཙུན་མི་ལ་རས་པའི་མགུར་གླུ་དག་ལས་ཀྱང་ཁྱད་ཆོས་ཡོད་པ་ཞིག་ཡིན་པས་ཞིབ་ཏུ་རྣམ་ཐར་ལས་ཤེས་པར་ཞུ། དེར་མ་ཟད་རྩོམ་རིག་ལ་དོ་སྣང་བྱེད་མཁན་ཞིག་ཡིན་ན་ཡང་དེ་ལས་མཐོང་རྒྱ་བསྐྱེད་འོང་སྟེ། དེ་ཉིད་དུ་ཚེག་བར་ལྔ་ཅན་མ་ཟད་གསུམ་ཅན་གྱི་མགུར་ཡང་མཆིས་པ་དེ་ནི་གུས་པས་ད་ཕན་མཐོང་བའི་ཚིགས་བཅད་སྙན་ངག་ལས་ཚེག་བར་ཆེས་ཐུང་བའི་མཚན་གཞི་རུ་འཇོག་ཆོག །         མདོར་ན་གླེགས་བམ་ཤིང་སྤར་མ་གཅིག་ལས་ཞིབ་འཇུག་པས་བརྗོད་བྱ་ལ་མཇལ་བ་དང་། རྩོམ་རིག་པས་སྡེབ་སྦྱོར་ལ་དཔྱད། ལྷ་རིས་པས་ལྷ་སྐུ་ལ་གཟིགས། ཡིག་མཁན་གྱིས་ཡིག་གཟུགས་ལ་བལྟས། ཤོག་བཟོ་པས་ཤོག་གུ་ལ་བརྟག ། སྤར་རྐོན་གྱིས་རྐོ་རྩལ་ལ་དཔྱད་ཆོག་པ་བཞིན། ལོ་ཙཱ་བ་རྣམས་ཀྱི་རྣམ་ཐར་དག་ལ་བརྗོད་བྱ་ཐུན་མོང་མ་ཡིན་པ་དང་། རྩོམ་ཚུལ་ཡན་གར་བ་མང་དུ་མཆིས་པས། དེ་དག་གི་སྙིང་པོ་ལེན་དགོས་ན་ཆེད་ལས་དང་རིག་ཚན་མི་འདྲ་བ། ཕྱོགས་དང་ཟུར་མི་འདྲ་བའི་ངོས་ནས་མཇལ་ན་ང་ཚོ་ལ་བློ་བསྐྱེད་ཆེན་པོ་ཐོབ་པ་གདོན་མི་ཟའོ། །བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ་ལས་ཁག་བཅུ་པ་རྣམ་ཐར་བཀླགས་པ་རྫོགས་སོ། །