བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ། ༡༢

        བོད་ཁ་བ་ཅན་ནི་ལྷ་དང་ལྷ་མོའི་ཞིང་ཁམས་ཤིག་སྟེ། དེར་འཇིག་རྟེན་པའི་ལྷ་ཡུལ་ལྷ་གཞི་བདག་དང་འཇིག་རྟེན་ལས་འདས་པའི་ལྷ་ཡི་དམ་ཆོས་སྐྱོང་སོགས་མང་པོ་ཞིག་མི་རབས་ནས་མི་རབས་བརྒྱུད་བོད་རྣམས་ཀྱི་དད་རྟེན་དུ་བཞུགས་ཡོད། དེ་ཡང་འདི་དག་གི་ཁུངས་དེད་ན་སྟོད་རྒྱ་གར་འཕགས་ཡུལ་ནས་ཕེབས་པའི་ཕྱི་ནང་གཉིས་ཀྱི་ལྷ་དང་། སྨད་རྒྱ་ནག་ཕོ་བྲང་ནས་འོང་བའི་སྲུང་མ་ཡོད་པར་མ་ཟད། གནའ་སྔ་མོ་ནས་མཐོ་སྒང་འདིའི་སྣོད་བཅུད་གཉིས་སྲུང་བའི་ལྷ་ཡང་མང་པོ་ཞིག་ཡོད།
        རྒྱ་གར་གྱི་ལྷ་རྣམས་ནི་འཇིག་རྟེན་ལས་འདས་པའི་ལྷ་སྟེ། ཡི་དམ་དང་། ཆོས་སྐྱོང་། མཁའ་འགྲོ་ལ་སོགས་རེད། དེ་རྣམས་གདན་འདྲེན་མཁན་ཕལ་མོ་ཆེ་བོད་ཀྱི་ལོ་ཙཱ་བ་རྣམས་ཡིན་པས་ཚན་ཆུང་འདིར་འདིའི་སྐོར་གླེང་འདོད་བྱུང་ཞིང་། འདིའི་ཐད་ལ་རྒྱུས་མངའ་ཆེན་པོ་མེད་པས་བདུན་ཕྲག་གོང་མར་གསན་ཡིག་གྲགས་ཆེ་བ་རེ་གཉིས་དང་། ཆོས་འབྱུང་ཅི་རིགས་ལ་ཆེད་དུ་བམ་ཀློག་བྱས་ནས་བརྗེད་ཐོ་འདི་ཉིད་བྲིས་པ་ལགས་ན། ནོར་འཛོལ་འབྱུང་སྲིད་པས་སླད་མར་དག་བཅོས་བྱ་འཆར་ཡོད་ཅིང་། ཤེས་ནས་སྨྲ་བ་རྣམས་ཀྱིས་ཀྱང་དགོངས་འཆར་ཅི་ཡོད་སྩོལ་བར་ཞུ། དུས་འཁོར། གསང་འདུས། དཔལ་འཁོར་ལོ་སྡོམ་པ། གཤིན་རྗེ་གཤེད། གཤིན་རྗེ་གཤེད་དམར། སྒྲོལ་དཀར་ཡིད་བཞིན་འཁོར་ལོ།         འདིར་ཆེད་དུ་གསལ་བཤད་ཅིག་བྱེད་དགོས་པ་ཞིག་ནི་གོང་དུ་བརྗོད་པའི་བདེ་གསང་འཇིགས་གསུམ་བཞིན་ལྷ་རེ་རེ་ལ་ལོ་ཙཱ་བ་མི་འདྲ་བ་ནས་བརྒྱུད་པ་མང་སྲིད་པས། གུས་པས་ཡིག་ཚང་རེ་གཉིས་ལས་མཐོང་བ་ལ་གཞིགས་ནས་བརྗོད་པ་ཡིན་པས་མཐའ་གཅིག་ཏུ་ངེས་པ་མེད་པའང་ཤེས་དགོས་པ་ལགས། གཞན་ཡང་ཡི་དམ་གྱི་ལྷ་རེ་རེ་ལ་འདི་ལྟར་ཁུངས་དེད་ན། པཎྜི་ཏ་ཞིག་གམ་ཡང་ན་ལོ་ཙཱ་བ་ཞིག་ལ་ཐུག་པ་ཞིག་ཡིན་པ་འདྲ་ཡང་འདིར་དཔེ་མཚོན་ཙམ་གྱིས་འཐུས་པར་བྱ། རྒྱས་པར་ཤེས་འདོད་པ་རྣམས་ཀྱིས་ཡི་དམ་ལྷ་ཚོགས་ཀྱི་ཆོས་འབྱུང་རྒྱས་པ་སྟེ། <དུས་འཁོར་ཆོས་འབྱུང་>དང་<འཇིགས་བྱེད་ཆོས་འབྱུང་།> <གསང་འདུས་ཆོས་འབྱུང་>སོགས་དང་། བླ་མ་དམ་པ་རྣམས་ཀྱི་གསན་ཡིག་སོགས་ལ་གཟིགས་དང་འདིའི་སྐོར་གྱི་ཤེས་བྱ་མང་པོ་ཞིག་ཐོབ་ངེས།
        འདི་ལྟར་སྔོན་གྱི་ལོ་ཙཱ་བ་རྣམས་ཀྱི་མཛད་པ་ལ་མཇལ་ན་ཁོང་ཅག་ནི་ཡི་དམ་ཆོས་སྐྱོང་མང་པོ་ཞིག་གི་འཕྲིན་ལས་བོད་ཡུལ་དུ་སྤེལ་མཁན་ཞིག་ཡིན་འདུག་ཅིང་། འདི་དག་གི་ཆོས་སྐོར་ཐུན་མོང་མ་ཡིན་པ་རྒྱ་ཆེར་སྤེལ་བ་དེས་བོད་ལ་གསང་སྔགས་རྡོ་རྗེ་ཐེག་པ་ཆེས་ཆེར་དར་བ་མཚོན་པ་དང་། དེ་དང་ལྷན་དུ་ལྷ་རྣམས་ཀྱི་སྣང་བརྙན་བྲིས་ འབུར་གཉིས་ཀྱིས་བཞེངས་པའི་སྤྲུལ་པའི་བཟོ་བོ་ཡང་མང་དུ་བྱུང་བས། འཛམ་གླིང་སྒྱུ་རྩལ་ལོ་རྒྱུས་སུ་ཤེས་རབ་དང་བྱམས་བརྩེ་ས་བོན་དུ་བྱས་པའི་སྒྱུ་རྩལ་བརྩམས་ཆོས་མང་པོ་ཞིག་ཀྱང་འཁྲུངས་པ་ཡིན་ནམ་སྙམ། དེ་བས་ན་ལོ་ཙཱ་བ་རྣམས་ཀྱིས་རང་རེའི་ཡུལ་ལ་ཆོས་གཞུང་གཅིག་པུ་ཙམ་མ་ཡིན་པར་རྩོམ་རིག་དང་། ཟློས་གར། གསོ་རིག །བཟོ་རིག་སོགས་རིག་ཚན་མི་འདྲ་བ་མང་པོ་ཞིག་གསར་དུ་སྤེལ་བ་ལ་སྐུ་དྲིན་བླ་ལྷག་ཏུ་ཆེའོ། །བོད་ཀྱི་ལོ་ཙཱ་བ་རྣམས་ཀྱི་བརྗེད་ཐོ་ལས་ཁག་བཅུ་གཉིས་པ་ལྷ་ཚོགས་སྟོང་གི་ཕོ་ཉ་ཞེས་པ་རང་ནུས་ཀྱིས་ཅུང་ཟད་བརྗོད་པ་རྫོགས་སོ། །

གསལ་བཤད། ཚན་ཆུང་འདིའི་སྐུ་པར་ཕལ་མོ་ཆེ་ནི་ཧི་མ་ལ་ཡའི་སྒྱུ་རྩལ་བང་མཛོད་ ཞེས་པའི་དྲ་ཚིགས་ལས་བླངས་པ་ཡིན།