བོད་ཀྱི་སྒྲུང་གཏམ་རྩོམ་པ་པོ་ཚེ་རྒྱལ།
སྙུག་མིང་ལ་རང་སྒྲ།༡༩༦༤ལོ་མདོ་སྨད་ཐུན་ཏེ་རྫོང་ཁོངས་འབའ་གཞུང་དུ་སྐྱེས།ད་ལྟ་མཚོ་སྔོན《མང་ཚོགས་སྒྱུ་རྩལ》གྱི་རྩོམ་སྒྲིག་པའི་འགན་ཁུར་ཡོད།ལོ་རབས་བརྒྱད་ཅུ་པ་ནས་བཟུང་སྟེ་གསར་རྩོམ་གྱི་ལས་ལ་ཞུགས་ཤིང༌།སྔ་ཕྱིར་བོད་ཁམས་ཀྱི་དུས་དེབ་སྣ་ཚོགས་སུ་སྒྲུང་གཏམ་གཙོ་བྱས་པའི་བརྩམས་ཆོས་སྣ་ཚོགས་སྤེལ་མྱོང༌།༡༩༩༩ལོར་མཚོ་སྔོན་མི་རིགས་དཔེ་སྐྲུན་ཁང་གིས་སྒྲུང་གཏམ་ཕྱོགས་བསྒྲིགས《གངས་འདབས་ཀྱི་གཏམ་རྒྱུད།》དང༌།ལོ་རྒྱུས་སྒྲུང་གཏམ་རིང་མོ《ཐོན་མི་སམྦྷོ་ཊ།》གཉིས་པར་དུ་བསྐྲུན།སྒྲུང་གཏམ《བྱི་ལའི་གཏམ་རྒྱུད།》དང༌།《འདྲེ་རྐང་ཏོ།》《ཚེ་ཐར་གྱི་རང་གཏམ།》《གངས་འདབས་ཀྱི་གཏམ་རྒྱུད།》སོགས་རྒྱ་ཡིག་ཏུ་བསྒྱུར་ཏེ《མི་རིགས་རྩོམ་རིག》སོགས་སུ་སྤེལ་ཡོད་ལ།《འཕོ་འགྱུར།》དང《འདྲེ་རྐང་ཏོ།》རྒྱང་སྒྲོག་ཟློས་གར་དུ་བཅོས་ཏེ་མཚོ་སྔོན་མི་དམངས་ཀུན་ཁྱབ་རླུང་འཕྲིན་ནས་བརྒྱུད་གཏོང་བྱས།
སྙན་རྩོམ《ཁྲི་ཤོར་རྒྱལ་མོ།》དང《ཟླ་བའི་རི་བོང་གི་བྱུང་བ།》སྒྲུང་གཏམ《འཕོ་འགྱུར།》《འདྲེ་རྐང་ཏོ།》སོགས་བོད་ཀྱི་དེང་རབས་རྩོམ་རིག་དཔེ་ཚོགས་ལས《ལང་ཚོའི་རྦབ་ཆུ།》དང༌།《སྦྲང་ཆར་ལོ་འཁོར་༢༠དཔེ་ཚོགས།》 ལས《སྙན་རྩོམ་ཅོ་ཀའི་དྲུག་འགྱུར།》དང《སྒྲུང་གཏམ་རླབས་ཀྱི་ཟེགས་མ།》གཞན་ཡང《མཚོ་སྔོན་པོའི་གླུ་སྒྲ》སོགས་སུ་བདམས་ཡོད།སྒྲུང་གཏམ《འཕོ་འགྱུར།》ལ་༢༠༠༡ལོར་སྐབས་གསུམ་པའི་སྦྲང་ཆར་རྩོམ་རིག་བྱ་དགའ་ཐོབ།
ད་ལྟ་མཚོ་སྔོན་ཞིང་ཆེན་རྩོམ་པ་པོའི་མཐུན་ཚོགས་ཀྱི་ཚོགས་མི་དང༌།མཚོ་སྔོན་ཞིང་ཆེན་ལོ་ཙཱ་མཐུན་ཚོགས་ཀྱི་ཚོགས་མི།མཚོ་སྔོན་དམངས་ཁྲོད་རིག་རྩལ་མཐུན་ཚོགས་ཀྱི་ཚོགས་མི་བཅས་ཡིན་ནོ།།