༄༅།།ཨ་ཁུ་བློན་ཚང་བསྟན་ཁོ་ཚང་གི་ཡིག་གཟུགས་བརྩམས་ཆོས་སྐོར་ཞིག་ལ་རོལ་མྱོང་ཞུ་རོགས།

རྩོམ་པ་པོ་ངོ་སྤྲོད་རགས་བསྡུས།

       བློན་ཚང་བསྟན་ཁོ་ནི། སྤྱི་ལོ༡༩༩༠ ལོར་རྔ་བ་རུ་སྐྱེས། སྤྱི་ལོ༡༩༩༩ ལོར་མདོ་སྨད་སྣང་ཞིག་དགོན་ཆེན་གྱི་ཚོགས་གྲལ་དུ་ཞུགས་ཤིང་སྣང་ཞིག་སྐྱབས་མགོན་རིན་པོ་ཆེ་མཆོག་དང་རྒྱལ་ཚབ་བསྟན་འཛིན་དབང་རྒྱལ་རྣམས་གཉིས་ཀྱི་གཙོས་པའི་མཁན་སློབ་དཔང་པོ་བཞི་འདུས་ཀྱི་དྲུང་ནས་གཙང་མ་གཙུག་ཕུད་ཀྱི་སྡོམ་ཁྲིམས་བཞེས་ཏེ་རབ་ཏུ་བྱུང་།  དེ་ནས་རིམ་བཞིན་ཁུ་བོ་ལྷུན་གྲུབ་རྒྱ་མཚོ་མཆོག་དང་།   དགེན་གཙུག་ཕུད་འོད་ཟེར།  སྤྲེའུ་བཙུན་ཀུན་བཟང་ལྷུན་གྲུབ།  ཞང་ཞུང་བློ་གྲོས་ཉི་མ་སོགས་བཤེས་གཉེན་དུ་བསྟེན་ནས་རིག་གནས་ཀུན་གྱི་གཞི་མ་འཕྲུལ་ཆེན་ཡི་གེ་བཞི་བཅུའི་ཡིག་རིས་དངོས་འཛིན་ཚུལ་དང་ཕྱི་ནང་གསང་གསུམ་གྱི་ཆོ་ག་ཆེ་ཆུང་།  ཡིག་གཟུགས་དང་སུམ་དག་རྟགས་གསུམ། སྙན་ངག་ལོ་རྒྱུས་སྐར་རྩིས་སོགས་རིག་གནས་ཀྱི་སྐོར་ལ་སྦྱང་པ་མི་དམན་པ་བྱས་ཤིང་། སྤྱི་ལོ༢༠༡༤ལོ་ནས་ལོ་གཉིས་ཀྱི་རིང་ལ་བཤད་སྒྲུབ་སློབ་གླིང་དུ་ཡིག་གཟུགས་དང་རྨང་གཞི་སོགས་གསབ་ཁྲིད་དགེ་རྒན་གྱི་འགན་བཞེས་ཤིང་།  སྤྱི་ལོ༢༠༡༧ལོར་དམིགས་བསལ་གྱིས་འཛིན་ཁག་མི་འདྲ་བ་གསུམ་ལ་སློབ་གཙོ་དང་དགེ་རྒན་རྣམས་ཀྱི་རེ་འདོད་བཞིན་བཤད་སྒྲུབ་སློབ་གླིང་གཞུང་ངོས་ནས་ཡིག་གཟུགས་གསབ་ཁྲིད་བྱས།  ལོ་དེར་བོད་ལྗོངས་རླུང་འཕྲིན་ཁང་དུ་འཚམས་སྦྱོར་བྱས་པ་དང་།  སྤྱི་ལོ༢༠༡༧ལོར་རྔ་བ་ཁུལ་སྐབས་གཉིས་པའི་བོད་ཡིག་ཡིག་གཟུགས་རྒྱུ་ཆ་བེད་སྤྱོད་ཀྱི་གསོ་སྦྱོང་འཛིན་གྲྭར་དངོས་ཞུགས་བྱས།  སྤྱི་ལོ༢༠༡༨ལོའི་དགུན་ཁ་བོད་བཙན་རིག་གནས་ཚད་ཡོད་སྤྱི་གཉེར་ཁང་གི་སྒོ་འབྱེད་དུས་ཚུགས་སུ་གདན་ཞུས་བྱས་ཏེ་ཞང་བོད་ཀྱི་ཡིག་རིས་དུ་མའི་མཛེས་པ་ངོམས།  ལོ་དེའི་དཔྱིད་ཀར་ཀན་ལྷོ་བོད་རིགས་རང་སྐྱོང་ཁུལ་གྱི་ཡིག་མཁན་ལྷན་ཚོགས་རྔ་བར་ཕེབས་ཏེ་ཕྱོགས་གཉིས་ཀྱིས་མཛའ་འབྲེལ་དང་རྒྱུས་ལོན་ཟབ་མོ་བྱས་ཏེ་སྔར་ལས་མིག་རྒྱང་རིང་བོར་བསྟན།   ལོ་དེའི་དབྱར་ཁ་དཀར་མཛེས་ཁུལ་གྱི་བོན་དགོན་ཞིག་གི་ལྷ་ཁང་གསར་བཟོའི་སྐབས་དང་བསྟུན་ནས་ལྷ་ཁང་དེའི་ནང་དུ་ཤང་བསྐོས་བྱེད་པའི་མ་ཡིག་རྟག་གཟིགས་ཀྱི་ཡི་གེ་སྤུངས་སོ་ཆེ་བའི་ལམ་ནས་ཞང་ཞུང་སྙན་རྒྱུད་ཨ་གསལ་གྱི་གཞུང་འབྲི་བཞེངས་བྱས། ལོ་དེའི་ནང་དུ་ཞིང་ཆེན་ལྔས་མཉམ་འབྲེལ་གྱི་ཡིག་གཟུགས་འགྲེམ་སྟོན་དུ་ཁོ་བོའི་ཡིག་གཟུགས་གདམས་ཐོན་བྱུང་བ་དང་།   སྤྱི་ལོ༢༠༡༩ལོར་རྔ་བ་རྫོང་མི་རིགས་བཅའ་སྡོད་སློབ་ཆུང་གསུམ་པའི་ཡིག་གཟུགས་འགྲན་སྡུར་ཁྲོད་གདན་ཞུའི་དཔྱད་འདེམས་པའི་འགན་ཁུར་བ་དང་།  ལོ་དེའི་ཟླ་བ་བཞི་བའི་ནང་ཀན་ལྷོ་བོད་རིགས་རང་སྐྱོང་ཁུལ་ཀླུ་ཆུ་རྫོང་གི་ངོས་མིན་ཤུལ་བཞག་ཡིག་གཟུགས་འགྲེམ་སྟོན་ཁང་དུ་དེ་གའི་འབྲེལ་ཡོད་ཀྱི་མི་སྣ་དག་གིས་རེ་ཞུས་ལྟར་ཡིག་གཟུགས་ཁ་ཤས་འགྲེམ་སྟོན་དུ་ཕུལ།  སྤྱི་ལོ༢༠༡༩ལོར་སི་ཁྲོན་ཞིང་ཆེན་སྣང་བསྟན་མཐུན་ཚོགས་ཀྱི་རྩ་འཛུག་བྱས་པའི་ཡིག་གཟུགས་འགྲེམ་སྟོན་དུ་རེ་ཞུས་ལྟར་ཡིག་གཟུགས་ཁ་ཤས་འགྲེམ་སྟོན་དུ་ཕུལ།  ལོ་དེའི་ནང་དུ་ཀྲུང་གོ་རྒྱལ་སྤྱིའི་ནང་བསྟན་མཐུན་ཚོགས་ཀྱི་ཡིག་གཟུགས་འགྲེམ་སྟོན་དུའང་ཡིག་གཟུགས་ཁ་ཤས་འགྲེམ་སྟོན་དུ་ཕུལ།   སྤྱི་ལོ༢༠༡༩ལོའི་དབྱར་ཁ་མདོ་སྨད་ཟུང་ཆུའི་ཡུལ་ནས་སྣང་ཞིག་དགོན་དུ་ཡིག་གཟུགས་དགེ་རྒན་དུ་གདན་འདྲེན་ཞུས་པ་ལྟར་ཡིག་རིས་མི་འདྲ་བ་སྐོར་ཅིག་གསབ་ཁྲིད་བྱས།   ༢༠༡༩ལོར་ཁམས་ལི་ཐང་དུ་ན་རོའི་ཁྱིམ་གྱི་རིག་རྩལ་བྱེད་སྒོའི་སྐབས་ཀྱི་ཡིག་གཟུགས་འགྲན་སྡུར་ཁྲོད་དཔྱད་འདེམས་མི་སྣ་རུ་གདན་ཞུ་བྱས་པའི་སྐབས་དང་བསྟུན་དཀར་མཛེས་གསེར་བྲིས་ཁང་དུ་བྱིན་ནས་བྲིས་རྒྱུན་སྐོར་ནས་བསམ་བློ་བརྗེ་རེས་ལེགས་པར་མཛད།  ལོ་དེ་དག་གི་སྔ་གཞུགས་སུ་ཚགས་པར་དང་དུས་དེབ་དྲ་ཚུགས་སོགས་སུ་སྙན་རྩོམ་དང་དཔྱད་རྩོམ་ཡིག་རིས་དང་ལོ་རྒྱུས་སོགས་མང་པོ་བཀོད་ཡོད་པར་མ་ཟད།  ཁོང་གིས་བརྩམས་པའི་གཞས་ཚིག་མང་པོ་ཞིག་ཀྱང་བོད་ཀྱི་གཞས་པ་གཞས་མ་གྲགས་ཅན་མི་ཉུང་བ་ཞིག་གིས་དབྱངས་སུ་གྱེར་ནས་ཆེད་སྒྲིག་དང་དྲྭ་སྟེགས་སོ་སོར་འགྲེམ་སྤེལ་བྱས་ཏེ་གཞན་ཕན་གྱི་ཕྱག་ལས་བསྐྱངས་དང་སྐྱོང་བཞིན་པ་ལགས་སོ།།