གཞོན་སྐྱེས་བྲིས་པ་ཐ་སྐྱེས་སྒྲོལ་དོན་གྱི་གསར་བྲིས་ཡིག་གཟུགས་བརྩམས་ཆོས།

       སྒྲོལ་མ་དོན་གྲུབ། པུར་མིང་ལ་ཐ་སྐྱེས་ཟེར། མཚོ་སྔོན་མང་རྫོང་དུ་སྐྱེས། མཚོ་སྔོན་དགེ་འོས་སློབ་ཆེན་ནས་སློབ་མཐར་ཕྱིན། ད་ལྟ་བྲག་དཀར་རྫོང་མི་རིགས་སློབ་འབྲིང་དང་པོར་དགེ་རྒན་གྱི་ལས་ཀ་གཉེར་བཞིན་ཡོད། མཚོ་སྔོན་ཞིང་ཆེན་བོད་ཡིག་ཡིག་གཟུགས་རྒྱུན་འཛིན་དར་སྤེལ་ཞིབ་འཇུག་ཚོགས་པའི་ཚོགས་མི་དང་། མཚོ་སྔོན་ཞིང་ཆེན་སྲ་སྙུག་ཡིག་མཁན་མཐུན་ཚོགས་ཀྱི་ཚོགས་མི། མང་རྫོང་ཡིག་རིས་པར་ལེན་མཐུན་ཚོགས་ཀྱི་ཚོགས་མི་བཅས་ཡིན། མཚོ་སྔོན་ཞིང་ཆེན་གྱི་སྐབས་དང་པོའི་༼ཐོན་མིའི་ཡིག་རྒྱུན་༽ཡིག་གཟུགས་གསོ་སྦྱོང་འཛིན་གྲྭར་ཞུགས་ནས་བོད་ཡིག་གི་བྲིས་རྒྱུན་མི་འདྲ་བ་བརྒྱད་ལ་གྲུབ་འབྲས་གང་འཚམ་བླངས་ཤིང་། སློབ་ཆེན་སློབ་མཐར་ཕྱིན་ཁར་མཚོ་སྔོན་དགེ་འོས་སློབ་ཆེན་གྱི་སློབ་ཁུལ་གསར་བ་རུ་མི་སྒེར་གྱི་ཡིག་གཟུགས་བརྩམས་ཆོས་འགྲེམ་སྟོན་ཞིག་ཀྱང་གཟབ་རྒྱས་ངང་སྤེལ། ད་ལྟ་བྲག་དཀར་རྫོང་མི་རིགས་སློབ་འབྲིང་དང་པོ་རུ་ཆེད་ལས་སློབ་ཁྲིད་ཀྱི་བྱ་བའི་ཞོར་དུ་བོད་ཡིག་ལེགས་བྲིས་ཁང་གི་ཡིག་གཟུགས་དགེ་རྒན་གྱི་འགན་འཁུར་བཞིན་ཡོད།