སི་ཁྲོན་གསེར་རྟ་རྫོང་ཡང་འགོ་ཡུལ་ཚོའི་དབུ་ཚབ་དགོན་པའི་བསྐྱར་སྐྲུན་རབ་གནས་ཀྱི་མཛད་སྒོ་བསྡུས།

གསེར་རྟ་རྫོང་དབུ་ཚབ་དགོན་པ།

         ཟླ10བའི་ཚེས1ཉིན། སི་ཁྲོན་གསེར་རྟ་རྫོང་ཡང་འགོ་ཡུལ་ཚོའི་དབུ་ཚབ་དགོན་པ་བསྐྱར་བཞེངས་ལེགས་འགྲུབ་ཀྱི་རབ་གནས་མཛད་སྒོ་བསྡུས། ཚེས1ནས3བར་རབ་གནས་ཀྱི་ཆོ་ག་བྱས། ཚེས་བཞི་ལྔ་གཉིས་ལ་བསྐྱར་བཞེངས་ལེགས་འགྲུབ་ཀྱི་འགྲུབ་སྟོན་མཛད་སྒོ་བསྡུས།
         དབུ་ཚབ་དགོན་པ་ནི་སི་ཁྲོན་ཞིང་ཆེན་གསེར་རྟ་རྫོང་གི་ཤར་ལྷོའི་ཕྱོགས་སུ་ཆགས་ཤིང་། གསེར་རྟ་རྫོང་དང་སྤྱི་ལེ69ཡི་བར་དུ་ཡོད་པ་དང་། དེ་ནི་དཔལ་རྙིང་མ་བའི་གྲུབ་མཐའི་དགོན་པ་ཞིག་ཡིན་ལ། ད་ལྟའི་བར་ལོ་ངོ900ལྷག་གི་ལོ་རྒྱུས་ལྡན། མ་ཟད་དེ་ནི་གསེར་རྟ་ཡུལ་ཕྱོགས་ཀྱི་དགོན་པའི་ཆེས་ཐོག་མ་དེ་ཡིན་པས་ཡུལ་དེར་སྟོད་དབུ་ཀྱི་ཚབ་ལྟ་བུ་ཡིན་པའི་ན་དབུ་ཚབ་ཞེས་གྲགས།  དུས་ཡུན་རིང་བོའི་ལོ་རྒྱུས་ཀྱི་འགྱུར་ལྡོག་ཆེན་པོའི་ཁྲོད་དགོན་པ་འདི་སྔ་གཞུག་ཏུ་ཀཿཐོག་པ་དང་དཔལ་ཡུལ་བས་ཆོས་བརྒྱུད་འཛིན་སྐྱོང་སྤེལ་གསུམ་བྱེད་པའི་དགོན་ཆེན་ཞིག་དུ་གྱུར།  ལྷ་ནོར་དགེ་འདུན་རྒྱ་མཚོ་སྐུ་ཕྲེང་དང་པོ་ནས་སྐུ་ཕྲེང་བཅུ་བཞི་བའི་བར་གཙོ་བོ་ཀཿཐོག་པས་རྒྱུན་འཛིན་བྱེད་པ་དང་། ཡང་སྐུ་ཕྲེང་བཅུ་བཞི་བའི་སྐབས་སུ་བོད་ལ་སོག་དམག་གིས་བཙན་འཛུལ་བྱེད་སྐབས་དགོན་པ་འདིར་གཏོར་བརླག་ཚབས་ཆེན་ཐེབས་ལ། རྗེས་ནས་ལྷ་རྩེ་ཡེ་ཤེས་སེང་གེ་དབུ་ཚབ་དགོན་དུ་ཕེབས་ཏེ་དགོན་པ་འདི་བསྐྱར་བསྐྲུན་མཛད་པ་མ་ཟད། དེར་ཆོས་ལུགས་ཀྱི་འགྲོ་དོན་རྒྱ་ཆེར་སྤེལ་ལ། དེ་ནས་བཟུང་དབུ་ས་དགོན་འདི་སྔར་གྱི་རྙིང་མའི་གྲུབ་མཐའི་ཀཿཐོག་པ་ནས་དཔལ་ཡུལ་བར་བསྒྱུར།

གསེར་རྟ་རྫོང་དབུ་ཚབ་དགོན་པ་བསྐྱར་སྐྲུན་རབ་གནས་ཀྱི་མཛད་སྒོ།

         དུས་རབས་སྔོན་མའི་ལོ་རབས་བརྒྱད་ཅུའི་རྗེས་ནས་བཟུང་དགོན་པ་འདིར་འདུ་ཁང་རྙིང་བ་ཞིག་དང་གྲྭ་ཤག་འགའ་ལས་མེད་ཅིང་། ཡང་ས་གནས་མང་ཚོགས་ཀྱིས་འབད་པ་ཆེན་པོས་ཡར་ཞུ་བྱས་པར་བརྟེན་འབྲེལ་ཡོད་སྡེ་ཁག་གི་ཆོག་མཆན་ཐོབ་སྟེ་ད་ལྟའི་སྐུ་ཕྲེང་ཉེར་ལྔ་བ་ཐུབ་བསྟན་ཆོས་ཀྱི་ཉི་མ་རིན་པོ་ཆེས2005ལོ་ནས་བཟུང་དགོན་པ་བསྐྱར་སྐྲུན་གྱི་མགོ་བརྩམས་ཏེ་དུས་ཡུན་ལོ7སྤྱད་ཐོག2012ལོར་བསྐྱར་སྐྲུན་ལས་གཞིའི80%ལེགས་འགྲུབ་བྱུང་། བསྐྱར་བསྐྲུན་བྱས་ཟིན་པའི་ལས་གཞིར་འདུ་ཁང་ཆེན་མོ་དང་།  བཤད་གྲྭ།  སྒྲུབ་གྲྭ། མགོན་ཁང་སོགས་ཡོད།