༄༅།། བསམ་ཡས་གཙུག་ལག་ཁང་།
བསམ་ཡས་གཙུག་ལག་ཁང་མཚན་རྒྱས་པར་འབོད་ན་དཔལ་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཞེས་གྲགས་ལ་གཙུག་ལག་ཁང་དེ་ཉིད་བཀོད་པ་མཛེས་ཤིང་ལྟ་ན་སྡུག་པ།ལྟ་བས་ཆོག་མི་ཤེས་པ།བསམ་ཡུལ་ལས་འདས་པ་(ཡས་པ་)ཞིག་བྱུང་བས་བསམ་ཡས་ཞེས་མཚན་དུ་ཐོགས་ཀྱང་རུང་བར་གསུངས།གཙུག་ལག་ཁང་འདི་ནི་བོད་ལྗོངས་གནས་རི་བཞི་ཡི་ཡ་གྱལ་ཧས་པོ་རི་ཡི་འདབས་ཤིག་ན་གནས་ཤིང་།དེ་ནི་སྤྱི་ལོའི་དུས་རབས་བརྒྱད་པའི་དུས་དཀྱིལ་དུ་ཆོས་རྒྱལ་ཁྲི་སྲོང་ལྡེ་བཙན་གྱིས་ཟ་ཧོར་གྱི་གདུང་ལས་བལྟམས་པའི་མཁན་ཆེན་བྷོ་དྷི་ས་ཏྭ་དང་།ཨོ་རྒྱན་གྱི་སློབ་དཔོན་པདྨ་འབྱུང་གནས་བོད་དུ་གདན་དྲངས་རྗེས་སློབ་དཔོན་གྱིས་ས་དཔྱད་བརྟགས་ནས་ཆུ་ཕོ་སྟག་སྤྱི་ལོ་༧༦༢ལ་རྨང་བཏིངས་ཏེ་ལོ་གསུམ་ལ་རྫོགས་པར་གྲུབ།དེའི་དུས་སུ་བོད་དུ་ནང་པ་སངས་རྒྱས་པའི་ཆོས་ལུགས་བོན་པོ་ལས་རྣམ་པར་རྒྱལ་བ་དང་།ཕྱོགས་མཚུངས་བཙན་པོས་ཀྱང་རྒྱབ་སྐྱོར་ཤུགས་ཆེན་གནང་བར་བརྟེན་སངས་རྒྱས་ཀྱི་བསྟན་པ་ཉི་མ་ཤར་བ་བཞིན་དར་ནས་སད་མི་བདུན་རབ་ཏུ་བྱུང་བ་དང་།བོད་དུ་ནང་པ་སངས་རྒྱས་པའི་གཙུག་ལག་ཁང་དང་པོ་འདི་ཡང་བཞེངས།གཙུག་ལག་ཁང་འདི་ཐོག་བརྩེགས་རིམ་པ་གསུམ་དང་ལྡན་ཞིང་།མཐའ་བཞི་ལྕགས་རིས་བསྐོར་ལ་གླིང་བཞི་གླིང་ཕྲན་གྱིས་བརྒྱན་པ་སྟེ།ཤར་གྱི་གླིང་དུ།སད་མི་བདུན་རབ་ཏུ་བྱུང་གནས་རྣམ་དག་ཁྲིམས་ཁང་གླིང་དང་།ཆོས་དཔྱད་བྱ་ཡུལ་མཁྱེན་རབ་འཇམ་དཔལ་གླིང་།བརྡ་སློབ་ཁང་བརྡ་སྦྱོར་ཚང་མང་གླིང་།ལྷོ་ཡི་གླིང་དུ།སྔགས་ཀྱི་སྲི་གཏད་མནན་ཁང་བདུད་འདུལ་སྔགས་པ་གླིང་།བཙན་པོའི་རྟ་མགྲིན་སྒྲུབ་གནས་ཨརྱ་པ་ལོའི་གླིང་།ཆོས་སྒྱུར་ཁང་སྒྲ་སྒྱུར་རྒྱ་གར་གླིང་།ནུབ་ཀྱི་གླིང་དུ།བཻ་རོ་ཙཱ་ན་བཞུགས་ཡུལ་བཻ་རོ་ཙཱ་ནའི་གླིང་།མ་འོངས་ལུང་བསྟན་ཁང་བྱམས་པ་གླིང་།བསམ་གཏན་སྒོམ་ཁང་བསམ་གཏན་གླིང་།བྱང་གི་གླིང་དུ།རིན་ཆེན་གཏེར་མཛོད་ཁང་རིན་ཆེན་སྣ་ཚོགས་གླིང་།བྱང་ཆུབ་སེམས་བསྐྱེད་གནས་བྱང་ཆུབ་སེམས་བསྐྱེད་གླིང་།མཛོད་ཁང་པད་དཀར་དཀར་མཛོད་གླིང་སོགས་སོ།
གཙུག་ལག་ཁང་འདིའི་བཟོ་སྐྲུན་གྱི་བཀོད་པ་ཐུན་མོང་མ་ཡིན་པ་ཞིག་ཡོད་པ་ནི་བོད་ཆོས་ལ་དད་པ་རྣམས་དགའ་བ་སྐྱེ་བའི་ཕྱིར་འོག་ཁང་བོད་ལུགས་དང་།ཞང་པོ་རྒྱ་ཡིན་པས་བར་ཁང་རྒྱ་ལུགས།ཆོས་ཀྱི་འབྱུང་གནས་རྒྱ་གར་ཡིན་པས་སྟེང་ཁང་རྒྱ་གར་ལུགས་བཅས་ལུགས་གསུམ་གྱི་ཁྱད་ཆོས་ཚང་བ་བྱས་ཡོད།འོག་ཁང་རྣམ་དག་སྒོ་གསུམ་དུ་འདུ་ཁང་ཀ་བ་བཅོ་བརྒྱད་ཀྱི་རྒྱ་ཁྱོན་དུ་རྟེན་གཙོ་གུ་རུ་ང་འདྲ་མ་དང་།གཙོ་བོའི་གཡས་གཡོན་དུ་མཁན་སློབ་ཆོས་གསུམ་དང་།བཻ་རོ་ཙཱ་ན།གཡས་སུ་ཇོ་རྔོག་འབྲོམ་གསུམ་དང་འཇམ་དབྱངས་རྣམ་གསུམ་སོགས་ཀྱི་སྐུ་བཪྙན་བཞུགས།གཙང་ཁང་དབུས་མའི་རྟེན་གཙོ་རྡོ་སྐུ་རང་བྱོན་ཇོ་བོ་བྱང་ཆུབ་ཆེན་མོ་དང་།དེའི་གཡས་སུ་ནམ་མཁའི་སྙིང་པོ།བྱམས་པ།སྤྱན་རས་གཟིགས་སའི་སྙིང་པོ།དགའ་བའི་དཔལ།ཁྲོ་བོ་ཁམས་གསུམ་རྣམ་རྒྱལ་དང་དྲུག་གོ།གཡོན་དུ་བྱང་ཆུབ་སེམས་དཔའ་ཀུན་ཏུ་བཟང་པོ།ཕག་རྡོར།འཇམ་དབྱངས་།སྒྲིབ་པ་རྣམ་སེལ།དགེ་བསྙེན་ཆེན་པོ་དྲི་མ་མེད་པ་དང་།ཁྲོ་བོ་མི་གཡོ་བ།དམར་པོ་གཙོ་འཁོར་བཅུ་གསུམ།གསང་འདུས་ཡེ་ཤེས་ཞབས་ལུགས་ལ་ལྷ་བཅུ་དགུ་ཡོད་པ་ལས་དྲུག་མ་ཤོང་ནས་བྱང་ཆུབ་ཆེན་པོའི་རྒྱབ་ཏུ་གྱང་ལོགས་ལ་བྲིས་པ་སོགས་རྟེན་བྱིན་ཅན་མང་པོ་བཞུགས། བར་ཁང་གཡུ་ཞལ་མཐིལ་རྒྱ་ཁྱོན་ཀ་བ་ཉི་ཤུའི་ས།རྟེན་གཙོ་མཁན་སློབ་ཆོས་གསུམ་དང་།སྐུ་རྒྱུ་ཀོ་བ་ལས་བཞེངས་པའི་གཙོ་བོ་རྣམ་པར་སྣང་མཛད།དེའི་གཡོན་དུ་མ་འོངས་པའི་སངས་རྒྱས་རྒྱལ་བ་བྱམས་པ་མགོན་པོ་སྐུ་བཞེངས་སྟབས་སུ་བཞུགས་པ་སོགས་ཀྱིས་གཙོས་སྐུ་བཪྙན་མང་དུ་བཞུགས།སྟེང་ཁང་དུ་སྐུ་རྒྱུ་རས་འདམ་ལས་བཞེངས་པའི་སངས་རྒྱས་རྣམ་པར་སྣང་མཛད་ཀུན་ཏུ་རིག་པ་རིགས་ལྔ་དང་།ཉེ་སྲས་བརྒྱད།བྱང་ཆུབ་སེམས་དཔའ་རྡོ་རྗེ་རྒྱལ་པོ་སོགས་སངས་རྒྱས་བྱང་སེམས་ཀྱི་སྐུ་བཪྙན་མང་པོ་བཞུགས་ལྷ་ཁང་དེ་དག་གི་སྐྱ་ལྡེབས་སུ་མདོ་སྡེ་ལས་བྱུང་བའི་རྟོགས་བརྗོད་དང་།སངས་རྒྱས་བྱང་སེམས་ཡི་དམ་ཆོས་སྐྱོང་སྲུང་མའི་རྒྱུད་རིས་ཚར་དུ་དངར་བ་བྲིས་ཡོད་ལ་ཐོག་སྟེང་དུ་གཉྫི་ར་གསེར་ལ་ཤེལ་གྱི་ཏོག་ཅན་བཙུགས་ཡོད། གཞན་ཡང་གཙུག་ལག་ཁང་འདིའི་ཕྱོགས་བཞིར་ཁ་དོག་མི་གཅིག་པའི་མཆོད་རྟེན་ཆེན་པོ་བཞི་ཡོད་པ་སྟེ།བྱང་ཤར་མཚམས་སུ་རྒྱུ་བོད་རྫ་ལས་གྲུབ་པའི་མཆོད་རྟེན་སྔོན་པོ་ཐོག་བརྩེགས་བདུན་ཙམ་ལྡན་པ་ཞིག་གནས།མཆོད་རྟེན་དེ་ནི་ཆོས་ཀྱི་འཁོར་ལོ་དེ་བཞིན་གཤེགས་པའི་ལུགས་སྒོ་བཅུ་དྲུག་གིས་བརྒྱན་པ།ཁྲི་དཔངས་མཐོ་བ།མཆོད་རྟེན་གྱི་བང་རིམ་གཉིས་པའི་ཕྱོགས་བཞིར་ལྷ་ཁང་གསུམ་རེ་དང་།མཆོད་རྟེན་གྱི་བུམ་པའི་ཐོག་ཕྱོགས་བཞིར་ལྷ་ཁང་གསུམ་རེ་དང་།མཆོད་རྟེན་གྱི་བང་རིམ་གཉིས་པའི་ཕྱོགས་བཞིར་ལྷ་ཁང་རེ།བུམ་པའི་སྟེང་དུ་ཆོས་འཁོར་བཅུ་གསུམ།དེའི་རྩེ་མོར་ནོར་བུའི་ཏོག་གིས་མཛེས་པར་བྱས་ཤིང་དེ་ནས་ཕྱོགས་བཞིར
