༄༅།།གར་རི་དགོན་པ།
རྩོམ་པ་པོ།:མི་གསལ།
ཡོང་ཁུངས།:མཚོ་སྔོན་པོ་དྲ་བ།
དུས་ཚོད།:2020-06-08
ཀློག་གྲངས།:
གར་རི་དགོན་པ་་ནི་ལྷ་ས་གྲོང་ཁྱེར་ཉང་བྲན་ཕུར་གནས་ཡོད་ཅིང་། ཡུལ་དེར་ས་དཔྱད་ཕུན་སུམ་ཚོགས་པོ་ཡོད་པ་སྟེ། དད་ལྡན་རྣམས་ཀྱིས་བཞེད་སྲོལ་དུ་རྒྱབ་རི་སྒྲོལ་མ་རང་བྱོན། ཤར་རི་འཇམ་དབྱངས་ཀྱི་བླ་རི། འོག་གི་རི་བོ་གནས་རྟེན་བྲག་རི། ནུབ་རི་བདེ་མཆོག་ཕོ་བྲང་བྲག་ལ་སྒོ་ཡོད་པ། རི་ཆུ་རྩི་ཤིང་མེ་ཏོག་སོགས་ཀྱིས་མཛེས་ཤིང་ཉམས་དགའ་བ། མེ་ཏོག་པད་མ་བཞད་པ་ལྟ་བུའི་དབུས་སུ་དགོན་པ་ཕྲ་ཆེམ་མེར་གནས་ཡོད། དེ་ཡང་སྤྱི་ལོའི་དུས་རབས་བཅུ་གཉིས་པའི་ནང་རྒྱ་གར་གྱི་གྲུབ་ཆེན་ཕ་དམ་པ་སངས་རྒྱས་གནས་དེར་ཕེབས་པའི་སྐབས། མཁའ་འགྲོས་གར་འཁྲབ་ནས་བསུ་བ་ལྟ་བུ་གཟིགས་པས། དགོངས་པར་མོ་དགོན་ཞིག་བཞེངས་ན་ལེགས་པའི་བརྡ་མཁྱེན་ནས། བཙུན་མོའི་དགོན་པ་ཐོག་མར་ཕྱག་བཏབ་དགོན་མིང་གར་དགོན་ཞེས་མིང་བཏགས། ཕ་དམ་པ་གནས་དེར་ཕེབས་སྐབས་སྐུ་ངལ་བྱུང་ནས་ཞལ་སྐྱེམས་པ་དང་། ཡིད་ལ་ཡུམ་ལྷང་ལྷང་དྲན་པས་ན་བྲག་གི་འགྲམ་ནས་བ་དཀར་མོ་ཞིག་ཐོན་ཏེ། འོ་ཕུད་ཕུལ་བས་ཨ་མ་ཞེས་གསུང་ཤོར་ནས། བྲག་དེ་ལ་ཨ་ཡིག་རང་བྱོན་འཁྲུངས་པ་མཇལ་རྒྱུ་ཡོད་པ་དང་། བྲག་དེ་ལ་ཨ་མ་བྲག་ཟེར་བ་དང་། དགོན་གྱི་རྒྱབ་ཏུ་ཕ་ལྦང་དང་རུས་སྦལ་རང་བྱོན་སོགས་མཇལ་རྒྱུ་ཡོད་པའི་གནས་བཤད་ཤིན་ཏུ་མང་། དགོན་པ་དེའི་གྲུབ་མཐའ་ཐོག་མར་ཕ་དམ་པ་སངས་རྒྱས་ཀྱིས་གསར་གཏོད་མཛད་པའི་ཞི་བྱེད་ཡིན། སྤྱི་ལོའི་དུས་རབས་བཅོ་བརྒྱད་པའི་ནང་དགེ་ལུགས་སུ་བསྒྱུར་ནས་ཕ་བོང་ཁའི་མཁན་པོ་རྒྱ་མཚོ་མཐའ་ཡས་མཆོག་གིས་འཛིན་སྐྱོང་གནང་ནས་སྐུ་ཕྲེང་རིམ་བྱོན་གྱིས་དར་རྒྱས་སུ་མཛད། སྔར་དགོན་པའི་རྟེན་གཙོར་ཕ་དམ་པ་སངས་རྒྱས་ཀྱི་སྐུ་ཛྷི་ཀྴམ་ལས་གྲུབ་པའི་བྱིན་ཅན་དང་ཨ་མདོ་ནས་གདན་དྲངས་པའི་རྗེ་ཙོང་ཁ་པ་ཆེན་པོའི་འཁྲུངས་རབས་སྐུ་ཐང་ངོ་གྲངས་བཅུ་དྲུག་རིན་པོ་ཆེ་སྣ་ཚོགས་ཀྱིས་བརྒྱན་པའི་ཐུགས་རྗེ་ཆེན་པོ་ཕྱག་སྟོང་སྤྱན་སྟོང་ཐོག་གཅིག གསེར་ཟངས་ཀྱི་བྲག་རི་སྐུ་འཕྲེང་དང་པོ་རྒྱ་མཚོ་མཐའ་ཡས་ཀྱི་སྐུ་འདྲ། དེ་མིན་སྨན་ལྷ་བདེ་གཤེགས་བརྒྱད་དང་། ཤ་ལིའི་མཆོད་རྟེན། གསེར་བྲིས་ཀྱི་བརྒྱད་སྟོང་། བཀའ་འགྱུར་སོགས་པོད་མང་པོ་བཞུགས་པར་གྲགས། དགོན་དེའི་རྒྱ་ཁྱོན་ནི་འདུ་ཁང་ཀ་བ་བཅུ་གཉིས་དང་སྟེང་དབུས་སུ་བྲག་རི་རྡོ་རྗེ་འཆང་གི་གཟིམ་ཆུང་ཀ་གཅིག་མ། ཤག་སྒོར། རུང་ཁང་ཀ་བཞི་མ། གཉེར་ཁང་ཀ་གཅིག་སོགས་ཡོད། བོད་རབ་བྱུང་བཅུ་དྲུག་ས་ཕག་ལོ་སྤྱི་ལོ་༡༩༥༩ལོར་བཙུན་མ་ཞལ་གྲངས་བརྒྱ་བཅུ་ལྷག་ཡོད་པ་དང་། དགོན་བདག་བྲག་རི་བླ་བྲང་ནས་བྱེད།
འབྲེལ་ཡོད་འོས་སྦྱོར།