༄༅།།མདོ་སྨད་ཁྲི་ཀའི་རི་ཁྲོད་པའི་སྡེ།

      མདོ་སྨད་ཁྲི་ཀའི་རི་ཁྲོད་པའི་སྡེ་ཞེས་ཡོངས་སུ་གྲགས་པ་འདི་ཉིད་ནི། རི་ཁྲོད་དབང་བོ་རྗེ་གསེར་ཁང་བ་མཆོག་ནས་བརྒྱུད་པའི་ལྟ་སྒོམ་སྤྱོད་གསུམ་དང་ཆོ་ག་ཕྱག་བཞེས་ཉམས་ལེན་དུ་བསྟར་བ་ཡིན་ཞིང་། ཁྲི་ཀའི་ཡུལ་གྱི་སྐུ་ཕྱོགས་རྣམ་གསུམ་སྟེ་སྐུ་ཕྱོགས་ཐར་ཤུལ་ཚང་། སྐུ་ཕྱོགས་སྒོ་མང་ཚང་། སྐུ་ཕྱོགས་ཨ་རིག་ཚང་གསུམ་གྱི་སྐུ་ཕྲེང་རིམ་བྱོན་གྱིས་གཙོ་བོར་བདག་སྐྱོང་མཛད་དེ་བསྐྱངས་པ་ཡིན་ཞིང་། རི་ཁྲོད་པར་འཇུག་ན་རི་ཁྲོད་པའི་བླ་མར་སྐྱབས་འཇུག་ཞུས་ནས་བཀའ་ཁྲོལ་རྗེས་རི་ཁྲོད་པར་ཞུགས་དགོས། རི་ཁྲོད་པ་རྣམས་ལ་བཞུགས་གནས་ངེས་པ་མེད་ཅིང་། རྒྱུན་དུ་ཟས་གོས་གནས་མལ་ལ་འདོད་ཆུང་ཆོག་ཤེས་དང་དོན་ཉུང་བྱ་ཉུང་། དགེ་སྦྱོང་གི་ཆོས་བཞི་ལ་གནས་ཤིང་ལྟ་སྒོམ་སྤྱོད་པ་གཙང་མའི་ཉམས་བཞེས་ལ་གཅིག་ཏུ་གཞོལ་ཏེ། རང་མོས་ལྟར་རི་ཁྲོད་སོགས་སུ་བཞུགས་ཡོད་ལ། རྟེན་ནི་དགེ་ཚུལ་སློང་གི་ཚངས་སྤྱོད་ལ་ལེགས་པར་གཞོལ་བ་དང་། གཉིས་པའི་མཆོད་མེ་ཆོས་ཐོག་སྐབས་སྦྱིན་བདག་གི་འདོད་མོས་བཞིན་མཆོད་མེ་ཆོས་ཐོག་ལ་མཉམ་གཅིག་ཏུ་འཚོགས་བཞིན་ཡོད། མཆོད་མེའི་ཆོས་ཐོག་གི་འདོན་རྟ་ཕྱག་ལེན་སོགས་《མཆོད་མེ་ཆོས་ཐོག་གི་འདོན་བསྒྲིགས》ཞེས་པར་གསལ། རི་ཁྲོད་པ་རེ་རེ་ལ། ཏིང་ཕོར་ལྔ་བཅུ། ཏིང་ཏིང་ཤག ཐེབ་ཙེ། ལྷུང་བཟེད། མཎྜལ། སྣེ་རིང་། ཆོས་སྣམ། གཅོད་ཌཱར། རྐང་གླིང་སོགས་འཛོམས་དགོས།  ང་བརྒྱད་ཡར་སྔོན་དུ་ཁྲི་ཀའི་རི་ཁྲོད་པ་བརྒྱ་ཐམ་པ་ཞེས་གྲགས་མོད། དོན་དུ་བརྒྱ་དང་བཞི་བཅུ་ལྷག་བཞུགས་པར་བཤད། ལོ་རེའི་ཧོར་ཟླ་གཉིས་པའི་ནང་ཁྲི་ཀའི་རི་ཁྲོད་པའི་མཆོད་མེ་ཞེས་ཆོས་ཐོག་ཟླ་ཆོས་ཡིན་ལ་གནས་ངེས་མེད་དུ་སྦྱིན་བདག་གི་འདོད་མོས་ལྟར་འཚོགས་པ་ཡིན། པཎ་ཆེན་བཅུ་བའི་ཡོངས་འཛིན་རྗེེ་བསང་ཁོག་འཇིགས་མེད་ཚང་ཡང་ཁྲི་ཀའི་རི་ཁྲོད་པར་ཞུགས་པར་མ་ཟད་ཁོང་གིས་ཁྲི་ཀའི་ལྷ་སྡེ་ཡུལ་བཟང་ཐང་ནས་རི་ཁྲོད་པ་རྣམས་ལ་བཀའ་འགྱུར་གྱི་ལྗགས་ལུང་ཡང་བསྩལ་མྱོང་། རབ་བྱུང་བཅུ་བདུན་པའི་ལྕགས་ལུག་སྟེ་སྤྱི་ལོ༡༩༩༡ལ་མཁས་གྲུབ་ཆེན་པོ་ལཱ་མོ་ཡོངས་འཛིན་རིན་པོ་ཆེ་ནས་ཁྲི་ཀའི་རི་ཁྲོད་པའི་མཆོད་མེ་སླར་གསོ་གནང་སྟེ་ཨ་ལགས་གཤོང་སྨོན་ཆེ་ཚང་རི་ཁྲོད་པའི་བླ་མར་བསྐོ་བཞག་བྱས་ཤིང་། བསྟན་པ་ཡང་དར་སྐབས་ཀྱི་ཁྲི་ཀའི་རི་ཁྲོད་པའི་མཆོད་མེའི་ཆོས་ཐོག་དང་བོ་ཁྲི་ཀའི་ཇོ་ཇོ་ལྷ་ཁང་དུ་འཚོགས་ཐུབ་པ་བྱུང་།
      སྤྱི་ལོ༡༩༩༣ལ་བླ་བྲང་བཀྲ་ཤིས་འཁྱིལ་གྱི་དགེ་བཤེས་རྗེ་བློ་བཟང་རྒྱ་མཚོ་ཚང་ཡང་ཁྲི་ཀའི་རི་ཁྲོད་པར་ཞུགས་ཤིང་རི་ཁྲོད་པ་རྣམས་ལ་ཁྲི་ཀའི་ཇོ་ཇོ་ལྷ་ཁང་སོགས་སུ་བཀའ་འགྱུར་གྱི་ལུང་ཡང་ཆེད་དུ་གནང་། ད་ལྟ་ཨ་ལགས་བིས་ཀྱཱ་ཚང་ནས་རི་ཁྲོད་པའི་བླ་མའི་འགན་འཁུར་ཏེ་རི་ཁྲོད་པའི་མཆོད་མེའི་ཆོས་ཐོག་ལོ་རེའི་ཧོར་ཟླ་གཉིས་པའི་ཚེས་དགུ་ནས་བདུན་ཕྲག་གཅིག་ལྷག་རིང་ལ་འཚོགས་ཏེ། ཁྲི་ཀའི་དད་ལྡན་མང་ཚོགས་གཙོ་བྱས་ཕྱོགས་ཡས་མས་ཀྱི་རྒྱ་ཆེའི་ཆོས་དད་མང་ཚོགས་ཀྱི་རེ་བ་སྐོང་མུས་སུ་མཆིས་ལ། རི་ཁྲོད་པ་སུམ་ཅུ་ལྷག་བཞུགས་ཡོད་དོ། །