༄༅།།བ་ཀྱཱ་གྲྭ་ཚང་ཕུན་ཚོགས་དར་རྒྱས་གླིང་། ​

      སྡེ་འདི་ནི་ཁྲི་ཀའི་རྒྱ་མཁར་ནས་ལྷོ་ནུབ་ཏུ་སྤྱི་ལེ་བཅུ་དྲུག་གིས་ཆོད་པའི་བ་ཀྱཱ་སྡེ་བའི་སའི་ཆ་རུ་ཤཱཀྱའི་མཆོད་རྟེན་ཁུག་ཞེས་པའི་གནས་མཆོག་དེར་ཆགས་ཡོད་ཅིང་། གྲུབ་མཐའ་ནི་དཔལ་རི་བོ་དགེ་ལྡན་པ་ཡིན། མདོ་སྨད་ཆོས་འབྱུང་ལས། དགོན་སྡེ་འདི་ཐོག་མར་ཕྱག་འདེབས་མཛད་མཁན་ནི་མཁས་གྲུབ་གཉིས་ལྡན་གྱི་འཇའ་མོ་ཏ་བླ་མ་སྟེ་སྐུ་ཕྲེང་གཉིས་པ་དཀོན་མཆོག་བསྟན་འཛིན་ཉི་མ་ཡིན་ཟེར། དམ་པ་གང་ཉིད་རབ་བྱུང་བཅུ་གསུམ་པའི་ལྕགས་ཕག་སྟེ་སྤྱི་ལོ་༡༧༩༡ལ་སྐུ་འཁྲུངས། གོང་མ་ཏོ་བཀྭང་ཁྲི་ལོ་གསུམ་པར་ཤྭན་བཀྭན་ཙང་དུའི་བླ་མའི་ཆོ་ལོ་གནང་། རབ་བྱུང་བཅུ་བཞི་བའི་སྟོད་ཙམ་ལ་ད་ལྟའི་གནས་མཆོག་འདིར་སྒྲུབ་སྡེ་འདི་གསར་འདེབས་མཛད། དགུང་ལོ་རེ་བཞི་བ་ཤིང་སྟག་སྟེ༡༨༥༤ལོར་སྐུ་གཤེགས་སོ།།  སྡེ་འདིར་རྒྱུན་བཞུགས་ཀྱི་བླ་སྤྲུལ་སྙིང་ངེ་དང་གཅོ། བདེ་སྐྱིད་བཅས་བླ་མ་རྣམ་གསུམ་གྱི་སྐུ་ཕྲེང་རིམ་བྱོན་དག་གིས་མཐུན་རྐྱེན་རྒྱ་ཆེར་བསྒྲུབས་ཏེ་འདུ་ཁང་དང་ལྷ་ཁང་སོགས་བསྐྱར་བཞེངས་དང་། དུས་གསུམ་སངས་རྒྱས་ཀྱི་སྐུ་བརྙན་དང་ཐང་ག་སོགས་རྟེན་དང་བརྟེན་པ་བཞེངས་ཏེ་དགོན་པ་རྒྱ་བསྐྱེད།  གཅོ་བླ་མ་སྐུ་ཐོག་དང་པོ་བཀྲ་ཤིས་ལྷུན་པོའི་སྔགས་གྲྭ་པ་ཡིན་ལ་དགོན་དེའི་འཆམ་དཔོན་ཡང་ཡིན་པས། རྗེ་འདི་ཉིད་དམ་པ་གོང་མ་དག་གིས་བཀའ་ལུང་བཞིན་ཁྲི་ཀར་ཆིབས་བསྒྱུར་གནང་སྟེ་གོང་བ་དང་བ་ཀྱཱ། འཇའ་མོ་གྲྭ་ཚང་རྣམས་སུ་འཆམ་བསླབས་ཏེ་འཆམ་གྱི་ཕྱག་ལེན་ཐོག་མར་བཙུགས། ངོ་མཚར་བའི་ཕྱག་ལེན་བཟང་བོ་འདི་ཉིད་ད་ལྟའི་བར་དུ་མ་ཉམས་པར་རྒྱུན་ཆགས་སུ་གནས་ཡོད་ལ། གོང་སྨྲས་ཀྱི་བླ་མ་དེ་གསུམ་ལས་གཞན་སྐུ་གཞོགས་རྒྱ་ཉག་དང་ཨ་ཐིས་ཚང་གཉིས་ཀྱང་དགོན་འདིར་ཡུན་རིང་བཞུགས་སྐད་འདུག གནས་འདིར་སྐྱེས་ཆེན་མང་པོ་ཞབས་ཀྱིས་བཅགས་ཤིང་བྱིན་གྱིས་བརླབས་པ་དང་། འཕྲིན་ལས་ཀྱང་རྒྱ་ཆེར་སྤེལ་གནང་འདུག དགོན་པ་འདིའི་རྟེན་གྱི་གཙོ་བོ་ཡང་ལྷ་ས་ནས་ཨ་མདོར་འཕུར་ཡོང་ཟེར་བའི་རྗེ་དོ་ཁ་མའི་བྱིན་སྐུ་གཅིག་བཞུགས་པ་དེ་ཡིན་པར་བཤད། དེ་ལས་གཞན་པའི་སྐུ་གསུང་ཐུགས་རྟེན་ཡང་གྲངས་མང་པོ་བཞུགས་པ་དུས་འགྱུར་ཡིད་སྲུབས་ཀྱི་དབང་གིས་མེད་བརླག་ཏུ་གྱུར། རྒྱུན་སྤྱོད་ཀྱི་ཆོས་ཐོག་གི་སྐོར་ལ། རྒྱ་ལོའི་སྨོན་ལམ་ཉིན་ལྔ་དང་། ཧོར་ཟླ་བཞི་བར་སྨོན་ལམ་འཇིགས་བྱེད་བདག་འཇུག་རྡུལ་ཚོན་དང་བཅས་ཉིན་ལྔ། ཧོར་ཟླ་དགུ་བར་མགོན་པོ་ཕྱག་དྲུག་པའི་སྒྲུབ་ཐབས་ཏེ་གཏོར་སྒྲུབ་ཉིན་ལྔ། ཧོར་ཟླ་བཅུ་བར་རྗེ་བདག་ཉིད་ཆེན་པོའི་དུས་མཆོད། ཧོར་ཟླ་བཅུ་གཅིག་པའི་མ་ཎི་རིལ་སྒྲུབ། ཧོར་ཟླ་བཅུ་གཉིས་པར་ཆོས་རྒྱལ་གཏོར་སྒྲུབ་དང་རྒྱ་ལོ་དང་བཅུ་བར་གར་འཆམ་བཅས་ཡོད། ཆོས་དད་རང་དབང་གི་སྲིད་ཇུས་དངོས་འབེབས་བྱས་རྗེས། དད་ལྡན་མང་ཚོགས་ཀྱི་རེ་བ་ལྟར། དགོན་འདིའི་བླ་མ་རྣམ་གསུམ་དང་གྲྭ་བཙུན་ཡོངས་ཀྱི་ཐུན་མོང་གིས་གཙོ་འགན་བཞེས་ཏེ། འདུ་ཁང་དང་ལྷ་ཁང་ལ་སོགས་ཕྱི་ནང་གི་རྟེན་དང་བརྟེན་པ་རྣམས་ལེགས་གྲུབ་བྱུང་སྟེ། ད་ལྟ་དགོན་འདིར་རབ་བྱུང་བ་བཞི་བཅུ་ལྷག་གཏན་ཆགས་སུ་བཞུགས་ཡོད། གཞན་ཆོས་སྤྱོད་ཀྱི་ཆོ་ག་སོགས་སྔར་སྲོལ་ཇི་བཞིན་སྐྱོང་བའི་སྐབས་ལགས་སོ།།