༄༅།།ཅོག་རོང་གྲྭ་ཚང་དགའ་ལྡན་རབ་ཡངས་གླིང་། ​

      སྡེ་འདི་ནི་ཁྲི་ཀ་རྫོང་མཁར་ནས་ལྷོ་ནུབ་ཕྱོགས་སུ་སྤྱི་ལེ་གཉིས་ཀྱིས་ཆོད་པའི་སའི་ཆ་སྟེ་ཅོག་རོང་སྡེ་བར་ཆགས་ཡོད་ལ་དཔལ་རི་བོ་དགེ་ལུགས་པའི་སྒྲུབ་སྡེ་ཞིག་ཡིན། ༼མདོ་སྨད་ཆོས་འབྱུང་༽ལས་སྡེ་འདི་ནི་ཐོག་མར་ཅོག་རོང་བླ་མ་བཤད་སྒྲུབ་རྒྱ་མཚོས་རབ་དྲག་མེ་གླང་སྟེ་སྤྱི་ལོ༡༦༤༩ལོར་ཕྱག་གིས་བཏབས། དམ་པ་འདི་ཉིད་ནམ་འཁྲུངས་དང་བསྟན་པ་ལ་ཕྱག་ལས་མཛད་ཚུལ་སོགས་མི་གསལ་ཡང་ཁྲི་ཀ་ཅོག་རོང་ནས་འཁྲུངས་པར་ངེས། འདི་པའི་སྐུ་ཕྲེང་ཐོག་མ་ནི་ཁམས་ཕྱོགས་ཀྱི་ཟླ་གྲགས་ཟེར་བའི་མཁས་པ་ཆེན་པོ་ཞིག་མདོ་སྨད་དུ་ཕེབས་ཏེ་འཕྲིན་ལས་རྒྱས་ཤིང་། འོ་བྲན་དཔལ་གྱི་དབང་ཕྱུག་གི་སྐྱེ་བ་ཡིན་ཟེར་བ་དེ་ཡིན་པར་བཤད། དེའི་སྤྲུལ་སྐུ་དགོན་སྡེ་འདི་ཉིད་འདེབས་མཁན་ངག་དབང་བཤད་སྒྲུབ་རྒྱ་མཚོ་ཡིན། དེའི་སྤྲུལ་སྐུ་སྐུ་འབུམ་ཁྲི་ཆེན་སོ་དགུ་བ་སྒར་སྡེ་ཏཱ་ལེ་ཧོ་ཐོག་ཐུ་སྐལ་བཟང་ཐུབ་བསྟན་རབ་རྒྱས་ཡིན། འདི་པ་རབ་འདོད་ཤིང་བྱི་སྟེ་སྤྱི་ལོ་༡༦༩༤ལོར་ཁྲི་ཆེན་ལ་བཞུགས། དེའི་སྤྲུལ་སྐུ་ཞིག་ཆུ་བཟང་དགོན་དང་སྒར་སྡེ་གཉིས་སུ་རེས་མོས་ཀྱིས་བཞུགས་ལ། སྐུ་ཕྲེང་ཕྱི་མ་རྣམས་སྡེ་འདིར་བཞུགས་ཏེ་སྐྱོང་ཁུར་གནང་བའི་ལོ་རྒྱུས་མི་སྣང་ངོ་།། དེའི་ཕྱིར་དགོན་སྡེ་འདིར་ཆུ་བཟང་ཏཱ་ལེ་ཧོ་ཐོག་ཐུས་ཁ་འཛིན་བྱེད། 
      དེ་སྔ་དགོན་པའི་རྟེན་བཞེངས་ཀྱི་སྐོར་ལ། ཅོག་རོང་བཤད་སྒྲུབ་རྒྱ་མཚོས་གཙུག་ལག་ཁང་དང་རྟེན་བཞེངས། འདོན་རྟ་དབྱངས་གསུམ་དང་ཕྱག་ལེན་སོགས་རིམ་པར་རྒྱ་ཆེར་སྤེལ་བར་མཛད། ང་བརྒྱད་ཡར་སྔོན་དུ་གྲྭ་བཙུན་ཉི་ཤུ་ཡས་མས་དང་འདུ་ཁང་གྱན་ཉེར་ལྔའི་ནང་སྨན་འདམ་ལས་གྲུབ་པའི་རྗེ་ཡབ་སྲས་གསུམ་གྱི་སྐུ། བཀའ་བསྟན་སོགས་རྟེན་བྱིན་ཅན་མང་དུ་བཞུགས་པ་རྣམས་ད་ལྟ་མིག་གི་ལྷག་མར་གྱུར། སྐབས་དེར་དགོན་པར་བདག་དབང་ཡོད་པའི་ས་ཞིང་མུའུ་བཅུ་ལྷག་ཡོད་པ་ཆོས་ཐོག་སོ་སོའི་མཐུན་རྐྱེན་ཁོ་ནར་སྦྱར་རོ།།
      ས་ཁྱི་སྟེ་སྤྱི་ལོ༡༩༥༨ལོའི་དུས་འགྱུར་གྱི་ལས་རླུང་རྩུབ་མོས་སྡེ་འདིའི་རྟེན་དང་བརྟེན་པར་གནོད་པ་ཚབས་ཆེན་བཟོས། ཆོས་སྒོ་ཕྱེས་ནས་དད་ལྡན་སེར་སྐྱ་ཡོངས་ཀྱི་རེ་འདུན་ལྟར་འདུ་ཁང་དང་ཇ་ཁང་སོགས་གསར་བཞེངས་གནང་སྟེ་ནང་དུ་སྐུ་གསུང་ཐུགས་རྟེན་ཕུན་སུམ་ཚོགས་པ་བཞེངས་ཤིང་། མཆོད་ཆས་ཀྱི་རིགས་མ་ཚང་བ་མེད་པར་བཞུགས། ཆོས་སྤྱོད་ཐད་སྔོན་གྱི་སྲོལ་རྣམས་མ་ཉམས་པར་ཉམས་ལེན་བྱེད་བཞིན་པ་སོགས་བསྟན་པ་དར་བའི་སྐབས་ལགས། དེ་སྔ་ཡོད་པའི་དྲུག་བསྒྲལ་པའི་འཆམ་སོགས་ད་ལྟ་ད་དུང་ཉམས་གསོ་བྱེད་མ་ཐུབ་བོ།།