༄༅།།གླིང་ཚ་དགོན་བསམ་གཏན་གླིང་།

       སྒྲུབ་སྡེ་འདི་ནི་ཁྲི་ཀ་རྫོང་མཁར་ནས་ཤར་ལྷོའི་ཕྱོགས་སུ་སྤྱི་ལེ་དགུས་ཆོད་པའི་གནས་མཆོག་ཨ་མྱེས་སྲིན་པོའི་གནས་རི་སྟེ། རི་རྒྱལ་ལྷུན་པོ་ཀེ་ལ་ཤ་ཇི་བཞིན་བརྗིད་ཉམས་ཀྱིས་ཆགས་པའི་འདབས་རོལ་ན། གླིང་ཚ་ཚོ་བདུན་གྱི་མངའ་ཁོངས་སུ་ཆགས་ཡོད། མདོ་སྨད་ཆོས་འབྱུང་ལྟར་ན། སྡེ་འདི་ཐོག་མར་རབ་བྱུང་བཅུ་གཅིག་པའི་ནང་དུ། ཤངས་བླ་མ་ཞེས་བའི་མཚན་སྙན་གྱི་གྲགས་པ་ཡུལ་ཀུན་ལ་ཁྱབ་པའི་སྐྱེས་ཆེན་དམ་པ་ཁོང་གིས་སྒང་མཐའི་ཆུ་མགོ་སྒང་དུ་གསར་ཏུ་བཏབས། མཚན་ལ་རི་ཁྲོད་བསམ་གཏན་གླིང་ཞེས་གསོལ། དམ་པ་གང་གིས་གནས་འདིར་འགྲོ་དོན་རྒྱ་ཆེར་མཛད། གྲུབ་མཐའ་ནི་རི་བོ་དགེ་ལུགས་པ་ཡིན་ལ། སྡེ་འདིར་དེ་སྔ་ལོ་ངོ་སུམ་བརྒྱ་ལྷག་གི་ལོ་རྒྱུས་མངའ་ཞིང་དགེ་འདུན་ལྔ་བཅུ་ལྷག་འདུས་པའི་སྐབས་ཀྱང་བྱུང་བར་གྲགས། དུས་སྐབས་དེར་ཤངས་བླ་མས་འདུ་ཁང་དང་ལྷ་ཁང་གྲྭ་ཤག་སོགས་རྟེན་བཞེངས་གང་ལེགས་མཛད་པར་མ་ཟད། སྒྲིག་སྲོལ་དང་ཀུན་སྤྱོད་སོགས་འདུལ་བའི་གཞུང་བཞིན་བཅོས་པས་ཆོས་དོན་གྱི་བྱ་བ་ཀུན་ཚུལ་ལྡན་དུ་བཏང་། དེ་ནས་རྒྱུ་རྐྱེན་གང་མང་ཞིག་གིས་དགོན་སྡེ་འདི་སྒང་མཐའི་ས་དཀྱིལ་དུ་གནས་སྤོས། དེར་ཅུང་མ་འགོར་བར་ཡང་གླིང་ཚ་ཞོལ་མའི་ཉེ་འདབས་ཀྱི་གླིང་ཚའི་མཐོན་པོ་ཉི་མ་སྒང་དུ་སྤོས། གནས་དེར་རབ་རྒྱལ་ས་ཁྱི་སྤྱི་ལོ1958ལོའི་བར་དུ་གཏན་ཆགས་བྱུང་། དགོན་བདག་གི་བླ་མར་སུམ་པ་ཆོས་འབྱུང་དང་མདོ་སྨད་ཆོས་འབྱུང་རྣམས་སུ་ཤངས་བླ་མ་ཞེས་མཚན་ཙམ་ལས་མི་སྣང་བས་མཚན་དང་ལོ་རྒྱུས་སོགས་ཞིབ་ཏུ་མ་ངེས་ཀྱང་འཁྲུངས་ཡུལ་གླིང་ཚའི་མངའ་ཁོངས་ཀྱི་ཤངས་ཚོ་བ་ཡིན་པས་ཤངས་བླ་མ་ཞེས་འབོད། དེ་ལྟ་བུའི་ངག་སྒྲོས་ཙམ་ཡོད་ཀྱང་ཤངས་ཚོ་བ་དེ་ད་ལྟ་གར་ཡོད་འཆད་དཀའོ། སྐུ་ཕྲེང་ཕྱི་མ་རྣམས་དགོན་འདིར་ཕེབས་མྱོང་མེད་ཟེར།
      དགོན་སྡེ་འདིའི་ཕྱི་ནང་གི་རྟེན་དང་བརྟེན་པའི་སྐོར་ལ། འདུ་ཁང་བཟོ་བཀོད་ཕུན་སུམ་ཚོགས་པའི་ནང་རྟེན་གཙོ་བོར་གདོང་གྲལ་གྱི་དབུས་ཕུགས་སུ་དཀོན་མཆོག་གསུམ་གྱིས་མཚོན་པའི་སྐུ་གསུང་ཐུགས་རྟེན་ཁྱད་པར་ཅན། སྟོན་པའི་སྐུ་བརྙན་ཁྲུ་གང་བ་བྱིན་ཅན། གཞན་དུས་གསུམ་སངས་རྒྱས་དང་ཚེ་ལྷ་རྣམ་གསུམ། སྨན་བླ་བདེ་གཤེགས་བརྒྱད། རྗེ་ཡབ་སྲས་གསུམ་སོགས་རྟེན་བྱིན་ཅན་མང་བོ་དང་། བཀའ་བསྟན་དང་གསུང་འབུམ་དུ་མ། མཐའ་སྐོར་དུ་གྱན་ཐང་གིས་ཡོངས་སུ་གང་བར་བཞུགས། གྲྭ་ཤག་བཅུ་གསུམ་དང་གྲྭ་བ་ཆེ་ཆུང་ཉེར་བདུན་བཞུགས།
      ཆོས་ཐོག་གི་རིམ་པ་ལ། དུས་འབྲེལ་གསོ་སྦྱོང་། རྒྱ་ལོའི་སྨོན་ལམ་ཆེན་མོ། ཧོར་ཟླ་གསུམ་པར་མཆོད་པ། ཧོར་ཟླ་བཞི་བའི་ཀུན་རིག་སྒྲུབ་མཆོད་བདག་འཇུག་སྦྱིན་སྲེག་དང་བཅས་པ། བཅུ་བའི་ལྔ་མཆོད། བཅུ་གཅིག་པའི་གཏོར་སྒྲུབ་བཅས་ཡོད།
      ས་ཁྱི་ལོ་ང་བརྒྱད་དང་རིག་གསར་གྱི་དུས་ཟིང་ཁྲོད་ཕྱི་ནང་གི་རྟེན་བཞེངས་སོགས་ལྷག་མེད་བཟོས། ཆོས་དད་རང་དབང་གི་སྲིད་ཇུས་དངོས་འབེབས་བྱས་རྗེས། དད་ལྡན་མང་ཚོགས་ཀུན་གྱི་རེ་བ་ལྟར།  དགོན་འདིའི་དགེ་འདུན་ཡོངས་ཀྱི་ཐུན་མོང་གིས་གཙོ་འགན་བཞེས་ཏེ། སྒོས་སུ་འབྱོར་ལྡན་གྱི་སྦྱིན་བདག་རྣམས་ཀྱིས་མཐུན་རྐྱེན་སྦྱར་བ་ལ་བརྟེན། འདུལ་ཁང་དང་ལྷ་ཁང་ལ་སོགས་ཕྱི་ནང་གི་རྟེན་དང་བརྟེན་པ་རྣམས་ལེགས་གྲུབ་བྱུང་སྟེ། ད་ལྟ་དགོན་འདིར་རབ་བྱུང་བ་བཅུ་ལྷག་གཏན་ཆགས་སུ་བཞུགས་ཡོད། གཞན་ཆོས་སྤྱོད་ཀྱི་ཆོ་ག་སོགས་སྔར་སྲོལ་ཇི་བཞིན་སྐྱོང་བའི་སྐབས་ལགས་སོ།།