སྟོན་པ་ཐུགས་རྗེ་ཅན་གྱི་ཆོ་འཕྲུལ་མཛད་པ་ལ་བསྟོད་པ།
འདིར་ཆོ་འཕྲུལ་དུས་ཆེན་གྱི་ཚེས་བཅོ་ལྔའི་ཁྱད་འཕགས་དུས་བཟང་དང་བསྟུན་ནས་སངས་རྒྱས་མཁྱེན་བརྩེའི་བདག་ཉིད་ལ་རྗེས་དྲན་གྱི་ཆེད། སྐྱབས་མགོན་པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་མཛད་པའི་སྟོན་པ་ཐུགས་རྗེ་ཅན་ལ་བསྟོད་པ་རྒྱ་ཆེན་ཚོགས་གཉིས་མ་ཞེས་པ་འདི་སྤྱན་བསྟར་ཞུས་པའོ།།
རྒྱ་ཆེན་ཚོགས་གཉིས་མ།
ན་མོ་མུ་ནི་ཨིནྡྲ་ཡ། རྒྱ་ཆེན་ཚོགས་གཉིས་མཐར་སོན་ཕྱི་ནང་གི །བདུད་བཞི་ཀུན་བཅོམ་ཆེ་དགུ་བྲན་དུ་མཛད། །ཐམས་ཅད་མཁྱེན་པ་ལྷ་ཡི་ལྷར་གྱུར་པ། ། ཤཱཀྱའི་གཙོ་བོ་དེ་ལ་ཕྱག་འཚལ་ལོ། །མགོན་ཁྱོད་འོད་མའི་ཚལ་དུ་བཞུགས་པའི་ཚེ། ། ཕྲག་དོག་དབང་གིས་སྟོན་པ་དྲུག་པོ་ཡི། །འདོད་པས་ས་སྐྱོང་ཚོགས་བསྐུལ་ཆོ་འཕྲུལ་གྱིས། །ཚར་གཅོད་རྗེས་འཛིན་མཛད་ལ་ཕྱག་འཚལ་ལོ། །བཀྲ་ཤིས་འཁོར་ལོས་མཚན་དཔེའི་ཞབས་སྐྱེས་ཟུང༌། །ཡུལ་ལྗོངས་མང་པོར་བཀོད་ནས་འཕྲིན་ལས་ཀྱི། ། དགེ་མཚན་རྒྱ་ཆེར་སྤེལ་ཕྱིར་ལྷ་མིའི་ཚོགས། །གྲངས་མེད་བསྡུ་བར་མཛད་ལ་ཕྱག་འཚལ་ལོ། །ནམ་ཞིག་མཉན་དུ་ཡོད་པར་རྒྱལ་པོའི་གཅུང༌། །དུམ་བུར་བཅད་པ་བདེན་ཚིག་གིས་གསོས་ཤིང༌། །ཆོ་འཕྲུལ་འདུན་ཁང་ཡེ་ཤེས་མེས་སྦྱངས་ནས། །རྫུ་འཕྲུལ་དུ་མས་གཤེགས་ལ་ཕྱག་འཚལ་ལོ། ༈ །དཔྱིད་རའི་དཀར་ཚེས་དང་པོར་གསལ་རྒྱལ་གྱིས། །མངོན་མཆོད་ཚེམས་ཤིང་ས་ལ་བཙུགས་མ་ཐག །འདོད་འཇོའི་དཔག་བསམ་ལྗོན་པས་ལྷ་དང་མི། །ཀུན་དགས་ཚིམ་པར་མཛད་ལ་ཕྱག་འཚལ་ལོ། །ཕྱི་ཉིན་ཨུ་ཏྲ་ཡ་ནས་མཆོད་ཡུལ་དུ། །བཞུགས་པའི་གཡས་གཡོན་རིན་ཆེན་ས་འཛིན་ཟུང༌། །ཟས་མཆོག་རྩྭ་འཇམ་བདུད་རྩིས་འཚོ་བ་ཡིས། །ཡོངས་གང་མཛད་པ་བསྟན་ལ་ཕྱག་འཚལ་ལོ། །ཚེས་གསུམ་ཤུནྩི་ད་ལའི་བཤོས་གསོལ་ནས། །ཞལ་བསིལ་བོར་བ་ཡན་ལག་བརྒྱད་ལྡན་མཚོ། །འོད་ཟེར་བཞད་ལྡན་པདྨོའི་དྲ་བ་ཡིས། །མཛེས་པའི་ཕུན་ཚོགས་སྤྲུལ་ལ་ཕྱག་འཚལ་ལོ། །བཞི་པར་ཨིནྡྲ་ཝར་མའི་གདུགས་ཚོད་གསོལ། །རྫིང་བུའི་ངོས་རེར་ཡོར་ཆེན་བརྒྱད་བརྒྱད་ཐོན། །སླར་ཡང་བསྐོར་ནས་ནང་དུ་འབབ་པའི་སྒྲས། ། ཐེག་གསུམ་དམ་ཆོས་བསྟན་ལ་ཕྱག་འཚལ་ལོ། །ཚེས་མདའ་ཚངས་བྱིན་གྱིས་མཆོད་འཛུམ་ཞལ་ལས། །བྱུང་བའི་གསེར་མདོག་འོད་ཀྱིས་སྟོང་གསུམ་བཀང༌། །ངན་སོང་རྒྱུད་སྦྱངས་འགྲོ་ཀུན་བསམ་གཏན་གྱི། །བདེ་བས་ཚིམ་པར་མཛད་ལ་ཕྱག་འཚལ་ལོ། ། དཀར་ཚེས་དགའ་བ་གཉིས་པར་ལིཙྪ་བྱིའི། །ཞལ་ཟས་གསོལ་ནས་འཁོར་མང་ཕན་ཚུན་སེམས། །ཤེས་ཤིང་རང་བཞིན་དཀར་ནག་ལས་མཐོང་བས། །ཡིད་ཆེས་དད་པར་མཛད་ལ་ཕྱག་འཚལ་ལོ། །བཟང་པོ་གཉིས་པར་ཤཱཀྱའི་ཚོགས་རྣམས་ཀྱི། །བསོད་ནམས་ཞིང་བཞུགས་འཁོར་རྣམས་རེ་རེ་ཡང༌། །རིན་ཆེན་བདུན་ལྡན་འཁོར་ལོས་བསྒྱུར་རྒྱལ་གྱི། །ཕུན་ཚོགས་མཆོག་ཏུ་སྤྲུལ་ལ་ཕྱག་འཚལ་ལོ། ༈ །ཚེས་བརྒྱད་དབང་པོས་གུས་མཆོད་སེང་ཁྲི་ལས། །སྲིན་པོ་ལྔ་ཐོན་རྡོ་རྗེ་འཛིན་བཅས་པས། །སྟོན་པ་དྲུག་བཅོམ་དགུ་ཁྲི་སྲིད་ལས་བསྒྲལ། །མཐའ་ཡས་ཆོ་འཕྲུལ་བསྟན་ལ་ཕྱག་འཚལ་ལོ། །དེ་ཡི་ནངས་པར་རང་བྱུང་གིས་བསྐྲུན་པའི། །མཆོད་ཚོགས་བཞེས་ནས་སྲིད་ཞིའི་དགེ་ལེགས་སྐྲུན། །གཟུགས་ཅན་ལྟ་བུའི་སྐུ་ཡིས་ཚངས་གནས་ཀྱི། །བར་དུ་ཁྱབ་པར་མཛད་ལ་ཕྱག་འཚལ་ལོ། །ཕྱོགས་ཚེས་འཇིག་རྟེན་སྐྱོང་བས་ཞལ་ཟས་སྦྱར། །རྒྱལ་བའི་མཛེས་སྐུ་གསེར་འོད་སྟོང་འབར་བའི། །ཆུ་འཛིན་སྲིད་རྩེའི་བར་དུ་ཁྱབ་མཛད་ནས། །ཕན་བདེའི་གྲུ་ཆར་ཕབ་ལ་ཕྱག་འཚལ་ལོ། །དགའ་བ་གསུམ་པར་མགོན་མེད་ཟས་སྦྱིན་གྱི། །བསོད་ནམས་མགྲོན་གྱུར་སེང་གེའི་ཁྲིར་བཞུགས་བཞིན། །སྐུ་ཡི་སྣང་བ་མི་མངོན་ཚངས་དབྱངས་ཀྱི། །གསུང་གིས་དམ་ཆོས་བསྟན་ལ་ཕྱག་འཚལ་ལོ། །དེ་ཡི་སང་ཉིན་ཁྱིམ་བདག་ཙེ་ཏས་མཆོད། །བྱམས་པའི་ཏིང་འཛིན་ལ་བཞུགས་གསེར་འོད་ཀྱིས། །སྟོང་གསུམ་ཡོངས་བཀང་འགྲོ་ཀུན་ཕ་མ་ལྟར། །བྱམས་པས་ཁྱབ་པར་མཛད་ལ་ཕྱག་འཚལ་ལོ། །བཅུ་གསུམ་ཤུནྩིས་བསྙེན་བཀུར་བདེ་གཤེགས་ཀྱི། །ལྟེ་བ་ནས་ཐོན་འོད་འདོམ་བདུན་ཟུང་གི །སྣེ་མོར་རྒྱལ་བའི་སྐུས་མཚན་དེ་འདྲ་བས། ། ཕྱོགས་ཀུན་འགེངས་པར་མཛད་ལ་ཕྱག་འཚལ་ལོ། །ཕྱི་ཉིན་ཨུ་ཏྲ་ཡ་ནས་མཆོད་སྤྲིན་སྤྲོས། །མེ་ཏོག་གཏོར་བ་རིན་ཆེན་ལས་གྲུབ་པའི། །ཤིང་རྟ་སྟོང་དང་ཉིས་བརྒྱ་ལྔ་བཅུ་ཡིས། །སྲིད་གསུམ་མཛེས་པར་མཛད་ལ་ཕྱག་འཚལ་ལོ། ༈ །བཅོ་ལྔ་གཟུགས་ཅན་སྙིང་པོས་དགེ་ལེགས་བསྐྲུན། །མ་ལུས་ལྷ་ཡི་བདུད་རྩིས་ཚིམ་མཛད་ནས། །ཕྱག་སོར་ལས་ཐོན་གསེར་སྦྱངས་འོད་ཟེར་གྱིས། །མནར་མེད་བདེ་འགྲོར་མཛད་ལ་ཕྱག་འཚལ་ལོ། །དེ་ལྟའི་ངོ་མཚར་ཆོ་འཕྲུལ་བགྲངས་ཡས་ཀྱིས། །ནག་ཕྱོགས་ཀུན་བཅོམ་གྲངས་མེད་སྐྱེ་དགུའི་ཚོགས། །མཐོ་རིས་རྣམ་གྲོལ་རྫོགས་པའི་སངས་རྒྱས་ཀྱི། །ལམ་དུ་ངེས་པར་མཛད་ལ་ཕྱག་འཚལ་ལོ། །དེ་ལྟར་སྟོན་པའི་ཡོན་ཏན་རིན་ཆེན་གྱི། །ལྷུན་ པོའི་སྤོ་ལས་ཆོ་འཕྲུལ་མཛད་པ་ཡི། །རྡུལ་ཕྲན་ཙམ་ཞིག་བརྗོད་པའི་དགེ་བ་དེ། །འགྲོ་ཀུན་དོན་དུ་ཀུན་མཁྱེན་རྒྱུ་རུ་བསྔོ། །དེ་བཞིན་གཤེགས་པ་ཁྱོད་སྐུ་ཅི་འདྲ་དང༌། ། འཁོར་དང་×××། སྟོན་པ་འཇིག་རྟེན་×××། ཅེས་པ་འདི་ནི་བཀྲ་ཤིས་ལྷུན་པོའི་པིར་ཐོགས་དབང་པོ་ཆོས་རྗེ་བློ་བཟང་ཆོས་འཕེལ་སོགས་ཀྱིས་བསྐུལ་བའི་ངོར་ཤཱཀྱའི་དགེ་སློང་བློ་བཟང་ཆོས་ཀྱི་རྒྱལ་མཚན་གྱིས་མཛད་པའོ།། དགེ་ལེཊ་འཕེལ། །
