རྨ་ལྷོ་ཁུལ་རེབ་གོང་རོང་བོ་དགོན་པས་གོས་སྐུ་བཤམས་པ།

རྨ་ལྷོའི་རེབ་གོང་རོང་བོ་དགོན་པས་གོས་སྐུ་བཤམས་པ།

     ཟླ3པའི་ཚེས4སྟེ་ལུགས་རྙིང་གི་ཟླ1པོའི་ཚེས14ཉིན། རྨ་ལྷོ་བོད་རིགས་རང་སྐྱོང་ཁུལ་རེབ་གོང་རོང་བོ་དགོན་པས་གོས་སྐུ་བཤམས་པའི་བྱེད་སྒོ་སྤེལ་བ་རེད།
     རོང་བོ་དགོན་པའི་གོས་སྐུ་ཆེན་མོ་ནི་སྤྱི་ལོ༡༩༨༢ལོ་སྟེ་བསྟན་པ་ཡང་དར་གྱི་དབུ་བརྙེས་ནས་རྡོ་རྗེ་འཆང་རྫོང་ཆུང་སྐུ་ཕྲེང་དྲུག་པ་མཁས་བཙུན་ལུང་རིགས་རྒྱ་མཚོ་དང་ཁ་སོ་བློ་བཟང་འཇིགས་མེད་འཕྲིན་ལས་རྣམ་པའི་སྐུ་དྲིན་ལ་བརྟེན་ནས་གཉན་ཐོག་ལྷ་བཟོ་འཇིགས་མེད་སྐར་མདའ་དང་ཁོང་གི་སྲས་དཔལ་མགོན་སོགས་གཉན་ཐོག་ལྷ་རིས་པ་ཉི་ཤུ་ལྷག་གིས་གསར་དུ་བཞེངས། ཐང་ག་འདིའི་དབུས་སུ་བཞུགས་གཙོ་སྐུ་ནི་སྟོན་པ་ཐུབ་པའི་དབང་བོ་ཡིན། ཐུབ་དབང་གི་མཐའ་སྐོར་དུ་འཕགས་མཆོག་སྤྱན་རས་གཟིགས་དང་། སྒྲོལ་ལྗང་། འཇམ་དབྱངས་དམར་སེར། ཁྲོ་བོ་མི་གཡོ་བ། རྗེ་བཙུན་བྱམས་པ་མགོན་པོ། གྲུབ་ཆེན་སྐལ་ལྡན་རྒྱ་མཚོ། རྗེ་ཙོང་ཁ་པ། ཇོ་བོ་རྗེ་དཔལ་ལྡན་ཨ་ཏི་ཤ  གྲུབ་ཆེན་ཆོས་པ་རིན་པོ་ཆེ། མཁན་ཆེན་དགེ་འདུན་རྒྱ་མཚོ། སྐྱབས་མགོན་བདུན་པ་ཆེན་པོ་བཅས་དང་། འོག་ཕྱོགས་སུ་རྒྱལ་པོ་ཆེན་པོ་རྣམ་ཐོས་སྲས། མགོན་པོ་ཕྱག་དྲུག་པ། རྡོ་རྗེ་གུར། ཆོས་རྒྱལ། ལྷ་མོ་དམག་ཟོར་རྒྱལ་མོ་བཅས་ཀྱི་སྐུ་འདྲ་བཞུགས་པའི་གོས་སྐུའི་མེ་ལོང་གོང་གཤམ་བཅས་བསྡོམས་པས་སྲིད་ལ་ཁྲུ་ཙེ་ལྔ་བཅུ་ང་བདུན་དང་། ཞེང་ལ་ཁྲུ་ཙེ་བདུན་ཅུ་དོན་བཞི་ཡོད་པ་དེ་ནི་རི་མོ་ཤོག་བུར་བྲིས་པ་བརྒྱུད་ནས་རྒྱུ་རིན་པོ་ཆེའི་གོས་ཆེན་སྣ་ཚོགས་ཀྱིས་དྲས་དྲུབ་ཚོས་བསྒྲིགས་ཀྱིས་སམ། དྲས་པ་སྤྱིན་གྱིས་སྦྱོར་བ་དང་འཚེམ་པ། དྲོད་ངར་གྱི་དབུར་ཏིས་བརླན་པ། ཞིབ་ཚགས་ཅིང་སྒྱུ་རྩལ་གྱི་ཁྱད་ཆོས་མངོན་པ་བྱས་ཏེ་བཞེངས་པའི་གོས་དྲུབ་ཀྱི་ཐང་ག་ཆེན་པོ་ཞིག་ཡིན་ནོ།།

     རྒྱལ་ལོའི་ཚེས་བཅུ་བཞིའི་ཉིན་མོར་གོས་སྐུ་བཤམས་པ་འདིས་ཅི་མཚོན་ཞེ་ན། སྟོན་པ་སངས་རྒྱས་ཤཱཀྱ་ཐུབ་པ་སྐུ་དངོས་སུ་རེབ་གོང་རིག་པ་འབྱུང་བའི་ཞིང་ཁམས་འདིར་ལོ་གཅིག་གི་ནང་དུ་ཐེངས་གཅིག་བྱོན་ནས་ཞལ་གྱིས་གཟིགས་ཤིང་བྱིན་གྱིས་བརླབས་པ་ལྟ་བུའི་དད་མོས་ཀྱིས་རོང་བོ་དགོན་ཆེན་གྲྭ་ས་གསུམ་གྱི་བླ་སྤྲུལ་དང་གྲྭ་བཙུན་ལྷན་རྒྱས་ཀྱིས་སེར་སྦྲེངས་དང་བཅས་ཏེ་མཆོད་འབུལ་དང་།  དད་ལྡན་མང་ཚོགས་རྣམས་ཀྱི་འདུ་ལོང་ལ་བསམས་ན་དངོས་གནས་སྨྲ་མི་ཤེས་ཤིང་བརྗོད་ལས་འདས་པའི་སྤྲོ་སྣང་གིས་རབ་ཏུ་ཁེངས་ཡོད།