བྱབས་ཁྲུས་བྱེད་ཚུལ་ངོ་སྤྲོད་རགས་ཙམ་གནང་བ།

      དཔལ་ལྡན་རྡོ་རྗེ་རྣམ་པར་འཇོམས་པ་ཞུ་བ་ལས་བྱུང་བའི་བུམ་པའི་ཆུས་རྡོ་རྗེ་སློབ་མའི་སྤྱི་བོ་ནས་རྐང་མཐིལ་གྱི་བར་ཕྱི་ནང་ཐམས་ཅད་ཁྱབ་པར་བཀྲུས་པས། ནད་གདོན་སྡིག་སྒྲིབ་ཐམས་ཅད་དབང་པོའི་སྒོ་དང་བ་སྤུའི་བུ་ག་སོགས་ནས་ཐོན་ཏེ་བྱང་ཞིང་དག་པར་གྱུར། །ན་མཤྩཎྜ་བཛྲ་ཀྲོ་དྷཱ་ཡ། ཧུ་ལུ་ཧུ་ལུ×། རྡོ་རྗེ་སློབ་མ་འདི་རྣམས་ཀྱི་སྡིག་པ་དང་སྒྲིབ་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ནད་ཐམས་ཅད་ཤཱནྟིཾ་ཀུ་རུ་སྭཱཧཱ། གདོན་ཐམས་ཅད་ཤཱནྟིཾ་ཀུ་རུ་སྭཱཧཱ། རིམས་ཐམས་ཅད་ཤཱནྟིཾ་ཀུ་རུ་སྭཱཧཱ། འཁོན་ཐམས་ཅད་ཤཱནྟིཾ་ཀུ་རུ་སྭཱཧཱ། གྲིབ་ཐམས་ཅད་ཤཱནྟིཾ་ཀུ་རུ་སྭཱཧཱ། བྱད་ཐམས་ཅད་ཤཱནྟིཾ་ཀུ་རུ་སྭཱཧཱ། བྱུར་ཐམས་ཅད་ཤཱནྟིཾ་ཀུ་རུ་སྭཱཧཱ། སྐལ་བ་ངན་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ལྟས་ངན་པ་ཐམས་ཅད་ཤཱནྟིཾ་ཀུ་རུ་སྭཱཧཱ། རྨི་ལམ་ངན་པ་ཐམས་ཅད་ཤཱནྟིཾ་ཀུ་རུ་སྭཱཧཱ། མཚན་མ་ངན་པ་ཐམས་ཅད་ཤཱནྟིཾ་ཀུ་རུ་སྭཱཧཱ། བཀྲ་མི་ཤིས་པ་ཐམས་ཅད་ཤཱནྟིཾ་ཀུ་རུ་སྭཱཧཱ། མཚན་མོ་ནག་མོའི་གདོན་ཐམས་ཅད་ཤཱནྟིཾ་ཀུ་རུ་སྭཱཧཱ། ཉེ་བར་འཚེ་བ་ཐམས་ཅད་ཤཱནྟིཾ་ཀུ་རུ་སྭཱཧཱ། དུས་མ་ཡིན་པ་འཆི་བ་ཐམས་ཅད༌ཤཱནྟིཾ་ཀུ་རུ་སྭཱཧཱ། གཟའ་དང་རྒྱུ་སྐར་གྱི་གནོད་པ་ཤཱནྟིཾ་ཀུ་རུ་སྭཱཧཱ། རྒྱལ་པོ་དང་ཆོམ་རྐུན་གྱི་འཇིགས་པ་ཐམས་ཅད་ཤཱནྟིཾ་ཀུ་རུ་སྭཱཧཱ། བདུད་ཀྱི་ཞགས་པ་ཐམས་ཅད་ཤཱནྟིཾ་ཀུ་རུ་སྭཱཧཱ། གཤིན་རྗེའི་ཕོ་ཉ་ཐམས་ཅད་ཤཱནྟིཾ་ཀུ་རུ་སྭཱཧཱ། བགེགས་དང་ལོག་འདྲེན་ཐམས་ཅད་ཤཱནྟིཾ་ཀུ་རུ་སྭཱཧཱ། བར་གཅོད་མི་མཐུན་པའི་ཕྱོགས་ཐམས་ཅད་ཤཱནྟིཾ་ཀུ་རུ་སྭཱཧཱ། ལན་གསུམ་བྱ། བར་དུ་ན་མཤྩཎྜ་བཛྲ་ལན་གང་མང་བརྗོད། བསྒྲུབ་བྱ་རྣམས་ཀྱི་རང་རང་གི་ཁ་ནང་དུ་བུམ་ཆུ་ཅུང་ཟད་རེ་བཟུང་དུ་བཅུག་ནས། རྡོ་རྗེ་དང་བཅས་པའི་རྨ་བྱའི་སྒྲོའི་ཆུན་པོའི་སྟེང་དུ་ཉི་མའི་དཀྱིལ་འཁོར་ལ་གནས་པའི་ཧཱུཾ་ཡིག་སྔགས་ཕྲེང་དང་བཅས་པ་ལས་འོད་ཟེར་སྣ་ལྔ་འཕྲོས་པའི་བསྒྲུབ་བྱ་འདི་རྣམས་ཀྱི་ལུས་ལ་བྱབས་པ་ཙམ་གྱིས་བཀྲུས་པས་མ་དག་པའི་ནད་གདོན་སྡིག་སྒྲིབ་ཐམས་ཅད་སྤུར་མ་རླུང་གིས་དེད་པ་བཞིན་དུ་ནག་ཉིལ་ཉིལ་གྱིས་ཕྱགས་ནས་ཁ་ནང་གི་ཆུ་ལ་ཐིམ་པར་གྱུར། ཅེས་བརྗོད་ལ། ན་མཤྩཎྜ་བཛྲ་×བཟླ་བཞིན་དུ་རྡོ་རྗེ་དང་བཅས་པའི་རྨ་བྱའི་སྒྲོས་བསྒྲུབ་བྱའི་གཡས་གཡོན་མདུན་རྒྱབ་ཀྱི་མས་ནས་ཡར་ཕྱགས་ཏེ་ཁ་ནང་གི་ཆུ་སྟེང་དུ་སྤྲུག་པའི་ཚུལ་ཁ་ཤས་དང་སླར་ཡང་བྱབས་པའི་ཚུལ་དང་བཅས། སྐལ་ལྡན་རིགས་ཀྱི་བུ་འདི་རྣམས་ཀྱི་སྡིག་པ་དང་སྒྲིབ་པ་ཐམས་ཅད་ཨ་པ་ན་ཡེ་སྭཱཧཱ། ནད་ཐམས་ཅད་ཨ་པ་ན་ཡེ་སྭཱཧཱ། གདོན་ཐམས་ཅད་×། རིམས་ཐམས་ཅད་×། འཁོན་ཐམས་ཅད་×། གྲིབ་ཐམས་ཅད་×། བྱད་ཐམས་ཅད་×། བྱུར་ཐམས་ཅད་×། སྐལ་བ་ངན་པ་ཐམས་ཅད་×། ལྟས་ངན་པ་ཐམས་ཅད་×། རྨི་ལམ་ངན་པ་ཐམས་ཅད་×། བཀྲ་མི་ཤིས་པ་ཐམས་ཅད་×། ཉེ་བར་འཚེ་བ་ཐམས་ཅད་×། དུས་མ་ཡིན་པ་འཆི་བ་ཐམས་ཅད་×། མཚན་མོ་ནག་མོའི་གདོན་ཐམས་ཅད་×། གཟའ་དང་རྒྱུ་སྐར་གྱི་གནོད་པ་ཐམས་ཅད་×། རྒྱལ་པོ་དང་ཆོམ་རྐུན་གྱི་འཇིགས་པ་ཐམས་ཅད་×། བདུད་ཀྱི་ཞགས་པ་ཐམས་ཅད་×། གཤིན་རྗེའི་ཕོ་ཉ་ཐམས་ཅད་×། བགེགས་དང་ལོག་འདྲེན་ཐམས་ཅད་×། བར་ཆད་མི་མཐུན་པའི་ཕྱོགས་ཐམས་ཅད་ཨ་པ་ན་ཡེ་སྭཱཧཱ། ཞེས་པའི་བར་སྔགས་དང་སྤེལ་ཚིགས་ལན་གསུམ་བརྗོད་ལ། བསྒྲུབ་བྱའི་ཁར་བཟུང་བའི་ཆུ་དྲི་ཆུ་དྲི་གླུད་ཀྱི་སྟེང་དུ་འདོར་དུ་གཞུག རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས་བསྒྲུབ་བྱ་འདི་རྣམས་ལ་གནོད་ཅིང་འཚེ་བར་བྱེད་པའི་གདོན་བགེགས་ཐམས་ཅད་མདུན་དུ་བཀུག་པར་གྱུར། ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སམྦྷ་ར་སམྦྷ་ར་ཧཱུཾ། ཞེས་ལན་གསུམ་གྱིས་བསྔོས། གུ་གུལ་བསྲེགས་ཤིང་ཧཱུཾ་མཛད་ཀྱི་ཕྱག་རྒྱ་བྱས་ལ། ན་མོ་རྗེ་བཙུན་རྩ་བ་དང་བརྒྱུད་པར་བཅས་པའི་དཔལ་ལྡན་བླ་མ་དམ་པ་རྣམས་ཀྱི་བཀའ་བདེན་པ་དང༌། སངས་རྒྱས་ཀྱི་×། ཆོས་ཀྱི་བཀའ་×། དགེ་འདུན་གྱི་×། དེ་བཞིན་གཤེགས་པ་དང༌། རྡོ་རྗེ་དང༌། རིན་པོ་ཆེ་དང༌། པདྨ་དང༌། ལས་ཀྱི་རིགས་སུ་བཞུགས་པ་ཐམས་ཅད་དང༌། སྙིང་པོ་དང༌། ཕྱག་རྒྱ་དང༌། གསང་སྔགས་དང༌། རིགས་སྔགས་ཀྱི་ལྷའི་ཁྱད་པར་ཐམས་ཅད་དང༌། ཁྱད་པར་དུ་ཡང་བཅོམ་ལྡན་འདས་དཔལ་རྡོ་རྗེ་རྣམ་པར་འཇོམས་པའི་ལྷ་ཚོགས་ཀྱི་སྐུ་གསུང་ཐུགས་ཀྱི་གསང་བ་བླ་ན་མེད་པའི་བདེན་པ་དང༌། ཆོས་སྐྱོང་སྲུང་མ་རྣམས་ཀྱི་བདེན་པ་དང༌། ཆོས་ཉིད་རྣམ་པར་དག་ཅིང་ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པའི་མཐུ་ལ་བརྟེན་ནས་བསྒྲུབ་བྱ་འདི་རྣམས་ལ་གནོད་ཅིང་འཚེ་བར་བྱེད་པའི་གནོད་སྦྱིན་དང༌། ཤ་ཟ་དང༌། འབྱུང་པོ་ལ་སོགས་པ་ཐམས་ཅད་དྲི་ཆུ་དང་དྲི་གླུད་འདིས་ཚིམས་པར་གྱིས་ལ་རང་རང་སོ་སོའི་གནས་སུ་སོངས་ཤིག །ཨོཾ་སུམྦྷ་ནི་སུམྦྷ་ནི་བརྗོད་ལ་གུ་གུལ་གྱིས་བདུགས། ཡུངས་ཀར་གྱིས་བྲབས། གསང་ཆུས་གཏོར། རོལ་མོའི་སྒྲ་དང་བཅས་དྲི་ཆུ་དང་དྲི་གླུད་བསྒྲུབ་བྱ་ལ་གཡོན་སྐོར་ལན་གཅིག་བྱས་སྟེ་ཕྱིར་དོར། དེ་ནས་དྲིལ་སྟབས་དང་བཅས། སངས་རྒྱས་རྣམས་ནི་བདུད་ལས་རྒྱལ། །ཆོས་ནི་ཆོས་མ་ཡིན་ལས་རྒྱལ། །དགེ་འདུན་མུ་སྟེགས་རྣམས་ལས་རྒྱལ། །དབང་པོ་ལྷ་མིན་རྣམས་ལས་རྒྱལ། །ལྷ་མིན་ཟླ་བ་རྣམས་ལས་རྒྱལ། །ནམ་མཁའ་ལྡིང་ནི་རྒྱ་མཚོ་ལས། །མེ་ནི་ཤིང་རྣམས་ཀུན་ལས་རྒྱལ། །ཆུ་ནི་མེ་ལས་རྒྱལ་བ་སྟེ། །རླུང་ནི་སྤྲིན་ལས་རྒྱལ་བར་གྱུར། །རྡོ་རྗེ་ཡིས་ནི་རིན་ཆེན་ཕུག །ལྷ་རྣམས་བདེན་པར་གནས་པ་ལ། །སངས་རྒྱས་དང་ནི་ཆོས་ཀྱང་བདེན། །བདེན་པའི་རྒྱལ་གྱུར་བརྫུན་མ་ལགས། །བདེན་པ་དང་བདེན་པའི་ཚིག་འདི་དག་གིས་བསྒྲུབ་བྱ་ཚེ་དང་ལྡན་པ་འདི་རྣམས་བདུད་དང་མི་མཐུན་པའི་ཕྱོགས་ཐམས་ཅད་ལས་རྒྱལ་བར་གྱུར་ཅིག ཛ་ཡ་ཛ་ཡ། སིདྡྷི་སིདྡྷི། ཕ་ལ་ཕ་ལ་ཧོ། བསྒྲུབ་བྱའི་སྤྱི་བོ། སོག་ཕྲག དཔུང་མགོ་གཡས་གཡོན། དཔྱི་མགོ་གཡས་གཡོན་ཏེ་གནས་བདུན་དུ་རྡོ་རྗེ་རྒྱ་གྲམ་གྱི་ཚུལ་དུ་བཞག སླར་ཡང་རང་གི་ཐུགས་ཀའི་ཧཱུཾ་ལས་འོད་ཟེར་འཕྲོས་པས། ཕྱོགས་བཅུའི་རྒྱལ་བ་སྲས་དང་བཅས་པའི་བྱིན་རླབས་ནུས་མཐུ་ཐམས་ཅད་འོད་ཟེར་གྱི་རྣམ་པར་སྤྱན་དྲངས། བསྒྲུབ་བྱ་རྣམས་ཀྱི་བ་སྤུའི་བུ་ག་ནས་ཐིམ་པས། ཤ་སྐྱི་པགས་མཚམས་ཐམས་ཅད་འོད་ཟེར་ལས་གྲུབ་པའི་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་གྱུར་ཏེ་ནད་གདོན་སྡིག་སྒྲིབ་ཐམས་ཅད་ཀྱི་གནོད་པས་མི་ཚུགས་པའི་སྲུང་བ་ཆེན་པོར་བྱིན་གྱིས་བརླབ་པར་གྱུར། ན་མཤྩཎྜ་བཛྲ་×། སྐལ་ལྡན་རིགས་ཀྱི་བུ་འདི་རྣམས་སྡིག་པ་དང་སྒྲིབ་པ་ཐམས་ཅད་ལས་རཀྵ་རཀྵ། ནད་ཐམས་ཅད་×། གདོན་ཐམས་ཅད་×། རིམས་ཐམས་ཅད་×། འཁོན་ཐམས་ཅད་×། གྲིབ་ཐམས་ཅད་×། བྱད་ཐམས་ཅད་×། བྱུར་ཐམས་ཅད་×། སྐལ་བ་ངན་པ་ཐམས་ཅད་×། ལྟས་ངན་པ་ཐམས་ཅད་×། རྨི་ལམ་ངན་པ་ཐམས་ཅད་×། མཚན་མ་ངན་པ་ཐམས་ཅད་×། བཀྲ་མི་ཤིས་པ་ཐམས་ཅད་×། མཚན་མོ་ནག་མོའི་གདོན་ཐམས་ཅད་×། ཉེ་བར་འཚེ་བ་ཐམས་ཅད་×། དུས་མ་ཡིན་པ་འཆི་བ་ཐམས་ཅད་×། གཟའ་དང་རྒྱུ་སྐར་གྱི་གནོད་པ་ཐམས་ཅད་×། རྒྱལ་པོ་དང་ཆོམ་རྐུན་གྱི་འཇིགས་པ་ཐམས་ཅད་×། བདུད་ཀྱི་ཞགས་པ་ཐམས་ཅད་×། གཤིན་རྗེའི་ཕོ་ཉ་ཐམས་ཅད་×། བགེགས་དང་ལོག་འདྲེན་ཐམས་ཅད་×། བར་གཅོད་མི་མཐུན་པའི་ཕྱོགས་ཐམས་ཅད་ལས་རཀྵ་རཀྵ། ཞེས་ཚར་གསུམ་མམ་བདུན་བརྗོད། རྒྱལ་བ་སྲས་བཅས་བདེན་པའི་བྱིན་རླབས་དང༌། །རྡོ་རྗེ་རྣམ་པར་འཇོམས་པའི་མཐུ་སྟོབས་ཀྱིས། །འགྲོ་བ་འདི་རྣམས་བདག་གི་བསྲུངས་ཟིན་གྱིས། །འདི་ལ་སུས་ཀྱང་གནོད་པ་མ་བྱེད་ཅིག །བཛྲ་རཀྵ་རཀྵ། ཞེས་མེ་ཏོག་འཐོར་བ་དང་བཅས་ལན་གསུམ་བརྗོད། སེམས་ཅན་ནད་པ་ཇི་སྙེད་པ། །མྱུར་དུ་ནད་ལས་ཐར་གྱུར་ཅིག །འགྲོ་བའི་ནད་ནི་མ་ལུས་པ། །རྟག་ཏུ་འབྱུང་བ་མེད་པར་ཤོག ཅེས་སོགས་སྨོན་ལམ་དང་བཀྲ་ཤིས་སོགས་བྱའོ། །