སེ་ར་ཕུར་མཇལ་ཞེས་པའི་ཆོས་ལུགས་མཆོད་བཀུར་གྱི་ཆོ་ག

དད་ལྡན་མང་ཚོགས་རྣམས་གྲལ་བསྒྲིགས་ཏེ་མཆོད་མཇལ་བྱེད་པ།

          ཟླ2པའི་ཚེས18དེ་ལུགས་རྙིང་གི་ཟླ12པའི་ཚེས27ཉིན་ནི་སེ་ར་དགོན་པའི་སེ་ར་ཕུར་མཇལ་གྱི་ཉིན་མོ་ཡིན་ཞིང་།  ཕྱོགས་ཡོངས་ཀྱི་དད་ལྡན་མང་ཚོགས་རྣམས་འདིར་འཛོམས་ནས་མཆོད་མཇལ་བྱེད་ལ།  རྟེན་གཙོ་རྟ་མགྲིན་ལྷ་ཁང་གི་མདུན་ར་རུ་བླ་མ་ཁྲི་ལ་བཞུགས་ཏེ་མི་དམངས་ལ་མཇལ་ཁ་གནང་། 

བླ་མས་མཇལ་ཁ་གནང་བ།

          སེ་ར་དགོན་པའི་བྱེས་གྲྭ་ཚང་དུ་ཡོད་པའི་དཔལ་ཆེན་རྡོ་རྗེ་གཞོན་ནུའི་ཕུར་པ་མཇལ་བའི་དུས་ཆེན་དེར་ཡོངས་གྲགས་སུ་སེ་ར་ཕུར་མཇལ་ཞེས་ཟེར།  བྱེས་མཁས་མང་འདུས་པའི་གྲྭ་ཚང་གི་རྟེན་གཙོ་རྟ་མགྲིན་ཡང་གསང་ཡབ་ཡུམ་དང་དཔལ་ཆེན་རྡོ་རྗེ་གཞོན་ནུའི་ཕུར་པ་འདི་གཉིས་ནི་ཀུན་མཁྱེན་བློ་གྲོས་རིན་ཆེན་སེང་གེ་གཞིས་ཀ་དཔལ་འབྱོར་ལྷུན་པོར་བཞུགས་སྐབས་ཡབ་རྟོགས་ལྡན་ཡོན་ཏན་མགོན་པོས་ཁྱེད་ཡི་དམ་འདི་དང་ཕུར་པ་འདི་མ་བྲལ་བར་གྱིས་ཞེས་ཕུལ་བར་གྲགས།
          དེའང་དང་ཐོག་ཕུར་པ་འདི་ནི་གྲུབ་ཐོབ་འདར་ཕྱར་གྱི་གཏེར་མ་བྱིན་རླབས་ཤིན་ཏུ་ཆེ་བ་ཞིག་ཡིན་པའི་སྐོར་སྔར་སློབ་དཔོན་ཆེན་པོས་བཙན་པོ་ལ་དབང་རྒྱུད་གདམས་པ་དང་བཅས་གནང་ནས་རྟ་མགྲིན་ཡང་གསང་གི་ཆོས་སྐོར་དང་ལྷན་ཅིག་ཡེར་པ་སེ་བ་ལུང་གི་བྲག་ལ་གཏེར་དུས་སྦས་པ་གྲུབ་ཐོབ་འདར་ཕྱར་བས་གཏེར་ལས་ཕྱུང་།  དེ་ནས་གཙང་དུ་བྱོན།  ས་པཎ་སྐྱིད་གྲོང་དུ་ཕེབས་པ་དང་མཇལ།  འདར་ཕྱར་ཞལ་འཆོལ་ནས་ཨོམ་བཛྲ་ཀྱི་ལི་ཀྱི་ལི་ཡ་ཞེས་གསུངས་པས་ས་པཎ་གྱིས་དེ་མ་དག་བཛྲ་ཀི་ལི་ཀི་ལི་ཡ་ཟེར་བ་ཡིན་གསུངས་པར་འདར་ཕྱར་གྱིས་སྔར་ཡང་བཛྲ་ཀྱི་ལི་ཡ། ད་ཡང་བཛྲ་ཀྱི་ལི་ཡ།  སྔགས་མ་དག་ཀྱང་འདི་བཞིན་བྱེད་པ་ཡིན་གསུངས་ནས་ས་བྲག་ལ་ཕུར་པ་བཏབ་པ་འདམ་ལ་ཟུག་པ་དང་ཁྱད་པར་མེད་པ་བྱུང་བས་ས་པཎ་གྱིས་ཁོང་གྲུབ་ཐོབ་ཏུ་མཁྱེན་ནས་ང་མུ་སྟེགས་པ་དང་རྩོད་དུ་འགྲོ་བ་ཡིན་པས་དེའི་གྲོགས་སུ་ཁྱེད་འབྱོན་དགོས་གསུངས་ཏེ་མཉམ་དུ་ཕེབས།
          ས་པཎ་དང་མུ་སྟེགས་འཕྲོག་བྱེད་དགའ་བོ་གཉིས་ཉིན་བཅུ་གསུམ་བར་རྩོད་ནས་མཐར་ས་པཎ་རྩོད་པ་ལས་རྒྱལ་ཡང་གྲུབ་རྟགས་འགྲན་ཟེར་ནས་ནམ་མཁར་འཕུར་བས་ས་པཎ་གྱིས་འདར་ཕྱར་བོས།  འདར་ཕྱར་གྱིས་ཕུར་བ་བཏབ་པས་མུ་སྟེགས་པ་བྱ་ལ་རྡོ་ཕོག་པ་བཞིན་ས་ལ་ལྷུངས་ཤིང་རིང་མིན་ལྔ་ལམ་དུ་བཏང་།  རྗེས་སུ་མུས་སྲད་དུ་བྱོན་ནས་གཙུག་ལག་ཁང་གི་རྟེན་གཙོར་ཕུར་པ་འདི་བཞག    སླར་རིམ་གྱིས་གྱར་ནས་ད་ལྟ་སེ་ར་ཕུར་མཇལ་ཞེས་ཟེར་བའི་རྒྱུན་འདི་བྱུང་བ་ཡིན་སྐོར་ཞིབ་པ་རྙིང་མ་རྒྱུད་འབུམ་གྱི་དཀར་ཆག་ཏུ་གསལ་བ་གང་ལྟར་ཕུར་པ་དེ་ཤིན་ཏུ་བྱིན་ཅན་ཞིག་ཏུ་རྩིས་ནས་ལོ་ལྟར་གོང་ཚེས་ཉིན་མཇལ་ཁ་གཏོང་བར་ཉེ་འདབས་གྲོང་གསེབ་པ་དང་ལྷ་ས་བ་མང་པོ་མཆོད་མཇལ་དུ་བསྐྱོད་སྲོལ་ཡོད་པ་དེང་སང་གི་བར་དུ་ཡང་སྲོལ་རྒྱུན་དེ་མ་ཉམས་པར་གནས་ལགས་སོ་ཞེས་གསུངས་པ་ལྟར་རོ།།