འདོད་ཡོན་རྣམ་ལྔའི་མཚོན་དོན།

              འདོད་པའི་ཡོན་ཏན་ལ་ལྔ(五妙欲)སྟེ། གཟུགས་དང་། སྒྲ། དྲི། རོ། རེག་བྱ་བཅས་སོ། མཆོད་ཡུལ་སངས་རྒྱས་བྱང་སེམས་ཀྱི་སྣང་བརྙན་སྤྱན་ངར་མེ་ལོང་དང་། པི་ཝང་། བདུག་སྤོས། ལྷ་བཤོས། དར་དཀར་བཅས་ཀྱི་ཡིད་དུ་འོང་བའི་མཆོད་རྫས་བཤམས་པ་དེས་དངོས་བཤམས་ཡིད་སྤྲུལ་གྱི་འདོད་པའི་ཡོན་ཏན་ལྔ་རུ་འདུས་པའི་མཆོད་པའི་བྱེ་བྲག་ཡོངས་རྫོགས་མཚོན་པ་ཡིན་ནོ། དེ་བཞིན་དུ་འཇིག་རྟེན་གྱི་འདོད་པའི་ཡོན་ཏན་ལྔ་མཚོན་པ་ལའང་མཚོན་སྟངས་ཁྱབ་ཆེ་སྟེ། མེ་ལོང་གིས་གཟུགས་དང་། པི་ཝང་གིས་སྒྲ། བདུག་སྤོས་ཀྱིས་དྲི། ལྷ་བཤོས་ཀྱིས་རོ། དར་དཀར་གྱིས་རེག་བྱ་བཅས་མཚོན་ནོ།